Manual inspeccion de trabayu asturianu

Escuela de Formación sindical y política Redondo-Pichi

MANUAL DENUNCIES ENTE INSPECCIÓN DE TRABAYU

Corriente Sindical d’Izquierda

Escuela de Formación sindical y política Redondo-Pichi

ÍNDIZ 1.- NORMATIVA. ....................................................................................................................................... 3 2.- CONCEUTU. .......................................................................................................................................... 3 3.- COMPETENCIES. ................................................................................................................................. 3 4.- ESTRUCTURA FORMAL D’UNA DENUNCIA ÉNTE INSPECCION DE TRABAYU ................... 4 5.- DENUNCIES MÁS COMUNES ............................................................................................................ 4 A) LES RELLACIONAES COL DERECHU LLABORAL ................................................................ 4 B) LES RELLACIONAES COLA SEGURIDÁ SOCIAL .................................................................. 6 C) LES RELLACIONAES COLA PREVENCION DE RIESGOS LLABORALES .......................... 7 D) LES RELLACIONAES COL DERECHU SINDICAL .................................................................. 7 6.- DOS DENUNCIES ESPECÍFIQUES ..................................................................................................... 8 8.- IMPORTANCIA DE LES DENUNCIES A INSPECCION DE TRABAYU ........................................ 9 9.- ULTIMES CONSIDERACIONES ....................................................................................................... 10 MODELU 1.- DENUNCIA D’UNA SEICION SINDICAL ...................................................................... 10 MODELU 2.- DENUNCIA PELA PARTE’L SINDICATU .................................................................... 12 A LOS SERVICIOS MÉDICOS ................................................................................................................ 12 MODELU 3.- DENUNCIA INDIVIDUAL POR ACOSU ........................................................................ 13 MODELU 4 DENUNCIA INDIVIDUAL DE COTIZACIONES ............................................................. 14 MODELU 5 DENUNCIA ACCIDENTE DE TRABAYU Y RECARGU DE PRESTACIONES A LA INSPECCION DE TRABAYU .................................................................................................................. 15

2

Escuela de Formación sindical y política Redondo-Pichi

INSPECCION DE TRABAYU

1.- NORMATIVA. La regulación d’esta materia concrétase nuna llexislación básica, destacando la que vién darréu: a) Llei 23/2015, de 21 de xunetu, Ordenadora del sistema d’Inspección de Trabayu y Seguridá Social b) Real decretu llexislativu 5/2000, de 4 d’agostu, pol que se apreba’l textu refundíu de la Llei sobre Infracciones y Sanciones nel orden Social c) Real decretu 928/1998, de 14 de mayu, pol que se apreba’l Reglamentu Xeneral sobre procedimientos pa la imposición de sanciones por infracciones d’orden social y pa los espedientes lliquidatorios de cuotes de la seguridá social. d) Real Decretu 597/2007, de 4 de mayu, sobre espublización de les sanciones por infracciones pergraves en materia de prevención de riesgos llaborales. e) Conveniu númberu 81 de la OIT sobre la Inspección de Trabayu.

2.- CONCEUTU. La Inspección de Trabayu y Seguridá Social ye un serviciu públicu al que-y correspuende exercer la vixilancia del cumplimientu de les normes del orden social y desixir les responsabilidaes pertinentes, asina como l’asesoramientu y, nel so casu, conciliación, mediación y arbitraxe en diches materies.

Les normes del orden social a que fae referencia’l párrafu anterior comprenden les rellatives a materies llaborales, de prevención de riesgos llaborales, de seguridá social y proteición social, colocación, empléu, formación profesional pal empléu y protección por desempléu, economía social, emigración, movimientos migratorios y trabayu de persones estranxeres, igualdá de tratu y oportunidaes y non discriminación nel empléu Concíbese como un derechu que tién tou trabayador o trabayadora a recurrir a la Inspección de Trabayu y Seguridá Social cuando considere que los sos derechos fueron conculcaos.

3.- COMPETENCIES. Vienen daes y definíes poles infracciones que l’empresariáu pueda cometer.

Consideraránse infracciones llaborales les aiciones u omisiones del empresariáu contraries a les normes llegales, reglamentaries y cláusules normatives de los convenios coleutivos en materia de rellaciones llaborales, lo mesmo individuales que coleutives, de colocación, empléu, formación profesional pal empléu, de trabayu temporal y d’inserción sociollaboral, tipificaes y sancionaes de conformidá col Real Decretu Llexislativu 5/2000, de 4 d’agostu, pol que se apreba’l textu refundíu de la Llei sobre Infracciones y Sanciones nel orden Social.

3

Escuela de Formación sindical y política Redondo-Pichi

Son infracciones llaborales en materia de prevención de riesgos llaborales les aiciones u omisiones de los estremaos suxetos responsables que incumplan les normes llegales, reglamentaries y cláusules normatives de los convenios coleutivos en materia de seguridá y salú nel trabayu suxetes a responsabilidá conforme a la llei enantes citada.

Son infracciones en materia de Seguridá Social les aiciones y omisiones contraries a les disposiciones llegales y reglamentaries que regulen el sistema de la Seguridá Social, tipificaes y sancionaes como tales na presente Llei.

Tales infracciones clasifíquense en lleves, graves y pergraves llevando apareyada la sanción correspondiente.

