ViaxAst 14, la revista de VerAsturies.com

Arranca’l bon tiempu y failo con más llibertá de movimientu, una vegada rematáu l’estáu d’alarma. Ye’l momentu de siguir teniendo precaución, magar que les circunstancies seyan meyores.

Primavera soleyera

Nesti númberu nuevu de ViaxAst percorremos Asturies a la gueta d’opciones d’ociu de tou tipu, asina como descubriendo una vegada más la hestoria d’Asturies, les sos tradiciones, la cultura’l país, la gastronomía, etc.

Esfruta de la llectura, qu’aguardamos que sirva p’apurrite idees d’ociu per Asturies. Agora más que nunca ye’l momentu de da-y sofitu al turismu de cercanía. ¡Vémonos peles caleyes y les cais d’Asturies!

Inaciu Galán - @Inaciugalan Director de ViaxAst

Equipu de ViaxAst

ÍNDIZ

EQUIPU

Primavera en Castrillón

4

El barriu de Sabugo

6

Sobrescobiu, un paséu pela hestoria

8

Trés xardinos hestóricos

11

Ruta de les muyeres ribeseyanes

12

Les recomendaciones

14

L’orixe de les espiches

16

Asturies tamién foi urbana III

18

Xixón Tours 20 Cerámica n’Asturies

22

15 años de xeneración Formientu

24

DIRECTOR Inaciu Galán DIRECTOR DELEGÁU Lluis Fanjul Quelle XEFE DE REDACCIÓN Marcos S.L. REDACCIÓN Vero Suari Jennifer Berrocal Beatriz Rato Arantxa Margolles DISEÑU Y MAQUETACIÓN Alejandra González XESTIÓN EDITORIAL EDICIONES

Receta 28 Les escursiones 32 Mio güela: Syra 35 4 rutes pa perdese per Asturies

36

¿Qué sabes de la naturaleza asturiana?

38

DIRECTORA COMERCIAL Nuria López García 684 645 846 info@verasturies.com Teléfonu: 984 086 626 IMPRENTA: Gráfiques Summa SEMEYA PORTADA: Conceyu de Ribeseya Depósitu Llegal: AS 03801 - 2017 Cuatro Gotes Producciones SL Númberu 14 - Añu IV - Cuarta Dómina

¿Ónde puedes Ver Asturies?

Pues atopar la revista n’hoteles, restoranes, centros culturales, oficines de turismu...

4

Primavera en Castrillón y les sos árees recreatives

Llega la primavera, y el tiempu, cada vez más soleyeru y prestosu, convida a salir de casa y esfrutar del aire llibre, sobremanera dempués de tar una primavera cuasi entera zarraos en casa, va más o menos un añu. El cuerpu pide esfrutar otra vuelta de paisaxe, de naturaleza, d’una comidina nel prau (siempre respetando l’espaciu y les normes, claro).

Porque si a dalgo nos tán ayudando les restricciones de los últimos meses, ye a esfrutar de los pequeños detalles que nos regala’l nuesu entornu. En Castrillón esto nun ye nuevo, y siempres cuidó de ser un sitiu onde pasar una tarde perafayadiza respirando aire puro nes zones recreatives. Los llugares perfectos onde pasar estes tardes de fin de selmana cola familia o amigos.

Una d’eses árees ye’l pinar de Salinas. Esti área recreativa asítiase bien cerca de la sablera de Salinas, a l’altura del entamu de les dunes pero al otru llau de la carretera. Consta d’una zona de barbacoa y dellos de llugares de descansu, nos qu’hai instalaes meses de madera de picnic distribuyíes per gran parte del área recreativa a la solombra y ente l’arboleya, col envís de dar descansu y tranquilidá a los sos visitantes.

Podemos atopar una fonte pública con agua potable, contenedores de residuos, papeleres espardíes per tol recintu, y un hidratante pa casos d’incendios. Amás de toos estos servicios, esti área recreativa ye accesible pa persones con movilidá amenorgada. Ye importante reseñar que nesti espaciu natural repobláronse delles especies de flora autóctona.

