SAN MARTIN
I scolars dla terza B dla scora mesana cun l’insegnanta Licia Dragotto.
11 de forà sunse stà sö dal Ćiastel de Tor a ti ćiarè al’esposiziun d’ert dl IKA (integriertes Kunstatelier) da Bornech, insciö sunse rovà en contat cun i artisć che s’à metü adöm te n atelier por svilupé nosc talënt artistich. I ên plü co 50 mituns ch’i ùn soné, scrit y dessigné deboriada por n pêr de ores se devertin y se desfarenzian un dal ater, nia tan por les deblëzes, mo por les abilitês de vignun. Ai 20 de forà unse tignì la desfilada da Carlascè rodan imascorà sö por paîsc y incër la ćiasa de palsa. Ai 26 de merz sunse, dui scolars por tlassa, jüs a vijité le museum dl Ćiastel de Tor y ai 16 d’aurì unse spo podü mëte ala proa nosc savëi tla ćiasa dla cultura a La Ila te n quiz gnü fat do le sistem dla “Milionenshow” cun dër de bi pesć. La jita de mà ai 30 d’aurì àl baldi plovü decà.
Ia por l’ann unse albü incuntades cun n studënt pachistan che stüdia a Balsan, cun le poet Christian Ferdigg che nes à fat gnì la vöia de porvè inće instësc da mëte adöm poesies y cun le campiun dai schi Manfred Mölgg d’Al Plan che n’es à cuntè de so laûr, de süa vita y dles gares. Inće i carabinieri é gnüs a nes ciafè, nia por nes sprigoré, mo por nes cuntè di prighi tl monn di jogn y dles regoles sön strada. Te n grup de ot scolars unse tut pert a na inscenaziun teatrala portan dant la scena ch’i ùn imparè ite cun n bel aplaus da pert di scolars. I ùn tratè le proiet cuntra le fomé y i sperun ch’al ne sides plü degügn fomadus dan scora da abiné. Le dé dl sport unse tignì a San Martin tl ćiamp de Pradel ai 29 de mà. 427