Meeqqat aallaavigalugit allannguinerit ataavartussat pilersinniarpagut

Kalaallit Nunaanni Danmarkimilu ullut tamaasa meeqqat, inuusuttut ilaqutariillu naapittarpagut. Tusarnaartarpagut, oqaloqatigiittuarpugullu qularnaarniarlugu, inuit piviusut inuuneranni allannguinerit piviusut pilersinnissaasa neqeroorutiginissaat.

Tamanna ilaatigut ersarippoq ilaqutariinnik Danmarkimi sullissinitsinni – tamanna ukiut qulit sinnerlugit ingerlaneranni ineriartuaarluni maanna tassaavoq allanngupallanneqarsinnaasumik neqeroorut, ilaqutariit ulluinnarni unammilligassarisaasigut naapitsiffigisarput. Taamaaliorsinnaasarpugut ilaqutariit oqartussaasunik ataatsimeeqateqarneranni tapersersornerisigut imaluunniit ataatsimooqatigiiffiit assigiinngitsut sinaakkutissaannik pilersitsinikkut, maannakkorpiaq nuannaarnermik pilersitsiffiusumik ungasinnerusorlu eqqarsaatigalugu aalaakkaasumik ataatsimooqatigiilernermik pilersitsisumik.

Assingisaanik suleriaaseqarluta Kalaallit Nunaanni illoqarfinni nunaqarfinnilu aasaanerani katerisimaartitsisarnitsigut, najukkami inuiaqatigiit suleqatigalugit meeqqat inuusuttullu nuannersunik misigisaqarnissaat sulissutigisarparput. Aasaanerani katerisimaartitsinerit ilaat pingaarutillit tassaapput najukkami namminneq kajumissutsimikkut sulisut, ingerlatsinerup nalaani sulillutillu namminneq kajumissutsimikkut sulisut nunanit tamalaaneersut aallaraangata ataatsimooqatigiiffimmik ingerlatitseqqittartut.

Aamma suliniutit nutaat pingasut piareersarpagut, taakkulu pilersikkiartorneqarput Kalaallit Nunaanni Danmarkimilu suleqatigisartakkatta, meeqqat, inuusuttut ilaqutariillu oqaloqatigisarneri aqqutigalugit pisariaqartitsinerit uagut iliuuseqarfigisinnaasorisagut misiginikuugatsigit.

Kalaallit Nunaanni pilersikkiartuaarpagut ataatsimooqatigiiffiit, inuiaqatigiinni mikinerusuni meeqqanik atugarliortunik isumaginninnissamut ikiuussinnaasut. Ukiumoortumik nalunaarusiami uani atuakkiortup Laila Andrésip inersimasunut tamanut meeqqanik inuusuttunillu artornarsinnaasut pillugit oqaloqateqartaqqullugit kaammattuutaa atuarsinnaavat. Ataqatigiissuseq taamaattorpiaq pilersitseqataaffigerusupparput.

Danmarkimi ataatsimooqatigiiffik nutaaq neqeroorutigisalissavarput, suliniut ’Uagut’ aqqutigalugu, ’Uagut’ inuusuttunut kalaallinut saaffiginnippoq. Tassani ingerlatsineq unamminartulik aqqutigalugu imminnut ilinniarsinnaapput inuunerminnilu pisariaqartitatik naapertorlugit allannguinissamut sapiissuseqalerlutillu iliuuseqarsinnaassuseqalerlutik. Naggasiullugu minnerunngitsumilli Kalaallit Meerartaat siunnersuisartoqatigiinnut Danmarkimi kalaallit ilaqutariit meerartaat pillugit sulianik suleqatigiinnermillu pitsanngorsaanissaq anguniarlugu sulisussanut tunuliaqutaassaaq. Tamanna ukiumoortumik nalunaarusiami matumani annertunerusumik paasisaqarfigisinnaavat.

Atuarluarisi

Puk Draiby, Kalaallit Meerartaanni allattaaneq