deild
frjálsíþrótta
Starfsárið 2020
E
nn einu ári í starfi frjálsíþróttadeildar Umf. Selfoss er lokið og komið að því að gera upp árið 2020. Eins og undanfarin ár hefur starfið verið í miklum blóma, innan vallar sem utan. Frekar hefur fjölgað í hópi iðkenda á milli ára, en deildin hefur á að skipa sömu þjálfurum og undafarin ár, þjálfara með mikla reynslu og hæfileika á sínu sviði. Árið 2020 verður að öðru leyti helst minnst fyrir Covid-19 faraldurinn, sem hér á Íslandi eins og annars staðar í heiminum setti allt á annan endann með sóttvarnarreglum, fjöldatakmörkunum, banni á íþróttaiðkun og mótahaldi o.fl. Við þessar aðstæður var aðdáunarvert hvað allir lögðust á eitt að láta þetta trufla starfið sem minnst. Þjálfarar voru í sambandi við foreldra og iðkendur á samfélagsmiðlum þar sem þeir settu upp æfingaáætlanir fyrir iðkendur til að stunda heima og hvatningu til að halda áfram að hreyfa sig og viðhalda rútínu sinni og skipulagi. Þegar kom fram á sumarið rofaði til og var hægt að æfa og stunda keppnir nokkurn veginn á eðlilegan hátt. Munaði það miklu fyrir starfið, ekki síst fyrir iðkendur að komast aftur á æfingar og í keppni. Þrátt fyrir bakslag þegar haustaði gekk starfið vel. Hafði það ekki áhrif á iðkendur og ekki varð vart við mikið brottfall iðkenda. Eins og flestir vita þá er risið stórt fjölnotahús á Selfossvelli fyrir knattspyrnu og frjálsar íþróttir. Stefnt er að því að húsið verði tekið í notkun seinnipart sumars 2021. Ekki þarf að fjölyrða um að húsið verður algjör bylting fyrir iðkendur frjálsra íþrótta á Selfossi og Suðurlandi öllu. Einnig er unnið að því að koma upp þreksal í samstarfi við knattspyrnudeildina í húsinu. Þar verður hægt að æfa allar greinar frjálsra íþrótta og er tilhlökkunin mikil að sjá þetta verða að veruleika. Um leið og ég þakka stjórn deildarinnar fyrir samstarfið á árinu, vil ég einnig þakka öllum þjálfurum fyrir samstarfið, ásamt foreldrum og iðkendum. Án allra þessa aðila væri ekkert starf. Einnig vil ég þakka öllum þeim fyrirtækjum og stofnunum sem hafa lagt deildinni lið, með beinum og óbeinum hætti. Sérstaklega vil ég þakka Svövu Steingrímsdóttur og Ingibjörgu Jóhannesdóttur fyrir samstarfið og góða vinnu í stjórn deildarinnar undanfarin ár, en þær gefa ekki kost á sér til áframhaldandi setu í stjórn.
Helgi Sigurður Haraldsson, formaður frjálsíþróttadeildar
Keppnislið HSK/Selfoss á Meistaramóti Íslands 11–14 ára sem haldið var á Sauðárkróki.
Meistaraflokkur
Stjórn frjálsíþróttadeildar ásamt yfirþjálfara og starfsmanni deildarinnar. Efri röð f.v.: Elvar Atli Hallsson, Helgi S. Haraldsson, Sigríður Anna Guðjónsdóttir (yfirþjálfari og starfsmaður) og Þuríður Ingvarsdóttir. Neðri röð f.v.: Helga Sigurðardóttir, Svanhildur Gunnlaugsdóttir og Svava Steingrímsdóttir. Á myndina vantar Ingibjörgu Hugrúnu Jóhannesdóttur, fulltrúa iðkenda 16-25 ára.
Stjórn frjálsíþróttadeildar kosin á aðalfundi deildarinnar 6. febrúar 2020: Formaður Helgi Sigurður Haraldsson Varaformaður: Elvar Atli Hallsson Gjaldkeri: Helga Sigurðardóttir Ritari: Þuríður Ingvarsdóttir Meðstj.: Svava Steingrímsdóttir Meðstj.: Svanhildur Gunnlaugsdóttir Fulltrúi iðkenda 16–25 ára: Ingibjörg Hugrún Jóhannesdóttir
Sumarið 2020 gekk með ágætum hjá iðkendum meistaraflokks frjálsíþróttadeildar Umf. Selfoss, sér í lagi miðað við Kórónuveiruástandið. Sóttvarnir sem einkendu sumarið fóru harðnandi er leið að hausti. Þrátt fyrir það voru þó nokkur mót haldin innanlands og stóðu iðkendur sig vel. Nokkrir iðkendur Selfossi höfðu náð lágmörkum fyrir Norðurlandamót og Evróumót unglinga, en þeim var því miður aflýst vegna Covid-19. Frjálsíþróttavöllurinn á Selfossi er nú þegar búinn að margsanna gildi sitt og hefur gjörbylt aðstöðumálum deildarinnar. Völlurinn virkar sem aðdráttarafl enda er fjöldi iðkenda í meistaraflokknum. Árangur sumarsins var stórgóður og óteljandi héraðs- og Selfossmet litu dagsins ljós ásamt Íslands-, bikar- og héraðsmeistaratitlum. Æfingar voru reglulega fjórum til fimm sinnum í viku með þjálfara allt sumarið. Nú styttist í að innanhússaðstaða fyrir frjálsar batni verulega en stefnt er að því að fjölnota íþróttahús verði tekið í notkun í lok sumars á íþróttavallarsvæðinu á Selfossi en þar verður tartanefni á frjálsíþróttahlutanum og því hægt að æfa keppislíkt allt árið. Vormót HSK var haldið í seinna lagi vegna samkomubanns. Það fór fram á Selfossvelli mánudaginn 9. júní. Fín þáttaka var á mótinu eða 92 keppendur og ágætis árangrar litu dagsins ljós. Þetta var fyrsta stóra mót sumarsins. Selfoss átti 20 keppendur á mótinu og stóðu þau sig vel. Alls unnu Selfosskeppendur 4 gull, 4 silfur og 6 bronsverðlaun.
45
BRAGI ársrit Ungmennafélags Selfoss
