Facebook MEPofficial
MINISTER PRESIDENTNAN DI ARUBA, CORSOU Y SINT MAARTEN TA ATENDE REUNION NA NACIONAN UNI
MINISTER DI SALUD PUBLICO CONHUNTAMENTE CU AZV, HAVA Y WIT GELE KRUIS A FIRMA UN ACUERDO PA FORTIFICA Y AMPLIA E PROME LIÑA DI CUIDO NA ARUBA.
LOGRANDO OPERATION COMMAND CENTER DEN BARIO DI SAVANETA
LEY DI SCREENING MINISTERS A BIRA UN REALIDAD DANKI NA E PERSISTENCIA DI MEP!
WEGANAN INTERINSULAR ARUBA 2024
ENSEÑANSA PA EMPLEO
MEP SIN MIEDO
CONECTA CU NOS
#LOGRANDO
Prome Minister di Aruba, Evelyn WeverCroes, Prome Minister di Sint Maarten, Silveria Jacobs y vice Prome Minister di Corsou, Ruthmilda Larmonie-Cecilia, ta atende un conferencia na Nacionan Uni riba e posicion di hende muhe. Durante e conferencia cu ta cuminsa e siman aki, lo atende cu e avansenan di hende muhenan mundialmente y den Caribe, y lo adresa e retonan creciente.
“Siman pasa nos a celebra dia internacional di hende muhe na Aruba. Durante tur e encuentronan cu mi a atende diabierna ultimo, a bin dilanti e deseo di hende muhenan pa nan
bos wordo scucha y pa nos mira mas participacion di hende muhenan den nos comunidad. Un encuesta recien di Centraal Bureau voor de Statistiek (CBS) a mustra cu 90% di persona kier mira mas hende muhe den posicionnan di gobierno y parlamento. Lamentablemente na Aruba nos ta mira cu e indice di violencia contra mucha muhe y hende muhe ta un problema serio ainda.
Tur e temanan aki ta wordo trata na Nacionan Uni den e conferencia di ‘Commission on Status of Women’. Mi lo atende e dos prome dianan di
e conferencia, den cual mi lo duna e statement den nomber di Reino Hulandes. Alaves mi lo reuni cu institutonan cu ta asisti nos den e lucha pa derecho di hende muhe, UN Women y WorldBank.
Semper ta bon pa demostra kico tur nos hendenan ta haciendo na Aruba riba e tereno aki, den sector publico, sector academico, organisacionnan voluntario y NGO’s. Y ta importante pa scucha kico tur por wordo haci y ayudo cu nos por haya pa asina logra nos metanan”, Prome Minister Evelyn Wever-Croes a duna di conoce.
Minister di Salud Publico Sr. Dangui Oduber conhuntamente cu AZV, HAVA y Wit Gele Kruis (WGK) durante e conferencia di prensa a firma un acuerdo pa fortifica e prome liña di cuido di medico door di introduci mas praktijk Ondersteuner Hulp (POH) y amplia e cantidad di esaki pa duna dokternan di cas un miho apoyo pa maneha e salud di e aseguradonan di AZV. E amplificacion aki lo mehora e accesibilidad di dokternan di cas y esaki cu tempo ta traduci su mes den menos necesidad pa aseguradonan yega specialista.
Prevencion ta bira un parti importante den e inversionan di cuido. Minister Dangui Oduber ta expresa cu tin ayudo pa e comunidad hiba un bida mas saludabel. Un di e organisacionnan cu ta yuda cu esaki ta Healthy Lifestyle Center. E meta principal di HLC ta pa brinda e pueblo di Aruba e guia profesional pa cu nan nutricion y movecion, especialmente esnan na riesgo pa haya complicacion di salud, door di hiba un bida no saludabel. E meta ta pa guia e participante pa adapta su bida pa uno mas saludabel cu ta completamente gratis pa e pueblo di Aruba.
Minister Dangui Oduber ta menciona cu aña pasa den luna di juni 2023 a firma un acuerdo di cuido (zorgakkoord) caminda a trece tur e actornan di cuido hunto pa asina firma e acuerdo cu ta determina e direccion y futuro di cuido medico na Aruba. Un di e temanan mas importante den e acuerdo aki tawata e fortificacion di e prome liña di cuido y a formula e metanan cu ta bay traha riba dje den periodo 20242027 cualnan ta: (1) Aumenta e cantidad di dokternan di cas y baha e cantidad di asegurado pa dokter di cas, (2) Crea mas cupo den e estudio di dokter di cas na Imsan; huisartsen opleiding, (3) Amplia e cantidad di POH y ofrece e estudio completo, (4) Inverti den formacion pa asistentenan di dokter di cas. Den e acuerdo firma lo percura pa financia
completacion di e estudio di e POH pa e 27 POHnan actual cu e modulonan, cuido pa adulto mayor y promocion di salud. Anteriormente ya caba a haci e modulonan di diabetes y cardiovascular. Tambe amplia cantidad di POH cu 10 mas pa yega na un total di 38 y e meta ta pa 2027 cada dokter di cas ta dispone di 0,7 fte di POH. Siguientemente pa amplia e coordinacion di e trabao di POH cu un coordinador mas y por ultimo mehora e raportahe riba e trabaonan cu e POHnan ta realisa.
Minister Oduber kier a manda un palabra di gradicimento y felicitacion na e team profesionalnan di POH, AZV, HAVA y WGK, sin lubida tur esnan cu ta haci e acuerdo aki posibel. Minister Dangui Oduber su maneho y vision ta sigui traha pa mehora calidad di cuido y servicio. Haci inversionan den cuido y percura pa por garantiza cu e fondo di azv ta keda sostenibel y garantiza pa keda ofrece e mesun pakete di seguro cu ta uno hopi amplio pa nos aseguradonan.
'Spantenbier' di e Savaneta Operation Command Center.
Akinan, muy pronto ta bay ubica e ekipo cu ta bay analisa y monitorea entre otro e imagennan di e camaranan di siguridad.
Palabranan di gradicimento na SETAR y contratista Maclanig, pa haci esaki posibel.
LEY SCREENING MINISTERS
Ley di screening ministers a bira un realidad danki na e persistencia di MEP!
Danki na e iniciativa di Minister Rocco Tjon, e tempo ey Parlamentario y Presidente di Parlamento sr. Edgard Vrolijk Ley di Screening Ministers ta un realidad awe. Na mas di un ocasion nos a purba pasa e ley aki pero constantemente esaki tawata keda rechasa den sala di parlamento.
Na mei di 2021 Raad van Advies mes a conclui na punto 1.3 cu e motibo pakico e ley no ta pasa ta pa falta di madurez politico y falta di integridad propio. Porfin, riba 25 di october 2021 Parlamento a aproba e Ley di Screening Ministers (AB 2021 no. 203) cu 19 voto pro, 1 voto contra di Miguel Mansur y 1 persona ausente cual tawata Sr. Dowers.
E ley aki ta regla e screening di ministernan y candidatonan pa bira minister. E ta brinda un base legal unda cu por entre otro haci investigacion di siguridad nacional, y unda Husticia por bay mas profundo pa asina mira si e persona ta ministeriabel of no. E ley aki ta pa yuda garantisa un bon gobernacion unda integridad y transparencia ta keda central. Pa ley awor ta posibel cu formador of Minister President por apunta un comision pa haci investigacion pa mira si un persona
ta ministeriabel y/of si un Minister por keda den su funcion. Ademas e ley aki ta obliga Minister y su famia pa entre otro duna un relato financiero di tur nan propiedad y bienes. Investigacion fiscal y investigacion pa constata transaccionnan irregular tambe ta forma parti di e screening aki.
