Gair Bach o Gyngor - Rhagfyr 2023

Gair o Gyngor Rhagfyr 2023

Rhifyn 10

Staff Cyngor Gwynedd

CRIW DERWEN YN SERENNU AR Y SGRIN FACH

Gair bach

gan y golygydd

Croeso i rifyn arall o Gair Bach o Gyngor.

Fel y gwelwch ar y clawr, mae staff Gwasanaeth Derwen wedi bod yn brysur iawn yn adnewyddu lleoliad ar gyfer plant gydag anableddau. Ar dudalennau 8 a 9 cawn glywed gan aelodau staff y gwasanaeth a fu yn serennu ar y rhaglen Prosiect Pum Mil. Ar dudalennau 4 a 5 cawn ddarllen am gynllun gofal cyffrous sydd gan y Cyngor i recriwtio a datblygu staff i’r sector Gofal. Byddwn yn cael darllen am brofiad un aelod o staff sydd yn rhan o gynllun Therapyddion Galwedigaethol Cyngor Gwynedd.

Cawn ddarllen am sut mae un o sêr tîm pêl-droed Cymru wedi dangos cefnogaeth i un o wasanaethau’r Cyngor ar dudalen 6.

Gyda’r Nadolig yn agosáu, gall fod yn gyfnod heriol iawn wrth wynebu argyfwng costau byw. Ar dudalennau 12 a 13 cawn gyfarfod y tîm sydd yn ymweld â thrigolion y sir i ddarparu cymorth costau byw.

Mae sawl stori ddifyr arall wedi eu cynnwys, gobeithio y gwnewch fwynhau eu darllen.

Rydym eisiau clywed am eich llwyddiannau chi ac eich cydweithwyr. Efallai fod prosiect wedi derbyn canmoliaeth neu eich bod wedi cyflwyno rhywbeth newydd yn y gweithle. Bach neu mawr, rydym eisiau clywed amdanynt.

Cofiwch os hoffech chi gyfrannu at y rhifyn nesaf mae modd i chi gysylltu drwy e-bostio cyfathrebumewnol@gwynedd.llyw.cymru neu ffonio 01286 679341.

Diolch i bawb sydd wedi cyfrannu at y cylchgrawn yn 2023. Dyma ddymuno Nadolig Llawen a Blwyddyn Newydd Dda i chi gyd.

Ffion Oeddech chi'n gwybod fod 60% o boblogaeth Prydain ar Facebook? Dydan ni yma yng Ngwynedd ddim gwahanol a dyna pam, yn dilyn sgyrsiau efo staff mae grŵp Facebook wedi cael ei greu yn arbennig ar gyfer HOLL staff Cyngor Gwynedd.

Dyma gyfle i bawb gael gwybodaeth am y Cyngor yn syth bin - ar eich ffôn, ar eich iPad neu ar eich cyfrifiadur. Os hoffech ymuno gyda'r grŵp chwiliwch am "Staff Cyngor Gwynedd" ar Facebook .

ENILLYDD CYSTADLEUAETH CALENDR 2024 Llongyfarchiadau mawr i Aled Carrington Rees o’r Adran Cefnffyrdd am ennill y gystadleuaeth calendr eleni gyda’i lun o afr Dinorwig. Bydd y llun buddugol yn ymddangos ar galendr swyddogol y Cyngor ar gyfer 2024.

Dywedodd Aled: “Cefais fy swyno wrth weld gafr yn Eryri, gyda chefndir mawreddog Yr Wyddfa. Roedd yn ddiwrnod syfrdanol o hardd, a theimlais yn ffodus i weld moment mor brin a hudolus. Fe wnes i gydio yn fy nghamera yn gyflym a thynnu'r llun, gan wybod mai dim ond ychydig eiliadau oedd gen i i ddal hanfod yr anifail swil ac eiconig hwn. Rwy'n mwynhau crwydro Eryri ar droed a beic ac mae fy nghamera bob amser yn barod i ddal y golygfeydd hardd arbennig y byddaf yn dod ar eu traws. Rwy’n ddiolchgar i bawb a bleidleisiodd drosof ac a werthfawrogodd fy llun.”

Dathlu Therapyddion Galwedigaethol

Richard

Ar gychwyn mis Tachwedd cynhaliwyd wythnos Therapi Galwedigaethol. Mae’r wythnos yn gyfle i ddathlu Therapyddion Galwedigaethol a’r holl waith maent yn ei wneud yn ein cymunedau lleol. Mae gan Cyngor Gwynedd gynllun gofal cyffrous i recriwtio a datblygu staff i’r sector Gofal. Mae’r cynllun yn golygu bod hyfforddeion yn cael cyfle i astudio am radd gyda chymhwyster proffesiynol yn rhan amser; gydag amser i fynychu’r brifysgol ac amser astudio ochr yn ochr â gallu parhau yn eu swydd.

