Vetrarrafbílarannsókn

Félags norskra bifreiðaeigenda, NAF og FÍB

Lúxsusbíllinn Mercedes-Benz EQS háði mjög jafna keppni við uppáhaldsbíl almúgans, Tesla Model 3 Long Range, í drægnikeppni 31 rafbíls í Noregi um hver kæmist lengst á rafhleðslunni. Þetta kemur fram í vetrarrafbílarannsókn Félags norskra bifreiðaeigenda (NAF) og félagstímaritisins Motor sem gerð var í byrjun árs.

Svo fór að lokum að Teslan hafði sigur og hafði komist 521 kílómetra þegar hún stöðvaðist en Benzinn náði 513 km. Næst kom og BMW iX xDrive50 með 500 km. Allir bílarnir í prófuninni voru langt frá uppgefnum viðmiðunargildum um akstursdrægni (WLTP) framleiðendanna.

Hinn kínverski BYD Tang sem stóð sig þó hlutfallslega best og vantaði aðeins 11 prósent upp á að ná hinum uppgefnu 400 kílómetrum á einni rafhleðslu (hann komst 356 km).

Hin nýja Tesla Model Y stóð sig einnig vel og komst 451 km en það er frávik upp á 11,05 prósent. Hér skal undirstrikað að síðustu 100 kílómetrarnir voru brattari upp í móti og hitastigið nokkru lægra en þegar BYD Tang glímdi við lokaleið sína. Rannsókn þessi var sú viðamestu sinna tegundar í heiminum hingað til og komu fleiri samtök að viðburðinum, þeirra á meðal FÍB. NAF og Motor hafa um árabil gert vandaðar prófanir og úttektir á rafbílum bæði að sumar- og vetrarlagi.

Aðstæður í þessari nýju vetrarkönnun voru í stórum dráttum þær að veðurfar og færð var breytilegt, yfirborð veganna var ýmist autt, þurrt, blautt, snævi eða ísi þakið. Hitafar á meðan prófunum stóð var þannig að sjaldan var kallast brunagaddur eða hörkufrost heldur lá lofthitinn oftast á bilinu frá fáeinum plúsgráðum niður í um tíu gráðu frost. Prófanir fóru fram bæði á láglendi og á fjallvegum.

Eins og vænta mátti að vetrarlagi náðu rafhlöður bílanna, sem voru 31 talsins, ekki sömu nýtni og afköstum eins og sumar væri og reyndist orkueyðsla þeirra að meðaltali vel yfir 10 prósentum meiri en uppgefin eyðsla samkvæmt WLTP-staðlinum.

Nánari úttekt verður á prófununum í 3. tbl FÍB-blaðsins.