Flórgoðinn nóv. 2023

FLÓRGOÐINN SAMVINNA - ÁBYRGÐ - TILLITSEMI - TRAUST

VINAVIKA 2023

Nóvember 2023

KYNJA OG KYNFRÆÐSLA SÍMAREGLUR LÆK FJÖLGREINDALEIKAR BLEIKUR DAGUR NORDPLUS

VINADAGURINN

Mánudaginn 6. nóv. var vinavikan sett á sal og söngstund var fyrir alla nemendur og starfsfólk.

Skólaþing um líðan var haldið innan árganga og deginum lauk með að vinabekkir hittust og tóku í spil.

FJÖLGREINDARLEIKAR Þriðjudaginn 7. nóv. og miðvikudaginn 8. nóv. voru Fjölgreindaleikar og þar var nemendum skipt í hópa þvert á deildir og fóru nemendur á 38 stöðvar um allan skólann þessa tvo daga.

Hópurinn heimsótti LEGO land

Samstarfsverkefni Áslandsskóla og skóla í Randers í Danmörku Tuttugu og sex nemendur í Áslandsskóla voru í samskiptum við danska vini sína í rúmt ár áður en þeir fengu þá í heimsókn í byrjun september, en í byrjun 8. bekkjar völdu nemendurnir dönsku í vali.

Tuttugu nemendur frá Randers lille skole komu í heimsókn fyrstu vikuna í september. Á meðan á dvöl nemanda frá Randers stóð var ýmislegt gert saman eins og að fara Gullna hringinn, skoða Reykjanesið ásamt því að fara í Bláa Lónið, Þingvellir voru heimsóttir, kíkt var í Perluna og síðan var unnið saman að heimildarmynd í skólanum.

Rúmri viku seinni fór hópurinn frá Áslandsskóla til Randers og átti þar frábæra viku fulla af dagskrá. Þau fóru meðal annars til Skagen, nyrsta odda Danmerkur, til Aarhus og skoðuðu tvö söfn þar, fóru í Legoland og á leiðinni heim fóru þau í Tívolíið í Kaupmannahöfn. Á þessum tíma hefur skapast frábær vinskapur meðal nemenda, nemendur hafa þroskast mjög mikið og hafa farið langt út fyrir þægindaramma sinn að sögn Önnu Sigríður Hilmarsdóttur kennara í Áslandsskóla.

Styrkur fékkst frá Nordplus í þetta verkefni.

SAMVINNA - ÁBYRGÐ - TILLITSEMI - TRAUST

Innleiðing kynja- og kynfræðslu í Áslandsskóla

Innleiðing á nýrri nálgun í kyn- og kynjafræðslu er nú hafin í Áslandsskóla. Í frétt Hafnarfjarðarbæjar í ágúst síðastliðnum kom fram að frá og með haustinu 2023 myndu allir skólar sveitarfélagsins efla hjá sér kynfræðslu og kynjafræði. Í grunninn er innleiðingin tilkomin af ýmsum góðum og gildum ástæðum en þar ber þó helst að nefna áskorun sem barst frá ungmennaráði Hafnarfjarðar, foreldraráði, Kennarasambandi Íslands og tillögu sem barst frá starfshópi mennta- og menningarmálaráðherra. Fræðslan er einnig einn af grunnþáttum menntunar og er það lögbundið hlutverk kennara að fræða um kynjajafnrétti. Fram til þessa hafa margir kennarar sinnt jafnréttis- og kynfræðslu, sú fræðsla hefur hingað til gengið mjög vel og verið fagleg en með innleiðingunni er verið að leggja meiri áherslu á efnið sem faggrein.

Alhliða kynfræðsla er nauðsynleg forvörn fyrir ungmenni og er hún ein mikilvægasta leiðin til að stuðla að heilbrigðum samskiptum og heilbrigðri kynhegðun. Með alhliða kynfræðslu er hugað að andlegri, félagslegri og líkamlegri vellíðan að teknu tilliti til aldurs og þroska nemenda. Allir nemendur á unglingastigi fá eina kennslustund í viku tileinkaða kynja- og kynfræðslu þar sem unnið er markvisst út frá hæfniviðmiðum með farsæld, heilbrigði og vellíðan að leiðarljósi. Það að vinna með sömu hæfniviðmið innan hvers árgangs eykur ekki aðeins þekkingu og færni nemenda á þessu sviði heldur einnig stuðlar það að jafnræði.