Yn aml mae costau mynychu prifysgol neu goleg a’r buddsoddiad amser yn golygu nad yw yn opsiwn y gall pobl ei ystyried ac mae’r cynllun yma yn negyddu rhywfaint o’r rhwystrau yma gyda Gwynedd yn elwa o ffynhonnell o Therapyddion Galwedigaethol lleol.

Un aelod o staff sydd yn rhan o gynllun Therapyddion Galwedigaethol y Cyngor ydi Richard Cashman.

Dyma gyfle i holi Richard am ei brofiad fel hyfforddai ar y cynllun.

Sut wyt ti wedi cyrraedd lle ‘wyt ti heddiw?

Mae fy nhaith i gyrraedd lle ydw i yn bresennol wedi bod yn un amrywiol. O fy rôl hyfforddi pêl-droed yn broffesiynol draw yn America, i gymhorthydd dosbarth mewn ysgolion cynradd ac uwchradd, gweithiwr cefnogol, cydlynu prosiect Iechyd a Llesiant draw yn Antur Waunfawr ac athro chwaraeon. Dros y pedair blynedd diwethaf, rwyf wedi bod ar daith yn y maes iechyd a llesiant gyda’r tîm Anabledd Dysgu yng Nghyngor Gwynedd.

Mae pob un o'r profiadau hyn wedi chwarae rhan ganolog yn fy natblygiad, gan roi amrywiaeth o sgiliau i mi i’w ddefnyddio drwy gydol fy ngyrfa. Mae’r profiadau hyn wedi dysgu gwerth hyblygrwydd, amynedd, cymryd risgiau cadarnhaol a rhoi’r bobl rwy’n eu cefnogi wrth wraidd popeth dwi’n wneud.

Beth yw dy gefndir gwaith?

Roedd fy mhrofiad gyntaf o’r maes gofal tua saith mlynedd yn ôl pan gefais y fraint o weithio gyda dyn ifanc draw yn Ynys Môn. Gadawodd y profiad hwn farc mawr arna i yn bersonol ac yn broffesiynol. O fewn y rôl honno dechreuais adnabod yr effaith bositif all tîm cydweithredol a chefnogol ei gael ar fywyd unigolyn.

Yn ystod y cyfnod yna ges i'r cyswllt cyntaf efo Therapyddion Galwedigaethol a chyfle i ddysgu mwy am y rôl. Dechreuais ddod yn ymwybodol o'r potensial trawsnewidiol y gallai'r math hwn o waith ei gael ar fywyd rywun. Gwelais law gyntaf sut y bu i’r cydweithio grymuso unigolion i gael mwy o annibyniaeth a chymryd rhan mewn galwedigaethau mwy pwrpasol.

Ar ôl hyn, tyfodd fy niddordeb yn y rôl, ond doeddwn i ddim yn ymwybodol sut a lle fyddai dechrau dilyn gyrfa yn y maes. Wrth i mi ennill mwy o brofiad mewn gofal, mi ddes ar draws cyfle gwych wedi i mi ailymuno gyda’r Cyngor a Thîm Anabledd Dysgu yn llawn amser. Mi ddes ar draws y cynllun hyfforddeion therapi galwedigaethol.

Sut mae’r cynllun hyfforddeion wedi dy helpu?

Mae'r cynllun hyfforddeion nid yn unig wedi agor drysau i mi ond hefyd wedi cynnig llwyfan unigryw i weithwyr proffesiynol i weithio tuag at yrfa newydd. Ar hyn o bryd, rydw i yn fy mlwyddyn gyntaf, newydd ddarfod lleoliad 8 wythnos gyda’r Blind Veterans yn Llandudno. Mae hyn yn golygu bod gen i 3 blynedd a hanner arall ar ôl ar y cwrs.

