OBSERVAZIUNS DA LA NATÜRA 2022

SCHNER

L’an nouv cumainza cun ün di da bell’ora. Las temperaturas sun otas per la stagiun. Bgera glieud in val s’allegra sur da var 10 cm naiv als 5 schner. La naiva porta il fraid, -12 gros als 12 schner e la val tuocha per granda part darcho be als indigens. Il mais schner resta cun bell’ora, pocha naiv, per granda part cun temperaturas agreablas in algordaunza. La Svizra dal süd patescha d’üna granda süttina – in media 1.5 gros pü chod.

FAVRER

Il mais ans porta la naiv. Eir scha que do uschigliö dapertuot bod ün mez meter, ans allegrains sur da var 20 cm als 2 favrer. Als 7 favrer vegnan tiers var 10 cm ed ün ferm vent dal Güglia. Las temperaturas sun variablas, ma agreablas. Las cuorsas da chavals sül Lej da San Murezzan haun lö. Aunch’üna vouta naiv, var 15 cm als 15 favrer. Üna fasa cun temperaturas memma chodas portan dafata ün pêr guots da plövgia als 18 favrer. Il cu- manzamaint da la guerra in Ucraina schocca il muond. La fin dal mais, als 27 favrer evra finelmaing la pista dal Lej dals Chöds per la prüma vouta quista stagiun; però aunch’adüna cun pocha naiv e bger vent dal nord.

MARZ

Ils iffaunts festageschan Chalandamarz cun bell’ora; ad es però fraid. Il maraton ho lö cun var 11’ 000 partecipants e partecipantas als 12 marz cun bunas cundiziuns sün pistas perfettas. Als 15 marz clama il püf our dal Vallun dal Güglia e porta als 16 marz la puolvra da Sahara fin tar nus. Silvaplauna as chatta in üna glüsch melna diffusa mellna e la naiv es cuvrida cun ün tapet cotschen. Aunz cha pudains giodair darcho fich bels dis d’inviern cuverna üna tschiera spessa scu a Londra sur not nos cumün.