Otra área recreativa bien prestosa ye la de los Pinos Altos. Esti área recreativa ta no alto d’un monte. Dende ella puede almirase tola llocalidá de Salinas y la so sablera. Cuenta con diferentes llugares de descansu, meses de

5

madera de picnic repartíes per gran parte del recintu y bancos. Tamién podemos atopar ehí un aparcaderu y un miradoriu onde esfrutar de les sos ablucantes vistes. Puede dise a pie, xubiendo pel senderu de la Costa Norte dende Arnáu o Salinas, o en coche.

N’otra zona, cercana a Piarnu, podemos atopar otra área recreativa interesante nel puntu más altu de la Sierra de Pulide. Como nun puede ser d’otra forma, la so llocalización tan privilexada, ufre unes increíbles panorámiques dende’l cordal a la costa, distinguiéndose más de la metá d’Asturies en díes claros, perfecto pa llenar de “likes” les semeyes de les tos redes sociales. Alcuéntrase arrodiada d’árboles que proporcionen solombra y frescor nel branu, dispón d’un ampliu aparcaderu, barbacoes, meses de picnic, fontes d’agua potable y zona de xuegos pa la reciella. Un espaciu perprestosu pa pasar el día en bona compañía.

Por último, nun podemos terminar esti artículu ensin mencionar Arnáu que, anque nun

ye un área recreativa “al usu”, ye una zona de descansu de fácil accesu y dotada de meses de picnic y bancos nel entornu de la sablera de Arnáu.

Una zona d’especial guapura paisaxística.

Cerca d’esti llugar atopamos el Muséu de la Mina d’Arnáu y la Sienda Costa Norte, polo que ye un llugar ideal pa conocer el nuesu patrimoniu industrial, o descansar y reponer fuercies pa continuar la ruta costera. Un espaciu singular y escepcional, onde esfrutar y pasar un día de desconexón del ruíu de la vida cotidiana.

Castrillón ufre delles y mui bones formes de pasar un día prestosu escapando del estrés. Ye difícil escoyer un sitiu que visitar. Igual ye meyor visitalos toos.

www.ayto-castrillon.es

6

El barriu de Sabugo: la primer gran urbe d’Avilés Avilés ye anguaño una ciudá cosmopolita, onde tenemos dende l’arte más modernu hasta la hestoria más antigua. Prueba d’ello ye la variedá de los sos barrios, que puede maraviyanos tanto cola elegancia de les artes más modernos o cola artesanía más interesante de los barrios más humildes.

Nesti últimu grupu podemos atopar el barriu de Sabugo, un barriu nel que la tradición ta na pesca y les vides xiren alredor de la mar. Y ye qu’esti barriu foi al entamu de la hestoria’l motor económicu de la bona villa d’Avilés hasta que la vida más urbana foi ganando protagonismu. Sicasí, son delles les ayalgues de la época más dorada del barriu qu’entá podemos atopar nel llugar.

El Mercáu d’Abastos d’Avilés conocíu tamién como “La Plaza”, sedría un bon exemplu d’ello. Asítiase ente los noyos orixinales de Sabugo y la Villa, y sirvió pa xunilos, ganado tarrén a les marismes. Esti mercáu presume de tener más de quinientos años de vida. Fueron los reis Sabel y Fernandu nel añu 1479, los que concedieron a Avilés un mercáu selmanal ensin impuestos. Esto asocedió por mor d’una fueu terrible que tuvo llugar en payares de 1478 y acabó con gran parte de la ciudá. D’esta forma, incentivaríase la so economía. De primeres esti mercáu realizábase nes cais de La Fruta, La Ferrería y del Sol. Les dos primeres deben el so nome a los productos que se vendíen ellí. Foi nel sieglu XIX cuando se construyó la plaza na que s’atopa’l mercáu, la

Plaza Hermanos Orbón, que xunió’l cascu históricu d’Avilés col barriu de Sabugo. De magar, esti mercáu selmanal vien realizándose cada llunes. A lo llargo de tou esti tiempu hubo momentos hestóricos bien complicaos, pero nengunu foi quien a facelu desapaecer.

Otra de les señes d’identidá del barriu ye la Ilesia Vieya de Sabugo que s’atopa nel centru del pueblu de pescadores, qu’anguaño ye la plaza del Carbayo d’Avilés. El templu d’estilu románicu, empezó a construyise nel sieglu XIII, nel que destaquen los trés arcos centrales de mediu puntu con guardapolvu y el llugar qu’ocupa la tribuna elevada gracies a l’amplitú que tien l’interior del templu. Na so fachada llateral podemos ver la “Mesa de los Amoriantes”, onde s’axuntaben los pescadores pa planiar les campañes de pesca na dómina medieval.

