DIOS MABALOS JAIME JESUS UY BORLAGDAN
Reserbado an gabos na derechos Š2017 Jaime Jesus Uy Borlagdan
Pwedeng kopyahon an arin man na parte kan libro basta magpaaram sa may kapot kan derechos. Magsurat sa waterpatterns@gmail.com
NAMA OM VISHNU PADAYA KRISHNA PRESTAYA BHUTALE SRIMATE SIDDHASWARUPANANDA PARAMAHAMSA ITI NAMINE BAJA SRI KRISHNA CHAITANYA PRABHU NITYANANDA SRI ADVAITA, GADADHARA, SRIVAS ADI GAUR BHAKTA VRINDAM HARE KRISHNA HARE KRISHNA KRISHNA KRISHNA HARE HARE HARE RAMA HARE RAMA RAMA RAMA HARE HARE
MGA LAOG 1. Magadan ka na 2. Dios marhay na aga 3. Libro kan gadan 4. Sa mansiyon ka uru-igwahon 5. Ako palan 6. Kun ako saimo 7. Ulod 8. Ako pukawa 9. Maya 10. Mga bakante 11. Sa saodan 12. Boomerang 13. Lunes pa sana kasuogma 14. Abnormal 15. Huron 16. Nangaturog na gurang 17. Sarong banggi Nobyembre 18. Awot 19. Atot 20. Pag-omawon an diklom 21. Tipsik 22. Tasa 23. Miss mundo 24. Luha 25. Lumang gatong 26. Syudad kan sakit 27. Hotel del mundo 28. Ibang kinaban 29. Banggi sa Dabaw 30. Dai mo nahihiling 31. Yaon an Kagmukna 32. Kasuarin 33. Pasikrap 34. Gayon-kinaban
35. Kikilat kan kapakumbabaan 36. Mamundo ka 37. Adelfa 38. Parapudo-burak 39. Tugang 40. Mantang 41. Ngaran Mo 42. Kadlagan 43. Hari 44. Jaya Nityananda 45. Gauranga 46. Krishna 47. Giridhari 48. Gopinatha 49. Igwa daw? 50. Kabuahan 51. Kulog-laog 52. Bubon buda dagat 53. Lutab 54. Maabot an panahon 55. Nawarang aki 56. Sa gabos 57. Ta'bang 58. Ini mangyayari 59. Hacienda ni Kagurangnan 60. Ramayana-dasi 61. Dai man kuta dapat 62. Kun marumduman ko na 63. Mag-agahon 64. Kagayonan 65. Serbidor 66. Maging kahoy 67. Pangadyi 68. Tangad-bituon 69. Nata may takot an daing kagadanan
Jaya Gurudev. Jaya Nitai-Gaur. Kan mga tataramon na ini ihapros ko an lawas Mo Kagurangnan. An lawas Mong yaon sa kagabsan. Sa dawa sain, sa gabos na yaon. Pigbabalo kong du’tan an Saimong kagayunan kan mga tataramon na ini.
MAGADAN KA NA Pirmi mong isipon magadan ka na Ngani dai ka makaisip na saka na. Hilingon mo an gabos mantang pig-aanod Lunad sa pagbulos pasiring sa pagkaubos. Pag itinunong mo an pagsikad Mangangaturog an saimong tabay Pairarom sa buhang kan mga buskay. An pag-ipos mo sa pagpiyong Siring kan paghalat sa luhong laogan magsupay. Ngani dai ka magsarig sa siguro Kundi sa presenteng nasa kamot mo Pirmi mo isipon wara nang aga Siguro su hinangos hudyan mo na. Hare pakarugado ngani sana makapahingalo Sa hudyan na aldaw kun nuarin dai na kaya kan lawas mong tanuson. Hare paglaom Na makaabot sa puro kan puturo. An ngapit bako destinasyon, kundi daliwawa kan mga malungsing tulang, ulok kan mga bungo. Pirmi mo isipon magadan ka na, Ta saimong an pagkamoot yaon sa takot na mapara ano pa man an nawalat na dai pa minawot digdi sa kinaban kundi an magadan? 1-29-15. TNWCS
DIOS MARHAY NA AGA Marhay na aga, an saimong gayon ginuno sa sildang ni Govinda sarong ku’lit saka pidasuhon kasaradit kan gurot sa orasan kan daing katapusan. Dai ako nangangalas kun pa’no mo napapaawit ining mga balukag sa alang na sanga, kun pa’no an ating ti’makan kan mga dapan saimong napapabuskad. Ta arog sana kaan ngani sa sakuyang daghan nahawan mo an kadlagan kan kama’wotan na gumadan sa paagi kan lawas, tataramon, buda kaisipan. 2-25-17. Karangahan
LIBRO KAN GADAN Mapulot su hapon, mapa’nos na dugos kan binuklit ko su libro kan mga litrato kan gadan. Duman an mga lawas na wara na ngonian. Huni ako buda tugang sa bisekleta, na wara na ngonian. Huni an mga ulok mi buda mga ngipon na lapa na ngonian. An mga bado, sapatos na piriot na ngonian. Dawa an ayam na nadakop kan kua, mga tanom na pinosingan sa likod, ngonian warara na. Ngonian ano an nakua kundi kulog? Sa pakighilingan sa mga pandok na an mga mata warang laog? 10-7-13
SA MANSIYON KAN URU-IGWAHON Warang kulog na makalaog sa kudal na nagkoronang tunok. Warang hayang madadangog Sa hibog kan lanob na tinugdok. Hali ka sa pagdalagan An regular mong pahinang Kaumbasan an helang Kabukudan an paggurang. Huyan mga aki mo Nag-aadal sa tigsarong kwarto Para-duktor, para abugado Warang dulom an puturo. Huyan an saimong agom Naninitsit kan mga suruguon Parong an paborito mong kakanon nasunad sa de-numerong pugon. Ay, ano pa an hanapon Sa mansiyon kan uru-igwahon Wara kang mariraw na diklom Dawa daliwawa kaya mong bakalon. Sisay makakasalod kan ogma nagsupay sa saimong bulsa Kaogmahan na pagmati mo Dulot sana kan saimong paghingowa. Puso mo atak-atak, igwang sikretong ngarakngak pagsakat mo sa hagyan na sanggatos an timakan. Kaya ngani an ngalas mo sobra Sa kaitaasan ika napanganga Duman sa paborito mong ta’nawan Kan mga ngaran sa de lasong bulawan. Ta sa daghan mo may nagpuon
sarong gabat na saimo nagbutong dawa anong balo dai mo malikayan mapahadok sa ating hinalean. 2-8-15. Karangahan
AKO PALAN nag-iwal kita mala sa parong kan twalya arog mananggad kaan pag mag-agom na an twalya saro na sana nagreklamo ako kan parong kan lawas sinabi na mag tigsaro na kita sagkod sa naghali ka ta dai mo maako na magkaigwang twalyang tigsaro sa laog kan harong ta sarong pagkarigos ko kan su twalya sako na sana kan sa harong ako na sana an ngoris ko sa salming dai maaraman kun kulog o ogma ta an parong na tigkauyaman dawa sa bago nang tuwalya itoon pa 5-30-13
KUN AKO SAIMO Dipisil habuan, an siram pag-uminabot. Wara sa maray o maraot o kun igwang mamamaka’rot. Pag suminupang sa boot kinaban, gubot, sa nabutang pagsabot. Hahalunon, susurupon, hahapruson, sisinghuton, dadangugon, hihilingon. Garo manok na binubudan pasiring sa kalan; orig na ginuyod palaog sa bunuan.