Mae fy lleoliad gyda Blind Veterans wedi bod yn hynod bositif. Mae gweithio gyda’r cyn-filwyr yn y lleoliad hwn wedi fy ngalluogi i weld yn uniongyrchol effaith ryfeddol Therapi Galwedigaethol ar unigolion â nam ar eu golwg. Mae’r gefnogaeth a’r arweiniad gan staff profiadol wedi bod yn allweddol yn fy nhwf proffesiynol, ac rwyf wedi cael y fraint o’r cyfle i ddatblygu fy sgiliau ymhellach. Mae’r lleoliad hwn wedi bod yn help mawr tuag at fy nealltwriaeth o rôl Therapi Galwedigaethol wrth gyfoethogi bywydau’r rhai sy’n wynebu heriau unigryw, ac rwy’n wirioneddol ddiolchgar am y cyfle. Ac i fod yn onest, ni fydda dim o hyn yn bosib heb y cynllun hyfforddeion.

Beth mae’r cynllun yn olygu i chdi?

Mae’r cynllun hyfforddai wedi bod yn gyfle anhygoel i mi gyfuno astudiaethau academaidd â phrofiad ymarferol, byd go iawn fel Swyddog Llesiant o fewn y tîm Anableddau Dysgu. Rwy'n mwynhau'r daith ddysgu yn fawr, ac mae cael fy amgylchynu gan ddysgwyr eraill ar y cwrs gydag ystod amrywiol o brofiadau yn wych.

Mae'r cyfuniad hwn o brofiadau academaidd ac ymarferol yn fy ngalluogi i bontio theori â chymhwysiad ymarferol. Mae’n broses sy’n dyfnhau fy nealltwriaeth o rôl Therapi Galwedigaethol ac yn tanlinellu ei harwyddocâd hollbwysig wrth drio gwella bywydau unigolion.

Mae'r gefnogaeth barhaus gan yr Adran Hyfforddiant wedi bod ac yn parhau i fod yn anhygoel. Mae peidio gorfod aberthu fy incwm wrth anelu am yrfa newydd wedi lleddfu baich sylweddol. Ar ben hynny, mae bod yn rhan o grŵp Whatsapp gyda chyd-aelodau o’r cynllun sydd hefyd yn staff y cyngor wedi bod yn adnodd ardderchog ar gyfer rhannu gwybodaeth, chwilio am gyngor, a chyfnewid arferion da.

Mae'r elfennau hyn wedi gwneud fy mhrofiad gyda’r cynllun yn werth chweil ac rwyf yn ddiolchgar iawn am y cyfle. Byddwn yn argymell y cynllun hwn i unrhyw un sy’n ystyried gyrfa mewn Therapi Galwedigaethol neu unrhyw yrfa arall sydd ar gael. Mae’r cyfuniad o gefnogaeth, hyblygrwydd ariannol, a chymuned gefnogol o weithwyr proffesiynol wedi gwneud y daith hon yn un positif iawn.

Am fwy o wybodaeth ynghylch cyfleoedd datblygu ac am swyddi yn y sector gofal yma yng Ngwynedd: ffoniwch Gill neu Elen 07384876908 e-bostiwch gofalu@gwynedd.llyw.cymru ewch i www.gwynedd.llyw.cymru/GalwGofalwyr

PÊL-DROEDIWR CYMRU YN CEFNOGI DEMENTIA ACTIF Mae Nathan Broadhead yn enw cyfarwydd iawn i ddilynwyr pêl-droed. Ganwyd Nathan sy’n chwarae fel ymosodwr i Gymru ac Ipswich Town ym Mangor ac yn ddiweddar mae wedi dangos ei gefnogaeth i un o wasanaethau’r Cyngor sydd yn cefnogi pobl gyda dementia.

Mae Nathan wedi rhoddi ei grys o gêm Cymru v Gibraltar a gymerodd le yn Cae Ras, Wrecsam ym mis Hydref i Dementia Actif Gwynedd.

Mae Tîm Dementia Actif Gwynedd yn angerddol am godi ymwybyddiaeth, lleihau stigma a chwalu rhwystrau sydd ynghylch â Dementia.

Nod y tîm yw cefnogi pobl sydd wedi eu heffeithio gan ddementia, ac helpu i'w gwneud hi'n haws siarad am Dementia a fydd yn ei dro yn cefnogi pobl fyw mor dda ag sy’n bosib gyda’r afiechyd.

Nathan

Nid hyn yw’r tro cyntaf i Nathan ddangos ei gefnogaeth gan iddo gefnogi ymdrechion codi arian ar gyfer Dementia Actif yn gynharach yn y flwyddyn drwy ddod yn berchennog balch ar grys diweddaraf Bangor Comrades. Cafodd y Bangor Comrades ei ffurfio yn 2018 fel grŵp anffurfiol o gefnogwyr Bangor ar gyfryngau cymdeithasol a oedd am gadw ysbryd a hanes y gêm yn fyw yn y ddinas. Mae’r grŵp yn gweithio i hyrwyddo gweithgareddau cymunedol yn enwedig y rhai sy’n gysylltiedig â lles a chymorth iechyd meddwl. Maent eisoes wedi casglu £1,270 ar gyfer cefnogi Dementia Actif Gwynedd.

