Hvað er E10 eldsneyti og hvaða áhrif mun

Fram hefur komið í fjölmiðlum að neytendum stendur nú ekki til boða annað 95 oktana bensín en svokallað E10 sem býr yfir 10% etanólblöndu. Hvorki var aðdragandi að þessum breytingum á vöruvali né kynning veitt til að upplýsa neytendur. Fjölmargir bifreiðaeigendur hafa haft samband við skrifstofu FÍB og segja að þessi breyting hafi komið þeim í opna skjöldu. Getur verið að yfirvöld neytendamála á Íslandi hafi enga aðkomu haft að þessum breytingum á innihaldi 95 oktana bensíns sem allir viðkomandi bifreiðaeigendur verða nú að kaupa? Svona vinnubrögð vekja furðu á upplýsingaöld.

Sagt er að markmiðið með því að bjóða upp á E10 staðalbensín á bensínstöðvum sé að draga úr losun gróðurhúsalofttegunda vegna bensínbruna. RÚV hafði eftir Þórði Guðjónssyni forstjóra Skeljungs þann 14. maí sl. að samdráttur í kolefnislosun frá samgöngum á landi samsvaraði því að leggja allt að átta þúsund bensínbílum.

Auðvitað er jákvætt að draga úr kolefnislosun frá samgöngum en að bjóða einhliða nánast eingöngu upp á E10 bensín hefur í för með sér erfiðar áskoranir. Í Bretlandi er áætlað að um 600.000 ökutæki í umferð geti ekki notað E10 eldsneytið. Ekki er vitað hver þessi tala er hér á landi en varlega áætlað, miðað við bresku tölurnar, gæti verið um að ræða einhverja tugi þúsunda ökutækja. Margir þessara bíla eru í eigu þeirra sem minna fé hafa milli handa. Í sumum tilvikum er eini valkosturinn að nota 98 oktana bensín sem er mun dýrara og til sölu á fáum bensínstöðvum, aðallega á höfuðborgarsvæðinu og Akureyri. Í nágrannalöndum okkar geta neytendur einnig keypt E5, 95 oktana bensín og 98 oktana bensín.

Hvaða bílar

Að jafnaði er ökumönnum bifreiða sem nýskráðar voru fyrir árið 2002 ráðlagt að nota ekki E10 á bifreiðar sínar. Frá og með 2011 eiga allir nýir bílar á Íslandi að vera E10 samhæfðir. Upplýsingar um notkun á E10 eftir bílategundum er hægt að nálgast inni á heimasíðu FÍB

Vandamál

Þegar E10 eldsneyti er sett á bíl sem ekki er gerður fyrir 10% etanólbensín mun hann fyrst um sinn ganga en þéttingar, plast og málmar geta skemmst á lengri tíma vegna ætandi eiginleika lífetanóls. Rakaþéttni eykst en það getur verið til vandræða í eldsneytistönkum og víðar ef bíllinn stendur ónotaður í langan tíma.

Eigendur fornbíla þurfa að vera sérstaklega á varðbergi varðandi það að fylla ekki óvart með E10 því að það mun líklega leiða til skemmda nái það að liggja í bensíntanki bílsins um lengri tíma.

Sérfræðingur frá systurfélagi FÍB á Bretlandseyjum segir að fólk sem fylli óvart á bíla sem ekki uppfylli kröfur fyrir E10 þurfi ekki að örvænta. Það þarf þá að setja rétt eldsneyti á bílinn eins fljótt og auðið er eða þegar búið er að nota um þriðjung til helming bensíns. Blandaða bensínið getur þó valdið lélegri kaldræsingu og grófari gang.

Aukin eyðsla

Etanólblandað bensín hefur minna orkuinnihald. Bandaríska orkustofnunin (EIA) segir að það sé með 33% minna en orkuinnihald 95 oktana bensíns. Áhrif etanóls á eldsneytissparnað ökutækja er einnig mismunandi eftir magni þeirra náttúruefna sem bætt er við etanólið. EIA segir að almennt geti sparneytni ökutækja minnkað um 3% þegar E10 er notað. Sjá nánar (https://www.eia.gov/tools/faqs/faq.php?id=27&t=10)