Makinilya Tak! Tak! Tak! lakatak ng nakikidigmang utak itong makinang sa paglakatak ay ‘di mapigilan itong makina na handog ay mga titik na sintalas ng tabak itong makinang sa bawat pitik ng daliri ay handang itatak sa puting papel ang ganda’t sining na mapangwasak itong makina ng mga titik na minsa’y pinaglaanan ng panahon ni Camus makina ng mga titik na kayang palayain ang milyun-milyong nasadlak na katawan at utak. August 19, 2015
Sublimidad Inaantok na ang utak patulog na ang utak ngunit dinig ng may malay na utak ang ‘alang katapusang tiktak- tiktak ng mundong may aboridong utak at pawis na kulay dugong pumapatak. Agosto 4, 2013
Tutubi Lipad lipad lipad nang buong giting sa malawak na papawirin sikapin mong tawirin ang lambak ng sementadong haligi mag-ingat ka’t sa gilid-gilid ay may mga nanunuklaw na alambre mag-ingat ka! Sapagkat sa tore’y may nakaposte handang bumira suot ang itim na kamoplahe tungkod ang mahabang kalibre mag-ingat ka! Nanlilisik ang ‘di natutulog pa n’yang mata ‘ala ‘yang pakialam kung sakali mang tamaan ka ng nagbabaga’t matulis n’yang bala. Hala sige, lipad lang nang lipad mamaya ka na magbunyi kapag narating mo na ang tungki ng langit. August 14, 2015