Hageo
CAPÍTULO 1
1 Tuj tnejel k'ij te tkakin xjaw te tcabin abk'i ttzyetlen tcawin rey Darío, tzaj tma'n Kman jun yol te Zorobabel aju tcy'ajal Salatiel, gobernador tuj Judá, ex te Josué aju tcy'ajal Salatiel, tzaj tma'n Kman tu'n Hageo aju t-sanjel Dios. Tzaj tq'ma'n Josedec, a tnejilxix pale.
2 Chi Kman aju Tajaw Tcyakil chi cyja': Ke xjal lu in cyma'n ka ma pon tk'ijlalil tu'n tjaw binchet juntl maj tja Kman.
3 Tzajtzun tma'n Kman tu'n Hageo aju t-sanjel Dios.
4 ¿Mape pon tqʼijlalil tuʼn kyanqʼine tuj kyjaye bʼinchaʼn maj, ex aju ja lu ma tzʼel xitj?
5 Cyja'tzun, akine Dios aju Tajaw Tcyakil in tma'n jlu cyeye. Ximana ti'j cybinchbene.
6 Nim in cu'x cyawa'ne, pero nic'xi in tzaj cyi'ne; in che wa'ne, pero minti' in cnet cyu'ne; in che c'ane, pero minti' in che noj ti'j c'abj; in xi cyk'o'ne cyxbalune, pero minti' in k'ak'ante cyu'ne; ex aju in kamb'an ti'j chojb'il, in kanb'an ti'j chojb'il tu'n tokx tq'o'n tuj jun saqb'il at jul ti'j.
7 Atzun jlu in tma'n Kman aju Tajaw Tcyakil. Ximana ti'j cybinchbene.
8 Cyxi'ye twi witz, cyi'ntze si' tu'ntzun tjaw cybincha'ne tja Dios; ex chin tzalajele ti'j ex cjawil nimsa'ne, chi Kman.
9 Nimcu in che ayone ti'j, pero nok ch'in ma japun cyu'ne; ex tej ttzaj kyi'ne kyjaye, xi nq'ajtza'ne tq'ajq'ajel twi'. Taquntzun? Chi Kman aju Tajaw Tcyakil. Tu'n tlaj njaye otok cub xitj, ex teyle junjun in xi' ojqelan tja.
10 Cyja'tzun, aju cya'j cyibaje ma we' tu'n mi'n ttzaj che'w, ex aju tx'otx' ma we' twitz awal.
11 Xi nma'ne tu'n ttzaj tzqij tx'otx', cyibaj ke witz, twitz triw, twitz uva, aseyt, twitz awal in tzaj tk'o'n tx'otx', cyi'j xjal, cyi'j alumaj, ex cyi'j ke wacẍ. ti'j tcyakil ak'untl in bant cyu'n k'ab.
12 Atzunte Zorobabel aju tcy'ajal Salatiel, tuc'ix tnejel pal Josué aju tcy'ajal Josédec, cyuc'ix cycyakil xjal e cyaj ten, xi cyniman tyol Kman aju Cydios ex tyol Hageo aju t-sanjel Dios, ic tza'nx otok tma Kman aju Cydios xi t-sama'n, ex e jaw xob' xjal twitz Qman.
13 Xitzun tma'n Ageo aju t-sanjel Kman cye tnam xjal, ex xi tma'n cyja': Akine Kman in chin yoline cyuc'ile.
14 Tu'n Kman jaw tnimsa'n tc'u'j Zorobabel aju gobernador tuj Judá, aju tcy'ajal Salatiel, tuc'ix Josué aju nejenel cye pal ex tcy'ajal Josédec, ex tuc'ix cycyakil keju otok che cyaj ten. e ul ex e ak'nan tuj tja Kman aju Cydios aju Tajaw Tcyakil.
15 Tuj 24 tajlal tkakin xjaw te tcabin abk'i ttzyetlen tcawin rey Darío.
CAPÍTULO 2
1 Tuj 21 tajlal twukin xjaw te abk'i lu, tzaj tma'n Kman jun yol tu'n Hageo aju t-sanjel Dios.
2 K'manxa te Zorobabel aju tcy'ajal Salatiel ex gobernador tuj Judá, ex te Josué aju tcy'ajal Josédec, aju nejenel cye pal, ex cye mastl xjal.
3 ¿Alcye jun cyxole ma cyaj ten o til aju tja lu tej tbanilxix tspic'umal? ex ¿tza'ntzun tten nno'c cyque'yine ja'lo?
¿Myapetzun tuj cywitze ic tza'n minti' tajben?