Esti templu tien la capacidá d’adaptase a la dómina y los acontecimientos que se-y atañen, dende ser el centru relixosu y civil del pueblu, llugar de xuntes y toma de decisiones, hasta convertise en 1985 en sucursal del Muséu del Prado de Madrid, con una esposición

7

de cuadros orixinales de Carreño Miranda. Esta Ilesia ye tamién un puntu d’espardimientu pa los avilesinos, yá qu’arrodia al cascu antiguu onde ta allugada.

Falando de museos, el Muséu d’Hestoria Urbana d’Avilés ye otru puntu d’esti barriu bien interesante pa tener en cuenta. Ta asitiáu dientro de lo que yera’l recintu llendáu por una muria del Avilés medieval, lo que se conocía como la Villa. Un muséu que plantega un percorríu bien orixinal, qu’entama enseñando na primer planta un ricu pasáu que se xune al presente pente medies d’un ventanal qu’ofrez al visitante la contemplación de la única obra creada na península pol gran arquitectu Oscar Niemeyer. Una visita que sigue na segunda planta mostrando l’esplendor d’una villa medieval con fueru concedíu por Alfonsu VI nel añu 1085, lo que xeneró una intensa actividá urbana n’Avilés. El percorríu termina amosándonos l’esplandor d’Avilés a finales del sieglu XIX y entamos del XX, ente los que destaquen la llegada de los “indianos”, los primeros mecenes y la creación d’ENSIDESA. Too esto ilustraos con modernos elementos interactivos nel que afondar nel conocimientu del ricu pasáu

de la ciudá d’Avilés. Un pasáu que, como vemos, debe-y muncho al barriu de Sabugo, que punxo la semiente afayadiza pa facer d’Avilés hestoria viva de la vida urbana n’Asturies.

aviles.es

8

Sobrescobiu, un paséu pela hestoria Pasiar pel conceyu de Sobrescobiu ye pasiar pela hestoria. Demientres sieglos y sieglos de civilización, fueron incontables los peregrinos, comerciantes, soldaos romanos y más que pasaron pel conceyu. Güei recomendámoste trés rutes milenaries que vas poder esfrutar anguaño.

Sienda El Torrexón La sienda El Torrexón ye una ruta curtia d’unos 3 quilómetros de llargor, que lleven cerca d’hora y media pa dir y tornar. La ruta debe’l so nome al Castiellu de Villamoréi (tamién nomáu castiellu de los Aceales). Esti castiellu, anguaño cuasi en ruines, construyóse va más de dos mil años na época romana y reconstruyólu nel sieglu VIII el rei Alfonsu I como puestu onde vixiliar la entrada y salida de comerciantes y pelegrinos. Trátase d’un

senderu bien cenciellu al que a la so metá podemos atopar el Miradoriu de Cuyacera, onde sedremos a esfrutar d’unes vistes ablucantes non namás al torrexón sinón tamién al valle Rusecu. Un miradoriu que cunta con una prestosa área recreativa con mesas y bancos onde descansar y comer un daqué, siempres y cuando dexemos too tal cual lo atopamos. A partir d’esti puntu, la ruta tórnase un pocoñín más peligrosa por mor de delles subíes bien pindies y partes demasiao artes que nun son nada recomendables pa la reciella. A partir d’equí podemos acceder a los muros valtaos del Torrexón y contemplar el paisaxe qu’una montonera de lexonarios y comerciantes romanos contemplaron va güei más de 2000 años.

Ruta de los Cabornos Ye la ruta más cenciella y recomendable pa guah.es de les trés que proponemos. Trátase d’una siendina de 1,7 quilómetros que mos llevará menos d’una hora de percorríu (unos 45 minutos aproximadamente). Esti camín to-

9

ma’l so nome porque nos ofrez la posibilidá de ver los cabornos qu’arrodien a Campiellos.

