Kalaallit Meerartaat
UKIUMOORTUMIK NALUNAARUSIAQ 2O24-2O25
Sapiissuseq, iliuuseqarsinnaassuseq najukkamilu peqataaneq meeqqanik inuusuttunillu
nukittuunngortitsipput
Ukiuni makkunani apersuusersukkat amerlaqqaat – minnerunngitsumik Kalaallit Nunaata Danmarkillu ataqatigiinnerat pillugu. Tamanna tassaavoq oqaloqatigiinneq pisariaqartoq. Uanga neriuutigivara tamatuma Kalaallit Nunaanni Danmarkimilu kingunerissagaa meeqqat inuusuttullu kalaallit ingerlalluarnissaasa periarfissaasalu annertunerusumik isiginiarneqalernerat.
Ukiup ingerlanerani Danmarkimi kalaallit meeqqat angerlarsimaffimmik avataanut inissinneqartartut annertuumik eqqumaffigineqarput; tamannalu tassaavoq oqallinneq pingaarutilinnik apeqqusiiffiullunilu pisariaqartumik eqqarsalersitsisoq. Pingaaruteqarluinnarpoq ilaqutariit kulturikkut tunuliaqutarisaat isiginiarlugu pitsaasumik sulianik suliaqartarnissaq. Tamanna Kalaallit Meerartaanniit sulissutigivarput, Danmarkimi kommunini sulianik suliaqartartut 400-t naapeqatiginerisigut. Siunnersuisartoqatigiitta ilaatigut oqaluttuarisarpaat kalaallit kulturiannut tunngasut, oqaatsit ilaqutariittullu inuuneq, sulianik suliaqanermi siumut isummereertarnerup paatsoortarnerillu pingitsoortinnissaat siunertaralugu.
Pitsaaliuilluni suliniuteqarnerup inuunermi atugarisat pitsaanerusut pilersittarpai
Angerlarsimaffiup avataanut inissiisarnerit ikilisinniarutsigit aamma pitsaaliuineq isiginiartariaqarparput – Kalaallit Nunaanni Danmarkimilu. Kalaallit Nunaanni meeqqanik illersuisoqartitsisarnerput – Najorti – aqqutigalugu takusinnaavarput, meeqqat artornartorsiortillugit pilertortumik iliuuseqartoqanngitsoortoqartarsimasoq. Isumaqarpugut siusissukkut pitsaaliuilluni suliniuteqarnikkut allannguisoqarsinnaasoq taamaalillunilu ajornartorsiutit annertusiartuinnarlutik sumiginnaanermik angerlarsimaffiullu avataanut inissiinermik kinguneqartarneri pinngitsoortinneqarsinnaasut.
Taamaammat pitsaaliuineq annertunerusumik isiginiarparput. Nalunngilarput inuiaqatigiinni mikinerusuni najukkami suliniutit, meeqqanut inuusuttunut pitsaasumik allannguutaasunik kinguneqarsinnaasut. Sumiiffinni ataasiakkaani inuiaqatigiit meeqqanik inuusuttunillu pisariaqartitsisunik tapersersuisinnaanngorlugit, taakkunannga ikorfartuisarnerput pitsaaliuineruvoq. Taamaammat kalaallit meeqqat inuusuttullu najugaqarfinni ulluinnarnilu inuuffigisaanni inuunerminni atugarissaarnerunissaat anguniarlugu suliniuteqarpugut, ilinniagaqalernissamut suliffeqalernissamullu aqqutissaat ammartarlugit.
Inersimasut suliaminnut tunniusimasut maligassiuisullu meeqqat inuusuttullu siunissami periarfissarissaarnissaannik tapersersorpaat
Kalaallit Nunaanni sumiiffinni mikinerusuni inersimasut piumassuseqarluartut suleqatiginerinik tunngaveqartumik suliniutit - soorlu ’Ikioqatigiinneq’ - aqqutigalugit, takusinnaavarput ataatsimooqatigiiffiit qanitarisat, meeqqat inuusuttullu ingerlalluarnissaannut sunniuteqarluartartut. Taamatoqqinnaaq Danmarkimi mentoreqartitsisarnermik aaqqissuussinerput – ’Suluk’ – inuusuttunik kalaallinik tapersersuissaaq, ulluinnarni inuuneranni siunissamilu anguniagaannut tunngasutigut ikiortarlugit.
Meeqqat inuusuttullu tamarmik – annermillu meeqqat inuusuttullu atugarlioqqajaasut – inuunerminni unamminartut, qaangissagaanni sapiissuseqarlunilu iliuuseqarsinnaassuseqarfiusariaqartut, naapittuartarpaat. Nutaanik misiliinissamut sapiissuseqarnissaq aamma nammineq periarfissanik nutaanik pilersitsiniarluni iliuuseqarsinnaassuseqarnissaq, meeqqap ineriartorneranut pingaaruteqarluinnartuusinnaapput. Taamaammat meeqqat inuusuttullu takorluukkaminnik anguniakkaminnillu oqaasertaliisinnaanerat sulissutigisarparput, nammineq siunissartik pigisutut misigeqqullugu.
Meeqqat inuusuttullu sapiissuseqarnerat iliuuseqarsinnaassusiallu tapersersortarpagut
Sapiissuseqarnerup iliuuseqarsinnaassutsillu patajaallisarnissaat pitsaaliuinerup ilagaa pingaaruteqartoq – taamaalilluni meeqqat inuusuttullu artornartorsiortut pitsaanerusumik inuuneqaleqqullugit. Kalaallit Meerataanni sumiiffinni ataasiakkaani nukissallit, , namminneq piumassutsimikkut tunniusimallutik sulisut sulisullu ilinniagallit piginnaaneqarluartut suleqatigivagut, ataatsimooqatigiiffiit ineriartorfiusut pilersinniarlugit, ataatsimooqatigiiffiit meeqqat inuusuttullu nutaanik misileraaffigisinnaasaat, nutaanik aqqutissarsiorfigisinnaasaat naleqartutullu misigisaqarfigisinnaasaat. Tamanna meeqqat inuusuttullu toqqissisimasumik avatangiiseqarlutik alliartorlutillu ineriartornissaannut tunngavissiisarpoq. Taamaaliornikkut kalaallit meeqqat Kalaallit Nunaanni Danmarkimilu inuunenerinik siunissaannillu patajaallisaasumik, allannguinerit pisariaqartut pilersissinnaavagut.