Dywedodd Emma Quaeck, Cydlynydd Dementia Actif Gwynedd: “Hoffai tîm ac aelodau Dementia Actif Gwynedd ddiolch i bawb o Bangor Comrades am yr ymdrech anhygoel i godi’r swm rhyfeddol o £1270 - rydym wedi ein syfrdanu gan yr haelioni. Bydd yr arian yn mynd tuag at drefnu digwyddiad arbennig ar gyfer gofalwyr di-dâl sy'n gofalu am anwyliaid sy'n byw gyda dementia.

“Rydym yn gwybod bod gofalwyr di-dâl ac aelodau o’r teulu yn gwneud gwaith gwych mewn amgylchiadau heriol a hoffem ddangos ein gwerthfawrogiad trwy ddarparu digwyddiad a fydd yn rhoi ychydig o amser a mwynhad iddynt.

Diolch yn fawr iawn unwaith eto.”

Lia o Tîm Dementia Actif Gwynedd efo Moira Owen (gofalwr di-dâl) a Pete Jones (o grŵp cefnogwyr Bangor Comrades)

CODI ARIAN ER COF AM ALISON

Ruth, Arwel, Huw, Miriam a Guto

Yn gynharach eleni bu i ni dderbyn y newyddion hynod o drist am ymadawiad brawychus o sydyn ein ffrind a chydweithiwr Alison Evans. Roedd Alison yn Ymgynghorydd Caffael yn y Gwasanaeth Caffael Canolog.

Penderfynodd teulu, ffrindiau a chydweithwyr Alison gynnal taith gerdded yn ystod yr Haf mewn lleoliad lle'r oedd Alison yn mwynhau treulio amser. Fe gychwynnodd y daith gerdded yn Llangollen gan ymweld â’r Dyfrbont Pontcysyllte cyn cerdded yn nol a chwblhau’r daith yn Llangollen.

Fe wnaeth y criw gerdded deg milltir dros dair awr a hanner felly roedd hi’n bwysig cael gorffwyso’r traed yn Chapel Tea Room cyn cwblhau’r daith.

Er iddi fwrw glaw trwm ar y ffordd lawr i Langollen, daeth yr haul allan a phawb wedi mwynhau’r diwrnod mewn lleoliad oedd yn agos iawn i galon Alison.

Llongyfarchiadau mawr i’r criw am godi £1,000 at y Stroke Association.

CRIW DERWEN YN SERENNU AR Y SGRIN FACH

Karen a Demi (canol) gyda’r criw trawsffurfio

Roedd wynebau cyfarwydd iawn yn serennu ar y sgrin fach yn ddiweddar wrth i griw Prosiect Pum Mil ymweld â Phwllheli. Caban Heli oedd yn derbyn sylw wrth i Trystan ac Emma helpu criw Derwen i drawsffurfio hen glwb hwylio yn ganolfan addas i’r plant sydd yn defnyddio eu gwasanaethau. Dwy aelod staff y gwasanaeth a gymerodd rhan yn y rhaglen oedd Karen Parry Davies a Demi Davies. Dyma gyfle i holi y ddwy am y profiad o gael bod yn rhan o un o raglenni mwyaf poblogaidd S4C.

Oes modd i chi egluro dipyn am Wasanaeth Derwen?

Rydym yn dîm integredig sy’n gweithio hefo plant a phobl ifanc anabl a gwael rhwng 0 a 18 oed yng Ngwynedd. Rydym yn darparu gwybodaeth, asesiadau, ymyrraeth a chefnogaeth i blant a phobl ifanc gydag anghenion parhaus o ganlyniad i anabledd neu waeledd.

Rydym hefyd yn anelu i gefnogi teuluoedd, gofalwyr a’r gymuned ehangach er mwyn hybu iechyd a lles, datblygu sgiliau a chynnal gweithgareddau amrywiol i sicrhau datblygiadau a chanlyniadau positif ar gyfer y defnyddwyr gwasanaeth a’u teuluoedd.

Sut deimlad oedd cymryd rhan ym Mhrosiect Pum Mil? Anhygoel. Gwefreiddiol. Does dim geiriau i’w ddisgrifio i fod yn onest. Profiad unwaith mewn bywyd – go iawn! Hefyd yn deimlad o foddhad mawr iawn, ein bod yn llwyddo i greu darpariaeth sydd yn hynod o werthfawr i’r tîm a hefyd i’r gymuned eang.

Sut oeddech yn teimlo am fod o flaen camera?

Demi: Ofnadwy!! Karen ddim rhy hoff o’r camera (medda hi!!) ond wedi gwneud dipyn o ymdrech i edrych fel ‘super-model’ i’r gynulleidfa!!!

Karen: Demi reit dawel – fydd rhaid nôl camera yn fwy aml – ‘rioed wedi ei gweld hi mor ddistaw!!

Faint o amser wnaeth o gymryd i drawsnewid Caban Heli?

Cafodd llawer o waith paratoi ei wneud yn yr wythnosau yn dod i fyny i’r penwythnos mawr ond cafodd mwyafrif o’r gwaith ei wneud dros gyfnod o dridiau.

Pa wahaniaeth wneith y trawsnewid i fywydau’r plant rydych yn ei gefnogi ac i chi fel staff?

Mae’r boddhad mae’r plant yn gael o’r gwahanol adnoddau yn anhygoel. Mae cael y cyfle i fod yn rhan o Brosiect Pum Mil wedi ein galluogi i gael hafan ddiogel ar gyfer y plant rydym yn eu cefnogi, yn ogystal â’r staff. Mae defnyddio Caban Heli yn rheolaidd wedi galluogi ni fel staff i adeiladu perthnasau newydd, cyfathrebu a chydweithio yn fwy effeithiol er mwyn gallu canolbwyntio a sicrhau fod y plant, phobl ifanc a’u teuluoedd yn derbyn y gwasanaeth diogel o safon.

Mae cael hafan ddiogel wedi ein galluogi i gynnal amrywiaeth o weithgareddau grŵp sy’n datblygu sgiliau cymdeithasol y plant a chyfleon cymdeithasu nad oedd yn digwydd mor aml cynt.

Beth yw eich hoff ran o Gaban Heli?

Karen: Y tu allan! Er mae’n anodd iawn penodi un lleoliad gan fod bob rhan wedi fy syfrdanu yn llwyr.

Demi: Does dim hoff ran – bob man!!! Ond os fysa rhaid i mi ddewis, y ‘stafell sensori dywyll, mae’r plant wrth eu boddau yna yn ymlacio a chael seibiant bach o gyffro bywyd (a fi hefyd!!)

Sut gefnogaeth gawsoch chi gan y gymuned leol?

Nid oes bosib i ni ddiolch digon i’r HOLL gymuned unigolion a busnesau a helpodd ni. Mi faswn yma am byth yn rhestru pawb! Mae gennym ddyled fawr i’r gymuned - wnaeth pawb rhoi eu hamser sbâr i fyny a gweithio’n galed i gwblhau’r gwaith ar raddfa amser fer.

Hefyd, mae haelioni pawb o ran rhoi disgowntiau a phethau am ddim wedi bod yn anhygoel, nid oeddem yn disgwyl gymaint gan bobl. Nid yn unig ein cymuned leol sydd wedi bod yn wyrthiol, ond yr hyn sydd wedi ein dychryn fwyaf ydi’r gefnogaeth a gafwyd o’r gymuned ehangach, roedd criw wedi dod o ochrau Wrecsam i wneud gwaith a rhoddion am ddim, nid oeddem yn medru coelio’r peth!

Ein gobaith nawr yw sefydlu’r lle yn adnodd i’r gymuned leol, er bod dipyn o “loop holes” i neidio drwy rydym yn gobeithio’n arw fydd popeth yn ei le dechrau’r flwyddyn. Eto hoffwn ychwanegu ein gwerthfawrogiad i bawb a fuodd ynghlwm a’r prosiect o’r cychwyn i’r diwedd.

Mae modd i chi wylio Prosiect Pum Mil: Caban Heli drwy ddilyn y ddolen yma: BBC iPlayer - Prosiect Pum Mil - Prosiect Pum Mil: Caban Heli, Pwllheli

I ddysgu mwy am Derwen, ewch i Gwefan: Tîm Integredig Plant Anabl Facebook: Derwen

GWENNO YN DERBYN CYDNABYDDIAETH Llongyfarchiadau mawr i Gwenno Angharad Williams oedd yn un o bump gyrhaeddodd y rhestr fer ar gyfer gwobr Partneriaid Gwerthfawr, Gyrfa Cymru. Cafodd Gwenno sydd yn gweithio fel Swyddog Marchnata a Datblygu Gyrfaoedd yn yr Adran Plant a Chefnogi Teuluoedd ei henwebu yn y categori Cyfraniad Personol Eithriadol.