Los cabornos son unos castaños que se plantaren va sieglos pa producir castañes de meyor calidá pel valle del Nalón. Son unos árboles con tueros mui gruesos, engurriaos y afuracaos pol pasu del tiempu (munchos tienen más de dos mil años). A lo llargo de dellos años fueron la principal fonte d’alimentu de persones y animales. Dicen que les estrañes formes d’estos árboles inspiraren hestories mitolóxiques como les de los trasgos o los busgosos. Amás de la curiosidá hestórica de la sienda, el paisaxe ablucante, rematáu con un guapu miradoriu dende’l que sacar les meyores semeyes pa les nueses redes sociales. Amás, la ruta ye perafayadiza y podemos dir acompañaos de guah.es qu’esfruten esti paisaxe.

El camín d’Aceu La ruta del camín d’Aceu tien unos 6’5 quilómetros de llargor, que podemos percorrer nunes cuatro hores aproximadamente. Esta

ruta forma parte del Camín Real del Sellón, una vía milenaria que sirvió como sienda pal intercambiu comercial con Llión. Amás, mientres la Edá Media, servía tamién como una ruta al traviés de les montes que los pelegrinos percorríen pal Camín de Santiagu, que se dirixíen de pasu a la Ilesia de San Salvador (anguaño Catedral d’Uviéu) pa rendir cultu a les sos reliquies. En siguiendo les buelgues que dexaron toos estos pelegrinos y comerciantes, vamos poder ver grandes piedres de roca calizo colos que se construyíen este víes amás de les muries llaterales d’esta pindia cuesta.

Lo más guapo sedrá descendiendo pel senderu al Barrancu d’Anzó, onde vamos poder ver los tramos meyor conservaos del empedráu orixinal de la vía. Al final d’esta ruta espéranos una ablucante vista panorámica de los cordales al este de Sobrescobiu y de los cumes de la sierra del Crespón. Una mirada a Asturies dende los güeyos de los comerciantes, pelegrinos y mercaderes de va más de 2000 años.

www.ayto-sobrescobio.es

10

11

3 xardinos hestóricos LLABERINTU DEL PARQUE D’INVIERNU El llaberintu del Parque d’Iviernu d’Uviéu inauguróse va bien poco, nel añu 2010. Sicasí, yá ye una visita indispensable d’Uviéu. El llaberintu ta formáu por unos 650 lloreos y ta inspiráu nos diseños clásicos de los xardinos franceses. Un llaberintu d’unos 300 metros de caminos enrevesaos y 1000 metros cuadrados de superficie. Y cuidáu, qu’anque ye verdá que salir y entrar pel llabent¡rintu ye fácil, llegar al centru (y tornar) ye bien difícil. Nel centru espéranos un carrascu arrodiáu de cuatro bancos onde descansar d’andar perhí perdíos. Un llugar perprestosu onde perdese (lliteralmente) en metá d’un parque ideal pa dar un guapu paséu o facer deporte.

LA FONTE BAXA La Fonte Baxa ye un xardín perguapu que pertenez a José Rivera Larraya que podemos atopar en L.luarca, xestionáu agora pol Conceyu de Valdés. Ye un xardín al que podemos acceder al traviés de la Cai Peña o pel barriu la Pescadería. Aprovechando esta vuelta pela villa pesquera, podemos esfrutar tamién d’una guapa vista panorámica de L.luarca, que va asegúrate dellos “likes” nes tos redes sociales. Estos xardinos, qu’atopamos flanqueando les sableres de L.luarca, visualícense a la perfección dende’l Muelle Nuevu o dende la Capiella de l’Atalaya. Si t’apetez acceder a dalguna de les visites guiaes qu’ufre, vas atopar un xardín máxicu de 20 hectárees de llargor, arrodiáu d’azalees, redodendros, fayes, camelies, cedros, desmayos, araucaries, bambús… Too adornao con prestoses escultures, fontes, arcos y otros elementos ente los que destaca la pirámide camuflada ente’l verdor del prau. Un llugar pa sentise nel paraísu.

XARDÍN FRANCÉS El xardín francés foi una adquisición del Conceyu d’Avilés de gran parte del parque de los marqueses de Ferrera. Una adquisición qu’entamó cola so inauguración en 1976 y que pali que pali foi creciendo hasta que’l Conceyu foi a facese en 1988 col restu del xardín y fixo del palaciu un prestosu hotel de cinco estrelles. El xardín francés cunta con unos xardinos de 8000 metros cuadraos, ente los que destaca una zona central, con una xunión d’una plaza semicircular cerca del palaciu y otra circular. Nesta plaza circular podemos ver una fonte simétrica a la que ta al otru estremu d’una pérgola bien afayadiza. Y ye que pocos xardinos pueden presumir de ser escenariu d’una película de Woody Allen, o de dexar ablucada a Scarlett Johanson.