E ley di screening ministers tin incorpora articulonan unda ta determina e castigo pa un candidato Minister, Minister y su famia cu di un of otro manera ta viola e ley aki. Castigonan ta varia te cu 3 aña di prison. Tene na cuenta cu castigo pa actonan coruptivo ya caba ta regla den nos leynan di codigo penal.
Pa garantisa integridad y bon gobernacion e ley di screening ministers ta menciona e motibonan pa cual un persona no por wordo nombra minister. Mirando e ultimo acontecimientonan esaki ta un punto hopi importante pa para keto na dje. Por ehempel, personanan cu a wordo sentencia pa un crimen of cu ta sospechoso den un investigacion penal no por bira Minister.
Partido MEP ta sigui demostra pueblo cu integridad y bon gobernacion ta importante pa nos. E ta nos deber pa garantisa pueblo cu tur decision cu wordo tuma ta na bienestar general! Nos ta sigui lucha pa restaura e confiansa den politiconan.
Minister Glenbert Croes na ocasion di reapertura di EPE:
ENSEÑANSA PA
EMPLEO A PRUEBA SU
DERECHO DI EXISTENCIA SPECIALMENTE DEN MOMENTONAN DI DESAFIO PA NOS PAIS
Ciere di Lago a trece hopi desafio pa nos Pais y nos Pueblo. Hopi hende a keda sin trabou. Hopi hende a bandona nos pais. Y esunnan cu tabatin nan specialidad den refineria a haya nan mes diripente sin trabou y sin posibilidad pa un otro trabou.
Adicionalmente, Aruba e tempo aya a cuminsa concentra mas den desaroyo hotelero y turistico pues un cambio total di ofishi.
Pa e motibo aki cu na 1988 a inicia cu e proyecto di Enseñansa pa Empleo cu mester a percura pa recapacitacion di nos hendenan cu a perde trabou den Refineria di Lago.
Awe cu gran orguyo den presencia di Minister President Evelyn Wever Croes, Minister di Enseñansa Endy Croes, Minister di Turismo Dangui Oduber, Vice Presidente di Parlamento Raymond Kamperveen y Parlamentarionan Erasmus, Jarzagaray, Tevreden,
Hoek y Berlis, Stakeholders manera AHATA, HIAS, SNBA y VeneAruba, a efectua e reapertura di Enseñansa pa Empleo. Un instituto cu a recobra aun mas su balor e momento cu pandemia a bati na nos porta, cu a causa cu hendenan a perde trabou y mester a busca un alternativa pa por a sobrevivi.
Recapacitacion di nos hendenan a bira prioridad nacional atrobe. Asina cu EPE a bin resorta bou di Minister Glenbert Croes, a pone man na obra pa reactiva EPE. EPE anno 2023 ta conta cu solamente 10 empleado bou guia di Sabine de Groot cu cifranan di adelanto impresionante.
Aña 2022 EPE a conta cu 600 cursista. Pa aña 2023 ya nos ta bayendo na 1600 cursista cu e pronostico cu esaki ta bay sigui crece. Si aña pasa tabatin 19 curso cu a wordo duna na EPE,
e aña aki esaki a aumenta na 27. Total cursista a crece di 620 pa 1630. Apoyo di sector priva tambe ta aumentando reconociendo e importancia y balor di Enseñansa pa Empleo.
Minister Glenbert Croes a expresa su gratitud y orguyo na tur empleado cu ta trahando duro den un solo ekipo, demostrando cu EPE tin su lugar specialmente pa nos hendenan cu ta desea un miho trabou, pa por sigui cursonan cu ta wordo reconoci pa sector priva y na un tarifa social pa cartera di un y tur.
E mandatario su orguyo a keda refleha awe den e Rueda di Prensa durante cual a efectua cu cortamento di cinta, un EPE nobo, rebranded y cu animo renoba pa trece cursonan di gran balor pa nos pueblo, mas cerca di nos pueblo.