ULOD Yaon ka sa madiklom, nagkakaon. Pigkakapkap mo sana sa lamesa an mga kakanon. Malumoy, matagas, maharaphap, mahalnas, dai mo aram kun ano an naglalaog sa saimong lawas. Para saimo dai man kaipuhan iyo na man ini an saimong kinatudan. Dangan may nag-abot, binuksan su ilaw. Pinahiling saimo su mga nasa ibabaw: may gapo, may dugo, may lutab, may udo. Bako palan lamesa kundi inodoro; bako palan kusina kundi banyo; bako ka palan tawo, kundi ulalo. Sa kagdara kan ilaw an hiling mo kontraryo. Sa ilaw ngana an dagit mo. Habo mo maistorbo sa kaogmahan mo; habo mo maaraman an kabuahan mo. 11-23-14
AKO PUKAWA Ako nangaturugan Sa sarong pangaturugan Ki tulong kakanon. Nahiling ko su saro Kulor puti, su saro kulor dugo Su saro diklom. Lambang tuludan Tulo an kagdara Su saro karahayan Su saro kamawotan Su saro kawaran. Pinarong ko, su saro Burak. Su saro sulo, Su saro udo. Kan tinanan ko, su saro Mahamis, su saro maharang Su saro maranggis. Ako nakakataram Na ako nagkakan sa sarong pangaturugan Mantang nasa sarong pangaturugan Ngonian na ako na gimata, Ta mantang itoon duman Ako warang pagkaaram Kun nata daing kabasugan Dawa paburubalyo sa tulong plato. Pero ako ngonian mata Sa sarong pangaturugan sana. Aram kong ako turog pa Ta digdi sa sakong minuklatan Ako nag-inom sa salog Sa burabod, sa bubon Pero dai nahahali An sakuyang paha. 3-24-15
MAYA Nabanwit mo ako sa mata. Pero hare madagka. Ta an paon na kinaon ko bako ika. Kundi an buhok mong gubot Sa tikab mong nag-aalangan Lumukob o sumupang. Kan an mata ta nagdapangan Garo nagkiskisan an duwang alang Sa pahang kaawagan Sarong amak an nasabritan Na an isusunad iyo an katanosan. Kun may namit ki orgulyo sa ngabil mo Kuspaa. Ngaya nasubad mo An talingkas kong agimadmad hare madagka. Ta an naitanom sa sakong laog Sa pagsalbudan ta dai maorog, Dai masupang na buskad na masabwag Ki kaogmahan sa satong katibaadan. Kundi sarong luho Kun sain maburabod an gabos na ogma Paluwas sa sakong daghan Sagkod sa mahubas an paglaom Sa dawa sain pa man sa kagabsan Na ika nanggad, bako an namansayan Sa sakong kabutahan sa katotoohan, An tunay kong mamutan. 1-29-17
MGA BAKANTE
Kwarto uno: Jose buda Marie. Kwarto dos: Josie buda Mario. Kwarto Tres: Josefa buda Romeo. Nagyuruyurugyog ki katre. Munan. Kwarto Uno: Mario buda Marie. Kwarto Dos: Josefa buda Jose. Kwarto Tres: Romeo buda Josie. Nagkurukarandado, nagyarabelyabe. Sagkod. Kwarto Uno: Romeo, Marie, Josefa. Kwarto Dos: Mario, Jose, Josie. Kwarto Tres: Bakante. Nagtaranid-tanid sa banggi. Tinapusan. Kwarto Uno, Kwarto Dos: Bakante. Kwarto Tres: Gabos. Gabos nindang kwarto binalo, tinanid gabos na luho. An mga kwarto sigeng palaog, an minaluwas, anas hewas an laog. 10/24/12. Pawa
SA SAODAN Kan ika la'bas pa dai ka lamang naghaloy sa barakalan. Dai ka tinawadan kan nagbakal saimo pati su uli biyo rinilingawan. Pero sa hudyan ibinalik ka sa timbangan: anas ka sana daa laogan. Udto na sa saodan. Patapos na su barakalan. Sa kada paghiro kan oras an kantidad naiinaan. Sisay pa daw mangangaipo? Sisay an may kulang? Solamenteng mga ayam an naghahalat sa irarom kan papag kan itatarapok sa basurahan.