4.- ESTRUCTURA FORMAL D’UNA DENUNCIA ÉNTE INSPECCION DE TRABAYU Acompañen a esti manual dellos modelos debiendo indicase que tamién existe un formulariu de denuncia nes delegaciones de la inspección de trabayu cuya copia tamién apurrimos. Pesie a ello podemos afitar la estructura xeneral d’un escritu de denuncia énte la inspección de trabayu: Entama col ENCABEZAMIENTU, onde referiremos l’órganu al que mos diriximos (“A LA INSPECCION DE TRABAYU Y SEGURIDÁ SOCIAL”) pa, darréu, indicar los nuesos datos personales (nome y apellíos, dni y domiciliu a efeutos de notificaciones). Siguiremos faciendo referencia a que formulamos DENUNCIA e indicaremos la empresa o empreses contra la que diriximos la mesma.

Tres esi apartáu, continuaremos colos FECHOS, señalando nel primeru los datos profesionales de quien denuncia (antigüedá, categoría, tipu de rellación llaboral, conveniu coleutivu aplicable...), nel segundu los datos de la empresa mas específicos (actividá a la que se dedica, centru de trabayu, si ye un grupu empresarial....), nel terceru recueyeremos los fechos denunciaos intentando facelo con claridá, y per último señalaremos los incumplimientos que se deriven de talos actos denunciaos ( equí bien puede indicase espresamente qué artículos del Ldesconocemos o nun sabemos ónde encuadralos podemos referir que l’incumplimientu ye xenéricu con fórmules tales como “... tales fechos incumplen lo prescrito na llexislación llaboral o de seguridá social o de prevención de riesgos llaborales, vixente y aplicable a lo denunciao).

Acabaremos con un SOLICITO nel que indicaremos que se tenga por presentada la denuncia y en consecuencia se proceda a practicar l’actividá inspectora y que se afayen les midíes llegales oportunes (nos modelos tenéis redactaos esos solicitos).

5.- DENUNCIES MÁS COMUNES Podemos estremales en tres grupos: les referíes al derechu llaboral, les que tienen rellación cola seguridá social y los incumplimientos en materia de prevención y salú llaboral.

Tamién faéremos una referencia específica a les denuncies que pueden formulase consecuencia del incumplimientu pela parte de la empresa del derechu coleutivu o sindical na empresa.

A) LES RELLACIONAES COL DERECHU LLABORAL 1.- Despidu: 4

Escuela de Formación sindical y política Redondo-Pichi

Nesti supuestu, si nel despidu se cumplen coles formalidaes del mesmu, pela parte de la empresa, ello ye, entrega de la carta de despidu lo normal ye que nun tengamos que facer denguna denuncia sinon cenciellamente dir a la vía xurisdiccional.

Pero puede pasar que’l despidu seya de facto o verbal, ensin entrega de carta de despidu cenciellamente que mos comuniquen que nun volvamos a trabayar torgándonos la entrada a la empresa. Equí si ye conveniente proceder a denunciar tal fechu, a efeutos preventivos fundamentalmente.

Denunciaremos tal fechu y l’incumplimientu de la entrega de la carta de despidu. Con ello indiciariamente taremos demostrando la esistencia de tala actuación pela parte la empresa, anque ye recomendable pa demostrar dafechu la esistencia del mesmu l’acompañase a la empresa con ún/a o dos testigos/es pa que delantre d’ellos/es, como testigos/es, confirmen que existió’l despidu. Importante lo referío pues la empresa puede alegar que nun fuisti voluntariamente al trabayu y podría declarase’l despidu procedente o intentar el/la patrón/a date de baxa voluntaria na seguridá social.

2.- Salarios, horarios, categoríes, permisos, hores extres, contratos...

Ye’l gruesu de denuncies que se faen énte la Inspección de Trabayu.

Evidentemente hemos tener un conocimientu del conveniu coleutivu aplicable pa poder llevar alantre tales denuncies, si carecemos de conveniu coleutivu aplicable hemos tener más presente l’estatutu de les/os trabayadores onde se regulen estos aspectos e incluso’l contratu de trabayu individual que formalicemos.

Cenciellamente na denuncia a presentar referiremos los incumplimientos pela parte la empresa que se lleven alantre, asina: -

-

-

-

-

Nel tema de salarios por exemplu si nun se mos aplicó la subida’l conveniu, si mos paguen menos perres de les que correspuenden a la categoría reconocía, si nun se mos abonen los salarios o se fae con retrasu, si nun se mos entreguen les nómines, si falten pluses,....

Nel tema d’horarios si se incumplen los mesmos, si se mos cambien arbitrariamente o de forma unillateral pola empresa, si los cambios nun se faen d’alcuerdu a los plazos llegalmente afitaos...

En categoríes, les denuncies suelen ser más complexes por cuanto la denuncia va dir fundamentalmente encaminada a que se reconoza la realidá del trabayu que facemos y el so encuadramientu nuna categoría determinada por exemplu que dalguien cola categoría d’oficial de tercera faiga funciones d’oficial de primera, pero güeyu, hemos agüeyar bien el conveniu y la normativa xeneral pa deducir si tala denuncia podemos plantegala, lo que sí puede reclamase sedría la diferencia salarial correspondiente por facer trabayos de superior categoría. Esta denuncia comporta un llabor de preba, pela nuesa parte, importante.

Respeutu de los permisos nun suel haber denguna complexidá cenciellamente denunciaremos la esistencia d’una infracción de la empresa por nun permitinos l’esfrute d’un permisu claramente reguláu nel Conveniu Coleutivu o Estatutu de les/os Trabayadores. Otra cosa distinta sedría que se discutiere la época l’esfrute, si los díes de permisu son hábiles o naturales...

