Fimm verktakar vilja koma að smíði nýrrar brúar yfir Ölfusá

Fimm verktakar vilja taka þátt í samkeppnisútboði Vegagerðarinnar vegna smíði nýrra brúar yfir Ölfusá. Þrír þeirra eru erlendir, einn er íslenskur í í samvinnu við erlenda aðila og einn verktaki er íslenskur. Þetta er upphaf útboðsferlisins og í kjölfarið fer fram hæfismat og þeim sem metnir eru hæfir verður boðin þátttaka. Vonast er til að samningar náist á þessu ári.

Eftirtöld fyrirtæki sóttu um þátttöku í útboðinu: Hochtief Infrastructure

GmbH, Essen í Þýskalandi, IKI

Infrastructure Systems Co., Ltd, Tokyo í Japan, Ístak hf., – Per Aarsleff A/S –Freyssinet Int., fyrir hönd óstofnaðs félags í Reykjavík, Puentes y Calzada Infraestructuras, S.L.U. á Spáni og ÞG verktakar ehf. í Reykjavík

Fram kemur að Vegagerðin óskaði í byrjun mars á þessu ári eftir þátttakendum í samkeppnisútboð vegna smíði brúarinnar ásamt því að leggja aðliggjandi vegi og vegamót, smíða brýr og grafa undirgöng. Um er að ræða samkeppnisútboð á grundvelli laga um opinber innkaup þar sem beitt verður hæfismiðuðu vali og þeim fyrirtækjum boðið til þátttöku sem metin verða hæf á grundvelli útboðsauglýsingar. Stefnt er á að framkvæmdum við smíði Ölfusárbrúar ljúki árið 2026.

Útboðið var auglýst á Evrópska efnahagssvæðinu

Verkið snýst um færslu Hringvegar (1) út fyrir þéttbýlið á Selfossi. Meðal helstu verkþátta eru nýbygging 3,7 km Hringvegarins, smíði nýrrar 330 m langrar stagbrúar á Ölfusá og um 1 km af öðrum tveggja akreina vegum. Gera þarf ný vegamót við Hringveg austan Selfoss, undirgöng undir veginn fyrir gangandi, hjólandi og hestamenn ásamt undirgöngum fyrir bíla og gangandi. Einnig er gert ráð fyrir lögnum veitufyrirtækja.

Markmiðið með framkvæmdunum er að auka umferðarrýmd, aðskilja akstursstefnur og bæta umferðaröryggi

Brúin verður 330 metra löng stagbrú með 60 metra háum turni á EfriLaugardælaeyju. Brúargólf verður 19 m breitt og er gert ráð fyrir 2+1 vegi með aðskildum aksturstefnum ásamt göngu- og hjólaleið. Einnig er gert ráð fyrir göngu- og hjólaleið undir brúna á báðum árbökkum, steyptum endastöplum, brúargólfi með stálbitum og steyptu gólfi og turni úr stáli. Við forhönnun brúarinnar var miðað við aðstæður á svæðinu þar sem búast má við bæði jarðskjálftum og flóðum. Í brúnni er gert ráð fyrir jarðskjálftaeinangrun og forspenntum bergfestum í undirstöðum turnsins.

Helsta breytingin sem verður við þessa framkvæmd er að Hringvegur (1) styttist um 1,2 km og ferðatími styttist að lágmarki um fjórar til fimm mínútur. Einnig mun greiðast úr þeim umferðarteppum sem oft hafa skapast við gömlu Ölfusárbrúna. Framkvæmdin fer um tvö sveitarfélög, Flóahrepp og sveitarfélagið Árborg. Vegagerðin hefur sótt um framkvæmdaleyfi til þeirra beggja.

Áætluð umferð um brúna við opnun er um fjögur til fimm þúsund ökutæki á sólarhring. Þá verður umferð þyngri ökutækja ekki leyfð á gömlu brúnni þegar sú nýja hefur verið tekin í notkun.

Rafskútuleigur í París heyra sögunni til. Þetta var ljóst eftir niðurstöður í atkvæðagreiðslu sem íbúar Parísar tóku þátt í. Samningar við rafskútufyrirtæki verða ekki endurnýjaðir. Bannið mun ekki ná til rafskúta í einkaeigu en rafskútur til leigu hafa notið mikilla vinsælda og þótt góður ferðamáti.

Dræm þátttaka var í atkvæðagreiðslunni en alls tóku 103 þúsund manns þátt í henni. Af þeim greiddu 91.300 atkvæði með banninu.

Mörg alvarleg slys hafa orðið á rafskútum og er sú ástæða að baki því að ekki verður hægt að leigja rafskútur lengur í París og einnig hafa borist kvartanir frá vegfarendum. Enn fremur má nefna að ökumenn þeirra nota ekki hjálma og fráleitt sé að börn innan við 12 ára aldur hafi mátt leigja þær. Hörð viðbrögð urðu fyrir tveimur árum þegar kona lést eftir að tveir einstaklingar á einni rafskútu óku hana niður.