BOOMERANG Nagkakanigo an gabos na sakit na sinapar ko. Kulog kan tuhod, ngipon na raot, guramoy na dai natitiko. Saradit sanang bagay kun ikukumpara sa kulog na idinulot sa kinaban. Pigsasawod ko an Saimong Ngaran, an isip ko nalilinigan. An pagkaisi nabubutas sa pakakupo sa sadiri, dangan mahiling kun ano an enot dai nagkamaraanan. Kinulog ko siya sa sadit na bagay na ini. Pinalaom. Linaom sa banggi o mga banggi ki paghidaw o punaw. Dangan ngonian, napumpong na daw su haldat, su ngirhat? Kun gurano garo su sakong dai pagkaisi kan nangyari saiya, iyo man ito su rarom kan lugad. Sinapar niya, ninda, ito. Kaya naman sana may bigla na sana minatadok sa sakong daghan, dai ko makua kun hali sain o kisay. Bungag sa likudan, matarom na tataramon. Gabos palan ini badil na pinaputok mantang nakapiyong. Solamenteng an naggiya sa kulog na naglalayog sa paros pasiring sa iiguon iyo su sakuya man sanang daan na gibo.
LUNES PA SANA KASUOGMA Lunes pa sana kasuogma, ngonian sitenta ka na. Nakatangka sa sala, piglilinga kan ba’gong aga. Tubong an paglaom na baad makatari pa sa tampi kan tarom mantang naggagasod ki “bahala na!� Nahihiling mo sana pero dawa anong pirit dai mo mamati an lanit hali sa tingong sadit kan tangang nagkakagat sa saimong unit.
ABNORMAL Kun ako sana abnormal nata ako maha’dit sa banggi? Nata ako managndam na an laog ko bakante? Kun mamundo man an buhay na arog kaini, ano man kaan? Sa kinaban, dakol man kami. Kun ako sana abnormal. 5-8-13
HURON Hararumon na su bubon. Bukas na su mga pintuan. May dalan na sa kadlagan. Masarigon na su mga tulay. Igwa nang komersiyo. Nagsusuru’pay na su dulay. Nahihinog na su mga hubal. Nagbubuskad na su mga ugbos. Dangan huminiling ka sa relo. Pasikrap man sana ngani. Nagbalik su higot kan kinaban sa liog mo. Naging gapo gilayon su kahampang mo. 7-20-13. Pawa
NANGATUROG NA GURANG Lawas na an nagpapaaram kan pagkauyam sa kinaban. Mantang sa tukawan sa sadiring daghan ihinungko an kayungkaan. Sa saiyang piyong dai niya na piglalabot an sadiri sa sibot na minagubot sa palibot silensiyong pigsasabi na hare, hare na ako nindo ipagbali. 10-17-13
SARONG BANGGI NOBYEMBRE Pasang bote an bituon na an kimlat de koryente sa diklom haloy sabuton an naglalataw na babayi na may bestidang puti palan rambong kan pili sa banaag kan harayong poste.
AWOT An awot na inorihan sa hardin hilinga ta namumurak. An dai ginabot bako sa pagkamoot kundi sa takot sa karatan kan pagraot, ngonian namumunga. An dinugdog kan tapsik hali sa muyang dugdugon, an binayubo sa silensiyong maldisyon nagsupang hali sa limpoy kan pinadabang rambong. Ay, an burak na puti garo pirak kan kikilat! An pakaberde kan dahon hararumon na diklom! 8-12-13. Pawa
ATOT An laogan na magayon aga pa sana ilimpyahan ki tubig buda sabon. Gabos na tiklop buda suksok daing ipalusot sa hiso buda kuskos. Pirang otro ihiling sa hampang kan salming pigrerepaso kun may nalapwasan na gira o giringgiting. Ihaplasan ki halnas, mahamot, makintab, ngani paghinapros siguradong madadalinas kamot man o boot. Pero dai matago, pirang suon pa ki bado an maglubong, an totoong parong kan laogan na magayon sa dai mapugulan na hamot na puminugrot hali sa lubot. 8-17-13. Pawa
PAG-OMAWON AN DIKLOM Gadan an telebisyon! Dai ako namumundo. Ta sa bintana an bulanon sa paultanan kan mga dampog pahimon-himon. An sagang puting bulawan huni sa sakong tamong nagtunong garo dahon ki mensaheng nakasurat sa pirak hali sa mga bituon. Arog baga talaga kaini an banggi, ini nagsasabi. Ipagrokyaw an pagpalsok kan ilaw ta sakong naririraw na an gayon na pighihidaw nakasarig sa sildang kan aldaw. Pag-omawon, pag-omawon pag-omawon an diklom ta sakuya iparumdom na an kinaban ini an totoong lalawgon.
TIPSIK An kimlat kan pangaran ta digdi sa kinaban siring an koronang tipsik sa daga pag nag-uuran. Kun lambang koronang tagdo rurumdumon, wara ngani ki makabilang dulo pa daw an makarumdom? An daga na garo minaimat-imat sa tubig na minatagdo buda minapasa, kisay ipapangaran an kagayunan? May dakula, may sadit, may mahewas, may hayakpit, gabos bigla minaabot, gabos hidali minahali. Kun ako sarong tagdo na nag-iisip na dapat sako ipangaran an gayon kan uran hare nindo ako pagtubudan!
TASA An tsaa an kantidad kan tasa. Sa sadiri, an tasa sarong malipot na nganga. Naghahalat sa estante. Iyo, yaon sa kawa’an ki laog nagkakaigwang kagamitan an tasa, pero kun dai mo lalaogan an tasa warang inabtan. Naging na warang kamugtakan. Ngani mabilog kaipuhan kan tasa an tsaa. Siring man ngani mamugtak kaipuhan kan tsaa an tasang laogan, ta kun dai, dagos ining malakop sa espasyo. Sa sunod na makaptan ta an tasa buda mainit ini, nagkakanigo na rumdumon na igwa ining laog.
