Dialuna December 3, 2012
Pagina 6
BENNY NISBET, LIDER DI PPA:
CRIMINALIDAD BIRANDO UN PELIGER SERIO PA FUTURO DI NOS SOCIEDAD !! STA. CRUZ -- Ultimo periodo sigur e ultimo lunanan nos sociedad Arubano ta wordo asota pa un racha di crimen. Algun caso unda ciudadano a perde nan bida y especialmente ladronicia den tur forma! Si antes e ladronicia aki grandemente tabata tuma lugar anochi of den madruga, ultimo lunanan ta evidente cu e ladronicia aki ta tumando lugar awor den dia cla. No tin berguenza NI miedo mas …. ta eherce nan abuseria den dia cla como sifuera ta simplemente parti di nan trabao. Pa nos puntra nos mes awe … si nos gobierno ta haciendo suficiente pa limita e desaroyo sumamente peligroso cu ta afectando e bida diario di nos ciudadania y nos comercio diariamente. E prome pregunta cu mester wordo haci ta: Di unda e criminalidad creciente aki ta bini ?? Di un pobreza grandi cu tin actualmente den nos sociedad? Di e hecho cu nos como sociedad a warda di mas pa introduci e Ley di Enseñanza obligatorio
cu awor nos tin un grupo grandi di hoben den nos comunidad cu no a termina un educacion y no por haya un trabao cu un cierto futuro mara na esaki … combina cu e hecho cu nos tin un grupo grandi di hoben di otro pais cu a bin biba aki cu tampoco no a logra integra den nos sistema di enseñanza debidamente cual ta limitando nan oportunidadnan riba Mercado laboral… cual tin tur sorto di consecuencia pa nos comunidad. No cabe duda cu e raiz di nos criminalidad ta diverso y lo tin otro motibo tambe… uso di droga y e necesidad pa cumpra esaki, bida cu un famia cu no tin suficiente entrada unda hobennan no por haci locual un hoben normal lo desea etc. etc. PPA ta di opinion cu aki gobernacion mester tin un maneho dirigi riba e aspecto criminal pero tambe su raiz, su pakico … pa asina como autoridad den representacion y defensa di nos sociedad, nos lo por lucha mihor contra esaki.
Accidente pisa na Jaburibari
Un lastra di brake, sigui pa un sonido fuerte a lanta diferente habitante di Jaburibari for di soño diadomingo madruga
STA. CRUZ -- Despues di 4’or madruga Central di Polis a haya yamada cu un accidente basta pisa a sosode riba e caminda di Jaburibari. A resulta cu un Mitsibushi Lancer tabata riba e caminda di Jaburibari bayendo direccion zuid
pero a perde control un tiki promer cu “Quality Foodmart”. Aki e chauffeur a dal den un pal’i luz y kibra, basha e pal’i luz cu transformator y todo abao. Door di e impacto un gran parti di Jaburibari, Moko, Paradera su coriente
a cay afor. Aunke e sla tabata basta fuerte, e chauffeur y e ocupante a sali levemente herida. Elmar a traha riba coriente y te den ora laat di mainta a logra suminstra coriente atrobe pa e barionan afecta.