VEREINE / KIRCHE
Vom Tischlein deck dich U vom ächte Riichtum Da isch dä Vater, däm si Geiss wichtiger isch als siner drü Söhn. Jede wird ungrächt behandlet u verjagt. U jede findt e Lehrmeischter, lehrt e Bruef u verdient sich e Lohn. Aber zHeiweh bliebt. Zwe vo drü Söhn verliere wieder, was sie verdient hei. Sie wärde ustrickst u merkes zersch gar nid. Wo sie ändlech wieder daheim si, schwärme sie vo ihrne Errungeschafte. Leider funktioniert das Tischli nid u der Goldesel laht statt Gold nur verdouti Nahrig ufe Bode gheie. Aber der Vater het zum Glück scho tschegget, dass ihm dSöhn ud Versöhnig wichtiger si als alles, wo sie chönnte mitbringe. U de chunnt der Jüngscht u bringt alles mit, wo gstohle isch worde. Är, wo als Lohn nur e Chnüppel ime Sack het übercho. Wär het nid scho mal vome Tischlein deck dich oder vome Goldesel tröimt. U mänge vielech ou vome Chnüppel im Sack, wo üs Grächtigkeit verschafft. Aber was, wes das tatsächlich git? Vielech nid genau so, wie im Märli, aber no viel besser? Es tönt ungloublech, isch aber für vieli Mönsche scho Realität. Vielech si mir ire Situation wie die drü Söhn, u erläbe Ungrächtigkeit, Verluscht, Depression u anders. Muet ud Chraft si groubt. Oder mir si meh wie der Vater, wo üs Sache, Gschäft usw. wichtiger si gsi als Beziehige. Egal, a welem Punkt im Läbe mir grad stöh: Es git Hoffnig! Es git Oschtere. D Entscheidig ligt bi üs: Türme mir dür das, was mir erläbt oder ta hei geng höcheri Muure um üsers Härz uf oder öffne mir üsi Härzenstür u mache Platz am Tisch vo üsem Läbe für dä, wo scho lang uf üs wartet? Lade mir Jesus Christus i, dass er üse Läbestisch nöi ideckt? Mit Friede, Rueh, Glasseheit u Gwüssheit uf Versorgig. Mir wärde entdecke, dass siner Gabe unändlech viel meh wärt hei als jedes Tischlein deck dich, viel Gold oder Grächtigkeit vo dere Wält. Das, wo üse Schöpfer üs mit Oschtere abietet u wott schänke, das cha üs niemer niemeh nä! Wage mirs u sueche a Oschtere nid nur Näschtli u Eier, sondern ou ganz nöi das Wunderbare, wo Oschtere würklech für üs parat het: Gwüssheit, das üsers Läbe unändlech wärtvoll u ke Zuefall isch, dass üsseri Umständ nüm lenger e Ifluss müesse ha drüber, dass mir üs gliebt, sicher u agnoh füehle u töife Friede u geng weniger Angscht i üs hei. Was fürne grossartegi Gägewart u Zuekunft wird üs da abote! Auf die Suche, fertig, los!
Daniela Francioli-von Allmen
www.pfimi-interlaken.ch
April 2022 | Bödeli- / BrienzInfo
49
