courant
• Bergrivier 1Swartland Weskus • Bergrivier
dié
23 Mei 2018
• Free • Gratis
Wes-Kaap se #1
Bou saam met goeie nuus
Uitgawe 470
23 Mei 2018
•DE VOS SE LIEFDE VIR DIE SPORT BRAND HELDER
Wedvlugkampioen se lewe draai om duiwe Alida Buckle VELDDRIF – Dit is duidelik dat die liefde tussen wedvlugkampioen Keith de Vos (68) en sy duiwe wedersyds is. Hulle antwoord as hy nes hulle koer en raak duidelik opgewonde as hy die hok binnekom. De Vos is al ‘n geruime tyd die Velddrif-posduifklub se kampioen. Met die onlangse heengaan van sy geliefde vrou, Anne, is dit sy duiweboerdery wat hom aan die gang hou. Hulle het die duiwe saam gedoen, altyd onder die naam Keith én Anne de Vos gevlieg, soos wat hy vanjaar gaan aanhou doen, “in her memory”. In die netjiese ruim huis in Port Owen, vertel De Vos dat hy al 45 jaar lank teel aan sy versameling kampioenduiwe. Hy het nagenoeg 80 vlugduiwe en 45 duiwe wat broei. As 14-jarige kind in Plumstead, Kaapstad, het hy altyd sy pa gehelp om sy duiwehokke skoon te maak en dáár het die gogga hom gebyt. “Ek het eers self begin vlieg nadat ek getroud is en ‘n huis van my eie gehad het. En, nadat ek en my vrou dit bespreek het.” Die sport het baie deur die jare verander, veral op tegnologiese gebied. “In die ou dae het ons met handklokke gewerk, deesdae werk ons met elektroniese klokke en ringe.” De Vos het entoesiasties gaan wys hoe die toestelletjie werk wat elke duif wat inkom en oor die elektroniese plaat loop, se besonderhede aandui. Besonderhede soos die datum die presiese tyd, die duif se gewig, ouderdom en nommer verskyn terselfdertyd ook op De Vos se rekenaar. Wanneer die wedvlugte in Junie begin gaan De Vos, soos al die ander wedvlugdeelnemers, elke Vrydag 10 jong duiwe (‘n jaar oud) en 10 duiwe in die ope-afdeling (enige ouderdom) in mandjies pak om op ‘n gegewe dorp ver hiervan-
daan losgelaat te word. De Vos sit by ‘n tafeltjie wat uitkyk op die duiwehokke, sodat hy kan sien as hulle begin terugkom en bo sy buurt draai. Sy truuk om hulle gouer te laat inklok is om sy twee mak duiwe, waarvan die vlerke geknip is, die lug in te gooi. “Sodra die wedvlugduiwe hulle sien, sien hulle vinniger die hok raak.”
Duiwe ouer as drie tot vier jaar word gewoonlik nie meer laat vlieg nie, maar eerder gebruik om mee te teel. De Vos glo nie daaraan om duiwe te verkoop nie, maar sal hulle eerder vir beginners gee wat hulp nodig het. De Vos glo daaraan om van die meesters te leer, die ouens aan die top van die lys. Soos wat hy ook vir jong wedvlug-entoesiaste leer. Wat sy duiwe kampioene hou is goeie kos, goeie gesondheid, die regte oefenprogram en die gehalte van die duif self. “As jy kwaliteit duiwe het wat uit ‘n familie – ma en pa, tantes en ooms, van wenners kom, sal jy baie wenners onder hulle hê. Daar is ‘n kuns aan die uitkies van ‘n duif, waarvoor ek ‘n gawe gekry het. As kind het ek my oorlede pa gevra waarom sekere soort duiwe elke jaar aan die top van die unies was. Hy het vir my gesê dat dit so is omdat daardie mense duiwe-wedvlugte baie ernstig opneem en ek wou een van daai mense wees.” De Vos glo ook in streng dissipline met sy duiwe. Hulle kry elke dag op dieselfde tyd kos en hy hou hulle goed genoeg dop en weet dadelik as een medikasie of vitamiene-aanvullings nodig het. As ‘n duif pronk en sy oog probeer vang, weet hy dat sy of hy reg is vir vlieg. Net so beïnvloed die duiweboer se bui die duiwe. “Hulle voel aan as jy nie in ‘n goeie bui is nie. Wees ontspanne en hulle sal ontspan. "Praat met hulle, dit is deel van my suksesresep.” • De Vos het in 2013 in die Weskus kom aftree ná 35 jaar as meganiese ingenieur by Transnet in Garsfontein, Pretoria. • Die Velddrif-duiweklub val onder die nuwe Weskus-duiwe-unie van die Suid-Afrikaanse Nasionale Posduiforganisasie (Sanpo).
NUUS • NEWS
2
23 Mei 2018
WK se ekonomie staan sterk
Sprekers by Velddrif-sakekamer se inligtingsessie was voor van links Sandra Crafford, Yvette Odendaal, Abigail Murray; agter staan Tilman von Zukowski, Elmondo Paulse, voorsitter Chris van Niekerk en Cornelis de Waal.
Koffiekanners eet dié keer snoek:
ST HELENABAAI – Die Koffiekan-bejaardes se maandelikse byeenkoms op Saterdag 12de Mei het om Moedersdag gedraai. Elke Moeder het ‘n pak koekies en ‘n pragtige kaartjie gekry. Daar is weer oudergewoonte gesellig Bingo gespeel en dié keer is daar heerlike snoek en brood geëet. Die oues van oral in die Weskus, was soos altyd baie bly om mekaar weer te sien, en volgens Menita Paxton, organiseerder, was dit ‘n heerlike geselsoggend. Foto: Menita Paxton.
Fotograwe kan nou wen met fotokompetisie Fotograwe, jonk en oud, kan nou deelneem aan 'n opwindende nuwe kompetisie wat deur die Swartland Fotografieklub aangebied word. Enige inwoner van die Swartland munisipale gebied asook Piketberg, Porterville, Hopefield, Gouda en Hermon kan een foto uit enige genre vir dié kompetisie inskryf. Die Swartland Fotografieklub ondervind die laaste paar jaar 'n groei in ledetal en almal – jonk en oud - wat foto's neem is welkom om hul by die klub aan te sluit. Die wenfoto sal vir die fotograaf 'n A1-grootte canvas-afdruk sowel as 'n jaar se gratis lidmaatskap tot die klub losslaan. Die prys vir die tweede plek is 'n A2-grootte canvas-afdruk sowel as 'n jaar se gratis lidmaatskap en die derde plek is 'n geskenkbewys asook 'n jaar se gratis lidmaatskap. Die kompetisie is vir gedrukte foto's. Inskrywings vir die kompetisie – enige foto – moet in A3-grootte gedruk wees. Deelnemers kan een foto inskryf. Vir deelnemers wat self hul foto's laat druk,
NUUS • NEWS
is die inskrywingsgeld R40 en die klub sal self die montering doen. U kan die gedrukte foto's inskryf by Emunah Gallery 'n Arts in Malmesbury. Die Gallery is toe op Maandae. Gedrukte foto's moet op fotopapier 170gm en dikker gedruk wees. Deelnemers wat hul foto's elektronies wil inskryf, kan dit e-pos na die klub en die inskrywingsgeld is dan R80, waarna die klub dit sal laat druk. Die elektroniese foto moet 'n resolusie van 300dpi hê en grootte tussen een en vier megagrepe wees. Die sluitingsdatum vir inskrywings is 8 Junie, waarna die beoordeling op 14 Junie in die keldersaal van die NG Gemeente Swartland-Noord op Malmesbury sal plaasvind. 'n Seleksie van die top-inskrywings sal later in Junie by Emunah op uitstalling wees. Vir enige navrae of 'n inskrywingsvorm, kontak die organiseerders by marketing@swartlandphotoclub.co.za.
Alida Buckle VELDDRIF – Indien die Wes-Kaap ‘n land op sy eie was, sou sy ekonomie as die sewende grootste in Afrika getel het. Só het Cornelis de Waal, hoofnavorsingsbeampte by Wesgro, in sy oorsig oor die Wes-Kaapse ekonomie gesê, tydens die Velddrif-sakekamer-inligtingsessie by die Riviera Hotel op Donderdag 17 Mei. Wesgro is die Wes-Kaapse handelsbevorderingsagentskap. De Waal het voorts gesê dat die ekonomiese uitset van die Wes-Kaap meer is as lande soos Kenia, Ethiopië en Ghana. In die Weskus is Saldanhabaai volgens De Waal die munisipaliteit wat die grootste ekonomiese bydrae lewer, gevolg deur Swartland en dan Bergrivier. Die grootste handelsvennote is Afrika (40%), Europa (30%) en die dan res. “Die Wes-Kaap verbou 53% van die land se landbouprodukte, 42% van alle waardetoegevoegte landbouprodukte and 70% van die land se dranke.” Onderburgemeester Sandra Crafford het haar opgewondeheid uitgespreek oor die moontlikhede wat die Saldanhabaai-nywerheidsonwikkelingsone (SBIDZ) en gepaardgaande projekte vir Velddrif as ‘n dorp inhou. Abigail Murray, wat namens die SBIDZ met kliënte skakel, het ‘n oorsig gegee van huidige en toekomstige ontwikkelinge. Sy het sakeondernemings aangemoedig om by GrowNet aan te sluit en die registrasieproses vir die SBIDZ te
deurloop om sodoende as verskaffer of diensleweraar te kan werk kry. Elmondo Paulse, plaaslike ondernemings en verskaffersontwikkelingsbestuurder van Transnet, het sakeondernemings aangemoedig om hul swartbemagtigingsyfers reg te kry sodat hulle werk by die staatsprojekte, soos die SBIDZ, kan kry. Daar is 3.5 biljoen rand daarvoor bewillig. “Dit is ongelukkig ‘n feit dat slegs maatskappye met ‘n 51% swart eienaarskap werk by die staat gaan kry,” het Paulse gesê. Yvette Odendaal, toerismebeampte vir die Bergrivier-toerismeorganisasie het bekendgestel dat Velddrif een van die dae toeriste en inwoners in klein sonaangedrewe driewielvoertuie gaan rondkarwei. Een van die groot klagtes oor Velddrif, sê sy, is altyd dat toeriste nie openbare vervoer het nie. Velddrif het ‘n groot tekort aan konferensiegeriewe, verblyfgeriewe spesifiek ingerig vir gestremde mense en opgeleide werkers in die reis- en verblyfbedryf. Odendaal ervaar wel ‘n bestendige styging in mense wat in Velddrif wil kom woon. Die nuwe sakekamer tesourier, Tilman von Zukowski, het teenwoordiges aangemoedig om by die sakekamer aan te sluit om sodoende groter blootstelling vir hul ondernemings te kry. • Vir meer inligting oor die SBIDZ, lees vorige berigte wat in dié courant Weskus verskyn het, aanlyn.
NUUS • NEWS
23 Mei 2018
•'MENS LEER ONGELOOFLIK BAIE VANUIT IEMAND SE PRENTE'
Sy help seer harte gesond word
• Alida Buckle JACOBSBAAI – Cilla Meintjes is een van daai mense wat jou dadelik op jou gemak stel, dadelik laat tuis voel en haar opregte belangstelling in mense en wat in hulle harte omgaan, straal soos ‘n warm vuur uit haar uit. Sy het ‘n gastehuis en skilder, maar haar eintlike passie is mense. Om moedeloses weer die Lig te laat sien en weer te laat hoop op ‘n toekoms. Met haar welstandterapie help sy uitsigloses om weer perspektief oor hul situasie te kry. Sy bring gereeld kunsterapie by, om mense wat sukkel om te praat, te help om uiting aan hul gevoelens te gee. “’n Mens lees ongelooflik baie in iemand te prente.” Haar geheim? "Geen snaakse new age dinge nie, net straightforward volgens die Bybel. Ek is slegs bruikbaar as 'n instrument in die hande van die Vader.” Sonder om name te noem of identiteite weg te gee, vertel sy van mense wat sy kon help het met krisisse in hul huwelik, identiteit, geloof en vele ander. En, sy eïen geensins vir haarself die eer toe nie, maar glo dat alles deur die Here se wil gelei word. “Die wortel van wat met mense gebeur, hoekom en hoe hulle besluite neem, kom van geboorte af. Sekere goed gebeur met jou in jou lewe, soos ‘n pa wat ‘n kleuter pakgee wat van ‘n fiets afval. “So ‘n voorval veroorsaak trauma by ‘n jong kind. ‘n Mens moet dáár begin om weer die persoon se lewe te herbou.” Sy verwys ook na ouers se kritiek wat veroorsaak dat kinders hulself druk om te presteer en dan as grootmense in mekaar tuimel as hulle hul werk verloor of nie “goed genoeg” presteer nie. “Hul verwysingsraamwerk het geword: ‘Wat sal die mense sê?’ Hulle raak perfeksioniste, en perfeksioniste verloor hulself baie keer in hul loopbaan.”
3
’n Groot groep mense doen voorbidding vir haar werk. “Die amazingste ding van alles is dat elke keer wat ek met iemand werk, God ook met my werk aan goed wat ék nog nie verwerk het nie. Dis die hele tyd ‘n skoonmaakproses.” Cilla kom uit ‘n agtergrond van menslike hulpbronne en massa-indiensname projekte. Sy het destyds by Lifeline in Richardsbaai vyftien weke opleiding as berader gekry. Later het sy beraders opgelei. Sy is in Virginia in die Vrystaat gebore en het ses jaar gelede het sy haar hart op Jacobsbaai verloor en hierheen getrek.
Cilla Meintjes van Jacobsbaai. Cilla sien haar lewensroeping om mense van brose porseleinpoppe te help herbou tot mense wat die lewe in die oë kan kyk. Sy nudge mense, dwing hulle nie. Sy het geleer om liggaamshouding baie fyn dop te hou. “Ek kan net vir mense kyk, dan weet ek waar hulle is, want die Here gee my die gawe.” Cilla glo dat die mense wat uiteindelik oor haar drumpel stap, deur God gestuur is. Wanneer dit nie die geval is nie, loop mense gewoonlik gou-gou. Gebed en gehoorsaamheid aan die Woord hou haar staande. Soms raak mense se omstandighede haar só, dat sy intens saamhuil. “Ek is so gekoppel aan die Here. Hy gee my insight.” Sy volg ‘n basiese “resep”, maar die Here wys baie keer vir haar dat sy met iemand op ‘n ander manier moet werk. “Jou ore is soos asblikke. Jy moet dit ná ‘n beradingsessie gaan uitwas. Jy moet jou psige skoon kry en dit is waarom ek begin skilder het. Om dit wat ek in my sessies hoor, uit my lyf te kry.”
4
NUUS • NEWS
23 Mei 2018
dié courant Moenie te veel let op die klein jakkalsies nie, dis die breër prentjie wat tel, is raad wat bejaardes vir mekaar gee oor tweede en derde huwelike en verhoudinge. Miskien lê daar tog waarheid in. Miskien maak dit nie meer saak in die silwerjare van ‘n mens se lewe nie. Maar, klein jakkalsies is egter besig om die vrede, samehorigheid en gemeensaamheid wat tog wel in ons land voorkom, op te vreet. Die rassekaart word vir die geringste rede uitgehaal, afgepoets en blinkgevryf. Alle kante toe. Gemoedere vlam hoog. Mense kry selfs tronkstraf omdat hulle iemand ‘n kras woord noem wat verwys na sy of haar velkleur. Politici is vinnig om so ‘n kans waar te neem om hul kiesers te probeer opsweep vir 2019. Ongelukkig kry hulle dit in baie gevalle reg, want wedersydse haat en nydigheid lê skynbaar net veldiep. Jaloesie en afguns is nog twee jakkalse.
Dis Goeie Nuus
Klein jakkalsies Doen die een goed is daar altyd tien ander wat wens dat hy of sy nie slaag nie. Velkleur is net die slaanding vir mense wat uitsigloos geword het, wat geen hoop meer het op ‘n beter lewe nie, wat meen dat sy of haar volk gemarginaliseer word. Ons is almal Suid-Afrikaners met Suid-Afrikaanse bloed. Hoe lank nog gaan gewone mense toegee daaraan om mekaar met die raskaart te slaan en te probeer seermaak? ‘n Mens het nie die luukse om sy velkleur te kies nie. Waarom dan ‘n ander daaroor blameer of almal van een kleur oor dieselfde kam skeer? Almal van een velkleur is níé dieselfde nie. En om mediaveldtogte te loods om een velkleur uit te lig en boos te maak, laat net jou eie velkleurgroep wraaksugtig en haatdraend lyk. Hopelik, eendag, sal ons na mekaar kan kyk en nie mekaar se velkleur raak sien nie, maar die mens daaragter.
Polisie-adjunk wil ook plaaslike SAPD verbeter
Dr. Andrew Bosman
'n Klein seuntjie
Almal hou van ‘n mooi storie. Verlede keer het ons van ‘n dogterjie gelees in die Ou testament, wat reeds op ’n baie jong ouderdom, die Here geken het. Sy kon by haar eie probleme verbykyk en die nood van iemand anders raaksien. Haar naam word nie eens vermeld nie. So ook in die Nuwe testament is daar ‘n seuntjie wat na vir die hele dag na die Here Jesus wou gaan luister, en vir hom ‘n kospakkie van vyf garsbroodjies en twee vissies saamgeneem het. Dit was net voor paastyd en die manne alleen was omtrent vyf duisend. Jesus het die brode en vissies geneem, en nadat Hy gedank het dit uitgedeel aan die dissipels en hulle aan die skare, soveel as wat hulle wou hê. Hy het hulle die brokstukke laat optel, sodat niks verlore sou gaan nie, en twaalf mandjies vol is opgetel nadat almal versadig was. Hoe maklik kyk ons na ons eie vermoë vas soos Filippus , en ons besef dat twee honderd mense se dagloon sou nie eers genoeg gewees het om so ‘n skare te voed nie. Vanuit God se perspektief is alles moontlik. Ons moet veral nou na Pinkster die Gees van die Here bid om ons te lei. Wees altyd aan die voorpunt van die goeie nuus met ons sosiale media. Volg ons Facebook-blad by @diecourant. Kontak ons by 022 487 3221 of stuur 'n epos na izelle@diecourant.co.za. Besoek ook ons webwerf by www.diecourant.co.za.
Bongani Mkongi, adjunkminister van die polisie. SALDANHA – Bongani Mkongi, adjunkminister van die polisie, het tydens sy besoek aan Saldanha op Vrydag 18 Mei gesê dat biljoene gespandeer gaan word om 28 000 polisiebeamptes te bevorder om die moraal onder polisiebeamptes te probeer lig. Hy het vroeër die oggend terugvoer aan polisiehoofde en ander hooggeplaasdes gegee oor sy besoek in Maart vanjaar, tydens ‘n vergadering by die Saldanha-polisiestasie. Mkongi het ook ‘n paar misdaadryke plekke in Middelpos besoek, voordat hy die gemeenskap in die Dial Rocksaal toegespreek het. ‘n Groot groep polisielede was binne en buite sigbaar.
“Daar moet oorlog gevoer word, nie teen ons mense nie, maar teen die kriminele. Ons is die mense se polisie. Ons ammunisie moet gebruik word teen geharde misdadigers.” Hy het ook gesê dat hy ‘n voorstander daarvan is dat polisielede na ander wêrelddele soos Rusland, Israel en Amerika gestuur moet word vir opleiding, sodat misdadigers vasgetrek kan word met minder konvensionele maniere. Hy het ook ‘n beroep op vroue gedoen om hulself uit situasies van gesinsgeweld te verwyder, “voordat julle deel van ons statistieke word”. Daar is ná die vergadering kospakkies uitgedeel.
NUUS • NEWS
23 Mei 2018
Velddrifweg - baie meer as net 'n uitgang na Velddrif VREDENBURG – Uitmuntende diens, dekades van ondervinding en kreatiewe denke snoer die sakeondernemings in Velddrifweg saam.
ACD
ACD Vredenburg, oftewel Auto Care @ Diagnostics, is 'n nasionale netwerk van onafhanklike werkwinkels wat spesialiseer in die diens van voertuie, onderhoud en herstel, plus hulle verskaf die nuutste metodes in die vasstelling van foute in voertuie. So voorsien hulle in die veranderende behoeftes van voertuigeienaars. ACD-fasiliteite is trots op die uitnemende diens wat hulle aan hul klante verskaf. Daar is meer as 70 verskillende konsessies regoor Suid-Afrika, met een op die Weskus se voorstoep, op Vredenburg.
Motolek
Albie en Nerina Hanekom het Motolek, ‘n outo-elektriese maatskappy van byna 45 jaar, in 2011 gekoop en dit loop nou saam met hul ander onderneming, Auto Care & Diagnostics (ACD). Hulle is bekend vir vinnige, akkurate diens.
Eusa Computer Accounting
Ena Koch het Eusa Computer Accounting in 1997 gestig en haar seun, Willem Koch het in 2007 by haar aangesluit. Hulle is al tien jaar lank die wenner van die Pastel-PCI Rekeningkundige Forum. Eusa het ‘n personeel van ses, elk met hul eie kundigheid. Ena doen opleiding, opstelling en ondersteuning vir Pastel-gebruikers. Willem doen opstelling, ondersteuning en dataregstellings.
Excelsior Pies
Excelsior Pies het pas na Velddrifweg geskuif, omdat dit ‘n besige straat is met baie mense. Hul helderkleurige vlae kan uit elke hoek gesien word. Excelsior Pies roem hulle daarop dat hulle groter, beter en meer vleiserige pasteie as ander maak. Die wonderlike reuk van pasteie, samoesas, gebak, vetkoek, beskuitjies, koekies en nog meer laat enigeen se mond water wat die netjiese perseel betree.
Fampak
Fampak is 'n verspreidingsagent vir alle groot verpakkingvervaardigers en het 'n wye verskeidenheid verpakkingsprodukte hoofsaaklik vir die voedselbedryf. Die sleutel tot hulle sukses is uitstekende kliëntediens en mededingende pryse.
Adelberg Auto
Adelberg Auto is alombekend vir hulle uitstekende diens en die ekstra myl wat André Adendorff en Marinda Liebenberg altyd bereid is om te loop. ‘n Tevrede kliënt skryf dat André met 'n stel gereedskap in die hand gebore is. Kliënte kom terug as gevolg van sy insig, kundigheid en professionaliteit as ‘n BMW-meestertegnikus. Hy en sy span werk ook aan ander gewone en luukse handelsmerke.
PG Glass Vredenburg
PG Glass Vredenburg is die bedryfsleier in die vervanging, herstel en montering van glas. Hulle spesialiseer in motorruitherstel en vervanging sowel as die bou van ruitvervangings. Hulle is bekend vir hul koste-effektiewe en gerieflike kliëntediens, doeltreffende professionele personeel en hoë gehalte glas.
Prestige Meubels
Cornelia Visser se Prestige Meubels is bekend vir hoë gehalte tweedehandse meubels en ander benodigdhede vir die huis én motorhuis. Die winkel nooi jou om te kon snuffel en oor verskeidenheid kan daar nie gekla word nie. Daar is iets vir almal.
Velddrifweg is propvol besighede wat tot diens van die publiek staan.
5
6
Dagboek • Diary Weekliks
Alkoholiste Anoniem, Maandae in Vredenburg, Woensdae in Langebaan en Vrydae in Saldanha – 073 179 0751.
Geleenthede
Vrydag 25 Mei: Weskus-jeugorkes, Die Plaasmol, Hopefield, 19:00, drag semi-formeel, R100 volwassenes, R70 studente en pensioenarisse – Tania 074 428 2802, oornagkampeerplek Fransie 074 924 8478. Saterdag 26 Mei: Morning Talk at West Coast Fossil Park, “Be of good cheer and drink well!”, principles, practices and utensils of ancient Greek drinking presented by Dr Samantha Masters, 10:30-12:00, R45 pp – Nadia/ Wendy/ Hildegard: 022 766 1606 or edu@fossilpark. org.za; Kom drink tee saam met aktrise Quanita Adams, Weskus Mall, 14:00, gelukstrekkings, R120 pp – Olivia 022 703 6900. Internasionale pik-en-slukaand, ATKV Saldanhabaai, disse van vyf lande, 18:00, lede R120 pp, nie-lede R150 pp, geen kinders o.18 – Corné by 083 235 8619 of Hedwig 083 364 5827. Woensdag 30 Mei: Vredenburg-tuinbouklub besoek Khoisan Sout, Velddrif, eie vervoer, verversings en tee/koffie na besoek (lede R50, nie-lede R80) –Ansie Loudon 083 284 3941. Dinsdag 29 Mei: Weskus Fotografiese Stigting, maandelikse byeenkoms en terugvoer, 18:30, Ou Stalle by NG Kerk-moedergemeente – Anna-Marie by 084 577 7752. Saterdag 2 Junie: Jurie Hayes Primêr hou Debutantebal en dinee by Hoërskool Vredenburg, R200 pp – 022 766 1568. Saterdag-Sondag 30 Junie tot 1 Julie: Goedverwacht Snoek en Patatfees, volwassenes R80 pp, kinders o.3 gratis, kinders tussen 3-18 R30 pp.
23 Mei 2018
NUUS • NEWS
Saterdag 14 Julie, Franja du Plessis en Ruan Josh by die Bergrivier-winterkarnaval by Riviera Hotel, Velddrif. Donderdag-Sondag, 30 Augustus tot 2 September: Hopefield-fynbosskou, Hopefield-sportterrein – 022 783 0856. Vrydag-Saterdag, 15-16 Desember: Mykonosfees, Langebaan, met onder meer Snotkop, Francois van Coke, Emo Adams, Jay, Refentse en Juanita Du Plessis. Hekke open Vrydag om 14:00, R100 pp per dag, R50 kinders o.14 – Kaartjies by Computicket / 022 707 7000 / info@clubmykonos.co.za.
SPORT Weekliks
Vredenburg-judoklub oefen Dinsdae en Donderdae, 17:00-19:00, Louwville-gemeenskapsaal, Vredenburg – Frazer 064 475 3097. Langebaan Stars-gimnastiekklub, oefen Dinsdae en Donderdae, Seebries Park, Langebaan – Madeleine 082 811 8118. Salkoriane-atletiekklub oefen Maandae, Dinsdae en Donderdae – stappers (Vernon 083 392 9356) en atlete (Sakkie 071 427 6731). Vredenburg-tennisklub oefen Woensdae 16:00 en Saterdae 13:30. – Benice 078 577 7997 / Annamari 083 356 6192. Langebaan Parkrun, Saterdae, 08:00, Langebaan Country Estate, Oostewalstraat. Gratis, registreer vooraf – parkrun.co.za/langebaan. Weskus-klawerjasunie (‘n streekskaartspelliga baie soos troewe), Sondae, kom speel saam – Charles 073 928 9004. Langebaan-atletiekklub, elke weeksdag, atlete oefen baan, veld, landloop, tweekamp, stap en pad. – Christopher 073 232 0046 / chrodgers1@ gmail.com.
Neem deel/ gaan kyk:
Saterdag 26 Mei: Curro Langebaan Golf Day, 11:45-13:30, Langebaan Country Estate, R1400 per four-ball, R750 per two-ball, bookings – Dommonique, dommo.f@curro.co.za Sunday 27 May: 4th Darling Brew Extreme DBX17, mountain bike race, start and finish at Darling Brewery, 48 Caledon Street, Darling, 07:30 – 021 286 1099, tasteroom@darlingbrew. co.za Woensdag-Saterdag, 11-14 Julie: Bergrivierkanomarathon, Velddrif – berg.org.za Sunday 2 September: Premier Drag Racing, Saldanha Airstrip, 09:30-17:30. Vrydag-Dinsdag, 28 September-2 Oktober: Hobie 16 SA Nasionale Kampioenskap, Hobie Beach, Club Mykonos – 083 300 1663 / hobiesun@ mweb.co.za.
KERKDIENSTE OP SONDAE * CHURCH SERVICES ON SUNDAYS NG Kerk Vredenburg Akkerdyk, Herculesstraat: erediens om 09:30 – 022 713 1314. AGS Weskus Lighuis, Hoofstraat, Vredenburg: diens om 09:00 – 083 230 5656 / 084 205 6944. Baptist Church, De Klip Street, Vredenburg: 10:00 – 076 370 2132. West Coast Vinyard Church, Heuningklip Street, Vredenburg: service starts at 09:30 - 022 713 4253. Nuwe Lewe Kerk, bo-op FNB, Hoofstraat, Vredenburg: vooraf koffie, diens om 10:00 – 073 179 0992. NG Kerk Vredenburg-moedergemeente, Hoofstraat, Vredenburg: 09:30 – 022 715 1276. Stuur asseblief inligting vir die gratis dagboek na alida@diecourant.co.za vóór Maandae om 10:00.
NUUS • NEWS
7
23 Mei 2018
Wie gaan White City wen in verkiesing?
Rudi Swartz van White City, Saldanha, met Wynand Breedt se nuwe CD, Gee my een wens, wat hy gewen het deur die oulikste onderskrif vir 'n foto uit te dink. Dié Facebook-kompetisie het 14 000 bereik. Regstelling: Die hobbelperd wat sy eienaar soek is in Moorreesburg gekoop by Douw de Lange, nie Steyn nie, soos in verlede week se uitgawe verskyn het nie. Die nommer moet wees 082 297496.
ANC: Barenice Cortje SALDANHA – Die bedanking van ‘n gerespekteerde DA-raadslid in die Saldanhabaai munisipale raad, Rayn Don, weens probleme met sy gesondheid, het ‘n tussenverkiesing op Woensdag 30 Mei genoop. Vier gemeenskapsleiers, elkeen met sy eie politieke paadjie wat tot by dié punt geloop het, staan as kandidate in White City, Wyk 3: ANC – Barenice ‘Barry’ Cortje (38) DA – Charleen van Nooi (54) EFF – Bongani Booi (47) ICOSA* – Kathleen ‘Truintjies’ Heynes (66) Cortje, ‘n boorling van White City, hoop dat as sy wen, sy die platform sal kan gebruik om die jeugontwikkeling waarmee sy in die gemeenskap besig is, verder te vat. Sy is ‘n lid van die wykskomitee asook die raadgewende komitee oor opleiding by die Saldanhabaai-nywerheidontwikkelingsone. Cortje het skool gelos en by Sea Harvest gaan werk, maar later ‘n N4 Bestuursdiploma by Weskus Kollege verwerf. Van Nooi, ‘n opgeleide kleuterskoolonderwyseres, glo dat sy as raadslid die diens sal lewer wat die gemeenskap van haar verwag. Sy ken die gemeenskap, veral omdat sy as skoolhoof met die ouers van die kinders in haar kleuterskool werk. Sy dien op die streek se voorskoolse leer ontwikkelingsforum en is ook deel van die weduweeklub. “Ek wil bitter graag ons jeug help.” Sy
ICOSA: Kathleen Heynes glo dat ouers hul regmatige plekke in die gesin moet inneem. Booi, ‘n oud-Southern Seas Fishing-werker en nou taxi-eienaar, wil verandering teweegbring. Hy is veral bekommerd oor die verval van die jeug in White City. “Die kinders gebruik te veel drugs, loop rond en werk nie.” Hy wil ook help om huise vir almal te kry, omdat dié nood hom na aan die hart lê. Heynes, ‘n White City-grootwordkind, wil die verskil-stem wees. Sy glo dat die verskillende partye sal moet saamwerk om die breë gemeenskap te bevoordeel. “Niks in die lewe kom sonder opoffering nie en ‘n mens moet die Here eerste stel in alles wat jy doen.” Sy het as jong vrou haar drome gelos om haar ma, wat haar kleintyd al Truintjies die “Explorer” gedoop het, te kom versorg. Sy sê dat haar deur oop is vir die gemeenskap, hoewel sy haar veral beywer vir die “agtergeblewe bruin volk”. Inwoners van White City kan op Woensdag 30 Mei tussen 07:00-21:00 by die Schutersaal langs St Andrew’s Primêr en by die Berseba-kerksaal in Dolfynstraat stem, mits hulle daar geregistreerd is. Spesiale stemme word die vorige dag op Dinsdag 29 Mei afgehandel. *Icosa is die Onafhanklike Burgerlike Organisasie vir Suid-Afrika.
EFF: Bongani Booi
DA: Charleen van Nooi
courant 23 Mei 2018
dié
8
Tel: 022 487 3221
NUUS • NEWS
SPORT
23 Mei 2018
Young Hearts voor met punte in Grootuitdaagbekerreeks Alida Buckle Volgens die nie-amptelike puntestand staan Young Hearts-rugbyklub van Pella eerste op die punteleer, ná Saterdag 19 Mei se kragmetings. Saldanhabaai staan net met ‘n punt agter hulle met Vredenburg-rugbyklub derde met 9 punte. St Helenabaai het 7 punte. Paternoster, Velddrif en Langebaan het elk 5 punte en Mamre en Hopefield nul. Volgens Davie Lawrence van Boland Klubrugby Nuus was dié naweek se voorste puntemakers: Evan Barends (Vredenburg) 36, Fabio Afrika (Velddrif) 34, Gilmore Solomons (Young Hearts) 25, Raymond Papier (St Helena) 24 en Ambrose Barends (Paternoster) 23. Drieë is gedruk deur Gilmore Solomons (Young Hearts, 5), Barry Adonis (Young Hearts, 4), Ruan Kleinsmidt (Vredenburg, 4), Denwill Mannewill (Saldanha, 3), JP Martin (Paternoster, 3) en Tiaan van Wyk (Paternoster, 3). Uitslae is: Saldanha 42-17 Langebaan, Vredenburg 43-20 Mamre, Paternoster 44-9 Hopefield, Young Hearts van Pella 35-20 Velddrif. St Helenabaai het ‘n loslootjie gehad. Saterdag 26 Mei speel, tuisveld eerste: St Helenabaai teen Mamre, Vredenburg teen Saldanha, Langebaan teen Young Hearts en Velddrif teen Hopefield. Paternoster het ‘n loslooitjie. Hoewel Langebaan moedig teruggeveg het, was daar geen keer aan Saldanha nie.
VHS speel moedig teen Stellenbosch
VREDENBURG – In ‘n moedige poging het die A-spanne van Hoërskool Vredenburg net-net teen die van Hoërskool Stellenbosch verloor. Daar is op Saterdag 19 Mei hokkie, netbal en rugby gespeel. Die o.19 A rugbyspan verloor 33-29, die o.18A meisiehokkiespan verloor 1-0, die o.18A seunshokkiespan speel gelykop 0-0 en die o.18A netbalspan verloor 24-19.
Junior Jansen snel voort met die bal. Spanmaat Ricky Vlooch is agter.
Kontak ons • Contact Us
Ontwikkelende skopboksers hou toernooi:
Inge Roux (links) en Diané Pienaar veg dit uit in die o.56kg afdeling tydens die toernooi wat Saterdag 19 Mei by die Vredenburg-sportterrein gehou is. Die Vredenburg-skopboksklub, ‘n ontwikkelende klub, het toernooigasheer gespeel vir die ontwikkelende klubs van so ver as Vredendal. Foto: Alida Buckle
Redakteur: Izélle Garcia- izelle@diecourant.co.za Bemarkingsbestuurder: JB Paterson- ads@diecourant.co.za Joernalis: Alida Buckle- alida@diecourant.co.za Bemarkers: Desiré Kriel desire@diecourant.co.za Isabella Schnetler isabella@diecourant.co.za
Finansies: Jane Gouws - accounts@diecourant.co.za Web: www.diecourant.co.za Facebook: @diecourant Tel: 022 487 3221
Caitlin Skippers (links) van Hoërskool Vredenburg gryp die bal weg.