Vom Engeli Zuusli Es isch emol en chlinne Engel gse, dä isch met villne andere Engel im Himmel obe deheem gse. Die Engeli hönd zäme gsunge, musiziert ond e fröölechs Lebe kaa. Vor Freud hönd s mengmol au Pörzelbömm gmacht of de weiche Wolkedeckene. Ganz gsittet isch es dibii zue ond her gange, denn die Engeli hönd erni schöne Flögeli nüd wele vebonggele ond erni Kleidli nüd wele dreckig mache. Enzig de Zuusli isch e n Uusnam gse. Sis Hoor isch nüd gschträäled worde, d Fingernegel hönd schwarzi Rändli kaa ond siis Chleid öberal Flecke ond Löcher. Wäsche hät er sich scho gad gäär nüd wele. S Wasser schtinki noch Schtaub, hät er phopted. Will er all eso vezuuslet gse isch, hät mer em no de Zuusli gsääd. Wenn de Erzengel Gabriel de Zuusli hät möse wäge näbes zrechtwiise oder e Machtwort schpreche, hät er en mit sim richtige Namme gruefe: Angelino Angeletto. Es isch of d Wienacht zuegange. Alli Engeli sönd of de Obed em Punkt fööfi in grosse Himmelssaal iiglade gse. E Schtond früener als sös. Dei isch jede Tag vor em Nachtesse e ganzi Schtond lang Engelsgsang güebt worde. Das hät amel eso herrlech tönt, dass dene, wo zueglosed hönd, s Herz vor Freud aa gfange hät hüpfe. Hüt aber sönd alli Engeli im Kreis zäme gsässe ond hönd gschpannt drof gwaartet, wa de oberscht vo de Engel, de Erzengel Gabriel, ene hät wele säge.
9