Minister Maduro di Finansa ta informa:
MOODY'S TA E DI TRES COMPANIA
DI RATING CU TA EVALUA E SITUACION ECONOMICO Y FINANCIERO DI ARUBA
Ta prepara pa presenta Aruba su storia na inversionistanan riba e mercado internacional di capital
E siman aki Minister Maduro di Finansa hunto cu su ekipo di Departamento di Finansa (DF), a reuni cu e compania di rating Moody's, cu ta e di tres compania di rating cu lo evalua e situacion financiero y economico di Aruba.
Pa varios aña caba Gobierno di Aruba ta acudi na e mercado internacional di capital pa asina por cubri e necesidad financiero di nos Pais. Den e añanan di pandemia, Aruba no por a subi e mercado internacional di capital.
Sinembargo, e recuperacion financiero y economico grandi cu Aruba a conoce, ta brinda oportunidad pa Aruba presenta su mes atrobe na inversionistanan internacional.
Tabata un reunion den cual Minister Maduro y e profesionalnan di DF a brinda un bista amplio di e desaroyo economico reciente di Aruba, a repasa e
presupuesto y resultado fiscal, a splica e maneho di debe cu ta wordo hiba, a duna un bista di e reformanan structural cu ta forma parti di e 'Landspakket' acorda cu Hulanda, y a duna un bista di e inversionnan cu ta wordo haci awo y cu por wordo spera den e añanan nos dilanti na Aruba.
Minister Maduro ta gradici tur persona y instancia cu a reuni cu Moody's y ta yama un danki special na e team di Moody's pa acepta pa traha cu Aruba den preparacion pa Aruba por conta su storia na inversionistanan riba e mercado internacional di capital. E resultado di e evaluacion di Moody's por wordo spera den luna di April.
Weganan Interinsular entre e islanan ABC ta un medio di intercambio deportivo, cultural y social pa cera e lasonan di hermandad y brinda oportunidad na e mucha- y hobennan. Minister Endy Croes ta gradici Sr. Junny Figaroa y Lotto pa Deporte, Sr. Kenneth Vrolijk y Stichting Sport Subsidie Aruba (SSA) pa sostene e proyecto aki. Sigur palabra di danki na tur cu a aporta pa haci e bunita proyecto aki posibel. Cu deseo, dedicacion, determinacion y disciplina ta logra!
Durante un anochi yena cu ambiente deportivo a reparti premio na e ganadonan di Aruba, Boneiro y Curaçao.
Diasabra anochi den un esfera festivo, a tuma luga clausura di Weganan Interinsular 2024. Despues di dos dia di competencia sumamente exitoso cu a inicia na Aruba, a ofrece e delegacionnan di Boneiro, Curaçao y Aruba un recepcion.
Durante e ceremonia di clausura diferente orador a hiba palabra, entre otro, Minister di Enseñansa y Deporte Endy Croes, directora di Comunidad y Cuido di Boneiro Sra. Silvana Janga - Servilia y directora di Cultura y Deporte di Curaçao Sra. Lizette Sambo -Velder.
Tambe, a haci entrega di premio na e scol - y ganadonan overall di e disciplina di dam, trefbal y ahedres. En total Aruba a conkista 11 medaya, di cual 6 ta di oro, 3 di plata y 2 di brons. Curaçao a logra segundo luga cu 9 medaya, di cual 2 ta di oro, 4 di plata y 3 di brons.
Boneiro a logra 7 medaya, di cual 1 ta di oro, 2 di plata y 4 di brons.
Mester remarca cu e medayanan individual a ser otorga depues di cada partido final. Ademas di esaki, a reconoce y gradici Mildred Wever, Esmond Jones, Gersinio Constansia, Stallone Isenia y Naftalie Rier, kendenan ta motornan tras di e weganan escolar na e tres islanan.