4 Atzun ja'lo, aya Zorobabel, tenx tipumala, chi Kman. ex tenx tipuna aya Josué, tky'ajal Josédec, nejenel kye pal; Cycyakile akeye tnam ate'ye tuj tx'otx' lu, tenx cyipune, ex che ak'nane, porque akine atine cyuc'ile, chi Kman aju Tajaw Tcyakil.
5 Ic tza'nx nyole cyaj bant ti'j wu'ne cyuc'ile tej cyetze tuj Ejipt, ax icx ctel wanmiye cyuc'ile.
6 Porque atzun in tma'n Kman aju Tajaw Tcyakil. Nok jun maj, nok ch'intl tu'n ttzaj lu'lun cya'j wu'ne, tuc'ix tx'otx', tuc'ix mar ex tzkij tx'otx';
7 Che tzajel lu'lun cycyakil nasyon wu'ne, ex ctzajel aju cyajbil cycyakil nasyon wu'ne, ex cnojel tja Dios wu'ne tu'n tajwalil, chi Kman aju Tajaw Tcyakil.
8 Weye aju sak pwak ex aju k'an pwak, chi Kman aju Tajaw Tcyakil.
9 Aju t-spic'umal ja lu mas c'oquel twitzju te nej, chi Kman aju Tajaw Tcyakil, ex tuj lugar lu cxel nk'o'ne txubtxaj, chi Kman aju Tajaw Tcyakil.
10 Tzaj tma'n Kman tu'n Hageo aju t-sanjel Dios tuj 24 tajlal t-xjawil t-xjawil tcabin abk'i ttzyetlen tcawin Darío.
11 Atzun jlu in tma'n Kman aju Tajaw Tcyakil. Qaninxa ja'lo kye pale ti'j ley.
12 Ka ma tz'oc tmaco'n jun chibj xjan ttxa'n t-xbalun, ex ka ma tz'oc tmaco'n ttxa'n pan, ex ka ta'l twitz uva, ka aseyt, ex ka juntl chibj, ¿c'oquelpetzun jlu te xjan? Atzun cye pal xi cytzak'we'n: —Mi'n.
13 Xitzun tma'n Ageo te: —Ka ma tz'ilix jun xjal ma tz'oc tmaco'n jun cyimni, ¿majpe c'oquel te tz'il? —C'oquel te tz'il, che chi pal xi cytzak'we'n.
14 Xitzun ttzak'we'n Ageo cyja': —Akine Kman in tma'n: Cyja'tzun tten ke xjal lu ex ju nasyon lu nwitze. icxtzun tcyakil tak'unben cyk'ab; ex aju in xi cyk'o'n tuj lugar lu tz'il ke.
15 Ja'lotzun chin cubsale cywitze, cyximane ti'j tk'ijlalil ja'lo ex te tibajxi, tej na'nxtok toc k'o'n jun abj tibaj juntl abj tuj tja Kman.
16 Atxix tuj tk'ijlalil lu, otok pon jun xjal ti'j jun culbil te 20 malbil, nok o'cx laj tal, ex oc t-xi' jun xjal jatum tu'n tjatz ti'n 50 xar, nok o'cx 20 tal.
17 Cub cyi'je wu'ne tu'n k'ak', tu'n tx'a'c ex tu'n sakbakun tu'n tcyakil ak'untl ma bant cyu'ne; pero minti' e ajtz meltz'aje wuc'ile, chi Kman.
18 Che ximane ti'j ja'lo, atxix tuj winkin tuc'il cyaje tajlal tbelaj xjaw, ex tuj k'ij tej tcub ke' t-simyentil tja Kman.
19 ¿Atxpetzun iyaj tuj ch'u'j? na'nx ttzaj tq'o'n twitz uva, twitz higo, twitz granada ex twitz olivo;
20 Tzaj yolin Kman juntl maj tuc'il Hageo tuj 24 tajlal teju xjaw lu.
21 K'manxa te Zorobabel aju gobernador te Judá: Ctzajel lu'lun cya'j tuc'ix tx'otx' wu'ne;
22 Cbel nxitune cyk'ukbil ke cawbil ex cnajel cyipumal ke cawbil cye mastl nasyon wu'ne; che najel wu'ne ke carwaj in che ajben tuj k'oj cyuc'ix keju ate' cyibaj; ex ke chej cyuc'ix ke cyjax cyibaj che bel tz'ak, teyle junjun tu'n t-spad t-xu'jil.
23 Tuj tk'ijlalil tzul, chi Kman aju Tajaw Tcyakil: Aya Zorobabel aju nmajene, tal Salatiel, c'oquel nk'o'ne ic tza'n jun sey, porque akine Dios aju Tajaw Tcyakil cxel nsc'o'ne .