Puk Draiby
Kalaallit Meerartaanni allattaaneq
Sumiiffinni ataasiakkaani ataatsimooqatigiiffinnut nukissat amerlanerit
Qeqertarsuarmi meeqqat inersimasullu 820-t najugaqarput. 2025-mi suliniummut ’Ikioqatigiinnermut’ peqataalernissaminnut periarfissaqalissapput, ’Ikioqatigiinneq’ maanna Kullorsuarmi Nanortalimmilu ingerlareerpoq. ’Ikioqatigiinneq’ Kalaallit Meerartaasa aamma najukkami namminneq kajumissutsimikkut sulisut sulisullu ilinniarsimasut suleqatigiillutik piffissami sivisuumi suliniutigivaat, najukkami inuiaqatigiit meeqqatut ilaqutariittullu inuunermut sinaakkutissanik toqqissinartunik pitsaasunillu pilersitseqatigiinnissaannik siunertaqartoq. Tamanna pisarpoq suliniutit sammisaqartitsinerillu innuttaasut namminneq toqqarlugillu aalajangeeqataaffigisaat aqqutigalugit.
“Qeqertarsuup qanimut suleqatigilernera nuannaarutigeqaarput – annermik qilanaarivarput inuit nukissaqarluartut illoqarfimmi meeqqanik inuusuttunillu maanna sullissereersut annertuumik ilisarinerulernissaat. ’Ikioqatigiinneq’ aqqutigalugu suliniutigeriigaannik tapersiinissamut periarfissaqarpugut, taamaalilluni amerlanerit assersuutigalugu peqatiffinni ataatsimoorluniluunniit sammisaqarnerni peqataasinnaaqqullugit,” taama oqaluttuarpoq Julie Lynge, Nuummi immikkoortortaqarfimmi pisortaasoq.
Qeqertarsuup ilaatigut tusaamaneqaataasa ilagaat sissaq qernertunik sioralik, 2021-mi aasarsiortitsinitsinni pinnguarfittut aamma atorneqartoq. Aasarsiortitsinermi arlalippassuartigut suleqatigiilluarnerput nangillugu, ataatsimoorluta meeqqanut inuusuttunullu suli amerlanernik periarfissiiumalluta.
Qeqertarsualiartoqartarpoq siullermik Ilulissanut timmisartoriarluni tassanngaanniit qulimiguulimmut imaluunniit angallammut ilaalluni. Imaappoq illoqarfimmut illoqarfimmiillu angalaneq ilaqutariinnut akisullunilu sivisusinnaasartoq – taamaammat 2025-mi aasarsiortitseqqinniarpugut, tassanilu najukkami namminneq kajumissutsimikkut sulisut nunarsuarmillu tamarmeersut meeqqanik, inuusuttunik ilaqutariinnillu nuannersunik misigisaqartitsisassapput.
Mentorit inuusuttunut maligassiuilluartarput
Kalaallit inuusuttut Danmarkimi imminnut inissinniarnerini ajornartorsiutit amerlasinnaasaqaat assigiinngissinnaasaqalutillu.
Inuusuttutut inersimasutullu pitsaasumik inuuneqalernissamut akimmiffiusartut pingaarnerit ilagaat imminit ilimagisaqaranilu imminut upperinnginneq. Kalaallit Meerartaanni suliniutip nutaap inuusuttut imminnut pillutik oqaluttuaat illuanut saatinniarpai.
Danmarkimi meeqqanut, inuusuttunut ilaqutariinnullu suliniutinut pisortaq Jeanne Funch Asmussen naapertorlugu, inuusuttut isiginiarlugillu meeraanermiit inersimasunngornermut ikaarsaariarnerini suliniutit patajaallisarnissaat peqqutissaqarluarpoq.
“Inuusuttuunermi toqqagassat, inersimasutut inuunermut sunniuteqartussat arlaqalersarput. Tamanna akisussaaffittut oqimaatsutut misigineqarsinnaavoq, pissuseqarfiginissaa mersernarlunilu ajor nakusoorsinnaasarluni, minnerunngitsumik inuusuttunut naapittakkatsinnut, inuunerminni arlalinnik akimmiffeqartunut. Taakku tassaasarput inooqatigiissutsikkut, kulturikkut ilinniarnermullu tunngatillugu akimmiffiit, arlaqartullu peroriartornerminni misigisaqartarsimapput, ingerlalluarnissaraluaminnut inuunerminnilu periarfissaminnut sunniutipiloqartartunik. Tamatuma inuusuttutut inuunerat sunnertarpaa, arlallillu inuunerminni ’orloqqajaalersarput’.”
’Suluk’ tassaavoq kalaallinut inuusuttunut Danmarkimiittunut, ilinniagaqarnissamut suliffeqalernissamullu aqqutissamik nassaarinissaannut tapersersorneqarnissaminnik pisariaqartitsisunut, mentoreqartitsinermik aaqqissuussineq. Anguniagaavoq inuusuttut amerlanerit ilinniagaqalernissaat suliffeqalernissaalluunniit imaluunniit ilinniakkaminni suliffimminniluunniit ingerlaannarnissaat aamma inersimasutut inuunerminnut nassatarisinnaasaminnik suliamut tunngatillugu inuttullu piginnaasaqalernissaat.
Imminut isiginerliorneq akornutaasarpoq
Nammineq pisinnaasat upperinnginnerat annertuumik akimmiffiusarpoq, Danmarkimilu nalaanneqarajuttutut ilisimasakissutsimit sakkortusitinneqartarluni. “Inuusuttut arlallit naapittarpakka, takorluukkaminnik iluatsitsisinnaanngitsutut imminnut isigisut. Imminut pilluni oqaluttuaq tamanna illuanut saaterusupparput,” Jeanne oqarpoq.
Tapersersuineq asannittumillu ajattaaneq
Suliniummi ’Sulummi’ inuusuttut tamarmik mentorertaartarput, piffissami sivisuumi ingiallortigisassaminnik. Jeanne oqaluttuarpoq:
“Inuusuttunut suliniutitsinnit allanit nalunngilarput, qanoq pingaartigisoq, inuusuttup imminut sanarfiniarnermini inummik aalajaatsumik maligassaqarnissaa. Inuusuttut ataavartumik tapersersorneqarnissartik pisariaqartippaat, aammali asannittumik ’ajattalaarneqartariaqarlutik’. Kalaallit inuusutut arlallallit sapinngisatik pikkoriffitillu takusinnaalissagunikkit sapiissuseqarnissartik pisariaqartippaat.”
Inuusuttunik suliaqarneq sullissinerlu Kalaallit Meerartaannut nutaajunngilaq, aammalumi ’Suluk’ suliniutituaanngilaq, tassami Kalaallit Meerartaat inuusuttunut arlalinnik suliniuteqarput, ataatsimooqatigiiffinni ineriartorfigisinnaasaannik inuttullu piginnaasaqarfigilersinnaasaannik, soorlu sapiissuseqalerlutik iliuuseqarsinnaassuseqalerlutillu, imminnut anguniagassaliuullutik anguniakkamillu qanoq angunissaannik oqaasinnguillutik.
