Ggaffi mit Schuss

Es chunnt vor, dass öppis passiert, u niemer weis warum. Aber das isch en angeri Gschicht.

Är bsteut es «Ggaffi mit Schuss», auso eis mit scharfem Schnaps, nimmt paar Schlück, schrysst plötzlech e Pischtole us em Hosegurt … ziet ab – u «Paff!» – «Paff!» – «Päng!» … knaueret di lääre Gleser, wo – wi Soudate bim Aaträtte – i Reih u Glied im Gsteu stöö, i tuusig Schärbi. U de erlediget er no grad drei vou Bierhümpe uf em Büffee. Der Chrage platzt nid nume em Bier, wo itz nümm schuumet … u a Bode tropfet u pflotschet u glungget. D Serviertochter steit bleich u mit weiche Chnöi ir Gaschtstube, wo si mit eme füechte Lumpe grad e Tisch abhudlet. D Wirti, wo vor Chuchi uus zueluegt, macht grossi Ouge u schlaat verduzt d Händ über em Muu zäme. Isch eifach sprachlos … Teu Gescht hei sech unger Tische gflüchtet. Sy eifach abtoucht. Me weis ja nie, was no aus passiert! We itz niemer öppis ungernimmt, mues me aanäh, dass Bluet fliesst, u di ganzi vertrouti Gaschtstubegmüetlechkeit i luter Schärbi versplitteret. Die am Stammtisch näh der Stumpe, Pfyffe, Zigarillo, Zigarette u der Sargnagu us em Muu, u sy sech einig: «Itz längts! – Der Schuss isch duss u gnue Höi dunger!» Si stöö wi uf Komando uuf, der schiesswüetig Schütz chehrt sech, o wi uf Komando um, u zilet uf syner Gägner. «Chrieg ir Beiz!» wär auä di passendi Schlagzyle für d Sensations-Press. D Wirti düüsselet us der Chuchi u ziet däm mit der Pischtole vo hinger di schwäri Gussisebratpfanne über d Rüebe. – «Pännnng!» … tönts, wi we d Glogge im Chiuchturm eis schlaat – u macht dä Uflaat manöverierunfähig. U de isch es plötzlech muggsmüüsli stiu.

Nume der Gugger schneut wi pfickt us sym Versteck im Guggerzytli ar Gaschtstubewand u guggeret zäh Mau «Guggugg!» – «Guggugg!» – «Guggugg!» … «Mattäi am letschte!» seit dä mit em Stumpe zwüsche Mittufinger u Zeigfinger, wo itz grad e schöni, längi, graui Äschestange abbrösmelet, u wo de, wi nes gfährlechs rots Oug lüüchtet u ir Fyschteri umegschpängschtet, wiu d Serviertochter ir Ufregig ds Liecht glösche het. Totestiui! – U de chiichigs Schnuufe u häus, metauigs «Klick-Klacke» … Wo ds Liecht ume aageit, ligt dä mit der Pischtole ohni Pischtole, derfür mit föif Sackhegle im Ranze, am Bode u streckt aui Vieri vo sech. Itz ziet jede sy Hegu us em Buuch vo däm Uflaat, putzt di bluetegi Klinge süüferli am Nastuech ab, klappt ds Mässer süüferli zue, u versorgets süüferli – fasch wi wes öppis Wärtvous oder Heiligs oder äbe es «Corpus delicti» – wär, im Hosesack. – Was itz? Was passiert isch, cha me nid ungscheh mache. Wi chönnt me dä ohni Ufseh la verschwinde? Dä mit der Zigarillo het d Idee mit der Kadaversammusteu. Dä mit der Pfyffe meint, me chönnt ne imene Bschüttloch la versuuffe. Dä mit der Zigarette fragt: «Warum ne nid hinger der Beiz i ds Bachtobu achegheie?» Dä mit dem Stumpe im rächte Muulegge chüschelet chyschterig: «Notwehr!» Dä mit em Sargnagu schlaat vor, der Polizei aazlüte. Heja, ihne chönn me doch ke Vorwurf mache. Das syg doch nüüt angesch aus «Notwehr» gsi! Me steu sech einisch das Bluetbad vor, we dä wyter um sech püuveret hätt! D Gaschtstube het d Deckig ufggä. Niemer me huuret unger emne Tisch, u me isch sech einig: «Notwehr!» – Sanitäter trage de der Haubtot uf ere Bahre i ds Outo vom Rettigsdienscht u fahre mit Düüdää-Ghüu dervo. Der Polizeihouptkommissar chunnt zrugg i Gaschtstube u danket dene tapfere Manne, wo

dä us em Gfängnis türmt, mehrfach vorbestraft Delinquänt so muetig bodiget hei. D Wirti spändiert e Rundi «Ggaffi mit Schuss», u de läärt sech Gaschtstube naadisnaa. Di füf Sackheguheude styge i ds Outo vo däm, wo geng no am Stumpe sugget, wo itz im lingge Muulegge hanget. Dä git Gas, us em Outoradio plääret em Hazy Osterwald-Sextett sy «Gassehouer», u d Heude johle u grööle u holeie übermüetig: «Kriminal-Tango in der Taverne, dunkle Gestalten und rotes Licht. Und sie tanzten einen Tango, Jacky Brown und Baby Miller …» – I de Nachrichte wird über e Fau vom syt Tage gsuechte Usbrächer-Mörder bbrichtet. U de weis di ganzi Schwyz, dass es no e guraschierti Wirti u muetegi Manne git.

Kennet Dihr o so muetegi, tapferi u bravi Froue oder Manne? Was hei die gmacht oder voubracht oder gleischtet? Bewundert Dihr guraschierti Lüt? Verzeuet: