Page 1

Wellington

courant

dié

1

Gratis • Free

Hugenotestraat 24, Malmesbury

30 November 2016

Uitgawe 398

tel: 022 487 3221

GROOTSTE onafhanklike gemeenskapskoerant in die Wes-Kaap

•REEDS AS TIENER BEGIN DIG

Kinderstories die muse vir dié ouma •Jaomi Zeeman

Daar is vele idiome wat na die beleë kennis en wyse ondervinding van die ouderdom verwys: “Met die grysheid kom die wysheid”. “Mens is nooit te oud om te leer nie” en “Oud, maar nog nie koud nie.” Hierdie dinge kan seker alles van die plaaslike kinderboekskrywyr, Lizma van den Berg, gesê word. Lizma, die ouma van ‘n woelwater-tweeling, stel op 5 Desember haar eeste kinderboek bekend. Volgens haar is dit ‘n hoogtepunt, maar iets wat sy haarself nie noodwendig ‘n jaar of twee gelede sou kon voorstel nie. Alhoewel sy as tiener reeds stories en gedigte geskryf het, het sy nooit gedink dat sy eendag kinderstories sou publiseer nie. “Ek het as tiener begin skryf toe die gewone emosionele wroegings en ontnugterings, wat alle tieners mos maar tref, oor my pad gekom het. "Toe begin die lewe met studies, skoolhou, trou en daarna die kinders. "Vir die volgende 25 jaar was daar nie sprake van skryf nie. "Ek het ons twee dogters, een met ‘n leergebrek en een met ‘n wil soos ‘n ysterpaal, grootgemaak,” vertel Lizma. Na die geboorte van haar tweeling-kleinkinders, het die inspirasie om stories te skryf haar egter weer beetgekry. “Ons is sedert die premature geboorte van die tweeling baie betrokke by hulle. "Die twee se slaappatroon verskil geheel en al en ons maak een aan die slaap en hul ma die ander een. "Ek doen dit deur stories op te maak, liedjies te sing en rympies op te sê,” verduidelik sy. Volgens Lizma het sy besef dat sy die stories moet neerskryf, nadat die tweeling haar daarop begin wys het dat sy die storielyn van die een aand na die volgende ‘n bietjie verloor of verdraai. “Hulle het my gou begin herinner dat vanaand se storie nie dieselfde klink as gisteraand s’n nie – ouma het begin vergeet!” lag sy. Lizma vertel dat sy haar deur die tweeling se belangstellings en ontwikkeling laat lei het.

“Op twee/drie jaar hou hulle van stories oor hulself, op vier begin familie belangrik raak en op vyf begin hulle ‘n sin vir humor ontwikkel. "Hul kattekwaad en ondervindings is die inspirasie vir elke storie,” verduidelik sy. Selfs al het Lizma teen die einde van 2015 al byna 34 stories geskryf, het sy steeds nie aan enige publikasiemoontlikhede gedink nie. “Daar was in Desember 2015 ‘n Kinderbybel bekendstelling by die Breytenbachsentrum en ek het daarheen gegaan. "My buurvrou, Engela Duvenhage, se suster, Marie Prinsloo, is die illustreerder van hierdie Bybel en die idee het by my opgekom dat sy miskien my stories vir my kleinkinders kan illustreer om dit meer interessant te maak. "Ek het haar gekontak en sy was dadelik bereid om my stories te illustreer,” vertel sy.

In Januarie het Lizma die eerste van haar stories vir Marie gestuur. “Ons het onmiddellik gekliek. Sy het presies geteken wat ek in my gedagtes visualiseer het,” sê sy. Volgens Lizma is dit Marie wat haar aangemoedig het om die stories te laat publiseer. “Die hele jaar voel soos een groot wonderwerk. "Die tydsberekening vir alles was net perfek. "Ons gedagte was aanvanklik om my Kabouterstories en die pragtige illustrasies self te laat druk as ‘n nalatenskap vir die tweeling. "Ons het navraag gedoen oor selfpublisering en op 'Publishing World' se inligting afgekom, ‘n afspraak gereël en sommer van my ander stories ook aan hulle voorgelê,” vertel sy. In Julie het hulle ‘n oproep ontvang waarin hulle meegedeel is dat twee manuskripte vir publikasie aanvaar is. “Ons was met vakansie en het die e-pos wat hulle gestuur het, gemis. "Marie moes vinnig die laaste Kabouterillustrasies voltooi, aangesien die uitgewer die boek voor Kersfees gereed wou hê!” vertel Lizma. Lizma se eerste boek, met illustrasies deur Marie Prinsloo, gaan oor die ervarings van Carel en Liza Kabouter en hul maats in Kabouterland. “Oupa André is baie lief vir 4x4, kamp en die veld en hy neem al die tweeling saam vandat hulle twee jaar oud was. Wanneer hulle terugkom, gee Oupa idees oor diere, die veld en natuurbewaring en Ouma skryf oor hul ondervindings,” vertel sy. “Ek lees die stories al vir ‘n geruime tyd by plaaslike kleuterskole en speelskole voor. Die kinders by Pikkieland, Dwergiebos en Kinderland geniet dit regtig en dit is vir my ‘n groot aansporing. Dit is tog waarom ek die stories skryf: vir die kinders,” sê Lizma. Lizma se boekbekendstelling vind Maandagaand, 5 Desember van 18:30 tot 20:00 by Monte Video buite Wellington plaas. Belangstellendes kan haar by 083 235 3187 of lizma@em3.co.za kontak. Elke boek het ‘n CD, inkleurboek en kryte by en sal by die bekendstelling te koop wees.

NUUS • NEWS

30 November 2016


NUUS • NEWS

2

Strate verhelder deur flikkerende Kersliggies

Die jaarlikse aanskakel van Kerkstraat se Kersfees-liggies was hierdie jaar weer eens ‘n hoogtepunt op die dorp se sosiale kalender. Hierdie geleentheid, wat elke jaar die begin van die Feesseisoen in die dorp inlui, is hierdie jaar deur ‘n positiewe en gemeensame atmosfeer gekenmerk. Oud en jonk het na die straat gestroom om hierdie gebeurtenis op Saterdag 26 November te vier. Kerkstraat is reeds vroegmiddag afgesper om alles vir die feestelikheid in gereedheid te bring. Winkeleienaars het hul winkels en talle winskopies reggemaak vir die feesgangers en ‘n verskeidenheid stalletjies het in die straat verrys. Daar is selfs ‘n renbaan, ‘n mallemeule met motortjies, ‘n verhoog en ‘n vliegtuig-simulator in die straat gebou. Vroegaand het die dorpenaars vir die skouspel begin nader staan, terwyl hulle hul aan die heerlike eetgoed verlustig het en hulself met die talle aandenkings en gloei-versierings van die stalletjies getooi het. Daar was ook heerlike vermaak deur plaaslike en ander kunstenaars en die agtergrond van ‘n perfekte somersaand het tot die feestelike kuieratmosfeer bygedra. Toe dit donker genoeg was, is die liggies onder groot gejuig aangeskakel. Hierna kon al die feesgangers verder in die gloed van 2016 se Kerfeesliggies saamkuier.

•SING IN HARMONIE

30 November 2016

Hugenote gekroon as beste nuweling

Hugenote Laerskool se Juniorkoor het op Donderdag 24 November by die Durbanville Hoërskool se Ouditorium aan die Finaal van die Sing in Harmonie Koorkompetisie deelgeneem. Hierdie kompetisie, wat elke Sondag op kykNET se kanaal 146 uitgesaai word, bied aan laerskoolkore landwyd die geleentheid om met mekaar mee te ding. Hugenote se koor het by hierdie geleentheid met die gesogte “Beste Nuweling”-toekenning weggestap – ‘n bewys dat hulle die beoordelaars baie beïndruk het. Hugenote se Juniorkoor het in die finaal teen die kore van ander skole in die Suidelike Streke te staan gekom en het hul baie goed van hul taak gekwyt deur as een van die top-kore in die kompetisie aangewys te word. Die baie vermaaklike program tydens die verfilming van die finale rondte het vertonings deur nasionale sterre ingesluit en al die koorlede kon met gerekende mense in die vermaaklikheidsbedryf skouers skuur. Volgens Leana Engelbrecht, koorleier van Hugenote se koor, was hul deelname aan hierdie kompetisie ‘n belewenis wat hul nooit sal vergeet nie. “Ons het hierdie jaar vir die heel eerste keer aan so ‘n groot nasionale kompetisie deelgeneem en dit was ‘n wonderlike ondervinding. Om al die ander ervare kore te hoor en in aksie te sien, om die hele proses van opnames mee te maak en om die wonderlike blootstelling te beleef is iets wat ons nooit sal vergeet nie,” sê sy.

“Die toekenning is die beloning vir al die kinders se harde werk,” voeg sy by. Die beoordelaars het met groot lof op Hugenote se vertoning repliek gelewer en hul veral met hulle goeie dissipline, tegniese korrektheid, positiewe energie, samewerking tussen die koorleier en sangers en uitstekende begeleiding gekomplimenteer. Volgens die aanbieder van Sing in Harmonie, Anthonie Bougas, het Hugenote se koor die toekenning as “Beste Nuweling” verwerf omdat hulle, as onervare koor in hierdie kompetisie, ‘n uitstekende vertoning gelewer het. “Hierdie toekenning word gemaak aan die koor wat die beoordelaars báie beïndruk, maar nie noodwendig as nasionale wenners uit die stryd tree nie. "Dit word gewoonlik aan ‘n koor wat vir die eerste keer op so ‘n groot platform deelneem, toegeken. "Die mate waarin die koor tydens die verloop van die kompetisie gegroei het, is ook prysenswaardig,” het hy gesê. Die uitsending van Hugenote se deelname en toekenning sal op Sondag 4 Desember om 16:00 op kykNET se kanaal 146 uitgesaai word.


NUUS • NEWS

3

30 November 2016

’n Projek van lig, donker, merke en hoop • Marchelle van Zyl ‘n Kunskursus en ‘n kunsuitstalling in ‘n tronk? Dis dalk die laaste plek waar mens sal verwag om kunsklasse aan te bied, maar dis presies wat die kunstenaar, Fanie Marais, en die Breytenbach-sentrum gedoen het. Tien gevangenis het ‘n kunskursus onder sy leiding in Wellington voltooi. Marchelle van Zyl het die kunsuitstalling en prysuitdeling agter tralies bygewoon en ‘n les in lig en donker gekry. ’n Gesamentlike projek van die Departemente Korrektiewe Dienste Hawequa en die Breytenbach-sentrum in Wellington het hul eerste tien kunsstudente vereer tydens ‘n afsluitingseremonie waartydens sertifikate aan die deelnemers oorhandig is. Die studente se werk is ook tydens die oorhandiging uitgestal. Die kunstenaar, Fanie Marais, het die kursus oor agt maande aan gevangenis aangebied. Marais het die pad saam met hulle gestap en begin met basiese tegnieke en konsepte van lig en donker, skaduwees en die meng van primêre kleure. Die studente se werk in die vertrek vertel die storie van hul vordering oor die laaste agt maande. Van elementêre tekeninge van ‘n appel tot ‘n stillewe met hul eie skoen, ‘n rol toiletpapier en kwaste. “Dit was vir my ook maar ’n proses om te verstaan almal het talent, maar almal het ook gebrokenheid. Veral toe ek die ouens gehelp het om hul lewensverhaal te skryf en aan die hand dáárvan ’n kunswerk te skep, het ek besef hoe bevoorreg ek is,” vertel hy. Verhale van verwerping, moeilike huislike omstandighede, mishandeling, ontvlugting deur alkohol en dwelms is onrusbarend algemeen. Marais het die studente aangemoedig om hul diep persoonlike verhale visueel uit te beeld, maar die kursus het met die eenvoud van stillewes begin. “Dit was net ‘n baie lekker ervaring van dankbaarheid en om te sien hoe hulle groei. Ons het letterlik begin met ’n appel - om ’n appel se ronding te kan skilder en dan ’n groep appels, ‘n groep eiers, ’n stillewe en uiteindelik ’n lewende

persoon laat sit. En uiteindelik te sien hoe hulle dit regkry. Dit bly moeilik. Tot aan die einde wou van hulle hul hande in die lug gooi. Maar dit was vir hulle ’n energiewekkende ervaring en vir myself ook,” vertel Marais. Chesley Adams is onlangs vrygelaat en het spesiaal teruggekom om die seremonie by te woon en sy sertifikaat te ontvang. Hy is netjies uitgevat vir die geleentheid en reg om sy ‘nuwe’ lewe met ywer aan te pak en die nuwe vaardighede toe te pas. “Ek het geleer jy moet jou gevoelens in jou kuns uitdruk. En jy gaan daardeur terug in die verlede. Jy herbesoek jou verlede en jy kry daardie ou ‘stuff’ uit en jy verf. Dit wys hoe jy gevoel het uit die ‘past’ uit. Dit wys van jou leefstyl hoe jy geleef het en hoe jy op die oomblik nou kom en watter verandering kan jy daaraan maak. Ek het geleer hoe jy jou skadu bewerk - van donker tot lig. En altyd as jy jou ‘art’ doen, moet dit nie gestryk lyk nie - waar daar merke is, moet daar merke in jou ‘painting’ wees. Ek wil aangaan daarmee. Noudat ek my sertifikaat het - ek is bly!” Hy soen sy sertifikaat. “Nou kan ek verder gaan daarmee.” Wiseman Nunu, die area koördineerder van die Allandale-bestuursarea, het tydens die funksie die gevangenis bedank vir hul deursettingsvermoë en die wil om die geleenthede wat hulle gebied word binne die Korrektiewe Dien-

ste, te benut. Hy het die Breytenbach-sentrum en Marais bedank vir hul betrokkenheid by die program. “Ons het mense van daar buite nodig, mense uit die gemeenskap om ons te help met ons programme. En dit is presies wat die Breytenbach-sentrum gedoen het. Ons waardeer dit en ons waardeer julle bydrae om ‘n verskil te maak aan dié ouens se lewens.” Theo Kemp, besturende-direkteur van die Breytenbach-sentrum het by die geleentheid die belangrikheid van kuns as ‘n baken van hoop beklemtoon. “By die Breytenbach-sentrum word ons elke dag gekonfronteer deur mense wat dink kuns is ’n luukse, dat die gemeenskap dit nie nodig het nie. Maar ons sien hoe kuns lewens transformeer, hoe kuns hoop gee. ... Ons is nie die redders nie. Dit is jy,” het hy aan die studente gesê. “Dit is jy wat die geleenthede moet aangryp. Julle is die skildenaars en die kunstenaars van julle eie lewens. Wanneer jy eendag hier uitstap, is die skoon skilderdoek ’n metafoor vir jou lewe en dit is jou keuse of jy helder kleure wil gebruik en ’n ongelooflike mooi storie wil skilder. Hierdie is nie die einde vir jou nie. Dit is maar net

die begin. Dis ’n nuwe hoofstuk.” Hy het na die skilderye in die vertrek gewys en aan die gevangenis gesê: “Wees trots op julself en behou die hoop vir die toekoms.” Later wys ek een van die portrette aan ‘n vriendin. Sy sê-vra: “O, Lucian Freud?” “Nee,” sê ek. “Duane September van Hawequa Korrektiewe Dienste.”


courant

dié

4

Moenie jou blindstaar teen ander se geslote deure nie

Ons lees in vandag se daaglikse koerante oor die gebeure teen vroue en kinders. Dit is sekerlik nie iets nuuts nie, maar met menseregte en die bewusmaking van vroue- en kinderregte, kom hierdie dade meer tot die voorgrond. Om hierdie situasies en gebeure hok te slaan, sit nie in een of twee persone se broek nie. Dit neem 'n gemeenskap om na mekaar om te sien, mekaar te beskerm en mekaar se beste belange op die hart te dra. Ons is nou in die tydperk waar ons reflekteer oor die afgelope jaar se gebeure. Ons onthou, ons dink en ons gedenk. Ons leef nader aan familie, want die Kerstyd bring dit outomaties te weeg. Ons besef nou weer opnuut hoe kosbaar die lewe is. Dit is tragies dat daar dinge in ons gemeenskappe gebeur waaroor ons ons koppe wil laat sak. Kinders en vroue is net so belangrik soos al die ander lede van die gemeenskap. Hoekom moet hulle dan soveel keer die onderspit delf? Kinders is ons toekoms. Hulle is weerloos. Dit is ons almal se plig om te verseker dat hulle beskerm word. Moenie net jou rug draai as jy sien iets gebeur êrens nie, kontak die nodige owerhede om in te gryp. Moenie blind wees vir dit wat rondom jou aangaan nie. Jy sal nooit weet wat agter ander se geslote deure gebeur nie.

Dis Goeie Nuus

NUUS • NEWS

30 November 2016 dr. Andrew Bosman

In elke nasie, die wat in Hom vrees

Petrus was deur ‘n Romeinse offisier laat haal in opdrag van ‘n engel wat aan die offisier Cornelius veskyn het. Hy was verbaas dat God ook aan heidene wat nie Jode was nie genade bewys, dat hulle die goeie nuus van die evangelie kan hoor. Cornelius het ‘n groot groep vriende en belangstellendes uitgenooi sodat wanneer Petrus daar kom hulle gereed is om te hoor wat die Here vir hulle wil meedeel. Petrus spreek sy verbasing uit met die woorde hy sien dat God geen aannemer van die persoon is nie. Hy sien verder dat die Here uit elke nasie die een wat hom vrees en geregtigheid doen, die Here welgevallig is. Hierdie is nie ‘n vrees soos in bang nie maar met respek, om eer aan Hom te bring. Petrus begin sy onvoorbereide toespraak met Jesus van Nasaret se koms na die aarde en sy sterwe en opstanding. Veral hoe God Hom gesalf het met die Heilige Gees en met krag. Hoe Jesus die land deurgegaan het en goed gedoen het, en almal genees het wat onder die mag van die duiwel was, omdat God met Hom was.

Dagboek • Calender Wellington CLC Matriek-aandklasse by Wellington CLC., Hospitaalstraat. Dinsdae en Donderdae vanaf 18:00 tot 20:00. Navrae skakel 021 864 2418 Bôrdienghuis Teater 29 November: U word uitgenooi na die bekendstelling van KATRYN - Winnie Rust se laaste boek om 17:30 vir 18:00 Navrae en bespreking by 073 435 1022 of besprekings@breytenbachsentrum.co.za

Kerke • Churches

Anglican Church Sunday morning: April to Sept at 08:00; Oct - March at 07:30; Wed. Morning : 09:30 (end Jan to mid Dec); 4 Milner Street, Wellington. Enquiries: 021 873 1425.

Joshua Generation Sunday morning 09:00 (English), Sunday evening (Afrikaans) 17:00. Provence, Milner Road. Enquiries: 021 873 6541. Kerk van Macedonië Sondagdiens om 10:00; Groenberg. Navrae: 062 836 1316 of 074 608 0519

NEW Sunday morning at 09:00 (English service); HJN Training Centre, College Street, Wellington. Enquiries: 082 355 3280.

NGK Wellington-Oos Sondagoggend om 9h00 en Sondagaand om 19h00 - h/v Barlinka en Cummingsstraat, Wellington. Navrae : 021 873 2690

NGK Moeder-gemeente Sondagoggend om 09:00, Sondagaand-diens - Leefkerk om 19:00. H/v Kerk- en Piet Retiefstraat, Wellington. Navrae: 021 873 1561.

St George's Presbyterian Church Sunday mornings at 09:30 (English); 22 Jan van Riebeeck Street. Enquiries: 021 873 2021.

NGK Noord-gemeente Sondagoggend om 09:30: MacCronestraat 11, Wellington. Navrae: 021 873 2763.

Shofar Sondagoggend om 09:00 Laerskool Hugenote, Kerkstraat 41. Navrae: 021 873 7677.


NUUS • NEWS

30 November 2016

5


6

Wenke met water

Met die nuwe vlak 3 waterbeperkings wat vanaf 1 Desember in werking tree, sal mense anders en kreatief oor hul waterverbruik moet begin dink. Alternatiewe metodes van tuinmaak, grondbedekking en benatting is ons almal se voorland. Volgens Aubrey Withers, ‘n omgewingskonsultant, is dit die moeite werd om die potensiaal van die herwinning van “grys water” te ondersoek of te oorweeg. “Grys water verwys na die reeds gebruikte water uit baddens, storte, wasbakke en wasmasjiene. Hierdie water bevat sepe, wat as ‘n vorm van bemesting kan dien omdat dit fosfate bevat. Ongelukkig bevat hierdie water ook soms skadelike chemikalieë en dooie velselletjies. Die water moet daarom eers ‘gesif’ word,” sê hy. Aubrey beveel aan dat ‘n mens sommer iets soos ‘n ou sykous as filter by jou stort, badpyp of wasbakuitlate moet gebruik. Dit sal baie van die skadelike dele terughou voordat dit direk op grasperke of in tuine gelei word. Volgens hom sal dit ideaal wees om die grys water eers in ‘n tenk op te gaar om sodoende beter verspreiding daarvan moontlik te maak. Hy beveel aan dat hierdie gestoorde water binne 2 dae gebruik moet word of belug moet word om te verhoed dat dit begin stink. Aubrey gee ook die volgende waterbesparingswenke: Plaas ‘n baksteen of gevulde waterbottel in die toilet se toevoertenk as dit nie reeds ‘n waterbesparende dubbel-spoel funksie het nie. Stort i.p.v. bad en gebruik slegs waterbesparende stortkoppe (dit gebruik slegs ‘n derde van die water van gewone stortkoppe). Wanneer jy stort, draai die kraan toe terwyl jy jou was en draai dit slegs oop wanneer jy jou weer afspoel. Jy sal verbaas wees oor hoeveel water jy op hierdie wyse kan bespaar. Wasbakke kan met lugwater-krane, wat minder water gebruik, toegerus word. Draai die kraan toe toe terwyl jy tande borsel. Bedek swembaddens met plastiekseile, maar verwyder die seile wanneer dit reën om reënwater op te vang. Vang reënwater van geute op om tuine te benat. Volgens Manuel Molefe, bestuurder van plante by Lumé Kwekery en mev. Hannie Rossouw, assistent by hierdie kwekery, is daar baie nuttige wenke om water in tuine te bespaar. Alhoewel die waterbeperkings ‘n groot invloed op die benatting van grasperke sal hê, is daar gelukkig baie alternatiewe tuinmaakmetodes waarmee ‘n mens steeds met ‘n pragtuin in die droogte kan spog. Manuel verduidelik dat dit belangrik is om jou plante te ken en te weet hoe die son in jou tuin val. Wanneer jy al hierdie dinge in ag neem, kan jy slim besluite neem wat baie water kan spaar. Volgens hom is daar baie plante by Lumé kwekery beskikbaar wat baie gehard is, uiterste toestande kan weerstaan en min ondehoud of water verg. “Ons vetplante kan in volson en met byna geen water oorleef. Mense moet ook nie van gewilde kruie soos laventel en roosmaryn vergeet nie. Hierdie plante hou van volson en is nie lief vir nat voetjies nie. Hulle is ideaal vir waterwys-tuine,” sê hy. Hannie Rossouw voeg by dat die grondbedekking in ‘n waterwys-tuin ‘n reuse-verskil aan jou watergebruik kan maak. “Boombas is ‘n wonderlike natuurlike grondbedekking. Dit hou nie net die grond koel nie, maar verseker ook dat enige klammigheid vir baie lank in die grond bewaar word en nie sommer verdamp nie. Dit lyk boonop nog mooi ook,” sê sy.

NUUS • NEWS

30 November 2016

Neels Neels Neethling van Malmesbury boer al vir meer as 30 jaar in die Swartland. Hy is die eerste megaboer in die streek wat onlangs op die gewilde kykNET-program, Megaboere verskyn het. Neethling, wat vandag ‘n gemengde boerdery op Malmesbury en Colesberg bedryf, het as jong kind, ‘n melkkudde van slegs 12 beeste onder leiding van sy pa begin. Hy het vir twee jaar saam met sy pa op Saamstaan geboer voordat hy oorlede is. Dit is nou 31 jaar later nádat hy die boerdery oorgeneem het, waartydens sy kudde tot ‘n totaal van 8600 vroulike diere gegroei het. Saamstaan Boerdery melk vandag sowat 4000 koeie drie maal per dag op die plaas Môrester. Die veelsydige, tog nederige boer, lewer daagliks 130 000 ℓ melk. Hy is ook alleenvoorsiener vir melk aan Clover in die Wes-Kaap. Daar word 150 000 t se produkte op 16 plase van 8000 ha grond saam, gelewer. Dit sluit 130 000 ℓ per dag se melk en 25 000 t kleingraan per jaar in. Altesaam 1400 ha van sy plase is onder besproeiing wat hy onder splipunte benut om ruvoer te maak vir jou beeste. Nóg ‘n verdere 400 ha opgeleide wyndruiwe is onder drupbesproeiing. Sowat 5000 ton rooi en wit wyndruiwe word aan Piekenierskloof en Overhexkelder gelewer. Hy produseer ook lusern, mielies en koring op drie besproeiingsplase naby Colesberg. Neethling, ‘n pa van twee seuns en een dogter, se boerdery is beslis gediversifiseer. Hy produseer dus melk, wyndruiwe, mielies, koring, lusern, wintergraankuilvoer en mieliekuilvoer. Saamstaan-boerdery se koringopbrengs oor die afgelope 31 jaar was ‘n gemiddeld van 3 ton per hektaar. Volgens hom, was vanjaar nog die beste koringjaar in die 31 jaar sedert hy boer. Opbrengste van 4.4 t/ha tot 5.5 ton/ha is op verskillende lande verkry. Vir dié nederige boer, is die sleutels tot ‘n suksesvolle boerdery onder meer om ‘n goeie verhouding met sy werknemers te handhaaf. Dit is ook belangrik om die regte mense in sleutelposisies aan te stel. Goeie behuising speel volgens hom ook ‘n groot rol. Hy is nie net betrokke by boerdery aktiwiteite nie. Saamstaan Boerdery het ‘n paar jaar gelede die skool, Masekane vir sy plaaswerkers se kinders geopen. Die kinders, wat se ouderdomme van tussen ses maande en Gr. R toe wissel, word elke dag van die plase met ‘n bus na en van die skool vervoer. Sy raad aan jong mense wat ook eendag op ‘n suksesvolle boerdery wil terug kyk, is om definitief na skool te gaan studeer. Indien jy nie grond besit nie, is sy raad om by ‘n groot boerdery opset aan te sluit. Hy stel ook voor om jou kant te bring. “Staan uit op alle vlakke en stap ‘n ekstra myl saam met jou mentor en probeer daardeur aandele in die groot boerdery te bekom,” voeg hy by. Hy herinner jong boere om altyd nederig en konserwatief te bly en nie te huiwer om by hul buurmanne in die omgewing te leer nie. “Jou buurmanne kan nie al 50 jaar verkeerd boer nie. En jy wen daardeur met die wete dat hulle al baie skoolgeld betaal het.”


