Uđđâ anarâškielâg aavis

Anarâškielâ servi lii vuáđudâm uđđâ anarâškielâg aavis, mon nommân lii šoddâm Anarâš aavis. Tot almostuuškuođij njuhčâmáánu 6. peeivi 2023. Anarâš aavis lii digitaallâš aavis, mon puáhtá luuhâđ nuuvtá fastâ liiŋkâst: www.anarasaavis.fi. Tast ij rahtuu päviraavis ollágin. Mun poorgâm aavis váldutoimâtteijen, já toimâttâhkoodán kulá muu lasseen Marja-Liisa Olthuis. Ađai uđđâsij toimâttem lii algâttum uccáá navcâiguin, mut puátteevuođâst juávkku vissásávt-uv vijđán. Aavis almostitmáin servi tuáivu, et tot pastaččij pyerebeht ovdediđ anarâškielâ luuhâm- já čäällimkulttuur, mii majemui iivij lii lamaš seervi tooimâ váldu-ulme.

Aavis almostit uđđâsijd, moh kyeskih Sáámán, Suomân, Skandinavian, Euroopân já ubâ maailmân, ađai tot aldan uđđâsijdis tááhust stuárráábij kielâi aavisijd. Aalgâst aavis ij kuittâggin val peividuu tagaráin intensiteetáin ko eenâblovokielâ aavis, main lii stuárráb toimâttâs. Aavisist uđđâseh juáhhojeh čuávuváid kategoriaid: “Almugijkoskâsiih uđđâseh”, “Ekonomia”, “Kielâ”, “Kulttuur”, “Páiháliih uđđâseh”, “Politiik”, “Suomâ”, “Tieđâ”, “Ulmuuh” já “Valastâllâm”. Uđđâ kategoriah pyehtih lasettuđ aaigij mield. Uđđâsijd lii máhđulâš kommentistiđ. Jyehi uđđâs maŋa lii loová, moos puáhtá čäälliđ jieijâs kommentijd. Aavisist lii meiddei uđâsarkkâdâh, mon peht piäsá luuhâđ puáris uđđâsijd.

Anarâškielâ servi áigu uuccâđ ruttâdem aavis várás Suomâ máttááttâs- já kulttuurministeriöst vyesimáánust 2023. Vaidâlittee kale tuše uđđâsij čälimáin aavisân ij finnii ruttâdem. Tot taarbâš meid nk. “toimâttuvlijd” čalluid ađai ovdâmerkkân uáivilijd, blogijd, persovnsahhiittâlmijd, äigikyevdilis aašijd kommentistee njunoščalluid jna. Taan iävtu tiet uđđâsij lasseen aavisist lii meiddei Sahâvuáruh-nommâsâš uási, mii tääl siskeeld tagarijd kategoriaid ko “Blogih” (“Aanaar argâ”, “Kielâblogi” já “Luándublogi”), “Kirjeárvuštâlmeh”, “Njunoščalluuh”, “Sahhiittâlmeh” já “Uáivilčalluuh”. Taat-uv valjiittâh puáhtá vijđeduđ aaigij mield. Ministeriöst lii nubbe-uv iähtu: sijđostâh ferttee pei- viduđ aainâs-uv kulmii ohhoost. Taat vissásávt-uv luhostuvá, já mun jiešalnees oskom, et puátteevuođâst uđđâseh já eres čalluuh lasettuvojeh aavisân eenâb ko tuše kulmii ohhoost.

Servi tuáivu, et lohheeh aktiivlávt uásálistáččii uđđâsij já sahâvuárui čokkiimân já čälimân. Toimâttâh lii kal tietimin, et ulmuuh iä lah hárjánâm luuhâđ já čäälliđ anarâškielân siämmáá ennuv ko suomâkielân. Toimâttâh pasta kuittâg tipšođ kielâlávt toos fallum anarâškielâlijd čalluid. Mij tarbâšep eromâšávt njunoščalluid já uáivilčalluid. Toimâttâh mielâstis váldá vuástá meid blogičalluid. Jis tun halijdah išediđ seervi já čäälliđ aavisân, te vääldi ruokkâdávt ohtâvuođâ munjin čujottâsân fabrizio.brecciaroli@ gmail.com . Oovtâst mij pyehtip rähtiđ šiev já luvâttettee aavis!