Mae’r gwobrau yn ffordd i Gyrfa Cymru gydnabod a diolch i’r rhai sydd wedi cydweithio gyda nhw. Roedd y seremoni wobrwyo yng Nghaerdydd yn gyfle i ddathlu'r holl fusnesau oedd ar y rhestr fer cyn cyhoeddi'r enillwyr.

Mae Gwenno wedi derbyn enwebiad gan iddi: • Ddangos ymrwymiad eithriadol i gefnogi gweithgareddau mewn ysgolion • Dangos parodrwydd i roi cynnig ar syniadau newydd • Annog eraill o’u sefydliad i gymryd rhan • Gymryd camau pendant i hyrwyddo eu perthynas â Gyrfa Cymru ac ysgolion.

Gwenno

Dywedodd Gwenno: “Dwi’n hynod o ddiolchgar o gael fy enwebu yng Ngwobrau Partneriaid Gwerthfawr Gyrfa Cymru. Mai mor braf treulio amser efo pobl ifanc, gallu rhoi nhw ben ffordd a phlannu syniadau ar gyfer eu llwybrau gyrfa. Pan o ni’n yr Ysgol dwi’m yn cofio cael ffasiwn gefnogaeth gan gyflogwyr amrywiol a dwi’n meddwl bod gweld eich opsiynau mor bwysig. Braf iawn ydi dychwelyd i Ysgolion a bod y disgyblion yn eich cofio a gweld eu bod wedi cymryd eich cyngor.

O ni’n gweithio yn hwyr ryw noson, digwydd bod wedi bod mewn digwyddiad Gyrfa Cymru yn Pontio, pan ges i e-bost gan hogan ifanc oedd yn crisialu yn union pam fod ni’n neud y gwaith yma. Ar ôl neud sesiwn ffug gyfweliad efo’i ac ar ôl cael sesiwn wybodaeth ar brofiad gwaith, ar liwt ei hun roedd y ferch ifanc yma wedi penderfynu cysylltu i drefnu profiad gwaith yn un o’n cartrefi preswyl. Nododd heb y sesiynau yma fyddai byth wedi cael y cymhelliant i fynd amdani – a ma’ hynny yn fy marn i, yn dweud y cwbl!”

Llwyddiant Staff Rydym yn awyddus i ddathlu eich llwyddiannau chi fel aelod o staff y Cyngor.

Ydych chi neu eich cydweithiwr wedi ennill cymhwyster yn ddiweddar?

Efallai eich bod fel Gwenno wedi derbyn cydnabyddiaeth gan gorff allanol.

Cysylltwch gyda CyfathrebuMewnol@gwynedd.llyw.cymru er mwyn i ni allu dathlu eich ymdrechion.

CEFNOGAETH COSTAU BYW Mae Gwasanaethau ar draws y Cyngor wedi mynd ati i ymateb i’ r argyfwng costau byw.

Dewch i ni gyfarfod rhai o’r aelodau staff sydd yn ymweld â thrigolion y sir i gynnal sesiynau cymorth costau byw.

“Helo, Victoria ydw i a dwi’n gweithio ar y Rhaglen Cefnogi Pobl yn y Tim Arweinyddiaeth fel Hyrwyddwr Lles. Dwi’n teithio ar hyd a lled Gwynedd er mwyn helpu pobl gyda'r argyfwng costau byw. Dwi’n trefnu digwyddiadau ac yn mynychu digwyddiadau eraill i sicrhau fy mod yn cyrraedd mwy o lefydd er mwyn helpu mwy o bobl. Gallaf helpu pobl gyda nifer o bethau ond beth bynnag na allaf ei wneud, gallaf eich cyfeirio i’r gwasanaeth briodol.

Mae croeso i chi gysylltu drwy e-bostio croesocynnes@gwynedd.llyw.cymru.”

“Meilyr ydw i, a dwi’n gweithio i Wasanaeth Ynni Cyngor Gwynedd yn yr Adran Tai ac Eiddo. Mae gen i ddiddordeb mewn unrhyw beth sy’n arbed ynni ac arian. Dwi’n chwilio drwy’r pethau sydd ar gael i bobl Gwynedd drwy’r amser, ac wrth fy modd yn pasio y wybodaeth yna ymlaen. Fyddai’n ymweld a sawl lle yn y sir dros y gaeaf, a mi ydw’i ar ben arall y ffôn yn delio hefo ymholiadau fel arall.

