2 minute read
Ang Pagtiyabaw ni Bungisngis
Madungog sa pikas bungtod ning misteryosong buhakhak nga naglanog-lanog. Kung paminawon og tarong mura kini og bata nga gigitik sa kalipay. Apan kinsa’y magtuo nga kining malipayong huni gumikan diay sa usa ka higante?
Advertisement
Siya, gikahadlokan sa tanan. Lawas nga balahiboon, kusgan ug andam mukalib-ay sa mga kabug-aton sa kalibutan. Ngabil ug ngipong pagkadako, makaplagan sa matag ngisi nga abot dalunggan. Hait nga pandungog ug mata nga budlat.
Mao kini ang nawong sa higanteng nahimamat, ug didto sa bukid nga gipuy-an nagpabiling malinawon ug wala’y kaguol ang kinabuhi.
Sa pagbudlat ning mata, makita ang kaanindot sa kalibutan – ang bidlisiw sa haring adlaw, ang pagbuswak sa mga rosas, ug ang mga mananap nga malipayong nag-ginukdanay sa basakan dayon pahuway ilalom sa payag.
Sa pagmatikod ning hait nga pandungog, mabati ang tanang kasikas sa palibot– ang pagtilaok sa manok, paghaguros sa hangin, ug ang pagkatam-is nga tono sa iyahang kaugalingong bungisngis.
Ang higante nga adunay mabaw nga kalipay, dili gayud mahutdan og rason para mukatawa. Ang bugtong tumong sa kinabuhi: ngisi lang gayud bahala’g nagkalisod. Inosente ug wala’y intensiyon nga dautan, tinuod nga kalipay nag hinaot makaplagan.
Apan kung siya nagpuyo sa panahon karon, magmalipayon ba kini gihapon?
Sa matag budlat sa nag-inusarang mata, makita ang kagubot sa kalibutan – ang kinabuhi nga dili patas, ang pag-abuso sa gahum, ang mga oportunidad nga nagtuyok para sa mga adunahan lang samtang ang mga pobre padayong nag-antos niining bulok nga sistemang kanunay giatubang.
Sa pagmatikod ning hait nga pandungog, mabati ang tanang kasikas sa palibot – ang desperadang paglinabwanay sa tingog ug pagsiyagit sa katawhan nga nagpakiluoy, sila naghinaot nga paminawon ug mahatagan hustisya taliwala ning nagpabungol-bungol nga katilingban.
Matag adlaw masaksihan ang pagkahugno sa kalibutan. Angay pa ba nga mukatawa ug magpabuta-buta? Bawal ba atubangon ang negatibong realidad sa kinabuhi?
Mao kini ang sekreto ni Bungisngis. Likod sa kusog nga buhakhak ang gitipigang kakulangan. Kusgan man ug malipayon, apan paspas maratol ug mailad. Dali pakataw-on, apan dali ra sad pahilakon.
Kitang tanan nakasuway magpaka aron-ingnon nga malipayon. Pero ngano patuyang ang pagluom sa kaguol? Ngano adunay kahadlok kung masakpan man gani nga dili kusgan?
Gisuwat kining sugilanon para magpahibalo nga dili sayop ang paghilak. Ang pagsadya dili pirmi tungod kay maabot gayud ang panahon sa kasub-anan. Busa, dili angay ikauwaw ang pagpahuway ug pagpangayo og tabang.
Ang paghilak dili kamatuoran sa pagkatalawan. Ang hingpit nga pagsalig ug pag-atubang sa problema ang tinuod nga sukdanan sa kalig-on.
Ug kung ikaw mawad-an og paglaom, hinumdumi kini. Samtang may kinabuhi, padayon ang pagsinati sa kalipay ug kasakit, pahiyum ug pagmug-ot, pagkatawa ug paghilak, pagtumba ug pagbakod. Padayon sa gibati, hangtod sa hangtod.
Madungog sa pikas eskina kining paghagulgol nga naglanog-lanog. Kung paminawon og tarong mura kini og bata nga giilogan og duwaan. Oo, ang kanhi malipayong higante, nagyaka sa kaguol.
Sige lang, pasagdi. Tanang kalagot ipagawas. Ayaw pugngi ang luhang nagawas awas. Sama ni Bungisngis, ayaw kauwaw kung ikaw mutiyabaw.