Hores extres, tema trescendente na nuesa organización por ser principiu absolutu la so refuga. Evidentemente nesti tema tamién hemos tar a lo prescrito pola normativa d’aplicación. Nun podemos neganos a facer aquelles que pueda imponenos la empresa, por exemplu por conveniu coleutivu, pero de magar esa imposición hemos

5

Escuela de Formación sindical y política Redondo-Pichi

-

-

-

denunciar la obligación de faceles o el so encubrimientu a la hora de cotizar en conceutos extrasalariales...

Los contratos de trabayu ye ún de los aspeutos que más denuncies conlleven.

Los contratos temporales suponen una montonera d’inregularidaes que hemos denunciar dende los incumplimientos de forma por exemplu nos indiquen que ye d’interinidá y encubre unu fixu, los temporales que correspuenden a fixos discontinuos, los que namás reflexen 20 hores de trabayu y se faen 40 selmanales y asina hasta l’infinitum.

L’acosu y persecución llaboral, situaciones que tán creciendo nel mundu’l trabayu. Trataríase d’una serie de comportamientos y conductes abusives y d’hostigamientu tendentes a degradar sicolóxicamente a la persona empleada con tratos hostiles, humildantes intimidatorios u ofensivos. La dificultá nestes denuncies ye la preba de la so esistencia.

La falta d’ocupación efeutiva. Munches vegaes como castigu encubiertu déxase la persona trabayadora al marxen de les sos compañeres/os ensin dá-y trabayu efeutivu. Pues bien, ésta persona nun sólo tién el “deber” de trabayar sinon tamién el derechu al trabayu, y por ello son situaciones igualmente denunciables.

B) LES RELLACIONAES COLA SEGURIDÁ SOCIAL 1.- Les altes y baxes na seguridá social.

Ye importante saber si una vegada que empecemos a trabayar se mos dio d’alta na seguridá social. Si nun ye asina ha denunciase darréu énte la Inspección de trabayu, nun dexando trescurrir escesivamente’l tiempo, yá que sigún vaiga pasando más difícil va ser demostrar la fecha exacta na que empecemos a prestar servicios.

Lo mesmo cuando se mos da de baxa, a vegaes nin mos enteremos e incluso nin de la causa, poro si conocemos tales inregularidaes tenemos también que denunciales, por exemplu que mos dean de baxa señalando que ye voluntaria cuando realmente foi un despidu o por finalización de contratu temporal, fechu fundamental a efeutos de les posibles prestaciones de desempléu.

2.- Les cotizaciones Evidentemente la so importancia ye indiscutible, yá que van servinos como referencia pal cobru de toles prestaciones económiques derivaes de la seguridá social. Situaciones d’incapacidá temporal, invalideces, xubilaciones...

Poro, tenemos que prestar atención a si les cotizaciones son les afitaes llegalmente, y en casu contrariu denuncialo a la Inspección de trabayu. Nesti apartáu podemos alcontranos con periodos nos que la empresa nun cotiza o cotiza per baxo de lo que mos correspuendería...

3.- Les complicaes rellaciones coles Mutues d’accidentes de trabayu y enfermedaes profesionales.

Somos conscientes del papel empresarial de tales mutues lo que conlleva inevitablemente a rocees coles mesmes.

Hemos tener mui presente cuáles son les nueses obligaciones y derechos respeutu d’elles, por exemplu’l pasar reconocimientos, los atentaos a la intimidá e integridá física, el control de les baxes médiques y un llargu corolariu de cuestiones. Si se perpasen o incumplen los nuesos derechos ye’l momentu de dir tamién a la Inspección a formular la correspuendiente denuncia.

6

Escuela de Formación sindical y política Redondo-Pichi

Ónde más vamos chocar con elles ye nel reconocimientu d’accidentes de trabayu que independientemente de que sigamos otros procedimientos como son los espedientes por cambios de continxencia énte la seguridá social, tenemos quee denunciar los fechos referíos al accidente de trabayu y la so refugao pela parte les mutues, e incluso la denegación de la baxa por tal continxencia por indicación de la empresa consecuencia de los beneficios que podríen dexar de percibir sigún los índices d’accidentes sufríos.

C) LES RELLACIONAES COLA PREVENCION DE RIESGOS LLABORALES Ye fundamental conocer tal normativa pa deducir d’ella los derechos que mos asisten y por ello citamos, dientro la maraña llegal que tal materia xeneró, Llei 31/1995, de 8 de Payares, de Prevención de Riesgos Llaborales y el R.D. 39/1997, de 17 de Xineru, pol que se apreba’l Reglamentu de los Servicios de Prevención.

Ente los incumplimientos más vegaes denunciaos, podemos señalar: -

La obligación de planificar, llantar y aplicar un plan de prevención de riesgos na empresa.

Nun facer les evaluaciones de riesgos de los puestos de trabayu.

Afayar los puestos de trabayu a les condiciones físiques y síquiques de les persones trabayadores.

Superar los llímites d’esposición a axentes nocivos pa la salú de la plantilla.

Falta de midíes de proteición coleutives o individuales y de señalización de riesgos.

Incumplimientu del deber de información a la plantilla de los riesgos pa la so seguridá y salú y de les midíes y actividaes de proteición y prevención aplicables a los riesgos.