Mae croeso i chi gysylltu efo fi drwy e-bostio: tloditanwydd@gwynedd.llyw.cymru neu ffonio 01286 679589.”

“Helo, Ffion Haf ydw i. Dwi'n gweithio i Wasanaeth Ynni Cyngor Gwynedd yn yr Adran Tai ac Eiddo. Dwi'n mwynhau mynd o amgylch Gwynedd i roi cymorth Costau Byw Ynni i drigolion Gwynedd. Os oes angen sgwrs arnoch, cysylltwch â mi. Dwi'n fwy na pharod i wrando ac i geisio'ch helpu mewn unrhyw ffordd bosibl.

Mae modd i chi gysylltu drwy e-bostio: tloditanwydd@gwynedd.llyw.cymru neu ffonio 01286 679589.”

“Carol ydw i, a dwi’n gweithio i Wasanaeth Ynni Cyngor Gwynedd yn yr Adran Tai ac Eiddo. Dwi’n anelu i sicrhau bod pobl Gwynedd yn ymwybodol o’r cymorth sydd ar gael iddyn nhw gyda chostau tanwydd a chostau byw yn gyffredinol. Dwi’n gweithio’n agos gyda Swyddogion eraill oddi fewn y Cyngor yn ogystal â mudiadau sy’n helpu gyda chostau byw ac yn gallu eich cyfeirio atynt.

Fyddai’n ymweld â sawl lle yn y sir, yn rhannu’r wybodaeth a cynnig cymorth 1:1. Dwi hefyd ar gael ar y ffôn i ddelio efo’ch ymholiadau’n ddyddiol. Cysylltwch a fi drwy e-bostio tloditanwydd@gwynedd.llyw.cymru neu drwy ffonio 01286 679589.”

“Helo, Llinos a Mari yda ni, ‘da ni’n dwy’n gweithio yn y Gwasanaeth Gwybodaeth i Deuluoedd yn yr Adran Plant fel Swyddogion Gwybodaeth i Deuluoedd. Rydym yma i helpu a chyfeirio teuluoedd i gael gwybodaeth am help ariannol i dalu am ofal plant, rhestr gofalwyr plant yng Ngwynedd, gwasanaethau cefnogol sydd ar gael, hyrwyddo gweithgareddau ac unrhyw wybodaeth ychwanegol o fydd i deuluoedd.

Mae modd i chi gysylltu efo ni drwy e-bostio GGTGwyneddFIS@gwynedd.llyw.cymru neu ffonio 07976 623816.”

Cymorth a gwybodaeth Costau Byw Cofiwch am yr adran benodol ar Help Costau Byw sydd ar wefan y Cyngor. Mae pob math o wybodaeth yma er enghraifft: cyngor ar fudd-daliadau gwybodaeth am ynni yn y cartref manylion cyswllt sefydliadau eraill sy’n gallu helpu.

Cofiwch fynd draw i’r wefan er mwyn sicrhau eich bod yn derbyn yr holl gymorth, cefnogaeth a chyngor ymarferol sydd ar gael. Ewch i’r wefan drwy sganio’r côd sydd ar ochr chwith y dudalen neu drwy ddilyn y linc yma: Cymorth Costau Byw (llyw.cymru).

Os hoffech mwy o wybodaeth am be mae’r Cyngor yn ei wneud i helpu pobl hefo costau byw, cysylltwch â: Chloe Roberts - Cydlynydd Cynhwysiad a Threchu Tlodi.

ChloeRoberts@gwynedd.llyw.cymru / croesocynnes@gwynedd.llyw.cymru

Ail lansio Cynllun Cymhelliant Staff Dyma Nia Gwynn Meacher a Ffion Bryn Jones o’r Gwasanaeth Dysgu a Datblygu’r sefydliad yn egluro mwy am y cynllun.

Beth ydi Cymhelliant?

Ffordd o roi amser i bobl feddwl ydi Cymhelliant. Mae'n ddull datblygu effeithiol iawn sy'n cynorthwyo unigolion i adlewyrchu, adnabod a chyflawni eu hamcanion.

Ei brif nod yw darparu cymorth i wella perfformiad ac fel arfer mae'n seiliedig ar dasg neu amcan penodol. Gwasanaeth Dysgu a Datblygu’r Sefydliad sy’n cydlynu’r cymhellwyr mewnol, mae’n gynllun gwirfoddol a chwbl gyfrinachol.

Ffion yn trafod y cynllun cymhelliant efo Laura Ydi o’n ddull o hyfforddi?