NUUS • NEWS

7

30 November 2016

Neethling oor sy 30 jaar:

- meester-landbouer uit die Swartland Jurie de Kock ken die werkinge op die plase soos die palm van sy hand.

Neels Neethling in sy melkery waar hy sy dae spandeer.


courant

dié

8

WELLINGTON SPORT

Tel: 022 487 3221

Uitslae en Gebeure Results and Events Krieket Wellington 228/7 (Warren Groeneveld 61,

Tiaan Cloete 46, Edward Small 33, Junaid Cassiem 33, Leon le Roux 3/31) Maties 165 (Jean Bredenkamp 69, Gerhard Erasmus 46, Curtley Louw 4/31, Tiaan Cloete 2/16, Edward Small 2/19, Frank Abrahams 2/31. Wellington wen met 63 lopies Gholf

NUUS • NEWS

30 November 2016

30 November 2016

Wellington (72) : Enkel Stableford : F Marais 45, E Petersen 42, A Nieuwoudt 42, H Goosen 41, J Lategan 40, J Williams 40, G Visser 40, B Louw 40 Newton Summer Bash Die Newton (Bombela Old Boys) hou op 2 Desember 2016 hul jaarlikse ‘Summer Bash’

•KRANIGE SPORTSTER

Jaywin draf nou uit vir Rhinos

Jaywin Petersen, ‘n ratse 18-jarige vleuel en buite-senter van die Roses United Rugbykub, is onlangs vir die Suid-Afrikaanse Rhynos o.19 rugbyspan gekies. Hierdie span neem tans aan ‘n toernooi in Italië deel. Jaywin, ‘n voormalige leerder van Wellington Hoërskool, gaan volgende jaar by die Boland Rugby Akademie aansluit. Hy is nie net ‘n uitstekende rugbyspeler nie, maar is ook ‘n goeie atleet en kranige krieketspeler. Dit is die eerste keer dat hy provinsiale kleure verwerf en ook sy land internasionaal in die buiteland in ‘n sportsoort gaan verteenwoordig.

Beste jongspeler:

Warren Williams, voorheen verbonde aan die Roses United-rugbyklub, is aangewys as die Griffons se jongspeler van die jaar. Hier spog Williams met sy trofee.

Oefen: Die Boland Kavaliers is druk besig met hul voor-seisoen oefening. Hierdie groep het onlangs die vuurdoop geslaag en maak nou reg vir die 2017-seisoen.

by Newton Primêre skool en dit beloof om ‘n genotvolle aand te wees. Kaartjies beloop R60. Kaartjies is beskikbaar by die "Old Boys" asook by die sekretaris (Moula Pietersen) 0786740553, of die kassier (Mervin Petersen) 0767760702.

Dié courant wellington 30 november 2016 (398)