Guðlaug Elísa Einarsdóttir, kynja- og kynfræðslukennari í Áslandsskóla

BLEIKUR DAGUR Áslandsskóli tók þátt átaki Krabbameinsfélags Íslands með því að sýna samstöðu í verki og mættu nemendur og starfsfólk í bleikum klæðnaði föstudaginn 20.október. Árlegt árvekni- og fjáröflunarátak Krabbameinsfélags Íslands, Bleika slaufan, stendur yfir allan október. Átakið er tileinkað baráttunni gegn krabbameinum hjá konum. Í ár beinir Krabbameinsfélagið athyglinni að mikilvægi samstöðunnar og bleika litarins sem tákns um hana. Krabbamein kvenna snertir landsmenn alla einhvern tímann á lífsleiðinni og mikilvægt að leggjast á eitt í baráttunni og sýna samstöðu í verki með málstaðnum. Sýnileg samtaða getur flutt fjöll og breytt öllu fyrir þau sem glíma við krabbamein og aðstandendur þeirra. Fánar Bleiku slaufunnar prýddu fánastangir skólans og sveitarfélagsins.

Ellý með verðlaunin og Ísak kynnir kvöldsins

LÆK FER AF STAÐ Barnabókahöfundarnir, Gunnar Helgason og Bergrún Íris Sævarsdóttir heimsóttu Áslandsskóla á dögunum og ýttu úr vör lestrarverkefninu LÆK. Verkefninu er ætlað að efla lestur og lesskilning nemenda í grunnskólum Hafnarfjarðar og munu þau skrifa alls 18 smásögur í samstarfi við kennara og nemendur á mið- og unglingastigi í níu grunnskólum Hafnarfjarðarbæjar. Í kjölfar heimsóknarinnar sendu allir nemendur inn hugmynd að söguefni sem mátti vera eitt orð, nafn eða heilsteypt hugmynd auk þess að senda inn tillögur að nöfnum á sögupersónur. Þann 18. september drógu höfundar svo hugmyndirnar úr potti hvers skóla og skólastigs. Hvor höfundur um sig réði fjölda dreginna hugmynda og hætti þegar hann taldi að nóg væri komið í heila sögu. Það verður því spennandi að sjá hvernig Bergdís hnoðar saman hugmyndum miðdeildar og Gunnar Helga hugmyndum unglingadeildar. Þau áætla að ljúka skrifum 1. febrúar 2024 og munu sögurnar verða gefnar út í fallegri bók síðasta vetrardag 2024.

SÍMTÆKJANOTKUN Í ÁSLANDSSKÓLA Áslandsskóli er símalaus skóli frá 1. - 7. bekk og símalaus skóli í kennslustundum frá 8. - 10. bekk.

Seinasta vetur fór fram hjá okkur skólaþing þar sem nemendur ræddu um símtækjanotkun og reglur um þær. Höfum við í vetur verið að vinna úr þeirri vinnu í samvinnu nemendafélagið.

Eins og flestir vita þá notar Áslandsskóli ipad í kennslu þar sem nemendur mið- og unglingadeildar fá tæki til afnota en í yngri deild eru bekkjarsett. Tæknin gefur aukin tækifæri á að auka fjölbreytni í námi, bæta skipulag og auka sjálfstæð vinnubrögð sem opnar betur á að hægt sé að mæta þörfum hvers og eins. Áslandsskóli hefur þróast með samfélaginu og hefur ávallt lagt áherslu á ábyrga notkun á snjalltækjum þ.e. Ipad og farsímum. Í samvinnu við nemendur er nauðsynlegt að þau upplifi að á þau sé hlustað til að skapa traustan og góðan skólabrag enda er það í samræmi við Barnasáttmála Sameinuðu þjóðanna. Út frá niðurstöðum skólaþingsins vildi nemendafélagið koma eftirfarandi á framfæri: - Við teljum farsælast að það séu skýrar reglur um síma en ekki bönn.

- Reglunnar séu settar í samvinnu við okkur og við höfum eitthvað um þær að segja.

- Reglurnar séu einfaldar og allir þekki þær.

- Reglur gildi um alla, við erum öll fyrirmyndir.

- Símalaus skóli bæði í kennslustund og frímínútum er ekki raunhæft af mati nemenda. Þeirra skoðun er að símabann sé ekki lausn á neinu vandamáli heldur muni það stækka. Öll orka og tími kennara og starfsfólks muni fara í að fylgja þessum reglum eftir og nemendur myndu sífellt reyna að finna leiðir fram hjá þeim.

- Það er mun vænlegra til árangurs að læra hvenær má hafa símann og hvenær ekki. Að síminn sé geymdur í símahóteli á meðan kennsla fer fram en sé leyfilegur í frítímum á ákveðnum svæðum.

- Við eigum í allskonar samskiptum og samtölum í gegnum tækin.

- Síminn er oft líka okkar spilastokkur eða borðspil.

REGLUR UM SÍMANOTKUN Í ÁSLANDSSKÓLA 1. Áslandsskóli er símalaus skóli í 1. - 7. bekk.

Komi nemendur í 1.-7. bekk með farsíma í skólann skulu þeir geymdir í töskum og slökkt á þeim.

Best að geyma heima.

