Lungiarü Cor de dlijia N ann particolar podunse aratè l’ann 2008. Dô le bel ćiantè di Trëi Resc fora por les vijinanzes, à tosc le cor scomencè cun les proes tignin imënt le travert de chësc ann: 100 agn de ativité. Plü co zënza é i ćiantadus jüs lezitënć ales proes, inće sce al n’é gnü tignì deplü co ti agn passà. Aria da festa podônse sintì te döta l’ativité, n cêr se confortè y laprò n gran impëgn y tröp entusiasm por la cossa. Le cor de dlijia da Lungiarü é stè da d’aldí pro la mëssa ćiantada sö Oies ai 28 de jenà en onur dl Sant da Oies, pro la mëssa dl ann de siur Fonjo Clara ćiantada a Calfosch, pro la mëssa da noza dla ćiantarina Martha Clara, y sambëgn pro les gran festes de dlijia y la festa di iubilars. Pro les scomenciadies de intratenimënt recordunse cun ligrëza le batadù tignì ai pröms de forà, olach’al é stè pesć por vigni pêr. Le pröm pest é jü a
Gaby y Vinzenz. De messè él gnü invié i ćiantadus cun les families ala griliada sö dal morin dl Iagher, olach’al n’é garatè de vigni sort. En ocajiun dl compliann de 40 agn dl presidënt Sepl y de 60 agn dl orghelist Pio él gnü invié da luvè dër a bun’ora por che le dé foss dër lunch y tëmp assà da festejé. L’avenimënt plü gran é spo stè ai 8 de novëmber: le conzert en ocajiun dla festa de 100 agn dl cor. Deboriada cun le cor de dlijia d’Al Plan, sot ala bachëta de Irene Clara, y cun le cor de dlijia da La Val, sot ala direziun de Elio Clara, él gnü portè dant te na dlijia plëna de jënt n bel repertore de ćianties y musiga. Ai 16 de novëmber él spo gnü festejé la gran festa, adöm cun la comunité olache le cor à ćiantè la mëssa y pater Urban Stillhard ti à surandè la medaia de Palestrina. Por l’ocajiun él inće gnü dè fora n liber sura le cor de dlijia te sü 100 agn de ativité. Ai 28 de novëmber él gnü tignì la sentada generala dla uniun. En chësta ocajiun él gnü surandè les onoranzes por i 25 agn de bel ćiantè a Vinzenz Clara, Monica Clara Mischì y Maria Clara Sorà y lité le comité nü. En la festa de Santa Lizia él gnü organisé le marcé a sostëgn dl cor che é jü dër bun por la buna man dla jënt dl post. Sciöche contlujiun dl ann 2008 él gnü invié i ćiantadus a na picia festa d’Advënt, olach’al ti é gnü surandè ai mëmbri, sciöche rengraziamënt, na stëra da Nadè.
Vinzenz y Gaby é stà i mius da cartè.
336