MISS MUNDO Sa bilog na kinaban, ika daa an pinakamagayon. Sa saimong korona saro kang burak na nasampot na an buskad. Ngani makalakop kaipuhan mong buhian an saimong hamot sagkod an matada iyo an parong kan ginikanan na daga. Kun may nagayunan ako, baad iyo su saimong paghibi. Na sinabi mo mala sa ogma. Sako, garo baga ini pagdumig kan mga haloy inilaom— sarong paghagad na makasangaw kan mga bagay na dai pinadu’tan sa tataramon. Namamati mo an panahon an mabarahibong kamot kaini nagkakanap sa saimong luong. Sa tampi kan saimong mata nahiling taka, nakadungaw sa dagat kan suriaw, nangangalagkalag ki duongan.
LUHA Bako tamili may luha tama an mamundo sa luma buda maglapag sa wara. Bako tamili may luha tama an maglapag sa luma buda mamundo sa wara. 8-15-13
LUMANG GATONG An lumang gatong nagkaigwang ba’gong laad. An lumang lugad nagbuskad, bagong burak. Sa lumang lindok igwang ba’gong dulok igwang ba’gong kutok sa lumang tuok. 12-8-13. Sipocot
SYUDAD KAN SAKIT Ugaring, pano baga ki simbahan an syudad kan sakit. An nagsisilyab kaining atop lakop sa garo mapaknit na langit. Sisay makataram na daing relihiyon an dagang kawatan kan mga leyon? Aga, hapon, nakatangad pano ki paglaom an mga paon sa nakasalming na mga bituon. 11-2-13
HOTEL DEL MUNDO Matali sindang dai nakakalingaw na yaon sana kita digdi ki nagkapirang oras o aldaw. 5-14-13. Taal Vista Hotel
IBANG KINABAN Igwang ibang kinaban Apisar kaining namamarakmakan Dai ta mahiling ta dai ta masabutan Kun pano ining uya ngonian sa hampang An piglanganan kan gabos na kakayanan Bako an sagkoran, an kabilugan. May orog na kayaonan Sa luwas kan pangaturugan Kan buhay sa imbong kan laogan na laman. Pagnabusi kan liwanag an patos Kan kalibungan sa silyab kan buhay Magkakaigwang kalinawan. Kaipuhan sana makadangog ki awit Gikan sa luwas kan materyal na sagkoran An pirming gimata Ngani marumduman an kamawotan Na makahali sa kamugtakan, makauli sa ginikanan. Mag-ipos. Igwang ibang kinaban, apisar kaini, igwa.
BANGGI SA DABAW Wara man ki pinagkaiba. Nasa tangod an bulan buda an tuninong hali sa mga sirong kan kahoy, luhay-luhay an lakop. Dawa an dagat, baybay, kasugpon kan hudyan na hina’wasan. Oras buda distansya an minagibong rayo. An paglataw kan dati dai ta’naw an minataong pag-abot. Wara akong ba’gong namit na nata’nan sa hungit, warang ba’gong nangorog pagtundag kan alpog. Midbid ko na an lambang ubak buda laog. Dawa sain man sumampot, Kagurangnan, riraw ko an gira kan Saimong kamot. 9-20-13. Samal, Davao
DAI MO NAHIHILING Dai mo nahihiling? An Kagurangnan an gamot; an kagabsan an supang. Dai mo hiling, na dawa dai hiling an gamot, an supang katotoohan na yaon an gamot? Wara an gamot sa supang, pero may supang mala may gamot. Dai mo paghanapon sa hiling, an dai kayang hilingon, kundi hanapon sa pagtubod sa pagkaisi. Kaherakan ikang dai tatao maghiling, daing totoong paghiling, ta an mata mong daga, daga sana an kayang mahiling. Ikang ngani makasabot kaipuhan pang igabot ki supang, ngani sana mapatubod na sa lipod kan daga, an kayaonan kan gamot. 10-28-12. Pawa
YAON AN KAGMUKNA Yaon an Kagmukna dawa dai ka magtubod sa simpleng paghiling pagsabot maabot sa mga dalan sa dahon sa burda kan bukang kamot disenyo kan kagabsan digdi nakatakod. Magayon na ta’nawon dai ko kaipuhan hidawon ngani daghan ko mapano ki rokyaw diyan sa sayaw kan tawong naglalakaw sa tubig na nagkakamang sa kahoy o dampog na garo karaw silensiyong milagro naglalabaw. Ta dawa ining tula dai basta mamumukna sa pagwagas sana sa papel kan tataramon buda tinta kaipuhan ma’woton giyahan kan dunong hamanon an kagayonan sa pagpadabang daing tunong. Haribol! Haribol! Haribol! Haribol!
KASUARIN Kasuarin ako naghali Saimo Kagurangnan? Kun dai Ka buda akong kapinu'nan? Pa'no makakasabot? Pa'no maaabot? Warang ibang paagi kundi pagkamuot.
PASIKRAP Pag may napasikrapan akong kagayunan sa dalan Dai ko pighahagad na wara ako mamatean. Kundi pakatapos mahuyo an mata, pasalamaton ako, Krishna, na marumduman ko na an kaipuhan ko sana, Ika. 8-24-13
GAYON-KINABAN An gayon digdi sa kinaban minahali sa sarong lawas arog kan hamot na napapara sa sarong alang na burak. 8-26-14
KIKILAT KAN KAPAKUMBABAAN Kikilat kan kapakumbabaan kigkiga an hutok na mahungkang sa dampog kan kabanalan.
MAMUNDO KA Mamundo ka. Kun muya mo humibi ka ki salog. Buda diyan mo hilingon na dai mo mapapahalo An katotoohan Na an pag-iribahan ta Siring sa pagtagbuan Dai tuyo, dai ta minuya, Kan duwang uhot sa sulog, matipwasan sa hudyan dawa gurano kadukot, dawa gurano kaugos sa lambang kugos, dawa gurano kararom an naukdan na pagkamoot, masuwayan sa hudyan, sa dakulaon na salog dipisil nang magkanuparan ta iyan an kapaladan. Gibuhon mo na an gabos, ihusto sa diit na oras, pero dai kuta maubos sa pangaturugan, sa pagpugol, sa paghagad ki diit pang oras. Sa ngonian ina ka, tugang, aki o agom, kaito ika an parapadaba sa kun ano an lawas mong yaon, ngonian, kun ano an pigtatangad, iyo an lawas mo sa mag-abuton.
