Badia L’ann d’ativité dla Müjiga de Badia é gnü stlüt jö da d’altonn cun la partezipaziun ala Segra de Badia, ala festa dles musighes dla Val Badia tignida a San Martin y al Rait de San Linert. Le Cor de dlijia Tl 2011 é le Cor de dlijia stè dër impegné y atif tla vita liturgica y comunitara dl paîsc de Badia, n paîsc caraterisé dal’esistënza de tröc grups musicai, mo olache le Cor de dlijia mantëgn inant süa funziun primara tla vita de paîsc. Süa presënza é gnüda damanada gonot y dagnora à la uniun tut pert, desmostran lezitënza, impëgn y idealism ti bi y sintis momënć dla vita dla cöra de Badia. Cun le bel ćiantè à le Cor abelì les tröpes festes de dlijia, les sopoltöres y dötes les atres funziuns liturgiches. Al s’à abiné trö’ plü gonot en confrunt al’ann da denant, inće deache la cöra de Badia à messü tó comié da siur Franz Sottara y à spo tut ite le degan nü siur Iaco Willeit. Por le
Cor à chësc mudamënt inće orü dì tó comié dala ćiantarina Maria Tasser, che é jüda a stè a La Val por acompagné siur Franz Sottara che é śëgn curat ailò. Ala fin dl’ann compedâ la uniun incër 130 incuntades, danter festes liturgiches, sopoltöres, sentades, proes (indöt 51) y d’atres manifestaziuns de carater recreatif. Tröc iadi s’à inće abiné le comité dl cor che se crüzia de mëte a jì la festa por le iubileum di 275 agn de vita dl cor, che gnarà tignida de jügn dl 2012. Por mantignì tres vi le spirit dla uniun y stè n pü’ en compagnia él inće gnü organisé de plü ativitês tl tëmp lëde. Val’ mëmber dl cor à por ejëmpl tut pert ala gara de schi metüda a jì dal „Sängerbund” a Braies. Al é spo gnü fat na jita cun la liösa sö Saraghes y d’otober él gnü metü a jì la jita anuala dl cor a Borghetto söl Mincio, n paîsc interessant sides dal punt d’odüda storich co culinar, y spo al Lêch de Garda. I mëmbri dl Cor à inće albü ligrëza da tó pert ala noza dla ćiantarina Agnes Daprè che s’à maridé de mà cun Roberto Masarei da Col.
Le Cor de dlijia cun siur degan Iaco Willeit y les döes ćiantarines che é gnüdes onorades, Maria Tasser (amc.) y la dirighënta Cristina Pitscheider, cun l’onoranza che ares à podü pié do.
238