LJÓÐSASAMKEPPNI GRUNNSKÓLA KÓPAVOGS
Markmiðið að efla áhuga barna og ungmenna á ljóðagerð
SAMKEPPNI
LJÓÐSTAFUR JÓNS ÚR VÖR Englabróðir Stóri bróðir ég sakna þín. Eitt það sem ég þrái heitast er bara að sjá þig, bara einu sinni alla vega. En ég veit að þú ert alltaf hjá mér og gætir mín í gegnum skýin. Nú værir þú tólf ára, tveimur árum eldri en ég. Þú myndir gæta mín samt, þótt við hefðum fengið að vera hér samtímis. En nú gerir þú það í gegnum skýin. Það er skrítin tilfinning að sakna þín án þess að hafa hitt þig. Mér finnst ég hafa hitt þig í gegnum minningar þeirra sem þekktu þig best og við elskum báðir. Þú hést Rafn, ég heiti Rafnar því ég gæti krummans þíns.
Kári Rafnar Eyjólfsson sigraði grunnskólakeppnina árið 2021 með ljóðinu Englabróðir.
Jón úr Vör var einn af frumbýlingum Kópavogs. Hann var ljóðskáld og orðsins listamaður sem gaf út sína fyrstu ljóðabók árið 1937, aðeins tvítugur að aldri, en varð fljótt eitt af höfuðljóðskáldum landsins. Jón var heiðursfélagi Rithöfundasambands Íslands, hlaut Riddarakross Hinnar íslensku fálkaorðu og þáði heiðurslaun listamanna frá árinu 1986. Jón sagði að bókasöfn hefðu verið hans helsti skóli. Hann var því hvatamaður að stofnun lestrarfélags og bókasafns í sinni heimabyggð á Patreksfirði og þegar hann flutti í Kópavog stóð hann að stofnun Lestrarfélags Kópavogshrepps sem síðar varð Bókasafn Kópavogs. Hann var því frumkvöðull að stofnun Bókasafns Kópavogs og fyrsti forstöðumaður þess 1953 til 1977. Lista- og menningarráð Kópavogs hefur frá árinu 2002 staðið að árlegum ljóðaverðlaunum i minningu skáldsins Jóns úr Vör. Veitt eru peningaverðlaun og verðlaunaskáldið fær til varðveislu í eitt ár göngustaf, sem var í eigu Jóns. Ljóðstafurinn hefur verið afhentur nær óslitið frá 2002 og frá árinu 2012 hefur Ljóðasamkeppni grunnskóla Kópavogs verið haldin samhliða Ljóðstafnum. Markmiðið með grunnskólakeppninni er að efla áhuga barna og ungmenna á ljóðagerð. Öll grunnskólabörn í Kópavogi geta tekið þátt.
Lista- og menningarráð Kópavogsbæjar efnir til samkeppni um Ljóðstaf Jóns úr Vör. Öllum skáldum er velkomið að taka þátt en ljóðið má ekki hafa birst áður. Ljóði skal skilað í fjórum eintökum og skal hvert eintak merkt dulnefni. Með fjórritinu skal fylgja eitt lokað umslag merkt dulnefni skáldsins sem inniheldur upplýsingar um nafn, símanúmer og netfang skáldsins. Einungis umslög sem tilheyra vinnings- og viðurkenningarljóðum verða opnuð en öllum öðrum gögnum eytt. Ljóðstafurinn verður afhentur ásamt viðurkenningum föstudaginn 21. janúar 2022 við hátíðlega athöfn í Salnum en þá verða liðin 20 ár síðan Ljóðstafurinn var fyrst veittur. Nánari upplýsingar: menning@kopavogur.is
SKILAFRESTUR Í KEPPNINA ER TIL OG MEÐ 5. NÓVEMBER 2021. Utanáskrift umslags er: Ljóðstafur Jóns úr Vör Menning í Kópavogi Digranesvegi 1 200 Kópavogi