ADELFA An burak na ini an parong bako pasil garo may boot na tumugot o magpadipisil Nugad sa uran padalagan sa sirungan diit pa madalinas kan an dumog na hamot nasabatan pero kun tuyuhon na sa natad pumahiyahay dawa idungdong sa dungo garo wara ki buhay. Burak na an hamot anong ulam, an madagka saimo nakakagadan. Saro sana an aram kong saimo nakakaaram, sa Saiyang pamitsan ika sakuyang pig-aatang ngani an hudong kan saimong hiyom, sakong kabuahan magkaigwa lamang ki kamugtakan. 10-8-13
PARAPUDO-BURAK Oripon kan Diyos, ako pudua urawan tinik-tinik pa sana. Ba'go an supang tulos maluyos hamot na ipos hugason kan bulos. Kahiraki akong daing bitis dai makaagrangay ta daing boses. Pagtambo ko lamang magkalaog, imbes sa paros parululabyog. II Ako baga dati sarong daraga namuot sa gayon kan itsura aldaw banggi sadiri an ranga dai naukdan mamuot sa iba. Pinano an lawas, hamot, alahas Parakanta kan gayon, daing tunong sagkod dai napapaas. Dakol na pagma'wot an sakuyang nasambot pero an isinimbag ko sainda gabos, kulog ki buot. Nag-ani akong ori sa mga daghan kan babayi, ta sa saindang mga lalaki ako an aldaw buda banggi! Kabantogan kan sakong gayon, hamot kan sakong ngaran bilog na buhay an sakuyang piglanganan Sagkod sa aldaw kan kagadanan dai ko ini binutasan. Kaya ako ngonian sarong burak Sadiring pagma'wot iyo sako nagbugtak sa sarong lawas na luway-luway nawawaltak. Ba'go maubos, naglilimos ki hirak. Paglaom ko na sana iyo an maiatang sa Kagurangnan na iyo an dapat dulotan hamot ko buda gayon Saiyang kaogmahan bako para gamiton sa sadiring katuyohan. Pudua na ako, maherakon na deboto idusay ko na an gabos saimo Sa banal mong gibo, ubaya man ako Akong ining pagdusa an solamenteng maitatao.
TUGANG Tugang, pasain ka? Banggi na baga. Dai mo pa bibutsan an saimong dara Harayuon na baga. Sakat, lusad, buhat, higda, Ano an yaon sa puro Na pig-aabot mo? Uru-aldaw ka nag-uuli Sa sarong kahon na may pinto, May imbong, pero an pagma’wot Na makasirong kan daghan, daing tunong. An aldaw mo nasusukol Sa pagliwanag buda pagdikom Nagkakaigwang kapanuan Sa pagpabulos ki hinang. Pigtitios an pagal Ngani makabakal Ki mayumok na higdaan Paghingalo sa hudyan. Tugang, tangada Sa ibabaw kan mga apod kan muya buda sayuma, sa ibabaw kan tinampong pig-ooras kan paorootrong oras sa pagliskay kan buhay. Sa ibabaw kan mga dagit, Ha’dit, ori, buda agrangay. Baad sa ibabaw kan mga tore buda higante, marumdom an langit, an aldaw, dampog o paros, marumdom man na ining mga kagayunan igwang hinalean, marumduman na magpa-Dios Mabalos.
MANTANG Mantang may ilaw pa an mata hilingon na an itsura kan Kagurangnan. Mantang maliday pa an dila, buda an halunan may tuklang pa, kumanta, kumanta, kan mga Ngaran Niya!
NGARAN MO Banggi na, dai ko pa naaapod an Saimong ngaran. Naatugan kan mga sa hiling orog kaipuhan sa pakigumulan sa kinaban. Iyo, sa tahaw kan sarong gibo pasiring sa saro, yaon an hadit na igwa akong piglilingawan sa pagtubod na ini pirmi marurumduman. Pigpapahalat sa pagtubod na Ika mahalat arog kan mahewason na langit. Sa pagtubod na pirmi Kang yaon Ika napapasipara, sa pagtubod na ini, Ika dai natutubod. Iyo, napupu’ngaw ako Saimo. Ugaring, dai ko sierto. Dai, pero garo iyo. An aram ko sana, tadtaod, sa kinaban kan sarong piyong, mapakua ako Saimo. Tadtaod, pag nagkatarapos ko na ining dai ko pa matalikudan an mga simbolo kan kaluyahan kan sakong daghan.
KADLAGAN Maluway kong pigtataram an mga Ngaran Mo, Kagurangnan. Sarong kadlagan an nagsupang sa sakong daghan. Tulsi buda lotus marambong duman. Luway kan pagkamuot an tugtog sa Saimong sayaw; duon kan pagtubod an gira kan Saimong tini’makan.
HARI Daghan ko iubakan pag sakong narurumduman na wara Ka sa sakong daghan. Nagagadan an lambang burak na maagihan, nauulaktan kan sakit na sakong ataman. Siring kaini an pagmati sa Saimong paghali. Siring kaini an pamibi kan pintuan na dai makahibi. An ngaran Mo an solamenteng ritrato sa sakong puso, ootrohon ko sagkod maukdan ko an pauli Saimo. Pig-iiway ko an sakong talinga sa mga kantang maogma. Mga pan-arat sa magabat na pigdadara. Dawa gurano kahibog an maskara, an silyab kan luha masisirip sa gilid kan mata. An kinaban na ini sarong bakanteng lote an nakakapano sana awot buda sintunadong duli-duli. Pighahanap Taka sa kada timak kan dapan, sa dagang ining Saimong binayaan. 12-14-14
JAYA NITYANANDA An tataramon mataklang alahas kun isasamno sa Saimong lawas. Selestyal na halas na minabugkos sa gabos, napupundi an silyab kaining brilyanteng arte pag Saimo minarani siring an luha kan banggi na napapara sa pisngi kan burak na ihadukan kan daliwawa. An tanog solamente kan Saimong ngaran na ipaknit an unit kan kagabsan pauli sa kamurawayan an makakahaman ki nagkakanigong atang para sa Saimong kaomawan. Kaya akua man Kagurangnan an napagwani-wani kan daing kamugtakan. Nityarama an dagat sa sakong puso bulawan na dugos na pinahamis kan tagdo kan Saimong luha dulot kan higot Mong kugos sa pagkamoot sa Diyos. Hain nakasaray an perlas hali sa lotus Mong mga mata, yaon baga sa mga ngaran Hare Krsna, Hare Rama. Ika si Balaram na makalwagon nagbaba sa maribok na panahon para iwaras an orog na bendisyon.