2. Áslandsskóli er símalaus skóli í 8. - 10. bekk í kennslustundum. Nemendur í 8.-10. bekk geyma símana í símahóteli í þeirri kennslustund sem þeir eru hverju sinni. Kennari getur gefið leyfi að nota tækin. Nemendur mega vera í símanum í frímínútum og eyðum á sérmerktum svæðum.

3. Nemandi sem fer ekki eftir símareglum og truflar tíma, fær skráningu í mentor merkt snjalltækjatruflun. Unnið er skv. agaferli skólans.

- Með öllu er óheimilt að taka myndir eða taka upp efni nema með sérstöku leyfi.

- Skólinn ber enga ábyrgð á símum nemenda.

- Skólinn og nemendafélagið mun vinna áfram í því í sameiningu að gera aðstöðu og afþreyingu fyrir nemendur í unglingadeild þannig að þau geti átt í samskiptum án síma og notið sín í skólanum.

- Nemendafélagið mun sjá um að kynna bekkjum símalaus svæði og þá afþreyingu sem er í boði í frímínútum.

Kveðja Skólastjóri Áslandsskóla

Fulltrúar 8. og 9. bekkjar

Fulltrúar 10. bekkjar

Nemendafélag

Við erum með frábært nemendafélag sem samanstendur af fulltrúm úr bekkjum unglingadeildar og eru nú 19 fulltrúar í nemendafélaginu. Félagið fundar einu sinni í viku og ræðir ýmsa mikilvæga hluti og skipuleggur þá viðburði sem framundan eru. Lögð er mikil áhersla á samvinnu innan nemendafélagsins og að allir fulltrúar séu góð fyrirmynd.

Myndir hér að ofan eru teknar á hinni árlegu nemendafélagsfræðslu sem haldin er fyrir öll nemendafélög skólanna í Hafnarfirði.

Liðnir viðburðir og það sem er framundan

Það er alltaf nóg um að vera hjá okkur í Ásnum. Í byrjun október fóru 9 fulltrúar úr nemendafélaginu á Landsmót Samfés norður á Akureyri. Landsmót samfés er haldið árlega fyrir ungmenni í 10. bekk úr öllum skólum landsins sem sitja í nemandaráði.

Félagsmiðstöðvadagurinn var svo haldinn hátíðlegur með vöfflum, piparkökum og kakó fyrir mið- og unglingadeild þann 18. október síðastliðinn. Fjölskylda og vinir voru hvött til þess að kíkja í heimsókn. Það var vel mætt og ótrúlega gaman að fá alla í heimsókn sem gáfu sér tíma til þess að kíkja til okkar.

Slegið var svo til veislu í Ásnum og haldið halloween ball fyrir 5.-10. bekk þann 25. október. 221 ballið var á sínum stað en það er ball fyrir ungmenni í 8.-10. bekkur úr Áslands-, Setbergs-, Hraunvalla- og Skarshlíðarskóla.

Framundan hjá okkur er Rímnaflæði sem er á vegum Samfés og er á dagskrá 17. nóvember næstkomandi. Í desember verður danskeppni, Stíll og jólaball. Þetta verður allt auglýst þegar nær dregur á okkar helstu síðum sem fram koma hér að ofan.

Hægt er að nálgast frekari upplýsingar um bæði frístundaheimilið og félagsmiðstöðina inni á heimasíðu skólans undir tómstundamiðstöð.

Frístundaheimilið Tröllaheimar

Frístundaheimilið Tröllaheimar býður upp á fjölbreytt tómstundastarf fyrir nemendur í 1. – 4. bekk.

Opnunartími er frá kl. 13:10 – 17:00 alla virka daga nema á þriðjudögum en þá er opið frá 14:00 – 17:00.

Við sendum út vikulegan föstudagspóst með ýmsum upplýsingum og fróðleik.

Félagsmiðstöðin Ásinn

Félagsmiðstöðin Ásinn er opin fyrir alla í 5. – 10. bekk. Við leggjum áherslu á að hafa eitthvað í boði fyrir alla og taka krakkarnir virkan þátt í að útbúa dagskrá fyrir hvern mánuð.

Opið er fyrir unglingadeild mánudaga, miðvikudaga og föstudaga frá kl. 19:30 – 22:00.

Opið er fyrir miðdeild frá kl. 17:00 – 18:45. Árgangarnir skiptast á að mæta annað hvort mánudag, miðvikudag eða föstudag og rúllar þetta fyrirkomulag vikulega.

Við erum á samfélagsmiðlum Við erum með tvær facebook síður fyrir foreldra/forsjáraðila.

- Ásinn – unglingadeild: https://www.facebook.com/groups/1434778143560578 - Ásinn – miðdeild: https://www.facebook.com/groups/277358547035509 Síðan höldum við úti Instagram síðu sem heitir asinn1. Þar auglýsum við kvöldin og hvað er á dagskrá, viðburði og annað skemmtilegt sem tilheyrir Ásnum.