B’Ħeġġa Żagħżugħa

Ryan Micallef Sezzjoni Żgħażagħ Iljuni

Insellem minn qalbi lilkom il-partitarji kollha tasSoċjetà Filarmonika San Pietru Banda Birżebbuġa f’dan l-ewwel messaġġ tiegħi bħala l-President tas-Sezzjoni Żgħażagħ Iljuni. Jien ninsab kuntent ħafna li kelli ċ-ċans nifforma parti minn din is-sezzjoni żagħżugħa għaliex nemmen illi aħna ż-żgħażagħ għandna ħafna enerġija u ideat x’noffru lejn il-każin u l-komunità ta` Birżebbuġa.

Sfortunatament, din is-sena l-affarijiet ma mxewx mal-pjanijiet, u ma stajniex norganizzaw l-attivitajiet li kellna f’moħħna. L-għan ta’ dawn l-attivitajiet ikun li ningħaqdu flimkien, nieħdu gost u naħdmu b’ħeġġa żagħżugħa ħalli jkollna festa mill-isbaħ. Madankollu, xorta waħda qed nibqgħu nagħmlu ħilitna kollha sabiex nilħqu l-aħjar riżultat possibbli fis-sitwazzjoni li qegħdin ngħixu llum.

Grazzi lil dawk kollha li jagħtu ħinhom għall-każin u dawk kollha li għandhom għal qalbhom ir-raħal tagħna ta’ Birżebbuġa u lill-patrun maħbub tagħna, San Pietru Appostlu.

L-akbar grazzi tmur lill-membri tas-Sezzjoni Żgħażagħ tal-ħin u x-xogħol illi dejjem jagħmlu, u dan minkejja diversi impenji oħra tagħhom. Inħeġġeġ aktar żgħażagħ jingħaqdu magħna biex inkomplu naħdmu flimkien.

Ejjew nibqgħu magħqudin kif aħna ħalli billimitazzjonijiet kollha, nagħmlu festa mill-isbaħ lil San Pietru Appostlu, il-patrun illi lkoll tant inħobbu.

Is-Soċjetà Filarmonika San Pietru Banda Birżebbuġa toffri tagħlim tal-mużika fit-teorija u l-prattika bla ħlas. Ikkuntattjaw xi membru mill-Kumitat Ċentrali għal aktar informazzjoni