GAURANGA Kay Gurudev An matanaan an sako sanang muya Dawa diit sa minasu’pay Mong ogma Pag sa may salog nagsasarabsab an mga baka. Nagtuturon-turon na garo aki, Pag may danaw o bubon Napapahibi, napapataram na daing kahuron: Syama-kunda! Binayaan Ka kan Saimong Padaba Pakatapos Niyang makua Pagkamuot Mong buhay, pasupangon sa dagka. Sa kadlagan na Saindong hinigdaan Warang nawalat Saimo kundi lata' kan la’yab An giromdom na an hatod hamis buda luya. Sri Krishna Caitanya Radha-Krishna nahe anya, Arog Saimo, patanaa man daw ako Kun pa’no mamuot Saiya. Su warang hugpaan pero minaturon Su warang kinaagahan pero minabangon Warang buhay apisar kan pangangaipong magbantay Sa kada laogan, kada dalan, kada alpog na nakukugay Kada maawot, natad, na pwedeng agihan na palikap Kada piyong, hangos buda pulso Pigsasapar sa tampi kan mag-abuton An pagkamuot na dai naaatas Lugod nagrarambong, dulo na nagraraom An lugad na sa pagdagos kan oras dulong natatastas Lugod nagduduso, dulo na nagrarara Sa pagkasuhay buda paglaom Na sa daghan, an mapait na itinanom Mabunga ki mahamison. Agosto 27, 2012. Karangahan.
KRISHNA Apisar kan mga pagsadiring iningatan saro sana an sakuyang yaman. Sarong giromdom ki aki Sinaray na maray sa daghan May kapot Siyang bayong, buda kapot man Siya kan bayong sa pag-ulian ki pagpadaba Sa hampang kan Saiyang ulok daghan mo pigtutunaw na garo mamis Sa mata Niya pwede ka mabutod sa paghidaw buda pagkamuot An unit Niya pinaknit sa langit an minundagan mismo kan katoninungan Dulo sa gabos na kagayunan an saro ko sanang yaman Aram ko an Saiyang ngaran.
GIRIDHARI
Krishna an Ngaran Mo an buhay ko. An sakong pandong sa uran ki kalayo. Ika sana an masisirungan Ikang ipinayong an bulod Govardhan.
GOPINATHA Sa kun sain sa banggi pig-aapod kan Saimong plawta an sayaw sa sakuyang bitis. Ugaring nakakandado na an gabos na pintuan. Kaya huni sa bintana Sa tangod kan mga bituon mag-aga kong aawiton an Saimong Ngaran. Gopala Govinda Rama Madana-Mohana
IGWA DAW? Igwa daw sa irarom kan uran na ini an igwang pagkamoot na nagbubugawas na kayang lumuwas dawa dai pa huraw igwang buot na ngana an punaw para tuyuhon an tapuyas buda danaw makaabot sana dawa nanunururo makalingaw ki pangangaipo ki supog o onra maihatod sana an Pangaran Mo, Govinda?
KABUAHAN Ika an sakuyang karma an gapong sinara ko sa sulog kan buhay para ipukpok sa sakong payo. Kan inatubang taka tinalikdan ko an totoong nagpapadaba sako. Sinamba ko an saimong mga kakundian ipinagrokyaw an mga kakulangan. Idinusay an sakong kabilugan sa sarong kiritikiti na inako ko bilang an parataong sildang. Ngonian sakuyang pig-aani an gusi kan sakuyang kabuahan: ako ngoris na nagsasayaw sa ibabaw kan baga buda pasang pangaturugan.
KULOG-LAOG An puso mong harong, luom sa pagsaray ki agrangay--nakalaom-buda luhang tinuom lugod dai makagios sa tinipon na pagtios sa nakaatog na alpog patod-patod an hinangos. Tugang, suysuya an memorya himaya an giromdom hanapa an tahob na nagtatao saimong lumlom. Sa kada pandok, ngaran buda parong na diyan sa saimong daghan nakataluntong baad may kulog na nagbulukon piggagatob an laog an saimong boot pigkakaon. 10-6-13
BUBON BUDA DAGAT May bubon na nakalot sa sakong daghan. An rarom kaini-o minaawit. Sakit na nagraragit. Hinulugan kong mga namit pero garo sana pasipara. Ni dai ko ngani nadangog kun sa tubig naghugpa. Sa pagma’wot na mapano hinulugan ko ki dakol pa gayon, hamot, onra pero dulo lugod ruminarom an tubig daing girom. Sagkod naubos an kinaban buda an pwedeng iapon, pero daing girom an bubon daing sagkodan an rarom. Dangan nahiling ko an dagat.