E anochi a culmina cu un bunita show di carnaval di e grupo di baile Dazzling Dancers, Evolution Entertainment y Quality brassband, kendenan a deleita nos bishitantenan cu nos celebracion cultural mas grandi.
Por ultimo, Minister Endy Croes ta gradici tur alumno, docente, cabesante, coach, mayor y tur cu a haci Weganan Interinsular 2024 posibel y sumamente exitoso. Alabes mandatario di Deporte ta gradici IBISA, FDDK y Indebon pa e tremendo colaboracion pa organisa e gran evento deportivo aki.
Weganan Interinsular lo continua na Boneiro di 14 pa 17 di maart, unda cu e hobennan lo participa den e disciplina di basketball, aquatlon y futbol. E clausura lo tuma luga na Curaçao di 11 pa 14 di april, unda cu e scolnan lo participa den e disciplina di basketball, atletismo y volleyball.
Den un sala di Club Don Bosco na Noord completamente yen, PARTIDO MEP
TA PRESENTA SU LOGRONAN Y VISION
DEN ENCUENTRO DI ‘BAN TOPA’
Diaranson 6 di maart, a marca un otro encuentro exitoso y importante di ‘BAN TOPA’. E sala di Club Don Bosco na Noord tawata yen un biaha mas unda cu Lider di Partido MEP y candidatonan di nos partido a duna discurso y splicacionnan relevante riba temanan actual y e vision comun di Partido Movimiento Electoral di Pueblo y a reafirma nan compromiso y dedicacion profundo pa sigui sirbi nos pais y crea un futuro prospero pa cada Arubano.
‘BAN TOPA’ ta un plataforma pa dialogo informativo y interactivo di Partido MEP unda cu cantidatonan ta duna informacion actual, preguntanan ta haya contesta, y preocupacionnan ta wordo scucha. ‘BAN TOPA’ ta mas cu un reunion; e ta un oportunidad pa conecta, siña, y hunto bin cu ideanan pa un miho futuro di nos pais.
Durante e encuentro di ‘BAN TOPA’ diaranson anochi, e publico presente a haci preguntanan bastante skerpi y al caso. Como ciudadanonan preocupa y interesa den progreso di nos pais, nan a duna conseho y sugerencianan hopi interesante pa Gobierno y MEP. Concehonan y sugerencianan cu sigur lo haya oido di Gobierno pero sigur tambe di partido MEP.
E anochi aki, Parlamentario Marco Berlis a duna un presentacion di su trabou den Parlamento como sirbidor di nos pueblo enfatisando cu Parlamento di Aruba ta conecta cu necesidadnan di nos pueblo y ta trahando na e bienestar di cada ciudadano.
Minister di Enseñansa y Deporte Endy Croes a presenta logronan desde cu el a asumi e responsabilidad aki na 2021 enfatisando cu ta e deseo, disciplina, dedicacion y determinacion ta e motor tras di cada logro. Endy a presenta tambe e vision di su ministerio pa proyectonan grandi na caminda pa Enseñansa y Deporte.
Lider di MEP, Prome Minister Evelyn Wever-Croes, despues di su biahe di trabou, a regresa Aruba cu mas energia y determinacion pa sigui traha na bienestar di nos tur. Apesar di a caba di yega bek Aruba, Lider di MEP a cera e anochi dunando un resumen cortico di su viahe pa Hulanda y su participacion na e reunionnan di OCTA na Belgica. Tambe el a splica loke ta nifica pa Aruba su posicion como Presidente di OCTA pa e siguiente temporada nos dilanti. Tambe el a duna un presentacion yama ‘Snapshot’ pa demostra unda Aruba ta logrando y e vision di Gobierno di Aruba.
Despues di e reunion ‘BAN TOPA’, Candidatonan presente a atende personanan individualmente pa scucha mas di loke ta biba den nos comunidad.
