te Rutilio Escandón la sjach ta tojel te tak´inetik yun Bienestar

COMUNICADO/CHIAPA DE CORZO

Ta slumal Chiapa yun Korso, te ajwalil Rutilio Escandón Cadenas la sjach ta yak´el te stak´inal Programaetik Tak´in ta swenta te Bienestar yun te Me´elmamaletik sok te Tak´in ta swenta Bienestar yun te Mach´atik Mel Ayik ta Diskapasidad, te stak´inal yuil julio-agosto, ta swenta slekubtesel te jlumaltik sok pajal yich´el ta wenta te jlumaltik, yejtal te k´alal a jajchtel te Xchanebal Transformasión, te ajwalil yakal ta a´tel ta swenta skoltayel te mach´atik wokol ayik.

Jichyunabi, te ajwalil chiapaneko la spak´ sk´abyun te, ja´ wokolayalyun te yakal ta ak´el ta pajal te koltayel, k´uniltik yakal ta lekubel te xkuxinel te jlumaltik. Soknix la yal te, ja´ tey chikan ta ilel te yak´oj sk´op te muk´ul ajwalil Andrés Mayel López Obrador, te ya yich´ ich´beyelbel lekilal sok koltayel te mach´atik wokol ayik, te ya yich´ pukel ta pajal te stak´inal jlumaltik, lek yakal ta k´oesel ta pasel, ma´yuk stsael te mach´atik yakal ta koltayel.

“Te nailal ajwaliletik la yalik te ma stak´ skoltayik te jlumaltik, ta skaj te ma xlok´-a te tak´in; te orita ayix tul lekil muk´ul ajwalil yun te Repúblika, ay xk´uxul yo´tan sok lek yakal spukbel te tak´in pa´ ke ja´ ya staik te koltayel te mach´atik wokol ayik; teyuk-a te tulan sk´olal te koltayel-ito ta stoolik te me´elmamaletik, melel ja´ bayel spasojik tulan sok yak´oj sp´ijilik ta swenta slekubtesel te Méjiko sok te Chiapas”, xi la yal.

Te k´alal la yal te maba ja´ sbiil o slok´omba polítiko te Xchanebal

Transformasión, ja´ jun a´telil te yakal sk´oesbel ta pasel te bitik ya sk´anik te jlumaltik, te Escandón Cadenas la xcha´ yak´ sk´opyun te ya x-a´tejxanbel sok ya slekubtesxanbel te xkuxinel te jlumaltik. “Max a mel a wo´tanik, ya sk´oestik ta pasel, melel te ajwalil-ito pajal yakal yich´bel ta wenta te jlumaltik, ma spas lotil, ma x-elk´aj sok ya yich´ ta muk´ te slumal Méjiko sok te Chiapas”.

Jichek te delegado federal yun te Programaetik ta swenta te Bienestar ta Chiapas, José Antún Aguilar Castillejos, la xcholbey sk´olal te k´axem ta 412 mil ta tul te me´elmamaletik sok k´axem ta 82 mil ta tul te mach´atik ayik ta diskapasidad te yakal stajbelik te tak´in, te ja´ jun koltayel ta swenta te yakal spasbelik tulan ta slekubtesel te sme´ statik sok ja´ ta swenta slekubtesel te slumal Chiapas.

Soknix la yak´ ta na´el te ja´ bayel yakal stajbel koltayel yun programas sosialetik te slumal Chiapas, te yakal yak´bel te Ajwalil Federal, melel ay k´axem ta laju - neb xcha´ winik millones ta pesos yakal ta tuuntesel ta swenta skoltayel kol cha´ mil millones ta tul chiapanekaetik sok chiapanekoetik, soknix la yalbey wokolyun te ajwalil Rutilio

Escandón te yakal ta koltaywanej pa´ ke pajal ya staik koltayel te jlumaltik. Ta representasión yun te mach´atik la yich´ik koltayel, te Osay Sánchez Castillo la yalbey wokolyun te a´teltuuneletik te la yak´ik te Programaetik ta swenta te Bienestar, te ya skoltay te alnich´anetik, ch´ieletik, me´iletik te stukel ayik, te me´elmamaletik sok te mach´atik ayik ta diskapasidad, melel ja´ tey chikan ta ilel te Xchanebal Transformasión yakal ta pasel te Chiapas, te yakal slekubtesbel xkuxinel te mach´atik wokol ayik, xi la yal.