LUTAB Naglutab ako dai ko man tituyo na sa hampang kan sarong ayam. Nakaluko, nakakurikot sa lipot kan agang alimagyo. An reyalisasyon sarong tampa kan ako niya tinangad buda sa mata niya pinahiling an sarong pagiromdom. Sa tubig buda rarom na sa barahibo buda laman itinadom: “Tugang, nata mo ini ginibo sako?� Kasubago pa muklat ngonian sana nagimata kan ako singilon kaitong mga mata. Bako ini an turo kan sakuyang guro na nagsasabing maging hibaba pa sa sarong udo. Ayam, tawo, duwang laogan na an laog na kalag magtugang, sarong Ama an ginikanan. Kaya napasa su sakong boot kan nagrani ka para diluton an iniluwa kan sakong kalangkawan. Mala kaini sakuyang nahiling an manlaen-laen na grado kan kahibabaan. Ta ako man minatangad an ngimot nakanganga pigsasalod ining uran na lutab kan Kagurangnan. 8-11-13. Pawa
MAABOT AN PANAHON Maabot an panahon, sa totoo, mati ko na, pag dagos na akong nabuta kan mga huna, buda mahiling gilayon sa mga baseyo kan kinaban na igwang pagma’wot, daing pagpugol, daing takot— pigura kan babayi, harog kan pagmidbid, namit kan karne, layog kan alak— na masasabatan ko an Ngaran Mo, Krishna, buda wara akong mamamati, mara an sakong puso, pasipara. Sa panahon na an, Kagurangnan, na malingwan Taka, kaheraki man ta an paglaom para sako wara nang iba kundi kun Ika an makarumdom sakuya. 10-26-13
NAWARANG AKI Ikaag mo an saimong sadiri sa sarong aki na nakamalisyang binayaan siya kan saiyang ina. Pigtatanaw parayo, dai siya makahiro, gabos na kusog minabulos sa sulog kan ukang dai mapumpong. Garo ginibo siya para sana maglapag buda mag-apod na Mama, Mama! Kagurangnan, nuarin man ako makakamangno na ako suway, Saimo? 9-21-13. Samal, Davao
SA GABOS Sa maaskad na tubig na nabibilog sa mata kan deboto nata’nan na an gabos na dagat. Sa sarabod-sabod na dalan sa sadit na dahon nadu’ngawan na an gabos na saranga-sangang agihan. Sa Saimong Ngaran nadangog na an gabos na tanog kan manlaen-laen na tingog. Sa tada kan Saimong kinakan an namit kan gabos na pwedeng matanaan. 9-21-13. Samal, Davao
TA’BANG Bako man gabos kaipuhan may namit. An iba minasiram sa kata’bangan: Tubig, maluto, paros: sagkod daing namit yaon an siram. Dai man kaipuhan na pirmi matihab ngani makanamit. Nugad ngani habo lugod kan dila an kaipuhan nanggad kan lawas. Pwedeng dai matubong kan isip an kagayonan kan dai pagkaaram kun nata sa kata’bangan an namit kan tubig garo si Kagurangnan.
INI MANGYAYARI dawa dai ko mahiling an lubid kan bagting guyod kan liwanag na nagjojoging sa gilid kan ispaltong mag-agahon ngani an sarong anino sa halatan maging alopoop o multo, dangan magin tawo, sarong babayi, na may sinurugpon na pamibi sa kamot, sa ibong bulawan sa pulso an sukol na katanog ki tagdo apod an pag abot kan sundo sarong nagbukas na pinto, laogan na pinalisan, laogan na hinalean ngani siya magin riraw na depinisyon kan nagin, yaon, nawara, buda nag-agi. Dai ako kaipuhan digdi ngani magwaltak an pag-abot sa nagkakanigong paghinog. Bako sa sarong hutok nagtambo an supang kan danay na paghiro kundi kun may papel man an dunong ini suratan kan pagpirit na magngaran. An limpoy kan pagsabot haman nang pandong dawa wara pa an pandungan. Ako ngonian anion, nakasirong nakahiling sa sarong kapadagosan buda mapadagos dawa wara ako para magmaan, buda maghuna na ako, ako nanggad na kag-aram an kaghaman. 9-16-15. Alangalang, Leyte
HACIENDA NI KAGURANGNAN: GIROMDOM KAN ENOT NA PAGSAMPOT SA ISLA SAN MIGUEL An kabubuldan huna Sarong dagat na mahukulon Linumot sa pagtunong kan panahon. Pero an mga buong* sa harayo Na minalataw minalubog Sa kapatagan kan rarom Makinaryang daing tunong. Sa hewas iwagas an hagong Na iyo an pagirumdom Satuyang sa batak na tinampo Nakatimak huna iyo an kagibo Naglati, naglawig, nagkudal Sa baul nagsaray ki pangaturugan Buda naglingaw sa irarom Kan itinao satong mga bituon Na dai ki gapo o dahon an minahiro na warang tugot hali sa Saiyang buot. *apod kan hukol sa isla
RAMAYANA-DASI Uya an sitwasyon na minagubot kan gabos na ordinaryong paorootro. Nag-abot ka, sa lugar na ini-siring an sildang na piggigiris an sadiri sa dahon kan bintana ngani mahaman gilayon sa paril--nakisumaro samuyang nagsasayaw, tuog sa tugtog pasiring sa kagadanan. Dawa puropapano liwanag ka sa mata--suriaw ngani-buda sa daghan, sarong atake. Sarong kiling sa maogmang tanawon ika, kabasan ki burak, mayumhok na buklod, sinukray sa hapros kan takig, bago idaguso gilayon an isog sa sulog kan panahon. Paultanan na rason para humanap ki pawang sa diklom buda humigop ki rarom ngani makaawit an daghan --na luway-luway nahuhubsan ki laog sa bulawan na laoman-ki sarong oyayi ngani mangiturog ka buda maitanom na hararom saimo, mantang nangangaturugan an pagrumdom na bako digdi, bako ini an kamugtakan, an hudyan na sagpungan, an lubungan kan hukol kan koryenteng daing hungok, kundi diyan sa saimong daghan, an luwasan, an dalan pauli sa kapinunan. 12-14-14
DAI MAN KUTA DAPAT
