Kinguaariit nutaat persuttaanertaqanngitsumik peroriartussapput

Ilinniartitsineq aqqutigalugu Kalaallit Meerartaat inuusuttut akornanni persuttaasarneq annikillisinniarlugu pitsaaliorniarlugulu suliniuteqarput. Ilinniartitsinermik ingerlatsineq ’Tassa!/Naammaleqaaq!’ aqqutigalugu kissaatigaarput inuusuttut peqqinnartumik kultureqalernissaannut peqataanissaq, inuusuttut persuttaasarnermut naaggaarnissaat anguniarlugu.

”Meeqqat inuusuttullu persuttaanertaqanngitsumik avatangiiseqarlutik peroriartussapput. Tamannalu sulissutigivarput”, Julie Lynge, Nuummi allattoqarfimmi pisortaq oqarpoq.

Ukiup ingerlanerani ulluni atuarfiusuni pingasuni angajullerni atuartut periusissaminnik tigussaasunik assigiinngitsunik ilinniartinneqarlutillu sungiusarneqartarput, tamarmik persuttaasarnerup tununnissaanut sakkussinneqarlutik allatut periuseqalernissaannik siunertaqartut. Tassa!-mi kalaallit inuusuttut nammineq killissarisaminnik allallu killissaannik ilinniartinneqartarput. Naaggaarnissaq ilinniartarpaat, persuttaasoqalissappallu iliuuserisinnaasatik ilinniartarlugit.

”Tassa!” persuttaasarnermut - minnerunngitsumik Nuummi – ukiuni kingullerni ajoraluartumik annertusiartortumut illuatungiliuttuuvoq. Qujanartumik kisitsisit 2022-meersut takutippaat 18-it inorlugit ukiulinnit persuttaasoqarneranik nalunaarutigineqartut ikiliallassimasut. Akerlianilli angerlarsimaffinni meeqqat akuuffigisaannik persuttaasoqarneranik suliassat amerliartortut takusinnaavagut. Tamanna qisuariarfigisariaqarpoq, neriuppugullu Tassa!”” tamatumani iluaqutaasinnaasoq”, Julie Lynge Nuummi Kalaallit Meerartaanni allattoqarfimmi pisortaq oqaluttuarpoq, nangillunilu: ”Illuatungiliunneq, kinguaariit nutaat ilinniartinneqarsimasut oqarnissaminnut ”Tassa!/ Naammaleqaaq!”

Suleqatigiilluarneq allannguinermik pilersitsivoq

Tassa!-p pitsaaqutaasa ilagaat tamatigoortumik tunngaveqarnini. Tassami Kalaallit Meerartaat kisimik persuttaasarnermik akiuiniartuunngillat. Pinerlutsaaliuinermut Siunnersuisoqatigiit - PiSiu, Kalaallit Nunaanni Isumaginninnermut Aqutsisoqarfik aamma

Ilinniartitaanermut Aqutsisoqarfik suleqataasut allat ilagivaat, taakkulu atortussiat suliarinerinut peqataapput , atortussiallu atuartunut 333-nut Tasiilami, Maniitsumi, Nanortalimmi, Kullorsuarmi, Qasigiannguani, Sisimiuni Nuummilu atuartunut misiligarneqarput.

”Tassa!” Ulluinnarlugu suliaanngilaq. Suliniutaavoq sivisuumik piareersaqqaarneqartoq. 2020-mi upernaakkut suleqatigiit tamarmik naapeqqaarput, ”Tassa!”-p sinaakkutigisassai aalajangersarniarlugit, 2022-milu ukiakkut misiliinerit aappaat atuarfinni ingerlapparput. Anguniagaavoq ilinniartitsinermik ingerlatsinerup Kalaallit Nunaanni atuarfinni tamani 2023-mi neqeroorutigineqarnissaa. Julie Lynge nassuiaavoq: ””Tassa!” Suliniutaavoq angusaqarusuffiullunilu annertooq. Taamaammallu aamma pingaartuuvoq atortussiat suliarineqarlutillu misiligarneqarnissaannut piffissaqarluarnissaq. ”Tassa!”Kissaatigineqartutut sunniuteqassappat, pingaartuuvoq atuartut ilinniartitsisullu pigiliussinissaat. Tassami atuarfinni ilinniartitsisut atuartullu ”Tassa!” uumassuseqalersissinnaavaat pisariaqartumillu allannguinissaq aallartillugu”. •

Atortussiat suliarineqarput PiSiu, Isumaginninnermut Aqutsisoqarfik, Qeqqata Kommuniani atuarfinnut siunnersortit, Nuummi Nuussuup Atuarfiani ilinniartitsisut, Ilinniartitaanermut Aqutsisoqarfik aamma Ilisimatusarfik kiisalu persuttaanermik pitsaaliuinermik immikkut ilisimasallit arlallit suleqatigalugit. Tamarmik ilisimasaminnik atortussiallu pitsaassusaasa qularnaarnissaannut peqataapput.

Paasissutissat annertunerusut uaniipput: tassa.gl

Søren Greve Avannaani nunaqarfimmi Kullorsuarmi atuarfiup pisortaata tulleraa. Kullorsuup Atuarfissua 2022-mi ukiakkut ”Tassa!”-mik misileraaffiusussatut toqakkat ilagaat.

”Ullut nuannerlutillu artornartoqarput, taama oqaluttuarpoq Søren Greve. ”Pissutigalugu sungiusaatit amerlammata aammali atuartut artornarsinnaasut pillugit ammarlutillu oqaasertaliinissaminnut unammilligassinneqarmata. Arlallit tamanna sungiusimanngilaat, toqqissisartariaqarlutillu. Taamaammat aamma pitsaasuuvoq ingerlatsineq ullunit pingasunut siammaassimammat. Klassimi toqqissisimanissap pilersinnissaa pingaartuuvoq.

Isumaqarpunga Kullorsuarmi inuusuttut assersuutigalugu Nuummi inuusuttunit allaanerusut, maanilu atuartut akornanni sakkortuumik persuttaasarnerit innarliisarnerillu amerlanngeqaat. Taamaattoq inuusuttut akornanni oqaatsitigut sakkortuuliortoqarsinnaasarpoq aporaannernik kinguneqartunik. ”Tassa!”Persuttaasarnerup saqqummersinnissaanut pitsaaqaaq, inuusuttullu persuttaasarnerup suuneranik qanorlu killiliisarnissamik nutaanik paasinnipput”.