PUMPERNICKEL – RAPRESCHANTAZIUN

Da Musica E Sot

I’ l ram dal festival Resonanzen ho gieu lö dals 19 – 23 settember 2022 suot la direcziun da la Pumpernickel Company cun Norbert Steinwarz, Olivier Membrez ed Alex Wäber ün lavuratori tuot speciel. Var 60 scolaras e scolars da la scoulina fin tar la seguonda classa da Silvaplauna e Segl haun exercito cun la Pumpernickel Company e las musicistas Cornelia Dämmer e Tabea Schwartz per üna rapreschantaziun da musica e sot. Da lündeschdi fin gövgia es gnieu treno per adüna ün’ura e mez in gruppas sepparedas tenor vschinaunchas. Il zievamezdi da las 13.30 fin 15.00 h haun gieu lö las prouvas cumünaivlas. A gniva suto, chanto, fat musica e ris. L’inspiraziun pel lavuratori d’eira il term «la folia» chi vain druvo suvenz in connex cun la musica barocca e chi po gnir circumscrit il meglder cun «allegria be murbigns». Quist’allegria haun pudieu exprimer ils iffaunts cun lur muvimaints da sot ed instrumaints. A la fin haun els pudieu preschanter ün töch ch’els haun s-chaffieu svess. «Nus vulaivans ragiundscher ün sentimaint dad orizi», disch Olivier Membrez sur da l’ouvra.

Il cumanzamaint da l’orizi es gnieu simboliso cun musica mistica, suneda bod dad ot, bod da bass cun bachettas chi tunan. Cun pels da paucas, craunzs da s-chellas, üna granda folia da plastic e flötas s’ho pruvo da musser la plövgia, il vent, las sajettas e’ls tuns da tschêl. Apaina cha la musica, scritta aposta per quist töch e suneda cun üna flöta ed üna teorbe, ho cumanzo, s’haun furmos ils iffaunts in üna fuorma da spirala. In differents möds – currind, saglind u struzchand – as muvaivan els i’l tact da la musica ed haun intuno in seguit ün canon cul titul «Alle, allez, allegra». In venderdi bunura haun pudieu visiter las classas otas da Silvaplauna e Segl la prouva principela. Als 23 settember a las 18.00 h d’eira finelmaing cò il grand mumaint. Ils iffaunts haun preschanto lur töch a lur confamigliers. Cun quista rapreschantaziun gratageda es ida a fin ün’eivna da proget zuond interessanta e divertenta.