Soranomi dardaghesi di Tino Ite Se sa che a Dardàc e a Budhoia (ma ancia a Santa Luthia) ’l è sol che tre/quatro cognomi che i rapresenta la gran part de le famee, e par ’sta rasòn i nostre veci i à dovut inventasse dei soranomi par podè identificà ’na famea thentha ris’cià de confondela co’ ’n altra. Al è ancia da tìgne present che uncuoi ai canais i don tanti noms moderni, ma ’na volta i se clamava duth Bepi, Toni, Nani, Jacum, Gigi e Maria, Bepa, Teresina, Neta, Gigia. Cuan che un foresto el domanda a cualchedun del paes unlà chel stà un therto Zambon o Bocus, Giuseppe o Luigi, a Dardàc, o una therta Maria o Giuseppina Carlon o Fort, a Budhoia e a Santa Luthia, se nol dis de che famea che al è, nessun i li cognos. E cussì a Dardàc al è vignut fora i Thampèla, i Pinai, i Trantheot, i Cunicio, i Pala, i Theco, gli Ite, gli Sclofa…; Quàn che ere pithol, me nona Romana Ite (par dise al vero ’l era de Parmesan, ma ’l è deventada de Ite, dopo essese maridada co’ me nono Tino, che par l’anagrafe el feva Valentino Zambon, ma duth i lo ricorda anciamò come Tino Ite) la me feva sempre la lista de chei de ’na volta co i soranomi pì curiosi e ancia ridicui. Scomithiando da la banda nord de Dardàc (a la fine de la via San Tomè) e vignendo in dho par là de Tarabin fin in platha, ciateane i Pothale Vendramin, Tita Batistela,
26
Sbrindol Thelot, Conale Barisel, Pula Marcandola, Bici de Theco, General Caporal, Thiegol de Stort, Bruno Bonaparte. Chisti ’l è chei che mi me pense in te ’sta spece de filastroca che me nona la me contava par fame ride, ma cuàn che ere pithol me pense ancia de therti veci simpatici e carateristici (la gran part ’l è beldà quaranta/thinquanta ains che i ne à lassat) e che volarave ricordà unchì co’ tanta simpatia e afeto. Soi sigùr che chei de la me generathiòn i se li ricorda benòn, ancia parchè cualchedunc al era propio un sogeto. Cencio Svientol, Nible Batistela, Tino Cacamela (Trantheot), Piero Canta, Ilario Fuser, la Regina Cutha, la Marta Bronte, la Cencia Thampela, la Neta Nasona (che la steva intela ciasa rossa, intela Crosera del Crist), Berto Scroc, Nani e Bepi Cucola, la Teteca, Nani Pantha, Paolin Bocus, Paol Basso, Severino Luthol e i so fradiei, Toni, Gigi e Gino; Bepi Scopio (i lo clamava Scopio pal rumor del so trator su pa’ la Riva del Capelan), Vitorio de la Geia (chel ’l era stat in Frantha e ’l clamava el quartin de vin negre «supin»), Biòn Ite (me bisnono), la Nuta de la Rossa, Svaldin Marin, Andolùt Marin (detto Marini), Ostìn Bocus, Bramo Thisa, Vidio Muci (che al è stat nonthol par pì de thinquanta ains). E tanti altres che adès fathe fadia a mete a foc, ma che i meritarave ancia lor de esse ricordadi parché i era duti brava dhent e duti insieme i à fat la storia del nostre bel paesut.