‘Lider di MEP Evelyn Wever-Croes ta invita pueblo di Aruba di awo caba, na e siguiente ‘BAN TOPA’ den un bario playa na . Laga nos sigui bini hunto, pa scucha di otro, pa siña di otro, y pa reafirma nos compromiso cu nos pueblo. Pasobra union ta nos forsa pa un Aruba mas fuerte y resiliente. Keda pendiente pa mas informacion di e encuentro aki. Nos compromiso ta continua.
Parlamentario
Shailiny Tromp-Lee
Ta un berguensa cu Mike Eman, parlamentario di Pais Aruba, no por bisa pueblo unda e 916 miyon di prestamo di Hulanda pa maneha e pandemia (Covid) a bay.
Bo ta ripara cu den parlamento e no ta traha, sino e lo sa y no lo ta papia coy loco y crea sensacion. Lesa bo documentonan, lesa e leynan y lo bo sa!
Btw Mike Eman ta un tiki laat tambe pa awor kier bin bolter
cos si di 2020 pa awor bo tabata den silencio, cobrando salario di parlamentario sin traha y sporadicamente a sali duna un rueda di prensa. Ta con bo por tin bo isla y su hendenan na pecho? Ban ta serio! Y no mester kere ami, bay scucha kico Gerlien Croes ora e la sali di AVP y a bisa cu Mike no ta traha y ta e mester a represente semper. Hopi tristo e nivel di politica cu Mike Eman ta hiba y mas tristo
ainda cu e ta kere cu pueblo ta bobo.
Falta di seriedad!
Falta di responsabilidad!
Liderasgo di crea DEBE y problema social!
Gasta loke no tin!
Realisa proyecto sin indica con nos ta bay paganan!
Mike Eman nunca mas!
“Pa e pueblo di Aruba, trahado y integro, 14 miyon Euro ta masha hopi placa mes”
E politico nobo riba lista di AVP Juni Croes, recientemente a sali cu un cantidad di mentira puntando dede riba e compromisonan cu ministernan di Gabinete Wever-Croes tin den exterior, y segun Juni, sin logra nada. Mentiranan nada straño pa un partido lardon y corupto manera AVP. Juni Croes di AVP ta un politico cu ta brasa corupcion y esey ta haci’e mes of mas corupto cu Benny Sievinger.
Juni Croes ta referi na e ultimo biahe di Prome Minister pa Belgica, na unda a firma cu Union Europeo pa Aruba haya 14 miyon Euro. Acaso esey no ta nada, e no ta un logro grandi?
Claro, si compara e suma aki cu tur loke su lidercito Mike Eman y henter su gabinete a horta di pueblo, 14 miyon Euro no ta nada. Pero pa e pueblo di Aruba, trahado y integro, 14 miyon Euro ta masha hopi placa mes.
Partido MEP ta conseha Juni Croes pa bay studia e historia di su partido y su lidercito. P’esey laga nos compara gastonan di su lider cu gastonan di lider di MEP:
GASTO DI PERSONAL:
Mike Eman tabata tin 147 hende riba su payroll, gran mayoria no mester a presenta na trabou. E gastonan tabata 11.3 miyon florin. Minister President Evelyn Wever-Croes tin 23 hende riba su payroll, y e gastonan ta 2.2 miyon florin.
GASTO DI BIAHE
Mike Eman tabata biaha mundo rond sin logra trece placa pa Aruba, su gastonan tabata 155 mil florin pa aña, sin conta cuanto gasto e tabata pone companianan manera Elmar, WEB, Utilities paga pa su fotografonan bay. Total e gastonan di biahe di Eman tabata surpasa 400 mil florin.
E gastonan di biahe di Minister President Evelyn Wever-Croes no ta ni mitar di esey.
Y Juni Croes mester corda tambe cu Mike Eman ta biaha den avion priva, mientras Minister President Evelyn Wever-Croes ta biaha den trein! Cuanto biaha el a bay Venezuela den avion priva pa supuestamente habri Citgo sin logra nada. Mientras cu Minister President a bay Bruselas den trein y haya 14 miyon Euro.
