Minningarorð um
Einar Jónsson
†
félagsmann í Ungmennafélagi Selfoss Einar Jónsson fæddist 28. janúar 1958. Hann lést 1. ágúst 2020 og var jarðsunginn 7. ágúst.
Árið 2020 kvaddi Ungmennafélag Selfoss einn af sínum sterkustu félagsmönnum. Einar Jónsson var leikmaður Selfoss um langt árabil, fyrirliði, þjálfari, stjórnarmaður og leiðtogi innan vallar sem utan. Knattspyrnuferill Einars á Selfossi var glæsilegur. Hann er leikjahæsti leikmaður Selfoss frá upphafi með 386 leiki. Ferill Einars sem leikmaður hófst 1974 og spilaði hann sinn síðasta leik fyrir Selfoss 1994. Sem þjálfari stýrði hann meistaraflokki karla fyrst árið 1992 til bráðabirgða en síðan frá 1995 til 1997 og aftur frá miðju sumri 1998 út tímabilið 1999. Einar tók í fjórða sinn við liðinu árið 2006 og stýrði fram á mitt sumar 2007. Hann var einnig þjálfari meistaraflokks kvenna árið 1998, auk þess að hafa þjálfað fjölda yngri flokka. Einar sat í stjórn knattspyrnudeildarinnar frá 1993 til 1996. Einar var andlit félagsins út á við, drífandi í starfinu og mikill leiðtogi. Á erfiðum tímum í rekstri félagsins stóð hann í stafni með leikmönnum og lagði allt í sölurnar fyrir félagið, steypti gangstéttir um bæinn, hellulagði stíga við Geysi og teiknaði og byggði fyrstu áhorfendastúkuna við völlinn árið 1993, sem oft hefur verið nefnd Einarsstúka, auk þess að miðla af reynslu sinni til allra og gefa góð ráð.
Einar Jónsson í leik Selfoss gegn Víði 1990. Ljósmynd: Eiríkur Jónsson. Í umsögn knattspyrnudeildar þegar Einar var valinn afreksmaður deildarinnar árið 1980 eru orð sem lýsa honum jafn vel 40 árum seinna. „Einar Jónsson var valinn afreksmaður deildarinnar fyrir framúrskarandi dugnað. Árangur liðsins má þakka honum meðal annars þar sem hann var driffjöður liðsins, ávallt hvetjandi sína menn til dáða. Einar er ekki aðeins góður íþróttamaður heldur einnig afbragðs félagsmálamaður, hefur starfað mikið að unglingamálum deildarinnar, þjálfað og verið virkur í starfi. Hann hefur ávallt verið í röð fremstu knattspyrnumanna á Selfossi.“
Einar vann mjög óeigingjarnt starf fyrir Selfoss. Við munum minnast hans um ókomna tíð fyrir störf hans, bæði sem leikmanns og félagsmanns. Við kveðjum þennan öfluga liðsmann okkar með auðmýkt og djúpu þakklæti. Blessuð sé minning okkar góða félaga, Einars Jónssonar.
F.h. knattspyrnudeildar Umf. Selfoss Jón Steindór Sveinsson, formaður
Minningarorð um
steindór sverrisson
†
félagsmann í Ungmennafélagi Selfoss
Steindór Sverrisson fæddist 8. júní 1959. Hann lést 7. janúar 2020. Útför Steindórs fór fram 15. janúar.
Félagi okkar, Steindór Sverrisson féll frá snemma árs 2020, langt um aldur fram. Hverju samfélagi sem og frjálsum félagasamtökum er lífsnauðsyn að eiga öfluga stuðningsmenn og bakhjarla sem standa vaktina og eru tilbúnir til að svara kalli um aðstoð þegar það kemur. Þetta eru liðsmennirnir sem halda þessum samtökum gangandi. Þannig liðsmann átti knattspyrnudeild Umf. Selfoss einmitt í Steindóri sem alltaf svaraði kallinu, stóð vaktina í miðasölu, flaggaði í bænum á leikdegi, eldaði ofan í leikmenn og gestalið eftir heimaleiki og svo mætti áfram telja. Steindór var sjálfur iðkandi hjá knattspyrnudeildinni á yngri árum, kappsamur og ákveðinn eins og ávallt þegar kom
Steindór Sverrisson. að íþróttinni hjá honum. Í seinni tíð stóð hann vaktina sem foreldri á hliðarlínunni og sjálfboðaliði, ávallt hvatvís og jákvæður. Steindór var kraftmikill og glaðlyndur félagi. Hann hafði mikla ástríðu fyrir fótboltanum, tók fullan þátt í gleðistundum þegar vel gekk, nú síðast sumarið 2019 er fyrsti stóri titill deildarinnar vannst, bikarmeistaratitill kvenna. Enda var hann gallharður
Selfyssingur og vildi sjá liði sínu ganga sem best. Hann mætti á nánast alla leiki og studdi við bakið á liðinu í blíðu og stríðu. Steindór var heldur ekki feiminn við að segja sína skoðun og það var gaman að ræða við hann um fótbolta. Hann var duglegur að hrósa því sem vel var gert en líka gagnrýninn ef honum þótti ástæða til. Hann hafði líka efni á því, var kröfuharður á sitt lið en ekki síður á sjálfan sig. Það var hverjum manni ljóst er þekktu hann og fylgdust með harðvítugri baráttu hans um árabil við hinn illvíga sjúkdóm sem felldi hann að lokum. Við kveðjum þennan öfluga liðsmann okkar af auðmýkt og með djúpu þakklæti. Blessuð sé minningin um okkar góða félaga Steindórs Sverrisson.
F.h. knattspyrnudeildar Umf. Selfoss Jón Steindór Sveinsson, formaður
BRAGI ársrit Ungmennafélags Selfoss
75