’Suluk’ ingerlanneqarpoq Egmont Fonden suleqatigalugu.
Quppernerup tulliani allaaserineqarput Ole Kristian, 24-nik ukiulik, mentorialu Nuka.
Nukap naapittarnera ilorraallannartaqaaq
Nuka Abelsen 48-nik ukioqarpoq, namminersortutullu ilaqutariit kalaallit pillugit kommuninik namminersortunillu sullissisarpoq – aamma Ole Kristian Lyberthimut mentoriuvoq. Ole Kristian 24-nik ukioqarpoq Københavnimilu teater-, event- aamma av-teknikeritut ilinniarluni – ilinniagaq Nukap ikiuineratigut aallartitaa. Nuka aamma Ole Kristian sapaatipakunneranut ataasiarlutik naapikkajupput, arlaleriarlutillu oqarasuaatikkut oqaluuttarlutik.
Ole Kristian
Arlaatigut artornartunik naammattuugaqartillunga saaffissaqanngilanga, taamaammat allat tapersersorneqarniarlutik ikorfartorneqarniarlutilluunniit angajoqqaaminnut saaffiginnittarniartut, uanga Nukamut saaffiginnittarpunga. Tatigivara aamma assuarinngisaannarpaanga.
Nuka naalaartarpoq, aammali eqqaasissinnaallunga uanga nammineq akisussaasunga uumisaakujullungalu oqarfigisinnaallunga imminut nalligiunnaaqqullunga. Kisianni nalunngilara taama oqarfigisaraanga, imminut eqqortumik iliornissannut, nikeriaatigalugulu ineriartuutigisinnaasannut kaammattorniarlunga. Nukap tinnerserartanngitsuuppanga sorpassuit angusimanavianngikkaluarpakka. Tamatuma kinguneraa FGU-mi (piareersaataasumik tunngaviusumik ilinniagaq) sukataarnera, qallunaat oqaasiinik 10 matematikkimilu 12 karakteereralugit.
Suulluunniit annertunerusut annikinnerusullu Nukalu oqaloqatigiissutigisarpagut. Arlalitsigut annertunngikkaluit inuuninni annertuumik allannguinissamut akornutaasarput. Taamaallunga assut eqqarsaateqarpunga, sinissinnaananga assullu energidrikkinik imertarlunga. Tamatuma qinnikaartumi pitsaanngitsumi nikeriarsinnaajunnaarteqqavaanga, Nukalu peqatigalugu illuanut saappunga, sinnilinnik nukissaqalerlunga, assersuutigalugu ilinniagaq – eventuddannelse - manna ingerlassara qinnutigisinnaanngorlugu.
Attaveqatigiilluarneq pilersinnikuusarput, uannut pingaaruteqaqaaq. Sinnilimmik nukissaqarnera isumagissaarneralu appaqqajaasinnaasarput, Nukali naapeqatigigaangakku ersarinnerusumik takunnissinnaalersarpunga. Nukap naapeqatigisarnerata iluaallatsittaqaanga.
Imatut isigivara aqqusineeqqakkut tumilioqatigiilluta ingerlaartugut. Ilaanni tumit sanileriit ataasiinnanngortarput. Tamatumunngalu pissutaavoq aappara kissumialersarakku, kinguninnguali sanileriilluta ingerlaqqilersarpugut. Kissumiaasariaqartarnera nikerarpoq.
Oqartariaqartarnikuuvunga: Oqalorusaaginnarfiunngilaq. Naalaarusuppunga, kisianni aamma siumut nikeriartariaqarpugut. Nakkaattuulaartarneq, taamaatsillunilu nukinnik katersineq, ajunngilaq, kisianni ilumiutut pequliaqqaannartoqarsinnaanngilaq. Allatut ajornartumik masseqqinniartoqartariaqarpoq ingerlaqqillunilu.
Suliassama ilagaat Ole Kristiaat pikkoriffimminik takunnissinnaalernissaa, pikkoriffippassuaqarpormi. Aammali akornutaasunik peqatigalugu alapernaaserneq.
Ole Kristian tatigivara, isumaqarpungalu tamanna malugisinnaagaa. Ole Kristiaap qanoq kakkatsiginini uannut takutinniartussaanngilaa, uangalu assuarinngisaannarpara. Ole Kristiaap aqqutiginiakkaminik toqqaanissaa pillugu isummersortanngilanga; siunnersuutikka kukkusuusinnaapput. Kisianni inuunermini toqqagaasa kingunerisinnaasaannik nalilersueqataasinnaavunga.
Aamma Ole Kristian ilinniarfigisarpara, ullumikkut inuusuttuuneq pillugu ilikkagaqartarpunga, aammattaarli imminut paasinerusarlunga. Pitsaasumik patajaatsumillu attaveqatigiilernikuuvugut –tamatsinnut isumaqarluartumik.
Nuka
Sumiiffinni ataasiakkaani namminneq kajumissutsimikkut sulisut aasarsiortitsinernut iluaqutaaqaat
Aasat tamaasa Kalaallit Meerartaat sumiiffinni mikinerusuni aasarsiortitsisarput, 2024-milu Nanortalik aamma Kullorsuaq aasarsiortitsiffiupput. Sapaatip-akunnerini taakkunani pinnguarneq illarnerlu, ataqatigiinneq pilersilluarnerillu nalinginnaalluinnarput – minnerunngitsumillu meerarpassuit inuusuttorpassuillu aamma namminneq kajumissutsimikkut sulisut nuannisaqatigiittut.
Immikkut illuinnarpoq Kullorsuarmi aasarsiortitsinermi Kullorsuarmiut 17-it 15-iniit 61-inut ukiullit namminneq kajumissutsimikkut sulisutut peqataammata, nunaqarfimmi meeqqanut inuusuttunullu aasaanerani nuannersunik misigisaqartitseqataallutik. Kullorsuarmiut namminneq kajumissutsimikkut sulisut meeqqanik ilaqutaannillu ilisarisimanninnerat, najukkaminnilu inuunermik ilisimasaqarluarnerat, aasarsiortitsinerup iluatsilluarneranut pingaruteqarluinnarput.
Aammattaaq suliaminnut tunniusimalluarlutik peqataanerat, suliniutit aasarsiortitsinerup ingerlanerani pilersinneqartut, nunaqarfimmi ingerlateqqinneqarsinnaanerinut pingaaruteqaqaaq. Ilutigisaanik tamatuma qularnaarpaa, namminneq kajumissutsimikkut sulisunik suli amerlanerusunik sulisoqarsinnaalernerput.
“Uagut misileereernikuusugut nunaqqatitsinnut oqaluttuartarpugut. Peqataalluni qanoq nuannertiginersoq oqaluttuarisarparput,” campleder Susanne Eliassen oqaluttuarpoq.
Namminneq kajumissutsimikkut sulisut najukkameersut nunanillu tamalaaneersut ataqatigiilluartut
Namminneq kajumissutsimikkut sulisut Kullorsuarmiut aasarsiortitsinerup pisimasoqarfiulluartup pilersinnerani kisimiinngillat – tassami namminneq kajumissutsimikkut sulisut Kullorsuarmiut aamma nunanit tamalaaneersut suleqatigiilluaqaat. Kalaallit Meerartaanni suliniutinut inerisaanermullu siunnersorti Rikke Louise Kuhn, oqaluttuarpoq:
“Namminneq kajumissutsimikkut sulisut nunanit tamalaaneersut sammisaqartitseriaatsinik nutaanik tunniussaqartarput, najukkamilu inuiaqatigiit tamaasa nunarsuup sinneranik paasisaqarnissamut periarfissittarlugit. Ataatsimoorlutik namminneq kajumissutsimikkut sulisut nunaqarfimmi meeqqat inuusuttullu sammisinnaasaannik nutaanik allaanerusunillu pilersitsisarput. Nunanillumi allanit suliartortut najukkami namminneq kajumissutsimikkut sulisunit alutorineqartaqaat. Nunanit tamalaaneersut naapillugillu suleqatiginissaat pilerigilluartarpaat.”
Pinnguaatit nutaat misilinnerat nuanneqaaq, aamma nunarsuarmi sumiiffinnit allaneersunik ikinngutitaarpunga.
Meeqqat iluaqutissaat
Pingaarnerpaavoq Nanortalimmi Kullorsuarmilu namminneq kajumissutsimikkut sulisut meeqqanik inuusuttunillu nuannerluinnarumik aasarsiortitsimmata – peqataasut akornanni oqaluttuaqattaartoqartaqaaq, kulturillu naapinnerat tamanut isumassarsiorfiuvoq. Meeqqat inersimasullu nutaanik ikinngutitaartorput, ingerlaqqeriarnerminnilu atorsinnaasaminnik kingumullu nuannaarlutik qiviarsinnaasaminnik misigisaqarlutik.
“Paniga ullut tamaasa angerlartarpoq, oqaluttuarlunilu inersimasut peqatigalugit sammisassarpassuit nutaat misilerarsimallugit, namminnerlu kajumissutsimikkut sulisut akornanni ikinngutitaarsimalluni. Nuannarisaqaa,” taama oqaluttuarpoq Arnannguaq Poulsen, meeqqat aasarsiornermi peqataasut ilaata anaanaa.
Meeqqat pinngortitami periorartorput
Silami inuuneq pinngortitamilu sammisaqarnerit, ulluinnarni inuunermit meeqqat inorsartutut naleqqutinngitsutulluunniit misigisaqarfigisartagaannit allaanerusunik misigisaqartitsisarput. Pinngortitamiinnerisa meeqqat nalusaminnik nukissaqarnerannik paasinnilersittarpaat. Meeqqanik ilaqutariinnillu ilitsersuisartut Marianne aamma Charlotte isumaqatigiillutik taama isumaqarput. Esbjerg-imi suliniummi ’Nuan’-imi silami inuuneq pinngortitarlu meeqqanut suliniuteqarnermi initupput.
Miniup 9-nik ukiullip sissami assamminik sioqqerineq alutorilluinnarpaa. Niviarsiaqqat angajulliit talitik siaarlugit nilliaatigalutik ippinniit pisseqattaarput. Meeraqatigiit taartumi nipaaqisumi silamiipput niaqqumikkut qaammartartulerlutik, isussuupput, ersinalaarpormi aammali nuanneqaluni. Assit amerlaqaat. Amerlanersaat Fanø-meerput, tassanimi Marianne aamma Charlotte namminneq kajumissutsimikkut sulisunik ilaqarlutik meeqqanik sapaatip-akunnerata naanerani angalaaqateqarput.
Pinngortitaq sakkortusinnaasoq
Tammaarsimaarfik Vadehavet-ip qanitaani sissap killinnguani alutornarluinnartumi inissisimavoq.
“Pinngortitamut qanittoralaarsuuvugut, silalu qanoq-ikkaluaraangalluunniit aneernissarput pingaartipparput,” taama oqaluttuarpoq meeqqanik ilaqutariinnillu ilitsersuisartoq Charlotte nangillunilu:
”Pinngortitaq tamatigut tassaasanngilaq aasakkut sialualaaq imaluunniit aasakkut nillataartitsisumik anoraasuanera. Silami inuuneq aamma piumasaqaateqarfiusinnaavoq sakkortusinnaallunilu, qiulertoqarsinnaavoq, alersit masassinnaapput imaluunniit nakkarluni annertoqarsinnaalluni – kisianni takusinnaasarpagut meeqqat tamatigut sinnilinnik nukissaqarlutik misigisaqartartut. Meeqqat silamiillutik taama qasujaatsigalutillu taama nuannaartigisut siornatigut naammattoornikuunngilakka – aamma pinngortitaq sakkortuulioraluartorluunniit. Aali ukiuni 21-ni ilinniartitsisuunikuullunga.”
Puttaartarpugut
Marianne Tasiilami alliartorpoq, Charlotte-lu meeraalluni ukiuni tallimani Nuummi najugaqarnikuulluni. Tamarmik peroriartornerminni pinngortitaq misigisarnikooqaat. Tamaammat tamarmik pingaartippaat, meeqqat silami misilittagaqalerlutillu ilikkagaqarnissaat Marianne oqaluttuarpoq:
“Meeraaninnit eqqaamavara ullormut akunnerpassuit silamiittarluta, aammali ilaanni ulorianarsinnaasunik pinngortitami misileraasarluta. Assersuutigalugu puttaaraangatta – tamanna uagutsinnut pissusissamisuuginnarpoq. Tamakku kingumut eqqarsaatigigaangakkit, isumaqarpunga malussarissuserput annertusarneqartartoq sapinngisaqarnitsinnik aporfiusinnaasunillu qaangiisinnaanitsinnik misigititsilluni – isumaqarpungalu tamakku tassaasut inuttut pisinnaasat pingaarutillit pinngortitap uagutsinnut tunniussinnaasai. Tamakkualu ’Nuanimi’ meeqqanut uagut ingerlateqqerusuppagut. Ulorianartorsiortinneqassanngillat kisianni unammilligassaqarsinnaassapput. Upperivarput taamaaliorneq peroriartuutigisaraat”.