12

Ruta de les muyeres ribeseyanes El papel de la muyer na sociedá foi siempres perimporante anque silenciáu dende va sieglos. Nos últimos años, dellos espertos tán faciendo un trabayu impecable a la hora de recuperar y sacar a rellucir estes hestories de muyeres escaecíes magar de ser de vital importancia pal mundu. Nel Conceyu de Ribeseya, proponen, con esti fin, una ruta estensa, pero cenciella, amena y mui arriquecedora cola que poder reconocer y empoderar a la muyer na sociedá d’anguaño. Concretamente a la muyer ribeseyana, que cunta con una actividá sufrida y silenciosa y con un rol bien definíu hasta va poco. Por ello, el conceyu úfrenos 13 hestories llocalizaes en 13 puntos icónicos de Ribeseya, nos que la muyer tuvo un papel fundamental na evolución de la hestoria, la economía y, sobre too, la sociedá d’esta villa.

Caún d’esos 13 puntos van venir acompañaos de 13 hestories cola muyer y la llucha pola so visibilización como protagonistes. La primer parada, por exemplu, ye nel pódium del descensu del Seya. Ehí podremos conocer la hestoria de delles palistes que participaren demientres la so hestoria, entamando por Marta Junquera en 1932. Y ye que la participación de muyeres nesti campeonatu foi dellos años motivu de polémica, pero con cada participación, conseguíase dar un pasu alantre na normalización de la so participación nel descensu. Foi por fin nel añu 1964 cuando una muyer (Bernard del Centru de Natación Helios) xube al pódium. Cuatro años dempués, en 1968, María Jesús Cueto sedría la primera asturiana n’algamalo, xunto con Alfonso Martínez na so K2 mixta. Nesti puntu conoceremos la hestoria d’estes y delles muyeres más de la hestoria del descensu del Sella.

Otru de los puntos bien interesantes ye’l del paséu de los vencedores del Seya, que nesta

ruta ta dedicáu a la escritora riosellana Enriqueta González Rubín. Una muyer qu’escribió nun momentu nel que la situación de la muyer nel mundu llaboral nun yera nada fácil, y muncho menos nel sector de la lliteratura y nuna llingua, l’asturiana, que taba poco reconocida. Ente les sos obres destaca El Viaxe del tíu Pacho el Sordu a Uviedo, una hestoria que sirve como crítica social a cómo yera’l mundu naquella dómina del sieglu XIX, al traviés d’un humor y fina ironía que la caracterizó en delles obres de so, y de la que vamos poder conocer más detalles nesta guapa ruta.

Eso son namás que dos exemplos de les munches curiosidaes que’l conceyu de Ribeseya tien preparaos nesta ruta de les muyeres ribeseyanes. Otres muyeres que van homenaxase van ser la Marquesa d’Argüeyes (de quien se diz que morrió “h.arta de too”), les vendedores del mercáu d’Abastos, les trabayadores de les fabriques de conserves y salazones, les costureres, les modistes, les maestres rurales, les llabradores les ganaderes o les pescaderes.

Too esto nuna ruta perinteresante, y bien fácil de facer na que vamos percorrer Ribeseya demientres dos hores. Lo único que vas necesitar ye’l to móvil. Al traviés de l’aplicación “Ribadesella Guía Oficial”, que puedes descargar de la Play Store de Google o a través d’un código QR que te pueden facilitar na oficina d’información turística de Ribeseya. Ente les opciones d’esta APP, diendo a la opción de “Ruta de les Muyeres Riosellanes”, puedes ver la ruta a seguir, los puntos nos que vas poder parar y deprender les hestories d’estes grandes muyeres. Cuento con una audioguía que sentir dende’l to teléfonu que va contate, por fin, estos rellatos que lleven demasiaos años silenciaos.