D) LES RELLACIONAES COL DERECHU SINDICAL Les seiciones sindicales y órganos representativos de les y los trabayadores, comités y delegaciones de personal, tienen unos derechos que tamién han ser respetaos pola empresa. El so incumplimientu ha conllevar la denuncia consiguiente énte la Inspección de trabayu.

Ye necesario conocer fondamente los derechos sindicales que puedan reconocese nel conveniu coleutivu y na llexislación xeneral, nesti casu sobre too, l’Estatutu de les y los Trabayadores.

Les infracciones cometíes pol o la patrón/a son delles, pero les más comunes podemos resumiles asina: -

-

-

Incumplimientu nel reconocimientu de les hores sindicales y na forma de comunicar el so exerciciu.

Incumplimientu nos derechos reconocíos nel art. 68, ente los que cabe citar informar trimestralmente de la situación económica de la empresa, del índiz d’absentismu y les causes de los accidentes de trabayu y enfermedaes profesionales o conocer los contratos de trabayu o el balance, memoria o cuenta de resultaos de la empresa.

Poner torgues al llabor sindical de vixilancia y control de les condiciones de seguridá y salú del trabayu na empresa, y del cumplimientu de les normes vixentes en materia llaboral o seguridá social.

Importante reseñar les actuaciones discriminatories y d’atentáu a la llibertá sindical al potenciar más a determinaos sindicatos dándo-yos más información, pactando fuera de los órganos correspuendientes...

7

Escuela de Formación sindical y política Redondo-Pichi

-

La falta de comunicación de les subrogaciones cuando estes acontezan.

6.- DOS DENUNCIES ESPECÍFIQUES A) LES DEL ACCIDENTE DE TRABAYU Son importantes tales denuncies por cuanto que dientro’l derechu de la seguridá social existe una figura xurídica nomada RECARGU DE LES PRESTACIONES POR FALTA DE MIDÍES DE SEGURIDÁ que podría afeutar el futuru de la persona trabayadora.

Sabemos que d’un accidente de trabayu grave derívense toles prestaciones económiques correspuendientes por exemplo a la incapacidá temporal y n’últimu casu la invalidez permanente, pues bien esos cobros pueden ser superiores si demostramos que nel accidente sufríu existió una falta de midíes de seguridá.

Poro ye importante facer hincapié na denuncia sobre eses faltes de midíes de seguridá nunca reconocer que l’accidente foi fortuitu o culpa de la persona trabayadora.

B) LES DE LOS ERES (ESPEDIENTES DE REGULACION D’EMPLEU) Tres una de les múltiples reformes llaborales, la intervención de la inspección llaboral na tramitación de talos espedientes minimizóse de tal manera que nun ye necesario que los ERES seyan aceptaos pola autoridá llaboral.

Por embargu l’Estatutu de les/os Trabayadores mos dexa un resquiciu pa poder atacalos al indicase nel art. 51.6 que l’autoridá llaboral podrá impugnar los alcuerdos afayaos nel desendolcu del ERE por estimar que na conclusión de los mesmos existió fraude, dolo, coacción o abusu de derechu.

Pues bien, tanto les persones trabayadores a títulu individual y sobre too les/os representantes de les/os trabayadores y les seiciones sindicales, pueden poner les denuncies que tengan a bien por entender que l’alcuerdu del ERE afayóse incurriendo en dalguna de les causes prohibíes pol ordenamientu, talu como se señaló enantes.

Por exemplu podría denunciase que hebio fraude por cuanto nun se entregaron los datos económicos reales al tapecer una contabilidá B, o existió coacción por cuanto se amenazó con despíu a quienes se negaren al ERE, o que nun van abonase salarios hasta algamar un alcuerdu nel sentíu pretendíu pola empresa,...

7.- PREBES Ye conveniente apurrir xunto cola denuncia les prebes que tengamos, pero eso sí hemos aseguranos que les mesmes mos beneficien y preba lo denunciao plena o indiciariamente.

Fundamentalmente concretaránse en prebes documentales y testificales.

Respeutu de les prebes documentales tendremos que consiguir copies de comunicaciones (imaxinémonos que n’elles mos dicen que mos cambien de trabayu, o se modifica l’horariu d’entrada...), recibos de salarios (con ellos amosaríemos por exemplu que nun se cumplen les condiciones económiques del Conveniu aplicables), factures (supuesto de que nun se mos abonen les dietes) y lo que se mos ocurra, que mos ayude a amosar la realidá de lo denunciao.

8

Escuela de Formación sindical y política Redondo-Pichi

Respeutu de les prebes testificales nel escritu de denuncia podemos citar a aquelles/os compañeres/os que conocen de la situación que se denuncia, por exemplu quien presta’l mesmu trabayu y tién una categoría diferente, o quien foi testigu del acosu sufríu, etc. Pero hemos previamente falar con elles/os, y aseguranos, de que si se-yos requier pola Inspección van confirmar los fechos denunciaos. Casu de tener duldes coles/os testigues/os meyor nun citales/os.

Una preba fundamental na defensa de les persones trabayadores ye la grabación de conversaciones cola empresa o los sos subordinaos/es, pero güeyu nun toa grabación ye llegal.