Pinngortitamukaraangatta
avatangiiserisatta sungiusimasatta uloriananngitsullu avataannut pisarpugut, inuillu allat naatsorsuutigisariaqalersarlutigit. Meeqqat erseqqissumik malugisarpaat pisariaqartinneqarlutik. Kikkut tamarmik pingaaruteqarput. Arlallit tigussaasunik misigisaqartarput, misigilersarlugulu qunugisatik imaluunniit nalusaminnik sapinngisatik sapernagit.
Charlotte, meeqqanik ilaqutariinnillu ilitsersuisartoq
Esbjergimi meeqqat ’Nuan’-imi ataatsimoortartut 9-15-inik ukioqarput. ’Nuan’-imi assigiinngitsunik sammisaqarniarlutik naapittarput: Meeqanut klubbi, nereqatigiinnerit, ulluinnarlugu pisuttuarnerit aamma nalliuttunik nalliusseqatigiinnerit. Tamakku tamarmik ataatsimooqatigiiffittut ineriartorsfiusut ingerlanneqartarput, meeqqat qasukkarsinnaasarput, kalaaliaqqallu allat peqatigalugit misigisassanik nuannersorpassuarnik immersorneqartarlutik. Meeqqat ukiumut arfinileriarlutik sapaatip-akunnerata naanerani angalaaqatigiittarput, arlalitsigut Fanø-mut, tassanilu silami inuuneq pingaarnersaatinneqartarpoq.
Meeqqat imminnut qaninnerulersarput
Marianne-p pisimasoq eqqaamavaa, tassalu nukappiaraq angerlarsimaffimminni artornartunik ajornartorsiuteqartoq, meeqqanik allanik ilaqarluni Fanø-liaqataasoq.
”Pisuttuarnerput ungasinaarparput, illuaqqatsinniillu ungaseqisumut anngulluta. Aqqutaani nukappiaraq taanna qasuvoq piumassuseerullunilu, meeraqataasalu ikiulerpaat: Meeraqataasa akialerpaat, ilaasa uniisigut allallu singernerisigut tigullugu. Pinnguarnerugaluarpoq itinerusukkulli aamma ilungersornertaqarluni. Meeqqat imminnut qaninnerulerput meeraqatimillu tamarmik peqataanissaat isumagalugu, nukappiaqqallu tigussaasumik misigivaa ajornartorsiornerpaaffimmini kivinneqarluni ikiortilluni. Tamanna puigunngisaannarpara.“
Ataatsimoorluta oqaluttuarisaanerput pingaaruteqarpoq
Kalaallit Nunaanni najugaqarneq inuunerlu qanoq-ippat? Nunasiaasimaneq ullutsinni kalaallinut qanoq pingaaruteqartigiva? Sooq kiinnap pissusilersortittarnera taama pingaartigiva? Apeqqutit tamakku tusaannarlugit Danmarkimi kommmunini sulianik suliaqarnermut attuumassuteqarpasinngikkaluarput. Kisianni Kalaallit Nunaat pillugu ilisimasaqarnissaq, sulisunut tamanut ilaqutariinnik kalaallinik naapitsisartut pinngitsoorani piumasaasariaqaraluartoq, Kalaallit Meerartaanni siunnersuisarnermut pisortaq Jeppe Bülow Sørensen isumaqarpoq.
Suliniut ’Sulianik suliaqarneq pitsaanerusoq’ aqqutigalugu suliamut tunngatillugu siunnersuisartut Kalaallit Nunaat, kalaallit kulturiat Kalaallit Nunaatalu oqaluttuassartaa pillugit ilisimasanik saqummiisarput. Ulluni aalajangersimasumik qulequtsiilluni sammisaqarfiusuni suliamullu atatillugu saqqummiisarnertigut kommunini sulisut 400-nik amerlanerit saqqummiiffigivagut.
Angerlarsimaffiup avataanut inissiinerni aalajangersimasuni siunnersuinerup saniatigut suliniummi ’Sulianik suliaqarneq pitsaanerusumi’ pingartuuvoq paasititsiniaanissaq.
“Kalaallit Danmarki qallunaallu pillugit ilisimasarpassuaqarput, illua-tungaanulli taamaanngilaq,” Kalaallit Meerartaanni siunnersuinermut pisortaq, Jeppe, oqaluttuarpoq. ”Danmarkimi meeqqat atuarfianni ilinniarfinnilu Kalaallit Nunaat aamma kalaallit initusanngeqaat. Isumaginninnermik siunnersortinngorniat ilinniagassaannulluunniit ilaatinneqanngillat. Ilisimasakinneq innuttaasut kalaallit naapinneranni akornutaalersarpoq.” Jeppe Bülow Sørensen naapertorlugu imminut pilluni ilisimasaqarneq naligiinnermik pilersitsisarpoq, tamatumanilu ataatsimoorussamik oqaluttuarisaanerput saneqqukkuminaappoq.
“Qallunaat amerlanersaasa nunasiaateqarsimaneq ilisimavaat, kisianni isumaqarpunga ikinnerpaat kisimik tarnikkut eqqugaasimanerit qangalu pisimasut kingunerisa itissusii kalaallinullu sunniutaat ilisimagaat. Qallunaat kalaallillu imminnut ataqatigiinneranni tunngaviuvoq, pissaaneqarnerup nalingiinngitsorujussuarmik inissisimanera, tamannalu ersertarpoq – tamannalu minnerunngitsumik ersertarpoq qallunaap suliamik suliaqartup allaffiani, tassanimi sulianik suliaqartoq annertoorujussuarnik kinguneqartussanik aalajangiisinnaavoq,”
Jeppe Bülow Sørensen oqaluttuarpoq nangillunilu:
“Inimi naapeqatigiiffiusumi malunnaateqarsinnaapput qularnerit ernumanerillu, aamma qallunaat kalaallillu assigiinngeqisunik inuunerminni silarsuaqarput attaveqariaaseqarlutillu. Assersuutigalugu kalaallit oqaatsit atunngikkaluarlugit attaveqatigiissinnaapput kiinartik pissusilersortiinnarlugu. Tamakku tamarmik ilisimassallugit pingaartuuvoq, taamaanngippat oqariartuutiginiakkat amerlavallaat annaaneqassapput, immaqaluunniit kukkusumik inerniliisoqarsinnaalluni,”
Jeppe Bülow Sørensen oqarpoq.
Siunnersuineq paasititsiniaanerlu aqqutigalugit sulissutigivarput, innuttaasut kalaallit sullinnerini arajutsineqarsinnaasut pillugit paasititsiniaanissaq, sulianik suliaqartoq ilisimasaqarnerulluni paasinninnerullunilu ilaqutariinnik naapitsisinnaaqqullugu.
