Af hverju er svona mikilvægt að tryggja sig?

Ég greindist fyrir fjórum árum þá 30 ára með krabbamein í eista sem var búið að dreifa sér víða eins og í eitla, lungu og kviðarhol. En það algjörlega bjargaði mér að tala við annan sem ég þekkti um krabbameinið og að vera með líf- og sjúkdómatryggingu frá VÍS. Þá gat ég einbeitt mér að batanum og þurfti ekki að hafa áhyggjur af fjármálunum líka. Það gekk vel að fá út úr sjúkdómatryggingunni og ég vissi að ég væri svo ekki lengur tryggður fyrir krabbameini eftir að ég nýtti hana. En hins vegar fékk ég svo að vita að ég var alveg tekinn út úr sjúkdómatryggingunni þar sem þau breyttu einhverju hjá sér án þess að láta mig vita.* Ég er náttúrulega mjög fúll yfir því og mun ábyggilega skoða að færa mig en ég þarf að vera búinn að vera fimm ár krabbameinslaus til að geta tryggt mig annars staðar. Ég hefði aldrei viljað ganga í gegnum þetta án trygginga. Það hefði ekki verið á það bætandi að vera með áhyggjur af fjármálum og enda t.d. húsnæðislaus. Það er bláköld staðreynd að það er drulludýrt að vera veikur. Það kostar alltaf smá að tryggja sig. En þetta er peningur sem virkilega skiptir máli að fá til baka úr tryggingunum ef þú veikist og breytir hreinlega öllu fyrir þig. Þú getur einbeitt þér að sjálfum þér og þarft ekki að hafa áhyggjur af neinu öðru – bara að koma þér í gegnum þetta.

Það er sterk fjölskyldusaga hjá mér um brjóstakrabbamein og ég hafði verið tryggð hjá Sunlife tryggingafélaginu frá 18 ára aldri en þar var brjóstakrabbamein undanskilið. Við færðum okkur svo yfir í TM en þar er brjóstakrabbamein líka undanskilið vegna fjölskyldusögunnar. Í nóvember 2018 hringdi svo tryggingaráðgjafi frá Novis í okkur en það er slóvenskt tryggingafélag með útibú hér á landi og við fluttum trygginguna þangað. Ég greindist svo í janúar 2020 og fékk allt út úr tryggingunni því ég greinist fyrir 65 ára aldur. Ég verð áfram tryggð hjá þeim fyrir öllu nema brjóstakrabbameini því ég er búin að taka þá tryggingu út. Það gekk hratt og örugglega að fá út úr tryggingunum. Nú á ég eftir að fara í fyrirbyggjandi aðgerð en ég ætla að láta taka eggjastokka og eggjaleiðara og mun vera tryggð fyrir því líka. Þegar ég ræddi tryggingar síðar við krabbameinslækninn minn sagði hann að t.d. í Þýskalandi væri bannað að mismuna fólki í tryggingum vegna fjölskyldusögu. „Það skiptir öllu máli að vera tryggður. Þú veist aldrei hvað getur komið upp á, slys jafnt sem veikindi. Það eru alls ekki allir sem eru með fjárhagslega sterkt bakland. Við erum t.d. að fara ganga frá tryggingunum fyrir 19 ára gamla strákinn okkar því nú fellur hann ekki lengur undir fjölskyldutrygginguna og við viljum að hann sé tryggður.

