Lexojmë Këpuca prej argjendi

Ishte njëherë një nënë që kishte shtatë fëmijë. Për të shtatë fëmijët duheshin shumë gjëra: shtatë palë veshje, shtatë palë këpucë, shtatë shtretër. Por nëna e varfër nuk kishte aq shumë gjëra për ta. Kur erdhi dimri, ajo nisi të qepë nga një palë këpucë për të shtatë fëmijët e saj, mirëpo në fund, iu mbaruan penjtë dhe lëkura për njërën nga këpucët e më të voglit të fëmijëve.

Për fat, fëmija i vogël ende nuk kishte filluar të ecte, kështu që nëna mendoi se me një këpucë do t’i mbante njërën këmbë ngrohtë, ndërsa për tjetrën do të mundohej të gjente diçka.

Në mbrëmje, ajo i vendosi të gjitha këpucët pranë portës.

Një yll i vogël kaloi aty pranë dhe i pa këpucët që përtej xhamave të portës. U kënaq duke i parë, pasi ato ishin të reja. Papritur, vuri re se ishte një këpucë më pak. Dhe ishte më e vogla nga këpucët që mungonte.

I shkreti Pal, si do të bënte për të ecur nëpër botë me një këpucë! Mos vallë kishte ndonjë problem në këmbë?

Ylli i vogël u afrua pranë shtratit të Palit, i cili ishte në gjumë të thellë. Këmbët e tij të bardha kishin dalë pak jashtë mbulesave. Ylli i vogël i pa me kujdes këmbët e vogla të Palit, të cilat dukej sikur i thoshin: “Hë, si të dukemi? Nuk i meritojmë një palë këpucë të bukura për hapat tanë të parë mbi dhé?” I shkreti yll, edhe ai nuk kishte ndonjë pasuri të madhe, por u kujtua se kishte një rrotëz peri me fije të argjendtë dhe për tërë natën qepi një palë këpucë shumë të bukura për vogëlushin.

Nuk mund të përshkruhet ajo ditë feste e agimit që lindi. Sapo u ngrit, Pali pa këpucët. Ai u çapit deri te dera dhe me këpucët e bukura, që xixëllonin në këmbët e tij, mësoi të ecë.

Mendoni një fëmijë që mëson të ecë me këpucët e bëra nga një yll.

Fjalë të reja

pe (penjtë) − fije prej pambuku, leshi, mëndafshi etj., që përdoret për të qepur. gjumë i thellë − gjumë shumë i rëndë, gjatë të cilit nuk dëgjon e nuk ndien asgjë.

LEXOJ DHE KUPTOJ

Renditi fjalitë e mëposhtme sipas radhës së kryerjes së veprimeve (vendos numrat nga 1-6). Kur erdhi dimri, ajo nisi të qepë këpucë për të gjithë fëmijët e saj. Nëna kishte shtatë fëmijë. Një yll i vogël vuri re se njërit prej djemve i mungonte një këpucë. Djali i vogël mbeti me një këpucë, sepse nënës iu mbarua peri për të qepur. Djali u gëzua aq shumë, sa filloi të ecë me këpucët që xixëllonin. Ylli qepi këpucë me fije argjendi për djalin e vogël.

Trego përmbajtjen duke u mbështetur në fjalitë përmbledhëse. REFLEKTOJ

Krijo një mbyllje tjetër për këtë përrallë.

SHKRUAJ

Ngjyros me të kuqe emrat në numrin njëjës dhe me blu emrat në numrin shumës.