Henriette Berthelsen suliniummi ’Sulianik suliaqarneq pitsaanerusumi’ siunnersortaasartut quliusut ilagaat: “Kalaallit meeqqat Danmarkimiittut naleqqiussinikkut qallunaanit meeqqanit amerlanerit angerlarsimaffimmik avataanut inissitaasarput. Kulturikkut aasigiinngissutsit paatsoornerillu tunngavigalugit inissiineq ataasiinnaagaluaruniluunniit kukkuneruvoq. Suliniut ’Sulianik suliaqarneq pitsaanerusoq’ aqqutigalugu sulissutigivarput isummereertarnerit siumoortumillu paasinnereertarnerit ilaqutariit kalaallit sullinneqarnerini akornutaannginnissaat.
Suliniut ’Sulianik suliaqarneq pitsaanerusoq’ tassaavoq sulianik suliaqartunut ilaqutariit pillugit sulianik suliaqarneranni paasissutissiinissamik suliamullu tunngatillugu isumasioqatigiittarnissamik neqeroorut akeqanngitsoq. Siunnersuisartut Danmarkimi tamarmi sulisartut, tamarmik ilinniagaqartuupput Kalaallit Nunaanni Danmarkimilu meeqqanut ilaqutariinnullu tunngasunik suliaqartarnikut. Kalaallit kulturiat oqaasiilu nalunngilaat, aggersarneqarsinnaallutillu suliassanut aalajangersimasunut atatillugu imaluunniit assersuutigalugu sulisut ataatsimiinnerini nalinginnaasunik paasissutissiillutik saqqummiisussatut.
Aputsiaq nuannaartorisarivara
Kalaallit Meerartaanni meeqqat inuusuttullu suliniutinut assigiinngitsunut peqataanissaminnut periarfissaqarput, ukiui pisariaqartitaallu apeqqutaallutik. Meeqqat ukiorpassuarni ingiaqatigiittarput inuusuttunngoqatigiittarlutillu. Amerlasuut ikinngutigiillualertarput inuunerminnilu tapersersoqatigiilersarlutik. Titken-ip ikinngutaata Aputsiap ilinniagaqarniarluni qinnuteqarnissaanut kajungilersippaa.
Uangaalluni qanoq inninnik paasinnissinnaasumik eqqanniittoqarnissara uannut pingaaruteqarnikuuvoq, uattulli sorsuuteqarnikuusumik, taama oqaluttuarpoq Titken. Meeqqanut angerlarsimaffimmik avataanut inissitaasimasunut suliniummi ’Sisi’-mi ataatsimooqatissaqalerpoq, minnerunngitsumillu Aputsiaq inuunerminut pingaaruteqaleqisoq ikinngutigilerlugu. Allaammi Aputsiaqarallartillugu, Titken maanna qarmaasutut ilinniagaqalernikuuvoq.
Titken ’Sisi’-mut peqataasalinngikkallarnermini Kalaallit Meerartaasa suliniutaanni allami peqataasarpoq. Titken 12-inik ukioqarluni sapaatip-akunnerata naanerini angalaaqataasalerpoq aamma anaanani nukkani ilagalugit nereqatigiinnernut ilaqutariinnullu sammisaqartitsinernut allanut peqataasalerluni. Kingornatigut Titken angerlarsimaffimmi avataanut inissinneqarpoq, meeqqallu angerlarsimaffimmik avataanut inissitaanikkut attaveqaataannut peqataasalerluni. 16-inik ukioqarpoq, namminerlu oqarnera naapertorlugu nipaarluullunilu avammut sammisuunani, tamakkualu tamarmik ataanni kamaqarluni.
Titken-ip oqaluttuaraa minnerunngitsumik paaqqinniffimmit inissinneqarfigisaminit sumiginnagaalluni meeraanini. Ulluinnarisaq pillarneqarfiusartoq inersimasullu assortuunnernik annertusaasartut pissaanermillu atuisarlutik, inuusuttut pitsaasumik naaperiarnagit, Titken eqqaamasalersaarpoq. Piffissap ingerlanerani Titken-ip kamani ilummut saatippaa.
’Sisi’ kalaallinut meeqqanut Danmarkimiittunut angerlarsimaffimmik avataanut qallunaanik angajoqqaarsiaqarlutik paaqqinniffinnulluunniit inissitaanikunut attaveqaataavoq. Meeqqat sapaatip-akunnerata naanerani angalaartarput, aasarsioqatigiittarlutillu, tassanilu naliminnik ilaqarlutik nuannisaqatigiittarlutik ilutigisaanillu angerlarsimaffiup avataanut inissinneqarnikkut annaasaqarnertik suliarisinnaallugu. Tamaani aamma naapittarpaat inersimasut, kalaaliaraalluni angerlarsimaffiup avataanut inissitaaneq pillugu ilisimasaqarluartut. ’Sisi’-mi meeqqat ataatsimooqatigiiffimmut pingaaruteqarlunilu patajaatsumut peqataasinnaalersarput, tassanilu kalaallisut kulturikkut tunuliaqutaqarneq pingaartillugu isiginiarneqartarpoq.
’Sisi’ illuanut saaffiuvoq
’Sisi’-mi Titken-ip naapippai meeqqat allat angerlarsimaffimmik avataanut inissitaanikut Titken-isulli oqaluttuassaqartut, aamma inersimasoqarpoq tusarnaarsinnaallutillu meeraqatigiinnut ataatsimooqatigiiffinnik patajaatsunik pitsaasunillu pilersitsisunik, Titken oqaluttuarpoq. Artornartut oqaluttuarinissaannut avatangiiserisat toqqissisimanarput, nammatallu oqimaatsut oqilisutut ipput. Naaperiarneqartutut misigineq Titken-imut illuanut saaffiuvoq.
“Imminut tatiginerulerpunga. Ataatsimooqatigiiffimmut uannik tapersersuisinnaasumut peqataalerpunga – ataatsimooqatigiiffik ernummateqarnanga peqataaffigisinnaasara. Ammanerulerpunga, ilikkarparalu tamatta inuusugut arlalippassuartigullu assigiiffeqartugut. Taamaalillunga takusinnaalerpara qulartutut pissuseqartuarnissara pisariaqanngitsoq.”
Aputsiaq nuannaartorisarivara
Ullumi Titken 23-nik ukioqarluni ’Sisi’-miinnissaminut ’utoqqaavallaalernikuuvoq, kisiannili attaveqaammut suli peqataasarluni, tassaniittartullu allat ilaquttamisut isigalugit. Nammineq oqarnera naapertorlugu inuunermi sinneranut atuuttussanik ikinngutitaarnikuuvoq. Annermik ikinngutaanit ataaseq Titken-imut immikkut pingaaruteqarpoq, tassalu Aputsiaq, taamanili aamma ’Sisi’-meeqataasarnikoq.