Ég er með BRCA-genið og greindist 2017 þá 33 ára með brjóstakrabbamein sem var komið út í eitla. Ég var með líf- og sjúkdómatryggingu í gegnum Swiss life sem Landsbankinn var með. Þegar ég var tvítug flutti ég til Reykjavíkur og keypti íbúð. Okkur var ráðlagt af bankanum að kaupa líka líf- og sjúkdómatryggingu hjá þeim sem við gerðum. Ég var svo ung að ég var ekki einu sinni að skoða hvað væri á bak við trygginguna. Þegar ég veikist svo og fór að sækja um trygginguna þá fékk ég skilmálana senda sem ég var náttúrulega löngu búin að týna. Þá kemur í ljós að ef krabbameinið hefði ekki verið búið að dreifa sér þá hefði ég ekki fengið sjúkdómatrygginguna greidda. Þar sem allt fór vel hjá mér þá er ég því í raun heppin eftir á að krabbameinið var búið að dreifa sér því annars hefði ég ekki fengið neitt út úr sjúkdómatryggingunni. Nú er ég hins vegar ekki lengur tryggð fyrir neinum sjúkdómum eftir að hafa leyst hana út þegar ég fékk krabbameinið.“ „Það er alveg gríðarlega mikilvægt að tryggja sig því þótt þú veikist þá fara lán og aðrir reikningar ekkert í biðstöðu. Ég var t.d. nýbyrjuð að vinna eftir fæðingarorlof og var sjálfstætt starfandi og launþegi í lítilli starfsprósentu á móti með lítinn veikindarétt. Ég veit ekki hvernig þetta hefði endað fjárhagslega ef ég hefði ekki verið með sjúkdómatryggingu.

Ég greindist með hvítblæði fyrir tveimur árum og var ekki tryggð. Málið er að ég fæddist með sjaldgæfan sjúkdóm, sem gerir það að verkum að hvítu blóðkornin mín eru gölluð og því hef ég aldrei getað líf- eða sjúkdómatryggt mig. Út af þessum sjúkdómi er ég öryrki en hef þó getað klárað háskólanám og unnið hlutastarf. Þegar ég greindist með hvítblæði var ég nýlega hætt að vinna vegna veikinda. Nokkrum mánuðum eftir greininguna lendi ég á spítala og þurfti að fara í margar stórar aðgerðir sem ég er enn að jafna mig á. Í dag er ég á örorkubótum og fjárhagslega staða mín er ekki góð. Nú er strákurinn minn orðinn 18 ára og því fæ ég ekki lengur barnabætur þó hann búi hjá mér. Ég bý í félagslegu húsnæði og á ekki bíl. Meginpartur af örorkubótunum fer í leiguna og mat fyrir okkur en ég veit ekki hvernig ég færi að ef ég fengi ekki stuðning frá foreldrum mínum. Það er náttúrlega ömurlegt að þrátt fyrir að maður sé kominn á þennan aldur að maður geti ekki verið sjálfstæður fjárhagslega og það gerir ekki mikið fyrir sjálfstraustið. Ég sé ekki fyrir endann á þessu hjá mér. Ég myndi tvímælalaust líf- og sjúkdómatryggja mig ef ég gæti það.

Ég greindist árið 2017, þá 25 ára með lymphoma krabbamein (eitilfrumuæxli). Ég var því miður ekki tryggð því ég er óvirkur fíkill og alkóhólistar fá ekki líf- og sjúkdómatryggingu fyrr en þeir hafa verið edrú í fimm ár. Ég var búin að vera edrú í 5 ár og 6 vikur þegar ég greindist með krabbamein. Ég var búin að skrifa það í dagbókina að hafa samband við tryggingafélög en ég var því miður of sein. Ef ég hefði sótt strax um þá hefði fjárhagsstaðan mín orðið allt önnur og sömuleiðis andleg heilsa. Ég hefði nefnilega nýtt peninginn mikið í sálfræðimeðferð. Ég lifði í raun á loftinu fyrsta árið þar sem ég þurfti að bíða svo lengi eftir að fá örorkutryggingu. Ég var nýkomin á vinnumarkaðinn og hafði engin réttindi en gat ekki unnið því ég var svo veik. Maður má líka bara nýta 36 mánuði í endurhæfingu á lífsleiðinni og ég hafði þegar nýtt mér það svo þetta var allt í klúðri. Um leið og sambýlismaður minn flutti inn þá tryggðum við hann því við myndum aldrei þola fleiri svona bakslög. Ég er með risastóran tryggingarpakka hjá VÍS en svo líka með viðbótartryggingu hjá banka/tryggingarfyrirtækinu NOVIS sem er eins og söfnunarreikningur sem hjálpar mér ef ég lendi t.d. í slysi og við stefnum á að hækka þá tryggingu.