Tra fod hyfforddi yn dysgu sgil neu trosglwyddo wybodaeth yn uniongyrchol gan arbenigwr yn y maes, mae cymhelliant yn ddull datblygol sy'n amserol a phenodol. Mae’n ceisio grymuso unigolion i adnabod atebion i'w ymholiadau dros eu hunain.

Pwy fyddai yn fy nghymell?

Mae cymhellwyr y Cyngor wedi cael hyfforddiant proffesiynol cyn cynnal sesiynau. Nid ydynt o reidrwydd yn arbenigwr yn maes y sawl sy’n cael ei gymell.

Beth sy’n cael ei drafod fel arfer yn ystod sesiynau cymell?

Adnabod amcanion, cael eglurder a ffocws ar gyfer datblygu gyrfa Adlewyrchu ar ymarfer a chael mewnwelediadau i ffyrdd newydd o weithio Adnabod cynlluniau ar gyfer hunanddatblygiad Mwy o ysgogiad i weithredu ac i fynd i'r afael â heriau Datblygu hunan ymwybyddiaeth a gwella sgiliau cyfathrebu rhyngbersonol Lle fydd fy sesiynau Cymell yn cael ei gynnal?

Yn ddibynnol ar eich ffafriaeth chi, gellir eu cynnal wyneb i wyneb mewn lleoliad addas, neu dros TEAMS. Sut mae gwneud cais am gymhelliant?

Rhaid cwblhau y ffurflen gais sydd ar gael ar gael ar safle mewnrwyd y Tîm Dysgu a Datblygu a’i hanfon i Cymhelliant@gwynedd.llyw.cymru. Yna, bydd Nia neu Ffion yn cael sgwrs efo chi er mwyn sicrhau mae cymhelliant ydy’r ffordd gorau ymlaen i ateb yr anghenion. Yn dilyn hyn, bydd cymhellydd yn cael ei ddewis o’r Rhwydwaith a bydd y cymhelliant yn dechrau.

Dyma adborth gan aelodau staff y Cyngor sydd wedi derbyn cymhelliant: “Rwyf yn gweld gymaint o werth i’r sesiynau. Mi oedd y cymhellydd yn gwybod sut i fy herio ac wedi fy helpu i ddarganfod sut ydw i’n teimlo am fy ngwaith ac i deimlo’n fwy hyderus yn y gweithle.”

“Rwyf yn teimlo mwy positif ar ôl sesiynau cymhelliant oherwydd rwyf wedi gosod amcanion a thargedau realistig i weithio tuag”.

Rysait CYRI TWRCI Beth am ddefnyddio y twrci a’r llysiau sydd gennych dros ben dros y Nadolig i wneud cyri twrci? Mae modd ychwanegu unrhyw lysiau gwyrdd fel brocoli a phys ar y diwedd.

CYNHWYSION 1 nionyn wedi ei falu'n fân 1 llwy fwrdd o olew 2 clôf garlleg, wedi’u plicio a’u torri’n fân 1 llwy fwrdd o bowdwr cyri 1 tun o domatos wedi eu torri'n ddarnau 1 llond llaw o swltanas 500g o gig twrci wedi’i goginio

DULL Coginiwch y nionyn yn yr olew ar wres cymedrol nes ei fod yn hollol feddal Ychwanegwch y garlleg a choginiwch ymhellach am 60 eiliad Ychwanegwch y powdwr cyri a'i gymysgu gyda’r nionod gan ei droi am ychydig funudau Tywalltwch y tun tomatos i fewn i'r badell Ychwanegwch y swltanas a'r twrci Coginiwch y cyfan am 5 munud arall nes bydd y twrci yn chwilboeth

COFIWCH GEFNOGI SIOPAU LLEOL Y NADOLIG HWN Beth am roi yr anrheg gorau i fusnesau Gwynedd drwy eu cefnogi dros gyfnod y Nadolig?

Siopiwch yn lleol, gwariwch yn lleol, bwytewch yn lleol a mwynhewch yn lleol y Nadolig hwn.

Mae nifer fawr o fusnesau yn rhan o gynllun disgownt Hybu Busnesau Lleol y Cyngor.

Ewch draw i’r dudalen Hybu Busnesau Lleol i ddarganfod mwy.

CYSTADLEUAETH CALENDR 2024 Dyma rhai o’r lluniau wnaeth gyrraedd y rhestr fer eleni.

Llynoedd Cregennen, Martin Evans

Castell Dolbadarn, Ruth Evans

Camfa Tre Ceiri, Nia Jane Owen- Midwood

Rhaeadr Llyn Dinas, Tomos Wyn Jones