DE VIAXE POR ITALIA

Curso 2020/2021

CEIP Xoaquín Loriga

Volta ao Mundo en 80 Días Ola a todos e a todas! Neste curso os alumnos e alumnas de 3º imos realizar unha divertida e interesante viaxe seguindo a estela de Phileas Fogg na súa Volta ao Mundo en 80 Días e con el comezamos este percorrido. Procedente de París, o noso protagonista apéase na estación de Ferrocarril de Torino, en Italia, así que unídevos a nosa viaxe e animádevos a coñecer este marabilloso país.

Italia é un estado membro da Unión Europea, a súa forma de goberno é a República Parlamentaria. O seu territorio, en forma de bota, está dividido en vinte rexións formadas, á súa vez, por 106 provincias con capital en Roma. A súa economía, fundamentalmente está ligada ao turismo e na actualidade vese moi afectada por todo o que estamos a padecer a causa da pandemia do Covid19, xa que, aquí, igual que en España, hai moita poboación afectada.

Seguimos na loita, pero moi pronto todo isto rematará porque, xuntos e unidos venceremos.

Está cidade está situada ao Norte de Italia, na rexión do Piamonte, á beira do río Po e rodeada polos Alpes. Ten moitísimos atractivos turísticos, a súa catedral, interesantes museos, magníficas prazas, pero un dos máis importantes está relacionado co turismo de inverno e coa neve. Hai que lembrar que no ano 2006 tiveron lugar os Xogos Olímpicos de Inverno nesta rexión.

Tamén o ciclismo ten moita tradición e é habitual que no Giro de Italia, nalgunha das súas etapas pase por Torino.

Ao norte de Italia e preto de Torino, está Verona. Unha cidade medieval da rexión do Véneto, famosa por ser o escenario da traxedia romántica de "Romeo e Xulieta", obra literaria escrita por Willian Shakespeare, onde se narra a historia dun amor imposible entre dous mozos da nobreza cun desenlace moi triste e dramático. Esta é casa de Xulieta, unha residencia do século XIV, cun pequeno balcón, ao fronte a estatua de Xulieta e o muro dos namorados repreto de candeados, onde as parellas de mozos van selar o seu amor para sempre.

Noutra rúa pretiño desta está a casa de Romeo.

Outro monumento moi importante en Verona e “O Arena de Verona”, un enorme anfiteatro romano do século I, que actualmente acolle concertos a gran escala e representacións de ópera. É unha vila pequena, pero moi, moi fermosa.

Na rexión de Lombardía, Milano é unha das cidades máis grandes de Italia e nela atópase o monumento máis emblemático do país. O Duomo, o gran Duomo. Unha fermosa catedral que impresiona como poucas. É unha das igrexas católicas máis grandes do mundo que se di que caben ata 40.000 persoas no seu interior. A catedral de Milano chama a atención polo seu fermoso exterior, de estilo gótico, chea de pináculos e cuberta de mármore. No seu interior albergan altas columnas, tamén de mármore e obras de arte distribuídas por todo o templo.

E mesmo na praza do Duomo, As Galerías Vittorio Emanuele II reúnen a algunhas das marcas e firmas de moda máis importantes do mundo. O máis famoso é o Café Biffi por ser un dos establecementos máis antigos da cidade, pero igual de bonito como caro.

Esta cidade está situada ao nordeste de Italia, nun grupo de illas á beira do Mar Adriático. Foi declarada no seu conxunto patrimonio da Humanidade pola Unesco. Venezia tamén ten un rico patrimonio cultural e arquitectónico no que destaca sobre todo a praza San Marcos. Esta fermosa praza impresiona co seu deseño e o propio Napoleón definiuna como "a habitación máis fermosa de Europa". A basílica da praza é unha verdadeira marabilla da arquitectura bizantina. Diante, levántase o famoso campanile, símbolo da cidade que actúa como campanario e tamén se pode subir para admirar as fermosas vistas.

Un paseo en góndola polos seus canais é unha experiencia máxica que nos permite descubrir os recunchos máis fermosos da capital do Véneto, como é a ponte dos suspiros pola que cruzaban os prisioneiros e suspiraban fondamente por non volver ver o ceo e o mar da súa amada Venezia. O vaporetto é o medio de transporte mais empregado para transitar polo Gran Canal e admirar o Ponte de Rialto e por suposto as illas de Murano, Burano e Torcello moi pintorescas e moi bonitas. Outro dos reclamos turísticos desta fermosa cidade é o Carnaval de Venezia, e as súas famosas máscaras, verdadeiras obras de arte.

Esta cidade sitúase na zona central de Italia, na rexión da Toscana.

Firenze é unha cidade coñecida mundialmente polo seu patrimonio artístico e arquitectónico. O seu centro histórico foi declarado Patrimonio da Humanidade pola Unesco no ano1982.

Un dos monumentos máis importantes é a catedral, Santa María do Fiore, coñecida, sobre todo, pola súa cúpula, unha obra mestra renacentista deseñada por Filippo Brunelleschi.

Firenze foi un fervedoiro das artes no Renacemento, con artistas mudialmente venerados como Rafael, Leonardo da Vinci, Botticelli, Michelangelo, Brunelleschi e escritores como Dante, Boccaccio e Maquiavelo. Un atractivo moi importante da cidade é Ponte Vecchio. Esta é a ponte máis antiga e coñecida de Firenze. É de orixe medieval e foi a única que sobreviviu aos bombardeos nazis da Segunda Guerra Mundial. Actualmente é un dos símbolos máis recoñecibles desta cidade e un dos lugares máis frecuentados polos turistas.