Hemos diferenciar dos tipos de grabaciones, d’un lláu les PROPIES que sedríen aquelles nes que una de les persones intervinientes na conversación ye quien utiliza la grabadora (voz/imaxen), siendo indiferente que se conoca o non que tá rexistrándose la conversación, ello ye que se anuncie o non a la otra persona que va ser grabada. Y d’otru lláu les denominaes AYENES que se graben pela parte de dalguien conversaciones de terceres persones. Nesti últimu casu la grabación considérase illegal por entender que hai un atentáu constitucional a la intimidá pudiendo constituyir un delitu penal.

El casu de la grabación propia ye dafechu llícita y llegal y asina lo punxo de manifiestu’l Tribunal Constitucional, yá que se entiende que quien ye grabáu/ada accedió voluntariamente a tener esi contautu con quien graba y ye tributariu/a y responsable de les espresiones utilizaes y del conteníu de la conversación. Llegóse a señalar polos tribunales que cuando una persona emite voluntariamente les sos opiniones o secretos a un/a contertuliu/a, sabe de primeres que se despoxa de les sos intimidaes y-y les tresmite a quien les escucha.

Pero güeyu, namás cabe utilizala a los fines de denuncia, bien delantre inspección o tribunales yá que cualesquier otru fin que se pretenda con tales grabaciones propies, puede considerase illegal, poro hemos llimitalos na so utilización como un mediu de defensa.

Tal prueba llegal debería tener gran proyeición nel mundu llaboral a los efeutos de defensa de los derechos de les persones trabayadores pa prebar situaciones o fechos como l’acosu, les discriminaciones que atenten a derechos fundamentales, la esistencia de deudes non salariales, la persecución empresarial por motivos políticos o sindicales...

8.- IMPORTANCIA DE LES DENUNCIES A INSPECCION DE TRABAYU Fecha la denuncia o denuncies correspuendientes, la empresa normalmente afaya midíes persecutories o sancionadores hacia quien denuncia y por ello hemos parar nel denomináu DERECHU D’INDEMNIDÁ de la persona trabayadora como manifestación del derechu fundamental a la tutela xudicial, traducío llanamente en que nadie nun puede ser despedía/u, sancionada/áu nin perseguía/u por exercitar o reclamar los sos derechos, esto conllevaría sí hubiere tal atentáu a esi derechu, la máxima proteición, pues el despíu por esta causa consideraríase nulu, lo mesmo que una sanción o una modificación sustancial o un cambiu de categoría o cualesquier otru actu represor.

Supón, en definitiva, la imposibilidá de la empresa de llevar alantre represalies escontra quienes exercieron los sos derechos, y nestos casos la conducta de la empresa ha considerase siempre discriminatoria y radicalmente nula.

Tenemos que tener presente que non toa reclamación o exerciciu de derechos deriva necesariamente na consideración de tal proteición de la indemnidá, pues al construyise esti

9

Escuela de Formación sindical y política Redondo-Pichi

conceptu fundamentalmente polos Tribunales, hbemos acudir a la so casuística. Asina, dixeron que existe atentáu a tal derechu por: defender los derechos llaborales, organizar actos previos o necesarios pal exerciciu d’una aición xudicial (por exemplu pensemos na presentación de conciliaciones, o reclamaciones direutes a la empresa, u organizar una demanda coleutiva), pola interposición d’una o delles denuncies énte la inspeición de trabayu, por declarar como testiga/u nun xuiciu escontra la empresa, pola formulación d’una demanda, por ser candidata/u d’un sindicatu...

Ye importante que se valore pela parte de les persones trabayadores facer les reclamaciones nominalmente y en conxuntu col sindicatu, pa que pueda exercitar tal derechu, pues nel supuestu de que únicamente reclame’l sindicatu los sos derechos o’l mantenimientu de les sos condiciones de trabayu, tendría perdifícil demostrar la represalia que un despíu o cualesquier otra sanción o actu empresarial, puede encubrir. Asina ye mui corriente que’l sindicatu formule denuncies xenériques de dalgunes empreses a instancia de dalgún/a afiliáu/ada y por embargu ésti/a nun conste na mesma.

9.- ULTIMES CONSIDERACIONES 1.- La denuncia, respeutu de la persona denunciante, ye anónima yá que se obliga a la inspeición a guardar secretu sobre la so identidá.

2.- Puesta la denuncia la inspeición habría d’actuar de la forma que considere más afayaíza solicitando tola información que camiente oportuna, visitando’l centru de trabayu...

3.- La inspeición podrá abrir un periodu d’información previa cola fin de conocer les circunstancies del casu denunciáu y la conveniencia o non d’entamar actuación inspeutora.

4.- Quien denuncia nun tendrá la consideración d’interesada/áu na fase d’investigación de los fechos pero sí tendrá derechu a recibir información sobre l’estáu de tramitación de la so denuncia, asina como de los fechos constataos y de las midíes afayaes al respeutu cuando’l resultáu de la investigación afeute a los sos derechos. Sí tién la consideración d’interesada/áu, poo accesu al espediente, si se entama procedimientu sancionador.

5.- El procedimientu podrá acabar con requerimientos o actes d’alvertencia a la empresa cuando nun se deriven perxuicios direutos a les persones trabayadores o si se entamó procedimientu sancionador estenderá la correspuendiente acta d’infraición. Casu de que nun se preben los fechos denunciaos archivaráse l’espediente.

6.- Nun se almiten denuncies anónimes salvo al traviés d’un denomináu “Buzón de llucha contra’l fraude llaboral” puesto a disposición de la ciudadanía pola Dirección Xeneral de la Inspeición de Trabayu y Seguridá Social.

