Ky është botimi mbi projektin "Kursim apo investim - Kur është koha!?”, si stacioni i katërt i programit studentor “Edukimi ekonomik dhe financiar i publikut”, organizuar ABC Tirana Club në periudhën mars - korrik 2022. Projekti u mbështet nga Raiffeisen INVEST dhe në bashkëpunim me Fakultetin e Ekonomisë në Universitetin e Tiranës. Qëllimet kryesore ishin:
-PREZANTIMI në publik i treguesve të pavarur mbi vlerësimet dhe perceptimet e qytetarëve rreth efektivitetit të kursimeve apo qasjen e tyre për kreditimin; NDIKIMI përmes fushatës së informimit dhe ndërgjegjësimit, sidomos te të rinjtë, për njohjen dhe familjarizimin me konceptet bazike dhe instrumentet për depozitat e kursimit, si dhe qasjen drejt kreditimit bankar; NXITJE e institucioneve publike, sidomos Ministrisë së Arsimit dhe agjencive vartëse të saj, por dhe institucioneve të tjera publike dhe private, përfshi dhe rrjetin bankar, që edukimi ekonomik dhe financiar të jetë pjesë e kurrikulave në programet mësimore, që në nivelin e arsimit bazë etj.
