deild
sund
Starfsárið 2020
S
íðasti aðalfundur var haldinn 24. febrúar 2020, fyrir rúmu ári síðan. Þá höfðu í nokkra daga á undan verið í fréttum frásagnir af alvarlegri veiru nokkurri langt í útlöndum. Ekki óraði nokkurn mann þá fyrir því hvað þessi veira gæti gert mikinn usla fyrir íþróttastarf og þjóðlíf almennt hér á Íslandi. Smátt og smátt breyttust fréttirnar þannig að þessi veira var greinilega mjög hættuleg og virtist breiðast hratt út í sumum löndum. Fjórum dögum eftir þennan aðalfund greindist fyrsta smitið á Íslandi. Enn voru menn bjartsýnir á að við á hjara veraldar myndum sleppa sæmilega vel við veiruna sem fékk nafnið Covid-19, en annað kom á daginn. Veiran náði að dreifa sér um allt land og smám saman voru settar takmarkanir á starfsemi íþróttafélaga. Þann 15. mars voru sundæfingar bannaðar og átti að endurskoða það 23. mars. Við vitum það öll að þarna komu óvænt erfiðir tímar sem enginn gat trúað að gætu hvolfst yfir okkur hér á Íslandi og um heim allan. Með samstilltu átaki þjóðarinnar sem leidd var af þríeykinu góða náðist að koma veirunni niður. Það var mikil sigurstund þegar enginn greindist með veiruna nokkra daga í röð og allt opnaðist aftur. Sundæfingar hófust aftur 4. maí. Miðað við hvernig ástandið varð seinna á árinu verður maður undrandi að sunddeildin var með dósasöfnun um miðjan maí og aldursflokkamót HSK var haldið í Þorlákshöfn í lok maí. Vorhátið koparhóps var 3. júní, héraðsmót HSK í Hveragerði í lok júní og 1. júlí var vorslútt eldri deildanna og enginn var með grímu. Smám saman fór veiran aftur á stjá í lok sumars og hvelfdist yfir okkur í október með lokunum. En sem betur fer var það staðfest hjá vísindamönnum að börn smita síður og æfingar féllu því einungis niður um skamma hríð síðastliðið haust. Engin sundmót voru haldin seinni hluta árs. Nú lítur allt vel út með framvindu þess að ráða niðurlögum á faraldrinum og má búast við að starfsemin verði komin í eðlilegt horf haustið 2021. Foreldrum á Selfossi og nærsveitum stendur til boða að senda börn sín í ungbarnasund og sundskóla fyrir börn allt að sjö ára hjá Guðbjörgu Hrefnu Bjarnadóttur eða Guggu í Guggusundi eins og við þekkjum hana. Fyrir sunddeild Selfoss þjálfar hún einnig koparhóp fyrir iðkendur 7–10 ára. Eldri hóparnir frá 10 ára aldri eru þjálfaðir af Magnúsi Tryggvasyni, yfirþjálfara deildarinnar. Þetta eru bronshópur (10–12 ára), silfurhópur (12–14 ára) og gullhópur (14 ára og eldri).
70 BRAGI ársrit Ungmennafélags Selfoss
Verðlaunaafhending á aðalfundi. Magnús Tryggvason þjálfari ásamt Ársæli Árnasyni sem fékk verðlaun fyrir framför og ástundun og Sara Ægisdóttir sem valin var sundmaður ársins.
Fjárhagur deildarinnar er í góðu jafnvægi þó að tekjutap hefði verið vegna Covid-19. Tekin var ákvörðun að hækka ekki æfingagjöldin síðasta haust til að tryggja betur að börnin héldu áfram að æfa þó aðstæður séu erfiðar. Sáralítið tap var á rekstrinum síðasta ár sem hefur sýnt eilítinn hagnað mörg síðustu ár. Ég vil í lok þessa pistils þakka öllum sem hafa lagt hönd á plóg við starfsemi sunddeildarinnar. Ég þakka sérstaklega þjálfurum gott samstarf. Maggi og Gugga hafa staðið sig frábærlega vel á þessum
erfiðum tímum. Ég þakka meðstjórnendum, starfsfólki Sundhallar Selfoss, sem og starfmönnum Umf. Selfoss og formanni. Ég þakka Samskip fyrir frábæra aðstöðu sem við fáum við dósasafnanir. Síðast en ekki síst þakka ég foreldrum iðkenda og iðkendum. Að sögn Magga og Guggu eru þau búin að vera dugleg að mæta við erfiðar aðstæður á síðasta ári og dugleg að hjálpa til í þeim fáu dósasöfnunum sem við vorum með á síðasta ári fyrir deildina. Næsta haust verður allt sett á fullt. Guðmundur Pálsson, formaður sunddeildar Stjórn sunddeildar kosin á aðalfundi deildarinnar 24. febrúar 2020: Formaður: Guðmundur Pálsson Gjaldkeri: Eva Gunnarsdóttir Ritari: Anna Guðrún Sigurðardóttir Meðstjórnandi: Ægir Sigurðsson Meðstjórnandi: Árni Þór Guðjónsson Varamaður: Hilda Pálmadóttir Varamaður: Rakel Þórðardóttir Fulltrúi iðkenda 16–25 ára: Sara Ægisdóttir
Aðalstyrktaraðili sunddeildar Umf. Selfoss: Stjórn sunddeildar Selfoss. Efri röð f.v.: Árni Þór Guðjónsson, Eva Gunnarsdóttir, Ægir Sigurðsson og Anna Guðrún Sigurðardóttir. Neðri röð f.v.: Sara Ægisdóttir, Magnús Tryggvason yfirþjálfari og Guðmundur Pálsson.