7.- Les denuncies énte Inspeición nun suspenderán los plazos que tengamos pa facer les reclamaciones correspuendientes vía xudicial, polo tanto munchu cuidáu nel casu, por exemplu de despíos, sanciones o modificaciones sustanciales nel que’l plazu ye de 20 díes.

MODELU 1.- DENUNCIA D’UNA SEICION SINDICAL A LA INSPECCION DE TRABAYU

10

Escuela de Formación sindical y política Redondo-Pichi

NOME Y APELLÍOS---------------------------, con DNI nº ----------------------- nel so propiu nome y nel de la Seición sindical de la CORRIENTE SINDICAL D’IZQUIERDA, con domiciliu a efeutos de notificaciones en----------------, énte esta Inspección comparez y como meyor proceda, DIZ: Que a mediu’l presente escritu formula DENUNCIA frente a les empreses PEPITO SA Y SERVICIOS Y CONTRATES SL, con domiciliu en-----------------, too ello en base a los siguientes FECHOS PRIMERU.- Que la empresa SERVICIOS Y CONTRATES SL, dedicada a l’actividá del metal, tá prestandoa les y los sos trabayadores, de manera illegal, a la otra empresa denunciada.

SEGUNDU.- Dende’l principiu les y los sos trabayadores siempres tuvieron inmerses/os nel procesu productivu de la empresa principal PEPITO SA faciendo llabores de la mesma, lo mesmo na cinta d’empaquetáu, cadena de montaxe, como nel almacén de productos terminaos, faciendo les mesmes llabores, y xunto a ellos/es, que les persones trabayadores de PEPITO SA, y recibiendo órdenes de los sos mandos, con total dependencia d’ellos/es.

TERCERU.-Dientro los trabayos que les/os cedíes/os illegalmente faen hai que resaltar dellos aspeutos: A) Fae los mesmos trabayos que les persones trabayadores de PEPITO SA ensin que esista diferencia denguna.

B) Reciben les órdenes de los mandos de PEPITO SA pues ellos/es nun tienen dengún mandu na empresa principal.

C) Tán inmersos/es nel procesu productivu de la empresa principal ensin que los trabayos que faen tengan sustantividá propia.

D) Les ferramientes-y les proporciona la empresa PRINCIPAL. E) Tienen los vestuarios y les taquielles nel mesmu sitiu que les persones trabayadores de PEPITO SA. F) Reciben cursinos de formación de la empresa principal..

Dempués nesti casu la empresa SERVICOS Y CONTRATES SL contrató formalmente a unos/es trabayadores pa ceder, ensin más, a los/es mesmos/es, a la empresa principal pa facer trabayos propios de la mesma con un control y ordenamientu constante de la empresa principal, esistiendo en consecuencia una contrata fraudulenta.

CUARTU.- Que tamos polo tanto énte una cesión illegal de trabayadores, d’alcuerdu colo dimpuesto nel art. 43 del Estatutu de les persones trabayadores, debiendo actuar esta Inspección pa evitar tal abuuo.

Por tolo espuesto, SOLICITA A ESTI ORGANISMU que teniendo por presentáu esti escritu, sírvase almitilu, y na so virtú, previos los trámites pertinentes, se proceda a abrir el correspuendiente espediente sancionador, y nel so casu, l’acta d’infracción pertinente, coles consecuencies llegales pertinentes.

En XIXON a de

de 2016.

11

Escuela de Formación sindical y política Redondo-Pichi

MODELU 2.- DENUNCIA PELA PARTE’L SINDICATU A LOS SERVICIOS MÉDICOS A LA INSPECCION DE TRABAYU ................., Secretariu Xeneral de la CORRIENTE SINDICAL D’IZQUIERDA (CSI), nel so propiu nome y representación, con D.N.I. nº y domiciliu a efeutos de notificaciones en............ , énte esti organismu comparez y como meyor proceda, DIZ: Que a mediu’l presente escritu formula denuncia frente a la empresa..............................., con domiciliu en................................, en base a los siguientes FECHOS: PRIMERU.- Que énte la tendencia, cada día más espardía, de les grandes empreses de controlar los accidentes de trabayu a los efeutos estadísticos correspuendientes y les sos posibles repercusiones negatives, éstes intenten llantar unos controles sobre les persones trabayadores que lleven a la más absoluta illegalidá torgando o cercenando’l derechu de les persones trabayadores a les prestaciones sanitaries y económiques correspuendientes, como ocurre na empresa demandada al nun derivar a les/os accidentaes/os a la institución o entidá xestora de la seguridá social correspuendiente pa la valoración del accidente.

SEGUNDU.- Anguañu’l serviciu médicu d’empresa, enantes denomináu botiquín, tá compuestu por un ATS que ye quien recibe en primer instancia a la persona víctima’l accidente, decidiendo si lu deriva a la Mutua correspuendiente o non. Ello na mayoría de les ocasiones, a salvu d’accidentes nimios y que puedan iguase con una primer cura, conlleva una estrallimitación de les sos funciones pues, entendemos que llega a diagnosticar, al prescribir la correspuendiente medicación y la so práctica como son los inyectables. Un exemplu claro ye lo denominao vulgarmente como “tirón” na espalda, pues bien ye él quien decide’l diagnósticu y prescribe la cura.

Al traviés de tal práutica illegal, preténdese evitar unviar a la persona trabayadora a reconocimientu y valoración na mutua correspuendiente, únicu órganu competente al carecer la empresa de médicu/a dalgún/a.

