La Ila sort por imparé a lauré cun mascinns y massaries de socurs. Dër gonot van inće fora por les vijinanzes dl paîsc, olache al é dagnora da ciafè ogeć che s’adatëia ala eserzitaziun, insciö por ejëmpl val’ infrastrotöres che comporta plü prigo respet a d’atres. Vigni ann vëgnel conzedü la poscibilité da se eserzité pro la Lignacalor, la sënta de scialdamënt. Ideal é chësc post de proa dantadöt por le grup che laôra cun les mascheres de respiraziun. Te plü auti él n gröm de atrezatöres che vigni om di stödafüch messass savëi da d’adorè. Porchël él inće important che al vëgnes mindićé indô recordè y renfreschè le savëi de sciöche les massaries y i inijns funzionëia y dai anüzé. Por odëi sce düć sà bëgn ći che al é ti auti, él gnü metü a jì na sort de quiz: aladô dl intervënt che gno comanè, ne messâ i omi di stödafüch nia ma jì a tó le dër material, mo inće savëi dal adorè. Tres plü gonot ćiàron da ciafè confidënza cun litres y cordes, tl caje che al foss da portè socurs te n post, olache ara ne và nia da rové pormez cun l’auto dala litra. En chësc ann él indô gnü organisé n curs de pröm aiüt portè dant da n valgügn colaboradus dla Crusc Blanćia. Fora por l’aisciöda à la Uniun di Stödafüch da La Ila fistidié da mëte a jì la proa generala por düć i stödafüch dl raiun Alta Badia. Cun döes condütes él gnü pumpè l’ega da rü sö. Spo él inće gnü simulé la chirida de porsones da pert de chi che va cun les mascheres de respiraziun. Ala gran proa à tut pert inće la Crusc Blanćia. Ai 10 de setëmber él gnü fat na eserzitaziun adöm ai stödafüch da San Ćiascian pormez ala ütia da munt Bioch. Deplü omi dl’uniun à tut pert a cursc metüs a jì tla scora di stödafüch a Vilpian.
Le grup jonil.
Le curs de basa é gnü frecuentè da Andy Frenademez y da Andy Pizzinini; le curs por mascinns é gnü frecuentè da Armin Bernardi, Theo Debon, Florian Frenademetz y da Heino Valentini. Le cursc por jì cun les mascheres de respiraziun é gnü frecuentè da Alessandro Bonfanti, Aaron Frenademez, Daniel Stampfer y da Simon Granruaz; Simon Granruaz à inće tut pert ala preparaziun por verdajogn, tratan che Stefan Fistill à tut pert al curs por adorè l’explosimeter. I verdajogn Roman Bernardi y Simon Granruaz à albü n gran laûr da insigné jö le grup jonil fora por döt l’ann. Indöt él gnü metü a jì 25 proes che é gnüdes fates tla zona Ninz o te magazinn, canche al ê burt tëmp. Danter l’ater él gnü porvè da fà grops, da saltè la stafëta y da fà eserzizi cun impedimënc. Ai 29 de mà à le grup jonil tut pert al Vorbereitungswettbewerb a Niederolang, arjunjan n bun resultat: 7. post tla categoria de brom y 11. post tla categoria d’arjënt. Ai 25 y 26 de jügn à l’uniun tut pert al Leistungswettbewerb a Teis. Inće chilò éra jüda valgamia bun: 10. post tla 127