Pues cu hopi menos placa Minister President Evelyn WeverCroes ta logrando hopi mas cu Mike Eman. Unico cos cu Mike Eman a logra ta un gang di minister corupto, y su welga di hamber y Ensure.
CONSEHO DI MEP PA JUNI CROES:
Un conseho pa e politico nobo Juni Croes: si bo kier pa hende tuma bo na serio, bo mester haci dos cos:
1) stop di gaña, busca informacion pa bo no pasa pa bobo.
2) sali for di AVP pasobra ningun politico di AVP lo wordo tuma na serio.
Partido MEP a cuminsa nota cu politiconan di AVP a cuminsa saca nan sapato nobo di campaña y cuminsa lansa criticanan den direccion di Partido MEP. Den e caso di Parlamentario Mike de Mesa, cu pa hopi tempo no a presenta na Parlamento y tempo tempo ta mustra su cara den reunionnan publico di Parlamento, awo numa cu ta drentando campaña electoral, a realisa cu cierto propiedad di recreacion no a haya atencion.
Cu esaki, Partido MEP ta puntra Parlamentario de Meza, unda bo tawata ta prome anto cu bo no a worry te cu awo cu mantencion di un parke? Unda bo tawata ta cu ta te awo bo tin pueblo na pecho? Kico bo a haci tur tempo cu bo ta parlamentario y kico bo ta haciendo cu bo no ta atende trabou, reunion, no ta aporta na cambio di nos pais den ningun reunion di Parlamento, pero si e ta ganando un bon salario? Unda bo tawata ta e ultimo añanan cu bo no a worry ni aporta cu cambio den nos pais?
Mike de Meza, den su sapato nobis nobis di campaña, awo den pura kier cuminsa gasta sapato y busca buraconan pa critica Gobierno di MEP. Pero, Mike de Meza su hambresa pa poder y cieguedad politico di envidia, no ta lag’e mira e tur logronan di Gobierno di MEP den mantencion, renobacion y construccion di luganan di recreacion pa nos hobennan rond di Aruba. Ministr di Deporta Endy Croes ta publica cada logro
na bienestar di nos hubentud. Pasobra nos gobierno ta traha pa nos hubentud tin miho oportunidadnan.
Pero Mike de Meza no mester crusa brug pa wak logronan di Gabinete Wever-Croes. Pasobra Gobierno di Gabinete WeverCroes desde inicio ta trahando riba con pa mehora San Nicolas y ya varios proyecto a keda cla. Entre otro, Mike de Meza, por sali rato for di su camber, cana rond den su cura di cas, y disfruta di e logronan di Gabinete Wever-Croes rond di dje. Wak un hotel, Baby Beach y Rodgers Beach den desaroyo.
Y tambe si Mike de Meza kier ta obhetivo, e por bay keiro rato den centro di ciudad na San Nicolas y wak cambionan. Y ainda tin hopi proyecto cu pa e aña aki lo keda realisa pa atrae bishitantenan pa e parti aki di nos isla, pa crea cuponan di trabou y facilita ciudadanonan pariba di brug mas trabounan cerca di nan cas.
Gobierno di Aruba ta trahando pa progreso di cada skina di nos pais. Si Mike de Meza cana woro habri y gasta su sapato politico den tur e añanan cu e ta den Parlamento, e lo a ripara tur loke nos gobierno a logra prome y despues di un reto asina devastador manera e pandemia cu a kibra nos economia. Pero, cu sosten di nos pueblo, Gobierno di Aruba ta trahando pa surpasa tur reto pa un Aruba mas fuerte y resiliente.
Gobierno di Aruba ta trahando pa progreso di cada skina di nos pais. Cu sosten di nos pueblo, Gobierno di Aruba ta trahando pa surpasa tur reto pa un Aruba mas fuerte y resiliente.