www.ayto-ribadesella.es

13

14

Casa Alicia Av. del Mar, 2 - Piedrasblancas Teléfonu: 985 531 072

Sidrería Montera - Casa Güela Cai la Unión, 1 - Avilés Teléfonu: 985 579 402

El Pintu Cai La Llibertá, 11 - La Pola Llaviana Teléfonu: 984 045 505

Chigre’l Corquiéu Plaza Sta.Ana, 12 - Ribeseya Teléfonu: 670 43 19 73

Xintar per Asturies Sidrería Carroceu Cai Marqueses de Argüelles, 23 - Ribeseya Teléfonu: 985 861 419

15

Merenderu de Anzó Anzó, s/n - Sobrescobiu Teléfonu: 985 609 215

Merenderu Molino del Alba Soto, s/n - Sobrescobiu Teléfonu: 985 609 017

La Puerta de Arrobio Anzó, s/n - Sobrescobiu Teléfonu: 985 609 310

El Tostón de Jon Plaza Carbayo, 5 - Avilés Teléfonu: 984 398 682

Los meyores chigres El Pañol Plaza Carbayo, 1 - Avilés Teléfonu: 687 545 676

16

L’orixe de les espiches Dempués de yá más d’un añu con esta situación que mos tien alloriaos cada vegada echamos más coses de menos: los viaxes, les xuntes, salir a cenar, a pasiar pela nueche… y cómo non, les folixes. Cola época de les espiches entamando estos meses, y con yá más d’un añu ensin folixes de prau, tamos naguando por volver a echanos un culín bien fresquín. Pero, ¿sabes cuálu ye’l orixe de les espiches?

La tradición de la espicha tien delles curiosidaes yá dende’l so nome: “espicha”, que too paez indicar que provién de la pallabra “espiche”, un artiluxu de madera que cierra el furacu pequeñu de los toneles. Con esti artiluxu, nun abrimos namás qu’esi primer tonel de sidra, sinón tamién el primer culín de sidra del añu. L’espiche ye l’últimu pasu que’l llíquidu del país da enantes de llegar al nuesu gargüelu. Y ta nidio qu’esi últimu pasu ye motivu más que de sobra pa una bona celebración. Y ye que, ¿qué nun ye motivo de celebración no que se refier a la sidra?

Cuando la sidra almacenao na pipa formienta, hai qu’acorchalo en botelles pa que nun avinagre. Pero enantes d’eso, invítase a que preben a aquellos que collaboraren mayando la mazana demientres la seronda. Asina, son los propios mayadores los que van tener el privilexu de saborgiar la primer sidra del añu, recién salío del tonel. Esta prestosa invitación nun puede facese n’otru momentu. La razón d’esto ye que’l tonel tien de tar enllenu hasta que se corche o, en casu contrariu, hasta que pare de ferver y s’afuegue, perdiéndose la sidra.

17

Según la tradición la espicha tien llugar na primavera y suel facese pela nueche, una vegada terminaos los llabores del día, y ye ocasión de folixa y de xuntase colos collacios y collacies del pueblu.

Col tiempu, la espicha estendióse a les ciudaes, adaptándo, lóxicamente, a les circunstancies d’estes: faciéndose nun chigre, nun llagar, o al aire llibre. Equí la pipa nun se “espicha” propiamente nel sentíu orixinariu, pero la pallabra quedó pa siempres.

Al final, la espicha convirtióse poco a poco nun elementu cume de les tradiciones sidreres asturianes que, anque nun sabemos con esactitú en qué momentu la sidra lleva siendo parte de nós, sí que sabemos de xuru que trescaló na cultura asturiana de munches maneres dende va sieglos. Y ye precisamente la presencia protagonista de la bebida, una de les razones de que la espicha seya una tradición tan importante.

Otra razón ye que se trata d’una fiesta comunal, una característica indispensable nel ceremonial lúdicu asturianu. Como amuesa clara tenemos les folixes de prau, l’amagüestu, la danza prima, y les propies espiches. Celebrar en grupu ye, ensin dulda, un plus pa cualquier folixa de carácter asturianu.

Y por último nun hai qu’escaecer tamién el significáu que conlleva la propia espicha: el “bautizu” d’una nueva añada de sidra. Tornar a salir, a beber, a reatopase colos vieyos amigos, a pásalo bien y escaecer tolo malo.

Volver a esfrutar. Por eso esti añu les espiches caltienen, más que nunca, esi significáu tan especial.