Apputsiap aallarteriarnissannut pitsaasumik tinnerserarpaanga, taama oqarpoq Titken, 12-inik ukioqarluni Kalaallit Meerartaasa sammisaqartitsinerinut peqataaqqaartoq. Ullumi Titken 23-nik ukioqarpoq qarmaasutullu ilinniartuulluni.
“Aputsiaq uannut immikkut ittuuvoq, nuannaartoriuarnikuuara. Atuarnini aamma sapilernikuuaa, taamaakkaluartorli ingerlatiinnarlugu. Uattulli atuarnerminik qatsusseqqanikuuvoq ilungersortariaqarlunilu, tamaattorli aamma sanasutut ilinnialerluni. Uannut oqarpoq: Sukataartariaqarputit, aamma taama ajornartiginngilaq. Aallartinnissannut ajattorpaanga taamaalillungalu qarmaasutut ilinniarumallunga qinnuteqarpunga.”
Ullumi Titken qarmaasutut ilinniarluni ingerlaleruttorpoq. Aputsiap ilinniarnissaminik qinnuteqarnissaanut kajumissuseqalersippaa.
“Nakuussuseqarpoq arlaatigut uannut tunillaattumik. Uangaalluni qanoq misiginarnersoq nalunngilaa, uattulli aamma sorsugassaqarnikuulluni, taamaammat aamma uanga saperunnaarpunga.”
Socialstyrelsen:
’Najorti’ meeqqat inuusuttullu sulianut imminnut tunngasunut peqataatinneranni qitiuvoq
2024-mi meeqqat inuusuttullu 183-it Kalaallit Nunaanni kommunimi imminnut tunngatillugu suliap ingerlanneqarnerani illersortimit – ’Najortimit’ taperserneqarput. Kommunit meeqqanut suli nammineersinnaatitaanngitsunut illersuisoqartitsinissamik najorteqartitsinissamik neqerooruteqartarnissaat inatsisitigut piumasaalernikuuvoq, tamatumalu piviusunngornissaanut Kalaallit Meerartaasa ’Najortit’ pingaaruteqarluinnalernikuupput. Meeqqat
’Najortimi’ meeqqanik illersuisartut, meeqqanit inuusuttunillu isumaginninnikkut suliamut ilaalersunit atorneqarsinnaapput. Najortip qularnaartarpaa meeqqap imaluunniit inuusuttup paasissagaa, sunik tunngaveqarluni aalajangiisoqarnersoq aamma sooq taama aalajangiisoqarnersoq, aamma qularnaassavaa meeqqap isumaata ilaatinneqarnissaa meerarlu isummaminik saqqummiussiniarnerani ikiussallugu. Meeqqat sulianut imminnut tunngasunut peqataatinneqarnissaat inatsisitigut piumasaqaataannaananilu pisinnaatitaaffiinnaanngilaq, aammali tassaalluni meeqqamut inuusuttumulluunniit ersarissumik malunnaatilimmillu pitsaasumik allanngueqataaneq.
sulianut imminnut tunngasunut peqataatinneqartarnissaasa politikkikkut pingaartillugu isiginiarneqarnerata kingunerisaanik, Kalaallit Meerartaat aamma Isumaginninnermut Aqutsisoqarfik ukiuni pingasuni suleqatigiinnissamik isumaqatigiissuteqarnikuupput.
“Isumaginninnermut Aqutsisoqarfiup pingartippaa, meeqqat Kalaallit Nunaanni sumiikkaluarunilluunniit suliani imminnut tunngasuni peqataatinneqartarnissaat. Isumaginninnermut Aqutsisoqarfiup Kalaallit Meerartaannik suleqateqarneq, meeqqanik illersuisartussat ingerlaavartumik ilinniartinneqarnissaannut, taamaalillunilu Kalaallit Nunaanni meeqqat ilinniarsimasumik illersuisoqarnissamut periarfissaqartinnissaannut pingaaruteqaqaaq,.” taama oqarpoq Ida Rasmussen, Isumaginninnermut Aqutsisoqarfimmi immikkut siunnersortaasoq, nangillunilu: “Suleqatigiinnissamik isumaqatigiissutip Kalaallit Meerartaannik meeqqat peqataatinnissaannik inerisaaniarluta patajaallisaaniarlutalu ataatsimoorluta anguniakkatsigut nalinginnaasumik suleqatigiinnerput aammattaaq patajaallisarpaa.”
“Meeqqat ataasiakkaat tusaaniarneqarlutillu akuersaarneqarnissaat pingaartuuvoq, aamma taamaappoq meeqqap qanoq sunalu pissutigalugu pisoqarneranik paasinnilluarnissaa. Tamanna meeqqap toqqissisimaneruneranik pilersitsisinnaavoq. Ilutigisaanik meeqqap eqqortumik ikiorserneqarnissaa ilimanaateqarnerulersarpoq, namminneq eqqarsaatimik misigissutsimillu oqaatiginissaannut periarfissaqarsimagaangata – tamatumanilu meeqqanik illersuisartoq ikiuussinnaavoq,” Ida Rasmussen oqaluttuarpoq.
Rettighed – Pisinnaatitaaffik • Samtale – Oqaloqatigiinneq • Bisidder – Illersu isoq • Skole – Atuarfik • Kommune – Kommuni • Rettighed – Pisinnaatitaaffik
Samtale – Oqaloqatigiinneq • Bisidder – Illersuisoq • Skole – Atuarfik • mune – Kommuni • Rettighed – Pisinnaatitaaffik • Samtale – Oqaloqatigiinneq
Bisidder – Illersuisoq • Skole – Atuarfik • Kommune – Kommuni • Rettighed – Pisinnaatitaaffik • Samtale – Oqaloqatigiinneq • Bisidder – Illersuisoq – Atuarfik • Kommune – Kommuni • Rettighed – Pisinnaatitaaffik • Samtale – Oqaloqatigiinneq • Bisidder – Illersuisoq • Skole – Atuarfik • Kommune
Kalaallit Meerataasa 2024-mi illersuisartut nutaat arfineq-pingasut ilinniartippai, taakkulu Upernavimmeerlutillu Maniitsumeersuupput. Illersuisartoqatigiit 47-uuput, Kalaallit Nunaat tamakkerlugu illoqarfinni nunaqarfinnilu 12-niillutik. 2025-mi Tasiilami, Narsami, Qasigiannguani Uummannamilu illersuisartussanik ilinniartitsissaagut.
Ima amerlatigisunut annguppugut
Kalaallit Nunaanni Danmarkimilu kalaallit meeqqat, inuusuttut angajoqqaallu 1.328-t 2024-mi pitsaasumik ingerlaqqeriarnissaminnut kattuffitsinnit ikiorserneqarput.