D’alcuerdu a la diversa llexislación sobre funciones de los ATS, ver ente otros l’art. 62 del Estatutu del personal sanitariu non facultativu o l’art. 7 de la Llei 44/2003 d’ordenación de les profesiones sanitaries, éstos/es únicamente tendríen como principal misión la del exerciciu de les funciones propies de la so profesión cumplimentando les instrucciones que reciba del facultativu/a, dempués en dengún casu taría la de diagnosticar y menos prescribir medicación ensin tal datu.

TERCERU.- L’actuación de dichu ATS, estrallimitándose nes sos funciones, entraría o polo menos rayaría la órbita penal por suplantación de funciones d’una profesión, cola total aquiescencia de la empresa a los efeutos de cercenar los derechos de les persones trabayadores referíos col únicu fin, insistimos, de rebaxar los índices d’accidentabilidá anque pa ello tengan que atentar escontra la salú de les mesmes.

Por tolo espuesto, SOLICITA que teniendo por presentáu esti escritu, sírvase almitilu, por formulada denuncia y na so virtú, previos los trámites pertinentes se proceda a incoar el correspuendiente espediente d’infracción énte los fechos denunciaos.

En Xixón a

de

de 2016.

12

Escuela de Formación sindical y política Redondo-Pichi

MODELU 3.- DENUNCIA INDIVIDUAL POR ACOSU A LA INSPECCIÓN DE TRABAYU DE XIXÓN

....................................con D.N.I. .......................y, a efeutos de notificación, con domiciliu en c/Sanz Crespo, 3 bajo 33207 de Xixón, énte esta Inspección de Trabayu, comparez y como meyor proceda, DIZ Que a mediu’l presente escritu formula DENUNCIA frente a la empresa..............................., con domiciliu en Xixón, cai..........., too ello en base a los siguientes FECHOS 1º.- Que la denunciante trabaya como alministrativa na empresa denunciada dende’l día 2 de payares de 1997, faciendo estremaes funciones nes rellaciones de dicha empresa colos y les sos clientes a nivel nacional, polo que tién que afayar el so horariu, vacaciones, etc, a la demanda y necesidaes que les circunstancies del mercáu desixen, d’alcuerdu cola Direición de la empresa.

2º.- Que la direición de la empresa-y comunicó la so intención d’amenorgar un 10% los salarios al personal d’alministración, pa paliar los efeutos de la crisis económica actual.

3º.- Que como alternativa la empresa presentó un Espediente de Regulación d’Empléu pal personal afectáu por un períodu de 33 díes ente los meses de xineru a agostu de 2016.

4º.- Que dichu Espediente denególu la Direición Xeneral de Trabayu por coacciones (acompáñase copia).

5º.- Que énte esta negativa pela parte l’Autoridá Llaboral, la Direición de la empresa plantega de nueu l’amenorgamientu del 10% del salario a los afectaos.

6º.- Que la denunciante manifestó’l so deslacuerdu con esta midía debiendo respetase’l Conveniu Coleutivu, al tar acoyía al mesmu, al contrariu la mayoría de persones emplegaes que tán fuera conveniu.

7º.- Que de magar esti momentu, la Direición de la Empresa vién apercibiendo a la denunciante pa que cumpla estrictamente colos horarios del conveniu en vigor y coles midíes de control de presencia, ente otres, pesie a que como más arriba se indicó de la flexibilidá de la que gozaba lo mesmo que’l restu del personal d’alministración. Por embargu al restu d’esi personal, que tá fuera de conveniu y aceptó l’amenorgamientu de salariu, siguen manteniendo-yos les condiciones.

En consecuencia tal actuación de la empresa, persecución de la denunciante, ye consecuencia de la non aceptación de la rebaxa’l so salariu, obviando la empresa los derechos y condiciones más beneficioses de la que esfrutaba, xunto a les sos compañeres/os, anque insistimos la mayoría continúa con elles, sufriendo polo tanto un comportamientu d’acosu y discriminación contrariu a la llei y la nuesa doctrina constitucional.

Por tolo espuesto, SOLICITA A ESTI ORGANISMU que teniendo por presentáu esti escritu, sírvase almitilu, y na so virtú, previos los trámites pertinentes, se incoe’l procedente espediente y en consecuencia, se llevante la correspuendiente acta d’infracción por tal comportamientu d’acosu y discriminación, colos demás pronunciamientos llegales pertinentes requiriendo a la empresa’l cese inmediatu del mesmu.

En Xixón a

de

de 2016

13

Escuela de Formación sindical y política Redondo-Pichi

MODELU 4 DENUNCIA INDIVIDUAL DE COTIZACIONES A LA INSPECCION DE TRABAYU

.............................mayor d’edá, con domiciliu en Xixón, cai ........... y con D.N.I. nº............................, énte esti serviciu comparez y como meyor proceda DIZ: Que a mediu’l presente escritu formula DENUNCIA frente a la empresa..............................., na persona del so llegal representante, con domiciliu en Cai ........................................., too ello en base a los siguientes FECHOS PRIMERU.- L’actor prestó servicios pa la empresa demandada dende 10/2/2012, cola categoría profesional d’especialista, nuna obra que tal empresa executa n’El Musel.

SEGUNDU.- Que foi cesáu de la empresa por supuesta terminación de contratu con fecha 2/2/2014.

