Eine richtige Steindenaer, Philomène Paulissen Philomène is gebaore es Sajelaer. Ze greujde op in Aelse woo ze de vastelaovend ljaerde viere. Es keinjd deeg ze al mit aan de optoch. Jaore later, mit eine kirremès in Aelse, kaom èns eine groep jông mansluuj oet Stein ôm te fjèste nao Aelse. Philomène ljaerde doe Sjaak Paulissen kènne en de vônk sprông mitein euver. Naodat ze mit ein getrouwd zeen, ginge ze in Stein wonen. De iëste 9 jaor in Nieuwdorp en toen naar hun eigen hoes aan de Noelweg. Philomène waor al ummer aktief in ‘t soosjaal laeve. Ze deeg hènjdwirke veur de kirk, ze waor lid van ‘t zangkwoar, lid van buurtvereiniging ‘Achter de Hegge’, lid van vrouwenvereiniging Nieuwdorp en dao deeg ze auch nog jaore mit aan ‘t toneel en woore d’r jaore veurstèllinge gegaeve bie de Steinder Revuu. In 1977 woore in Stein ein aantal aksies op touw gezat ôm geldj bie-ein te kriege veur ein persooneböske veur de Moutheuvel. Dao deege mjae vereinigingen in Stein aan mit. Ein paar vrouwluuj woor gevraogd ôm bie de braderie in Stein, gekleid in auw Steinder kleijerdrach, te kollekteere. Dat waor ein sukses. Wie ’t böske geprizzenteerd woor, moedigde de toenmalige Burgemeister de vrouwluuj aan ôm mit dees gelegenheidsgroep door te gaon. 25 Vrouwluuj begooste toen de folkloregroep “de Bèsjen”
van Stein. Inmiddels is de groep ein begrip in Stein. Ze waore jaorelangk deilnummer in de Steinder Revuu mit zang en dans. Wae hereinjert zich nog de braderie woo “de Bèsjen” de luuj leete raoje nao de naam van ein pôp. Daegene dae de gooj Steinder naam wis te raoje wôn eine sjwoane pries. En es ste in Stein eemes zeukst dae dich wèt te vertèlle wie ste eine “Kroedwusj” moos maake, gank dan maer nao ein van “de Bèsjen”! Es weer Philomène vraoge nao ein leuke anekdote die eigelijk in de Bèsj haej moote staon, koome d‘r väöl verhaole oppe taofel. De Bèsjen waore èns oetgenweddigd deil te numme aan ‘t defilé op Keuninginnedag. Op waeg nao Soestdijk mit een Bèsje-pôp en 5 appelekauwevlaaien waore ze nao lang wachte eindelik aan de bäört. Wie Prins Bernard de vrouwluuj mit de vlaaie zaog aankoome, reikde hae al mit zien hènj en zag; “Oh, heerlijke vlaaien uit Limburg”. Tina Claessen gaof de Prins dirèk es enjtwoord; “ dees vlaaien zeen neet veur uch, maer veur de 5 Prinsessen!’ en ze leep straol langs de Prins door en goaf aan eeder Prinses ein vlaai. Ein anger anekdote waor nao ‘ne aovend stappen. “De Bèsjen” gingen heives, maer wie ze bie ’t hoes van Tina Claessen aankaome, kaom Tina d’rachter dat ze de hoessleutel vergaete waor. Doe woor mit keezelsteinkes taege de slaopkamervinster gegwoajd ôm Pie, dae laog te slaope, wakker te kriege. Maer Pie waor in eine deepe slaop en woor van het getik van de steinkes neet wakker. Tina waor ‘t zat en deeg häöre Bèsje-rok oet. In de lang ôngerbrook klôm ze soepel langs de raegepiep omhwoag nao ‘t platdaak. Noe koos ze oppe vinster bônken. Pie woor wakker en zaog zien vrouw aan de vinster staon, wie ‘r de gordien houw weggesjaove. “Maak mich de roet aope Pie, ich bèn de sleutel vergaete” reep Tina. Maer Pie, nog in eine roes, kreeg ‘t neet allemaol tegooj mit. Dae leep nao ônger, deeg de veurdeur aope en ging doe weer trök nao bèd en leet Tina achter de vinster boete staon. Tina koos doe de waeg via de raegepiep nog èns maake, maer dan noe weer trök nao ônger. Philomène kan d’r noe nog ôm lache. Aafgeloupe jaor vierden “de Bèsjen” van Stein hun 40-jaorig jubieleejum. In MFC de Grous waor ein fjèstelikke recepsie gehouwe. Väöl vereiniginge kaome de dames feliciteere. Auch hjel väöl bewoners van de Moutheuvel waore de straot euvergestaoke ôm hun felicitasies euver te draage. Grwuètsj kieke “de Bèsjen” trök op hun jubieleejum. Weer stèlde aan Philomène, al 40 jaor lid en Bèsj van ‘t Jaor, de lètste vraog; “Wat is veur uch ein Bèsj?” Häör dirèkte enjtwoord: “Ein Bèsj is ein kontente vrouw.”
Philomène, wie eederein van Stein häör kènt.
Dus.....zouwe d’r nog dames in ’t Bokkeriek zeen die gaer ‘t geveul van ein kontente vrouw zouwe wille belaeve, meld uch dan gerös aan bie “de Bèsjen” van Stein. 35