Fornbílaklúbburinn 45 ára

Fornbílaklúbbur Íslands

45 ára afmæli og nýtt félagsheimili

Fornbílaklúbbur Íslands fagnaði nýlega 45 ára afmæli sínu og við það tækifæri var nýtt félagsheimili klúbbsins formlega opnað að Ögurhvarfi 2 í Kópavogi. Klúbburinn var stofnaður 19. maí 1977. Félagsmenn fjölmenntu á afmælishófið og fögnuðu þessum tímamótum í sögu klúbbsins.

Markmið klúbbsins er að efla samheldni með áhugamönnum og eigendum gamalla bíla og gæta hagsmuna þeirra í hvívetna. Jafnframt vinnur Fornbílaklúbburinn að því að auka áhuga almennings fyrir gömlum bílum og glæða skilning á varðveislu þeirra og minjagildi.

Allt frá stofnum Fornbílaklúbbsins árið 1977 hefur hann náð umtalsverðum árangri í hagsmunagæslu fornbílaeigenda. Nefna má niðurfellingu bifreiðagjalda og stórlækkun aðflutnings- og tryggingariðgjalda, auk þess sem fornbílar mega nú bera eldri gerðir skráningarmerkja. Þessi árangur er afrakstur ötuls starfs við að vekja skilning stjórnvalda á varðveislugildi gamalla bíla. Fornbílaklúbburinn stuðlar að persónulegum kynnum eigenda fornbíla á Íslandi og hvetur félagsmenn til samvinnu um áhugamál sín, þannig að þeir geti miðlað hverjir öðrum af reynslu sinni og kunnáttu í meðferð og varðveislu gamalla bíla.

Pláss fyrir um 100 manns í sæti, og skrifstofu- og veitingaaðstaða.

Bílar eru hluti af menningunni, samfélaginu og litskrúðuðu mannlífi

„Eftir svona svolítið brölt í gegnum árin erum við komnir í þetta fína húsnæði inn í Ögurhvarfi. Þetta er mikið stökk því að við vorum áður í húsnæði sem hentaði engan veginn fyrir bílaklúbb. Flutningurinn var því algjör straumhvörf í starfseminni. Markmið okkar er að rífa upp félagsstarfið yfir vetrarmánuðina. Sumarið er samt ágætis tími á margan hátt en að sama skapi eru margir í fríum og annað slíkt. Við stefnum hins vegar á mesta starfið á veturna í nýja húsnæðinu með fyrirlestrum og kynningum sem tengjast bílum og þessu áhugamáli,“ sagði Bjarni Þorgilsson, formaður Fornbílalúbbs Íslands, í samtali við FÍB-blaðið. Bjarni hefur gengt formenskunni í þrjú ár.

Bjarni sagði að um 1200 manns væru í þessum félagsskap. Honum sýndist vera að byrja að yngjast í hópnum og það sé alveg greinilegt að áhuginn sé mikill almennt.

Samkeppni um tíma fólks væri orðin gríðarlegur

Inntur eftir helstum breytingum í starfseminni í gegnum tíðina sagði Bjarni að þær væru eins og hjá mörgum öðrum að fá fólk til að mæta og nýta þá starfsemi sem í boði væri. Samkeppni um tíma fólks væri orðin gríðarlega mikil í dag en tölvan og sjónvarpið væru farin að éta ótrúlegan tíma frá fólki. Bjarni sagði það vissa áskorun að hafa ávallt í boði áhugaverða og skemmtilega dagskrá. Þetta snýst um að drífa sig út og hitta fólk því að maður er manns gaman.

„Þegar við vorum í gamla félagsheimilinu mættu oft 100 manns á áhugaverðar kynningar. Ef þær tengjast bílum með einhverjum hætti er fólk duglegt að koma. Áhugafólkið er í þessu fyrir félagsskapinn fyrst og fremst. Covid-faraldurinn lék okkur ansi grátt en við vorum meira og minna með lokað þegar faraldurinn stóð sem hæst. Hópurinn sem var í mestri áhættu voru eldri borgarar og við vildum svo sannarlega ekki vera með samkomur af þeim sökum. Við lentum einnig í hremmingum í hruninu og vorum þá að byggja húsnæði í Elliðaárdalnum sem fór svolítið illa með okkur fjárhagslega. Við sluppum fyrir horn þar og þess vegna var keypt félagsheimili í Hlíðarsmára. Í hruninu vissi enginn hvað morgundaginn bar í skauti sér en klúbburinn gat ávaxtað pundið sitt í því húsnæði. Klúbburinn á því þetta nýja félagsheimili í Ögurhvarfi svo gott sem skuldlaust. Að eiga eigið húsnæði er lykilatriði svo að klúbburinn geti þrifist og þurfi ekki að hafa áhyggjur að því að eitthvað fasteignafélag fleygi því á götuna. Við sjáum fram á bjarta tíma og ég er viss um að nýja félagsheimilið verði klúbbnum til framdráttar.

Klúbburinn búinn að sanna gildi sitt

Bjarni sagði að klúbburinn væri búinn að sanna gildi sitt og vettvangur af þessu tagi væri bráðnauðsynlegur bílaáhugafólki. Klúbburinn hefði alltaf verið góður málsvari félagsmanna og í vor sem leið var haldinn góður fundur með Sigurði Inga Jóhannssyni innviðaráðherra. Þar fylgdum við eftir að ekki yrði farið út í öfgakenndar aðgerðir gegn gömlum bílum.

Í stóra samhenginu er mengun frá þessum gömlu bílum ekki mikil

„Eitt að því sem bílaeigendur finna fyrir er að bílar séu eiturspúandi stórhættuleg tæki. Í stóra samhenginu er mengun frá þessum gömlu bílum ekki mikil því að þeir eru notaðir alveg fáránlega lítið, varla meira en örfáar vikur yfir sumartímann. Á fundi með ráðherra mættum við skilningi en ég held að allir skilji að svona farartæki þurfi að vera til. Við heyrum alveg tóninn í dag, bílar eru hættulegir og mengandi. Þeir sem vilja ekki sjá þetta og kenna gömlum bílum um mengun vilja þó fá gömlu bílana í brúðkaup, útskrift og aðra stórviðburði. Bílar eru hluti af menningunni, samfélaginu og litskrúðuðu mannlífi á sumrin,“ sagði Bjarni Þorgilsson í samtalinu við FÍB-blaðið.

Plymouth, árgerð 1947

Buick, árgerð 1970

Rover 100, árgerð 1961