”Kulturikkut oqaatsitigullu nutserisuuvugut”

Kathrine oqaluttuarpoq. Angajoqqaallu ataatsimiinermi oqaatigineqartunik paasiuminaatsitsinerat misigigaangamiuk nutserisarpoq.

Christina kalaallisut oqaluttanngilaq. Tamannalu pissutigalugu ataatsimiinnermi oqalutsimik najuuttoqartarnissaa eqqumaffigilluarlugu. ”Pingaartuuvoq oqaatsitigut akimmiffeqannginnissap qularnaarneqarnissaa, tamannalu pisariaqartitsineq naapertorlugu tamatigut pisanngilaq.”

Assigiinngitsunik perorsaariaaseqarpugut

Oqaatsitigut paatsoornerit saniatigut aamma takornartaanngeqaaq kulturikkut assigiinngissutsit pingaaruteqalersarnerat, suliamik suliaqartut sulisulluunniit allat angajoqqaat angajoqqaatut piginnaassuseqarnerinik naliliiniartillugit. Christina oqaluttuarpoq: ”Taama pisoqarsinnaavoq assersuutigalugu meeraq mikisoq tummeqqatigut majuartillugu. Taama pisoqartillugu qallunaat angajoqqaarpassuit annilaaqalutik meerartik najummilissavaat, meeqqamik anninnginnissaat qularnaarniarlugu, angajoqqaalli kalaallit nalinginnaanerusumik eqqissisimanerusarlutik. Meeqqat ilagineqartarnerini kulturikkut assigiinngissuteqartoqarpoq. Assigiinngissutsit tamakku ilisimasariaqarput, angajoqqaatut pisinnaasaqassutsip nalilernerani”, Christina oqarpoq.

Meeqqat kulturikkut kinaassusertik pigiinnartariaqarpaat

Ilaanni suliaq angerlarsimaffiup avataanut inissiinermik kinguneqartarpoq. Taama pisoqartillugu pingaarutilimmik inissisimasarpugut. ”Meeraq ilaquttaminit nuussatillugu, meeqqap silarsuaa tamarmi allanngortarpoq. Tupinnanngitsumik tamanna tassaavoq meeqqap inuunerani ajornartoorneq annertoqisoq. Tamatumanilu pingaartuuvoq meeraq meeqqanut ataatsimooqatigiiffinnut Kalaallit Meerartaannut ilaalernikuusunut peqataanissaanik neqeroorfigisinnaagatsigu. Meeqqamut pingaaruteqarluinnarpoq kulturikkut kinaassutsiminik attassiinnarlunilu minnerunngitsumik ikinnguteqarluartuarnissaa”,

Christina, kommunini sulianik suliaqartut meeqqanik ilaqutariinnillu ilitsersuisartut sulinerannik nalinginnaasumik qujamasuuteqarnerannik misigisartoq oqaluttuarpoq.

Kathrine isumaqataavoq: ”Amerlanerpaatigut sulianik suliaqartunut namminernit ataatsimiinnernut peqataasarnerput iluaqutaasutut suliamillu pitsanngorsaaqataasut isigineqartarpoq. Tamattami assigiimmik kissaatigaarput, ilaqutariit pitsaanerpaamik tapersersornissaat. Uagulli Kalaallit Meerartaanni meeqqanik ilaqutariinnillu ilitsersuisartutut, kommunimi sulianik suliaqartup ilaqutariinnik ilisarisimanninngitsup tupigisassaanngitsumik ilisimanngisaanut naleqqiullugu, allaanerusunik maluginiagaqartarpugut. Ilaqutariit qanimut ilisarisimasarpagut kalaallillu kulturiat ilisimasaqarfigalugu, tamannalumi torersumik pitsaasumillu suliap suliarineqarnissaa qularnaarneqassappat pingaarutilerujussuuvoq”, Kathrine naggasiivoq •