FÍB mælir með...
Orkuhringnum Íslendingar eiga heimsmet í mörgu. Í það minnsta teljum við okkur trú um það og trúlega með réttu. Við leiðum ef til vill ekki alltaf huga að því heimsmeti okkar sem blasir við á hverjum degi. Þá er auðvitað átt við raforkuframleiðslu okkar, þ.e. framleiðslu rafmagns með vatns- og jarðvarmaorku. Hún er sú langmesta sem um getur í heiminum miðað við hina frægu höfðatölu. Einnig getum við státað okkur af því að orkuframleiðsla okkar sé sú hreinasta sem um getur því að langstærsti hluti orkuframleiðslu landsins kemur frá endurnýjanlegum hreinum orkugjöfum eða yfir 99% skv. Orkustofnun. Jarðefnaeldsneytisnotkun kemst vart á blað hjá okkur þegar kemur að notkun þess til raforkuframleiðslu. Því er ekki úr vegi að leiða hugann að þessum landsins gæðum og hugsa um þau um leið og ferðast er um landið okkar bláa. FÍB hvetur landsmenn til að velta fyrir sér orkunni sem við eigum, ekki síst nú þegar innan við níu ár eru uns stórt skref verður stigið í orkuskiptum í samgöngum á landi þegar bann á innflutningi jarðeldsneytisbíla verður staðreynd og rafmagnið, heimafengin orka, verður trúlega aðalorkugjafi í samgöngum okkar og komandi kynslóða.
Hellisheiðarvirkjun Sé ekið frá höfuðborgarsvæðinu austur Hringveginn áleiðis að Hellisheiði er komið að Hellisheiðavirkjun sem Orkuveita Reykjavíkur rekur, eftir um 30 mínútna akstur. Hún er stærsta jarðvarmavirkjun á Íslandi og var ein sú stærsta í veröldinni þegar henni var hleypt af stokkunum 2006. Virkjunin framleiðir ósköpin öll af rafmagni sem hleypt er inn á dreifikerfið, í raun nógu miklu fyrir nánast allt höfuðborgarsvæðið en auk þess sér hún okkur fyrir drjúgum hluta af því heita vatni sem höfuðborgarsvæðið notar, ásamt reyndar Nesjavallavirkjun sem er hinum megin í Henglinum. Hellisheiðarvirkjun er mikið mannvirki og þangað eru gestir og gangandi boðnir velkomnir í heimsókn. Jarðhitasýningin, sem hægt er að skoða, er verulega fróðleg og sömuleiðis aðgengileg og hægt að nálgast hana með leiðsögn gegn gjaldi eða á eigin vegum. Segja má að sýningin hefjist þegar við komuna heim að virkjunarhúsinu en ekki er endilega víst að því sé veitt eftirtekt. Hönnun framhliðar hússins er með þeim hætti að sá hluti virkjanahússins sem blasir við hefur skírskotun til flekaskilanna sem eru alfa og ómega í jarðfræði Íslands og einnig þess hvernig jarðlagastaflarnir, sem hlaðist hafa upp í gegnum milljónir ára, halla inn að skilunum.
Hellisheiðarvirkjun er staðsett sunnan við Hengil og framleiðir heitt vatn og rafmagn. Virkjunin var gangsett árið 2006 og er uppsett afl 200 MW í varmaafli og 303 MW í rafmagni. Í magni talið eru þetta um 950 lítrar á sekúndu. Allt umfram jarðhitavatnið rennur að jafnaði í niðurrennsliskerfi niður fyrir grunnvatnskerfi í jarðhitageyminn. Lofthreinsistöð er staðsett við virkjunina og nýtir hún Carbfix–aðferðina til að hreinsa um 75% af brennisteinsvetni og um 30% af koltvísýringi sem leyst eru upp í jarðhitavatni og veitt í niðurrennsliskerfi. Heimild ON.is 22
FÍB-blaðið