Pisa é unha cidade da rexión italiana da Toscana. Entre os monumentos máis importantes da cidade atópase, na famosa praza dos Miracoli, declarada Patrimonio da Humanidade, a catedral e xunto a esta, está a sorprendente Torre Inclinada de Pisa, do século XII, de 58,36 metros de altura, que sufriu unha inclinación inmediatamente despois de comezar a construción. A razón pola que se inclinan tantos edificios en Pisa, especialmente altos e delgados como os campanarios, é a natureza pantanosa do terreo sobre o que se atopa a cidade, que en moitos casos cede co peso destes edificios.

Siena é unha das cidades medievais máis fermosas e máis coñecidas da Toscana. Ten unha fermosa praza, a Piazza do Campo, considerada como a máis bela de Europa. Nela celébrase O Palio, festa de orixe medieval onde compiten as distintas Contradas que veñen sendo os barrios da cidade, nunha carreira de cabalos, congregando a miles e miles de persoas. Este ano pasado, o 2020, por mor do Covid non puido celebrarse.

É a cidade con maior concentración de bens históricos e arquitectónicos do mundo e foi incluída na Lista do Patrimonio Mundial da UNESCO. Segundo conta a lenda, Roma foi fundada polos xemelgos Rómulo e Remo.

Estes, cando naceron e para salvalos, foron lanzados ao río Tíber nunha cesta que encallou na área dos sete outeiros, unha loba baixou beber o río, recolleunos e aleitounos no seu cubil, no outeiro do Palatino ata que finalmente foron atopados e rescatados por un pastor e a súa muller que os criou. De adultos, os xemelgos fundaron a cidade na marxe dereita do Tíber, no lugar onde foran recollidos pola loba, para ser os seus Reis.

Roma é unha cidade moi fermosa, con moitos atractivos turísticos como o Coliseo, onde se ofrecían espectáculos de loita gratuítos entre gladiadores e animais salvaxes, organizábanse batallas mitolóxicas e fixéronse simulacros de batallas navais. Eran espectáculos diúrnos, ao aire libre. Cada espectador ocupaba o espazo segundo a súa categoría dentro da sociedade romana; os asentos inferiores eran para o emperador e os senadores. Os peores lugares, estaban reservados aos escravos e as mulleres Outros monumentos importantes son a Fontana de Trevi, unha fonte barroca, monumental e moi bonita e se vas a visitala debes tirar unha moeda para asegurar que volverás outra vez a Roma.

O Panteón Romano, Os Museos Capitolinos, A Basílica e a Praza de San Pedro e os Museos Vaticanos onde se atopa a Capela Sistina, son outros reclamos turísticos para ser visitados e moi interesantes e fermosos.

Esta Cidade Italiana está situada na rexión da Puglia, na costa do Mar Adriático. É unha das cidades máis importantes desta rexión, coñecida como “Porta d’Oriente”, a porta de entrada do Leste, desde a antigüidade.

Brindisi é unha cidade turística e nos seus arredores podemos gozar dun dos principais espazos naturais da rexión e un importante centro termal, ademais destaca o seu impresionante "Castello Rosso", un castelo vermello que recibe o seu nome pola cor particular da súa pedra.

Brindisi converteuse nun porto importante para as tropas romanas, para os comerciantes venecianos máis tarde, e hoxe, o seu porto segue sendo unha importante conexión turística importante de Puglia.

Deste porto, Phileas Fogg parte rumbo a Suez e Bombay, en barco de vapor, o Mongolia, iniciando a súa segunda etapa da Volta ao Mundo en 80 días.

Despedimos a Phileas Foog, animámolo para que continúe a súa viaxe e gañe a aposta, pero ti non marches, continúa con nós para coñecer algunhas curiosidades máis de Italia.

Italia é un país de volcáns. Ningún outro país de Europa ten tantos como Italia. Hai tres moi coñecidos que son o Etna, O Stromboli e o Vesubio.

En Italia, na localidade de Fano, está ubicada a primeira cidade dos nenos, ideada por Tonucci e na que os rapaces colaboran coa alcaldía aportando ideas e presentando as súas propostas para que haxa máis espazos públicos onde xogar, máis puntos verdes e tamén máis zonas peonís, para favorecer aos máis pequenos e as persoas con discapacidade. Tonucci di que se hai nenos hai seguridade e a cidade de Pontevedra trata de imitar a esta Cittá dei bambini.

Sabías que Italia é o país de Vivaldi, Galileo, Marco Polo, Cristóbal Colón Verdi, María Montessori, Sofía Loren, Fellini, Pavarotti... e moitos máis.

En Roma hai unha escultura famosa que se chama a Boca da Verdade e a persoa que conta mentiras e mete a man dentro pode quedar sen ela.

En Italia hai un pobo con sol artificial, Viganella. Está na rexión do Piamonte, rodeado de montañas, polo que tiveron que idear un espello xigantesco para proxectar a luz solar, especialmente nos meses de inverno.

Unha das maiores curiosidades de Italia é os dereitos outorgados aos gatos. Calquera persoa por matar un gato podería ser condenada a pagar unha multa de 10.000 € e ata 3 anos de prisión. Incluso un gato no ano 2011 herdou unha fortuna de 10 millóns de euros e converteuse no terceiro animal máis rico do mundo.

Italia é un país que ten dous países máis no seu interior: A república de San Marino e a Cidade do Vaticano. Son moi fermosos.

Neste país hai moitos terremotos e o número 13 e o 17 son considerados números que dan moi mala sorte.

A gastronomía de Italia caracterízase polas súas elaboracións con abundantes vexetais, froitas, carne, peixe, arroz, pasta e pans. Algúns dos seus pratos típicos son a pizza, a pasta e o risotto. Entre as sobremesas tradicionais temos xeados, máis coñecidos como xelado, o tiramisú e a Baba de Nápoles.

Así que quedades todos e todas convidados a un gelato de pistacho e a visitar este fermoso país.