Kalaallit Nunaanni suliniutitsinni – ilaatigut illersuisoqartitsisarnitsinni ’Najortimi’, pitsaaliuilluta suliniutitsinni ’Tassa!’-mi, aasarsiortitsinitsinni marlunni Ikioqatigiinneq aamma sumiiffinni ataasiakkaani ataatsimooqatigiiffinnik tapersersuiniarluta suliniutitsinni ’Ikioqatigiinnermi’- 2024-mi meeqqat inuusuttullu katillugit 560-it attavigivagut. ’ Najorti’-mi illersuisartutta meeqqat inuusuttullu 183-it taperserpaat – oqartussaasunik naapeqateqarnerini, qularnaarumallugu meeqqat imminnut tunngatillugu suliamik paasinnilluarnissaat namminnerlu siunissartik pillugu aalajangiinernut naammaginartumillu peqataatinneqarnissaat.
Danmarkimi suliniutigut ’Nuan’, meeqqanut angerlarsimaffimmik avataanut inissitaasunut attaveqaaterput ’Sisi’ aamma inuusuttunut suliniutigut aqqutigalugit meeqqat, inuusuttut taakkulu ilaqutaat 568-it naapippagut. Ukiuni kingulliunerusuni annermik inuusuttunut suliniutigut patajaallisarniarsimavagut – ilaatigut mentoreqartitsisarluni aaqqissuussineq ’Suluup’ pilersinneratigut, tamatumani inuusuttut ataasiakkaat inuunerminnik allannguiartornerminni inersimasumit nukissaqarluartumit tapersersorneqarsinnaasarput.
Namminneq kajumissutsimikkut sulisut annertuumik allanngueqataapput
Namminneq kajumissutsimikkut sulisut peqataanerat suliniutitsinnut pingaaruteqaqaaq – taakku suliniutitta amerlanerusunut anngussinnaanerat periarfissaqalersittarpaat, ilutigisaanillu meeqqanut inuusuttunullu misigisaasarpoq nuannersoq, inersimasut qujaffigineqarnissaminnik piumasaqanngikkaluarlutik imminnik soqutiginnittut naapittarnerat.
Namminneq kajumissutsimikkut sulisut ilagaat Agarthe Hansen Aalborgimeersoq. Ullumi soraarneruvoq, siusinnerusukkulli ilaatigut Kalaallit Nunaanni Danmarkimilu isumaginninnermi perorsaasutut sulinikuulluni. Kalaallit Meerartaanni ’Sisi’-mi ukiuni kingullerni meeqqat inuusuttullu sapaatip-akunnerisa naanerini angalaqatigisarpai.
“Uannut nuannertaqaaq misigisinnaallugu meeqqat ’Sisi’-miittartut sapaatip-akunnerisa naanerini naapikkaagamik qanoq
Aningaasaqarnermik takussutissaq
2024-mi Kalaallit Meerartaanni kaajalukaartitat katillugit 23 mio. Krupput.
Isertitatta ilarujussui Kalaallit Nunaanni Danmarkimilu pisor taneersuupput, aningaasaateqarfiillu namminersortut aningaasaliissutaat 29 procentiullutik, ilaasortat akiliutaat inuinnaallu tunissutaat 9 procentiupput kingornussallu 8 procentiullutik.
takummaasartigisut qanorlu inersimasut takoqqinneri nuannaarutigisartitigaat. Meeqqat ammasuunerat sapinngisaqassusiallu takullugu uannut alutornartaqaaq. ’Sisi’-mi meeqqat asanninnermik misigitinnissaannut, tapersersorneqarnissaannut eqqissisimaartinnissaannullu peqataasinnaavunga. Taava suli annertunerusumik pisinnaasaqalersarput,” oqaluttuarpoq.
Agarthe Naja Von Sehested-imit taperserneqarpoq, taanna Københavnimi nammineq kajumissutsimigut sulisutut ikiuivoq maanna ukiunik qulinngortorsiussaaq:
“Nammineq kajumissuseq tunngavigalugu sulisuulluni nuannernerpaavoq, meeqqat inuusuttullu nuannersunik eqqaamasaqarfigisinnaasaminnik patajaatsunik ataatsimooqatigiiffigisassaannut sinaakkusersueqataasinnaagama. Assersuutigalugu sapaatip-akunnerata naanerani angalaaqatigiinnerni, ataatsimoornissarput kisiat siunertaralugu allatut qanimut ataatsimoorfigisinnaasatsinni, eqqissisimaarfigisinnaasaannilu,” Naja oqarpoq.
2024-mi namminneq kajumissutsimikkut sulisut 140-t suliniutitsinnut peqataapput.
Aningaasat suminngaanneerpat:
Danmarkimi pisortanit
Ilaasortat akiliutaannit inuinnarnillu tunissutinit
Qujanaq!
Aningaasaateqarfinnit namminersortunit
Suliffeqarfinnit tapiissutinit
Peqatigiiffinnit tapiissutinit
Sullissinernit internetikkoorlugulu niuertarfimmit
ima atorpagut:
’Nuan’ – Danmarkimi meeqqanut ilaqutariinnullu suliniut
Paasititsiniaaneq katersinerlu
Allaffissorneq
Inerisaalluni suliaqarneq
Sulinerput taamaallaat iluatsissinnaasarpoq oqartussaasunit, inuinnarnit, suliffeqarfinnit aningaasaateqarfinnillu annertuumik taperserneqartaratta. Meeqqanik, inuusuttunik ilaqutariinnillu kalaallinik tapersersuisunut tamanut qujanarsuaq.
Kalaallit Meerartaat
Balders Plads 1, 2200 København N
Telefon: +45 3585 8330
Mail: fgb@fgb.dk www.fgb.dk
Sarfaarsuit 16, lejl. 303, 3900 Nuuk
Telefon: +299 263599
Siulersuisut
Thomas “Tyt” Mogensen (siulittaasoq)
Helene Brochmann (siulittaasup tullia)
Christina Tønder Bell
Tina Hjulmann Melsdgaard
Jan Mørch Pedersen
Lise Dalsgaard
Michelle Bech Friis
Tina Bresson (sulisut sinniisuat)
Aaqqissuisut
Kathrine Saxild
Amalie Holmgaard Olesen
Julie Bauer Larsen
Nutserisut
Naja & Kunuunnguaq Fleischer
Assiliisut
Fotograferne Vesterbro
Julie Meldhede Kristensen
Tobias Stidsen
Peder Trolle
Mads Joakim Rimer Rasmussen
Ilusilersuisoq
Rosa Amdi
Naqinneqarfia
Grafisk Rådgivning
Ukiumoortumik nalunaarusiap kalaallisuua uani piniarneqarsinnaavoq: fgb@fgb.dk