Que por nun tar d’alcuerdu con tal cese, el denunciante formuló demanda de despíu énte la Xurisdicción de lo Social, llegando la empresa a conciliar enantes de la cellebración del xuiciu correspuendiente, reconociendo la IMPROCEDENCIA’L DESPÍU y abonando al denunciante la indemnización correspuendiente asina como los salarios de tramitación.

TERCERU.- Que en tal conciliación cellebrada énte’l Xulgáu de lo Social nº 4 de Xixón, la empresa amás de reconocer la improcedencia’l despíu, comprometíase a abonar al actor la indemnización llegal más los salarios de tramitación.

CUARTU.- Que la empresa denunciada debió de cotizar pol actor por esos salarios de tramitación y hasta la fecha’l despíu. Por embargu tres la petición de la vida llaboral pela parte’l denunciante, descubre que tal obligación foi obviada pola empresa denunciada.

QUINTU.- En consecuencia énte esa falta de cotización, el denunciante vése obligáu a formular la presente denuncia frente a la empresa citada, pa que proceda a facer tal cotización.

SEXTU.- Al presente escritu acompáñase copia de vida llaboral, demanda y acta de conciliación enantes referíos.

Por tolo espuesto,

SOLICITA A ESTI ORGANISMU que teniendo por presentáu esti escritu, sírvase almitilu, y na so virtú, previos los trámites pertinentes, se incoe’l correspuendiente espediente, y tres la comprobación de los fechos denunciaos, resuélvase obligar a la empresa a cotizar pol períodu señaláu y en consecuencia, énte tal incumplimientu se proceda, igualmente, a llevantar la correspuendiente acta d’infraición, coles consecuencies llegales pertinentes.

En Xixón a

de

de 2016.

14

Escuela de Formación sindical y política Redondo-Pichi

MODELU 5 DENUNCIA ACCIDENTE DE TRABAYU Y RECARGU DE PRESTACIONES A LA INSPECCION DE TRABAYU ...................................., mayor d’edá, con domiciliu en cai ...........................y con D.N.I. nº...................., énte esti Organismu comparez y como meyor proceda, DIZ: Que presenta DENUNCIA frente a la empresa.........................., con domiciliu social en .............................., too ello en base a los siguientes FECHOS: Primeru.- Que la denunciante ye trabayadora de la empresa denunciada, cola categoría profesional de maquinista.

Segundu.- Que con fecha 10/02/2016, sufrió un accidente de trabayu por mor d’un desprendimientu de piedres y tierra, énte’l mal estáu de les cunetes y trincheres, afeutando a la vía pela que circulaba, acontecío nel Km52, direición Llanes, y por mor d’ello el tren descarriló, causando delles persones feríes.

Terceru.- Como consecuencia, l’actor sufrió importantes llesiones pola contusión sufría en rexón dorsal y en mano derecha, aparte de contusiones múltiples, lo que orixinó que se-y diere de baxa médica por accidente de trabayu mientres un periodu de 8 meses. La continxencia d’accidente de trabayu cúbrela la Mutua FREMAD. Cuartu.- De resultes de tales lesiones ye sometíu a delles prebes médiques de les que se deduxo la esistencia de les llesiones referíes nel informe médicu que se acompaña (pueden referise les llesiones tamién) Quintu.- Respeutu d’esti accidente hemos resaltar tres fechos: 1º Que la empresa denunciada pesie a la gravedá del accidente, nun lo comunicó a esta inspeición pa que ficiere la investigación pertinente, pesie a tar obligao a ello.

2º Que l’accidente ye consecuencia de la falta de midíes de seguridá esistentes nel tramu afeutáu pola dexadez de la empresa nel mantenimientu de les cunetes y aseguramientu de les trincheres y ello lo corrobora dellos fechos.

En primer llugar la esistencia de múltiples accidentes, más de cuatro, nesa zona.

En segundu llugar les estremaes interpelaciones parllamentaries efectuaes a la empresa denunciada sobre precisamente’l saneamientu de cunetes y aseguramientu de trincheres ensin que la empresa hasta’l momentu y pesie a conocer la esistencia de deficiencies nes mesmes ficiere llabor dengún que supunxere’l desaniciu de tales deficiencies que ocasionaron, ente otros, l’accidente que se denuncia.

Y, en tercer llugar, la inesistencia dientro los planes de prevención d’un estudiu de les condiciones xeológiques del trazáu fierroviariu y en concretu de les trincheres sosceptibles de desprendimientos nuna zona d’abonda pluviometría cual ye’l casu de la zona del accidente, y en xeneral de la Comunidá Autónoma d’Asturies.

Sextu.- Polo referío’l denunciante vése na obligación de poner tales fechos en conocimientu del Organismu al que se dirixe, pa que se proceda a llevantar el pertinente espediente y consecuente acta d’infraición por ocultar l’accidente acontecíu y la falta de midíes de seguridá esistente, proponiendo’l recargu de prestaciones correspuendiente por tales inregularidaes.

Por tolo espuesto, SOLICITA que teniendo por presentáu esti escritu, coles copies de los documentos que se acompañen, se proceda a l’apertura del espediente correspuendiente y en consecuencia, si a ello hubiere llugar, se incoe la correspuendiente acta d’infraición pola omisión na comunicación de tal accidente grave producíu a esti organismu y pola inesistencia de midíes de seguridá pa evitación del mesmu, cola propuesta correspuendiente en cuantu al recargu de prestaciones.

En Xixón a

de

de 2016.

15

Escuela de Formación sindical y política Redondo-Pichi

Xixón, noviembre de 2016

16