“La pallabra provién del actu d’abrir un tonel”

18

Asturies tamién foi urbana III Dexando atrás nel capítulu anterior la vida de los aristócrates, nesta edición vamos falar de les demás clases sociales que taben presentes na Asturies urbana nel sieglu XX.

Les clases medies Los profesionales nun abondaben en número, pero teníen muncha fama. Los médicos conocíen mui bien a los pacientes del barriu, colos que teníen munchu tratu, porque lo corriente yera que ya lu conociera’l so pá, médicu tamién. Siguíen estes profesiones families enteres: habíales d’abogaos, de médicos, d’inxenieros, de notarios… Los profesionales técnicos –peritos, oficiales de primera…- yeren con frecuencia estranxeros: les empreses trayíenlos de fuera porque teníen conocimientos más adelantaos y podíen aplicar nes industries asturianes técniques y máquines desconocíes polos asturianos.

Los profesionales artesanos cotizábense abondo y ganaben bien la vida, pero trabayando muncho. Habíalos de confección, madreñeros, ebanistes, zapateros… Munchos trabayaben en casa o directamente nes finques de los ricos, fechu qu’orixinaba una economía somorguiada mui floreciente.

Nos barrios yera corriente que los mercadiantes, con negocios que pasaben de padres a fíos, vendieren muncho de fiao; almitíen esta forma de pagu porque, a la llarga, cobraben siempres; a los ricos servíen-yos a domiciliu. De la que terminó la Guerra Civil, dellos comerciantes quixeron más pesllar les tiendes porque teníen tola mercancía requisao.

Les clases populares La clas obrera fórmase despaciosamente alredor de les mines y les fábriques, y adáptase a les esixencies de la producción capitalista. Per décades pervive l’obreru mistu, metá agricultor y metá obreru o mineru.

Munches vegaes les persones de clas media asalariada de la industria, ensin rellación coles mines, acumulábense en Xixón, n’Avilés –en menor númberu- y na rodiada d’Uviéu.

Los obreros especializaos nun llabor cooncretu y técnicu distinguíense bien del restu por cobrar meyores xornales y por tener trabayu en tolos tiempos, anque fueren difíciles. Asina, les sos condiciones de vida yeren bones, teníen mayor poder adquisitivu y viviendes más grandes.

Toles families obreres teníen nomatos, orixinaos los más d’ellos pa llamar a miembros antiguos de la mesma, que los llevaren tola vida y que perpetuaren nos sos descendientes. Había nomatos referíos a la personalidá del individuu (“Xuan el Benditu”), a característiques de la so fisonomía (“El Ferre”, por tener la nariz grande), al so llugar de procedencia (“Pepín de Migaina”)… Identificaben, asina, a cuálu de los “Pepes”, “Manolos”, “Xuacos”, “Xuaneses”, etc., se referiría l’interlocutor nuna conversación.

19

Lo más baxo na clas social popular yeren los obreros probes, ensin oficiu, que nun teníen trabayu fixu; andaben d’unos sitios pa otros buscando trabayu y llegaben delles vegaes a llimosinar. Los más desgraciaos acababen peles esquines, comiendo na Cocina Económica, dormiendo pelos portales y dalgunos robando; esta situación foi más corriente después de la Guerra Civil.

El cleru Los fios de les families de les clases sociales menos favorecíes nun tuvieron, demientres munchu tiempu, más manera de facer estudios que metiéndose a cures, anque ésti yera más un vezu de los pueblos. Por aciu del cura de la parroquia, munchos padres metíen nel Seminariu a los rapacinos, bien ceo y ensin tener tiempo nin maurez pa saber si sentíen o non vocación relixosa.

Son mui antiguos el resalbiu y les crítiques prevocaos polos cures ente la xente corriente, que duldaba siempre de la bondá, de la castidá y de la honradez de los cléricos. Demientres munchu tiempu cobraron polo oficios, casorios, funerales y bautizos que celebraben; había siempre malpensaos que creyíen que los beneficios nun diben pal mantenimientu de la ilesia parroquial, sinón pal bolsu del cura.

Nos tiempos de la posguerra, el cleru tenía munchu poder, inclusive los cures de los barrios yeren trataos con respetu pola xente que, anque los criticaba per detrás, nun quería tar a mal con ellos, porque munchos documentos personales necesarios – papeles de boda, de fallecimientu, etc…- teníen de llevar la firma del cura de la parroquia pa que tuvieren validez.