Dai man kuta dapat akong karapatan magmundo. Sinuko ko na baga sa Dios an bilog kong puso. Naghali ugaring sa hudyan an dai ko mabayaan. Nanamit ko ki diit an sasaparon sa kagadanan. An haldat na ini kaipuhan sabuton: an lanit kan pagpaknit dai man kuta kun dai nagkabit sa daing kamugtakan: sarong subo sa sulog, muya sagupon na daing sagkoran. Anong kapatalan. Totoo an namit kan kamunduan. An rumsa sa daghan. Alagad an dahilan nagin dahilan na sana man. Dai man kuta, siring kan takot o salang pagkamoot, kun an pigpanuga na iaatang dagos na talagang binutasan. 12-16-16. Karangahan
KUN MARUMDUMAN KO NA Kun marumduman ko na kun ano kita dati dangan ko sana matataram na namumutan Taka. Pagnarumduman ko na na wara Ka buda an lambang bagay sa palibot ko, nagpaparumdom sakuya, Saimo, na dai ko kayang mahiling o magrani sa mga ini ta sa daghan ko garo may nakababaw na dampog, pano ki dalugdog, dangan ko marurumdom an pagkamuot Ta. Pagnarumduman ko na Ika palan an solamente kong kaipuhan, wara na akong hahanapon pa. Ta ako nakalingaw buda imbes Ika, an mga itinao Mong mga pag-iriba an piggigibo kong Ika. Sinda bako Ika an sakong pigpapaluhaan, an kawaran ninda an sakuyang piglalapag. An mga gubing ninda buda gira an minapabua sako sa kamunduan. Kaya ko pigpaparumdom an sadiri ko, sa paoro-otrong pagsambit kan Ngaran Mo
Hare Krishna, Krishna, Krishna na kuta an pungaw na minasupang sa daghan ko sarong burak sa banggi na an hamot nagkakanigo nang i-atang, Saimo. 9-18-15
MAG-AGAHON Mag-agahon—an dampog bados ki iuran hinapros kan sildang, aldaw na pasirang: gayad na bulawan, gubing ni Kagurangnan. 9-5-13
KAGAYONAN An satuyang kagayonan Bako sa tu’lang buda laman Siring kan dagang natitimakan Ini mapapara sa hudyan. An kagayunan uya sa daghan An burabod na gikan kan kamarayan. Magayunon na kalag, ika uya diyan Kataning an Diyos na ginikanan kan kagabsan. 11-9-16. Karangahan
SERBIDOR Kan kiniling ko su apod, su amo ko palan dati su yaon sa sakong likod. Makapangyarihan na itsura. Dawa bako niya na kapot yaon pa man giraray an higot kan haloy kong inutob na kamot. Dai taka namidbidan sabi niya, nagniwang ka sa ba’go mong buhok, mantang pigtatao su kamot sa sarong abrasa. Iyo po ser, an nasabi ko sana. Taon na man na dai ko nagamit an, akong an inantusan sukdo na sa pwede pang sagkudan. Pero dai malisya, ta an praktisado kong pagbisa pirmi la’bas, garo kasuogma sana. Huni gilayon ako sa hudyan na tangga nakatangad sa nakatungtong sa itaas kan hagyan. Nagdadangog, naghahalat sa tuldok kan saiyang tataramon, pig-aaram na maingaton kun igwa siyang mga kaipuhan buda ma’woton. An paglikay garo pirming may mapasaon sa payo luway-luway na pigsasayaw an tugtog kan saiyang gusto. Ugaring nasa mall baga kami. Naka-ordinaryong bado, bako uniporme. Buda siya man baga hidali man sanang napaagi. Kagurangnan, itanom mo sa sakong daghan an pagmating ini kan serbidor na humilde. Pirmi Mo ako ta’wan ki ha’dit na dai makagibong dagit dawa diit sa kun sisay man, dulo na duman sa daing kapangyarihan, dulo na sa dai naghahagad ki paggalang. 1/15/13. Karangahan
MAGING KAHOY Kuta naging kahoy na sana ako Mantang pigtatadtad kan saimong tuka. Binayaan ko na sana kuta Na kadkadon mo an sakong daghan Buda duman makagibo kang salag-sirungan Sagkod maghuraw an aging kalayong uran. Ugaring mas pinili kong maging ha’nit Sumirong sa tunok kan naglalaad kong arikurong Buda iwasiwas an simbag sa paagi kan sipit. Nadalinas pasiring sa gumulan, kita nagubot, Sa sadit na pinunan, isip ta nagpiot, Sa ugot tang ngana napasipara su paabot Na takma kan kamot, ibinuntog kita Sa nagkakalakagang kawa, Sa sobrang init-- malipot, siring kan silensiyo, tuninungon, pero daing katoninungan.
PANGADYI Wara man akong sadiring isog an lansang kan boot Saimo man sanang itinugot. 3-28-13. Catanduanes
TANGAD-BITUON Igwang ba'gong lindok pagtangad sa mga bituon. Riraw ko sa konstelasyon an kamot Mong kan kimlat kagtubong. Mantang sa ngabil ko dai mapumpong an bulos kan Ngaran Mong dugos pagkaisi ko nakagapos sa lindong kan bitis Mong lotus. Kagurangnan, ano an pagkamoot na itinanom Mo sa alang kong daghan, na dawa an naghahayang ayam sa diklom buda kaawagan muya ko kuguson na garo tugang? 3-15-13. Pawa
NATA MAY TAKOT AN DAING KAGADANAN Nata may takot an daing kagadanan? Mala ta dai niya aram ining katotoohan. Nata nakalingaw an gimatang danay? Mala itinukal niya an tali sa diit na kasiraman. Nata nagsisirbi sa panahon an daing kasagkodan? Mala muya niya manamitan kun pano an pig-aatangan. Nata nagmama’wot an ipinangidam sa pagkamoot? Mala nag-ataman siyang mga hawlang daing laog. Nata habo mag-uli an nawawara an dalan? Mala ta huna niya yaon na siya sa totoo niyang ulian.
MANUNGOD SA KAGSURAT Si JAIME JESUS UY BORLAGDAN, sarong para-adal kan siyensiya kan identidad, sa irarom ni Jagad Guru Siddhaswarupananda Paramahamsa Prabhupad, an saiyang ispiritwal na guru. Igwa na siyang siyam na koleksiyon kun sain an librong AKO, KALAG, OMAY (2015) an pinakabago. Yaon siya kaiba an saiyang agom na si Carina buda mga aking si Radha Govinda (dasi) buda Ramayana (dasi) sa Siyudad kan Tabaco.