D Tuur dö Swiss isch doo

D Tuur dö Swiss isch doo

«Häsch draa tännkt, as hüt d Tuur dö Swiss of Altstätte chonnd, of em Poschtplazz machids sogär no en Halt!», hani em Peter Mesmer, wo im Schuelzimmer näbet meer zue onderrichtet hät, gseid. Da isch im Mai ane nünzädrüesächzgi gsi, de ganz Tag hät s gschiffet und gschiffet, dromm hammöör beidi i de Pause bim Bacchetta no schnäll en rächte Scherm poschtet.«Dä Scherm söll üüs jo nie näbert stäle chöne!» Bevor möör in Poschtplazz vöri sänd, hammöör im Schuelzimmer in ufgspannte Scherm ini zwöschet de Stäbli üseri Adrässe gschrebe. De Peter seid: «Ii will sicher sii, ases kamm in Sii chonnt, dä Scherm metlaufe zloo.» Zamme hammöör aagfange dichte: «Dieser Schirm bringt dir kein Glück, schon Morgen hol ich ihn zurück. – Du Dieb zurück gib! – Ist dieser Schirm wohl dein? Bring ihn zurück, du Schwein!»

Met ere wiisse Farb hammöör die Spröch of de Scherm gschrebe. Ii has met Tippex gmacht und de Peter met eme fiine Pinseli und ere wiisse Plakatfarb. Wo die Spröch troche gsi sänd, sämmöör in Räge usi und in Poschtplazz vöri. Os de Luutsprächer of de Tächer vo Tuur-dö-Swiss-Auto hand s scho vooraakündeget: «In wenigen Minuten treffen die ersten Rennfahrer in Altstätten ein. Achtung, Achtung! Bitte Plazz mache! Bitte Plazz mache!»

Im ströömende Räge sänd s also schoo vom Stooss obenabe dehäär gsaust. Möör zwee, de Peter und ii, sänd froo gsi, as möör en wakkere Scherm kha hand. Dänn sänd äbe die erschte dehäär choo und d Lüüt hand gklatschet und gjoolet. För d Rännfaarer isch es globi wäneger aagneem gsi i dämm suumääsege Räge, sü hand o kan Scherm ufspane chöne. D Lüüt sänd onder e paar hondert Scherm onne guet vesoreget gsi.

Woni eso zuefällig zom Peter, äär isch rächts vo meer gstande, öbere luege, sächi, wie oss de Stäbli vo simm Scherm e wiissi Flüssigkeit of sini Hoor, of de Chrage, of sini Schultere und siis tunkelblau Hämmp abitropfed. «Peter, lueg emool diis Hämmp a!»

«Duu verrekkt nomool!» Äär chlappet sin Scherm zue und springt dor de ströömend Räge is Schuelhuus Fäld usi.