20

Xixón Tours presenta más hestories interesantes Tres el bon recibimientu d’esta actividá que cumple yá tres años, torna XixónTours, dempués del parón del pasáu iviernu obligáu pola crisis del andanciu del coronavirus. Esti ciclu de visites guiaes temátiques n’asturianu que van ufrise al públicu a lo llargo de los meses del branu prepara yá delles rutes distintes. La “maestra de ceremonies” sedrá otra vuelta la hestoriadora Arantxa Margolles cola que vamos percorrer dellos requexos de Xixón en busca de les hestories más peculiares qu’arrodien esta ciudá. Anque tamién habrá incorporaciones nueves.

Una de les rutes temátiques que vamos poder esfrutar ye la de Xixón, y les traxedies de la mar: Un percorríu peles traxedies más desconocíes que vivió la ciudá de Xixón mientres la última metá del sieglu XIX y la primera del XX. Una ruta que va llevamos dende’l Muséu del Ferrocarril, hasta’l Campu Valdés, pasando pela Antigua Rula, na que vamos conocer casos de naufraxos mientres la Primer Guerra Mundial, les lleendes del Reina Regente, xoya de la marina española y hasta barcos pantasma, como ye’l casu del Mary Celeste, un barcu qu’inicia les llendes y cuentos de barcos pantasma que dempués apaecen nel cine.

Otra ruta temática bien prestosa va ser la del Xixón golfu. Una ruta na que vamos conocer tou tipu de golfos: Dende los golfos que la so razón pa facer el crime nun yera más que la maldá pura, hasta aquellos bandoleros pa los que’l so crime ye una marca

de rebeldía y anarquismu pol que llegaron hasta namorar a munches moces, pasando inclusive per aquellos golfos qu’acaben dando hasta pena magar de l’atrocidá del crime. Un camín per esti Xixón tan golfu que saldrá de la Plaza del seis d’agostu, hasta acabar na cai Institutu, pasando per sitios emblemáticos de Xixón como la Cai Corrida o la Plaza’l Parchís.

En XixónTours tamién vamos tener la posibilidá de conocer una época del país tan llamativa y escura como escalofriante: la etapa de la Inquisición. Una época de caza de bruxes lliteral en que non poques inocentes fueren “axusticiaes” ensin piedá.

Lloñe d’idealizar nenguna de les dos partes, Arantxa contará lo que fueron (o nun fueron) estes muyeres acusaes d’herexía o bruxería. Vamos conocer la xusticia o la inxusticia cola que se trató a estes muyeres nesta época tenebrosa, onde la diferencia

21

ente arrepentimientu y herexía podía ser la diferencia ente la vida y la muerte. N’Asturies fueron dos les hestories de muyeres xulgaes como bruxes pola inquisición que vamos conocer nesta ruta temática.

XixónTours ye una iniciativa pa dar a conocer la ciudá de Xixón a los propios habitantes del conceyu y a los asturianos y asturianes en xeneral, asina como a cualesquier persona que viniendo d’otros llugares quieran averase a conocer distintos aspectos de la mesma sintiendo la visita n’asturianu. Son rutes diseñaes pa buscar un averamientu orixinal a la hestoria de la ciudá, tratando de da-y un enfoque diferente que llame l’atención del públicu xeneral y n’especial de los y les xixoneses, que yá conociendo los llugares que van visitar, pa que puedan ver aspectos estremaos o desconocíos pa ellos.

22

Cerámica n’Asturies

CERÁMICA DE FARO Faro pertenez a la parroquia uvieina de Llimanes. Ye conocíu pol so pasáu alfareru, y el so orixe establezse enantes del sieglu XI. Mientres munchos años los sos habitantes vivieron de la fabricación de tou tipu d’oxetos de barru. En Faro producen dos tipos de cerámica, una de color escuru, característica na zona norte de la península pola mor del métodu de cocción que s’utiliza. Esti tipu de pieces suelen fabricase pa usu domésticu, exemplu d’elles son el barbón, la penada o la zapica de sidra. Per otru llau, ta la cerámica esmaltao en blancu y con decoraciones coloríes de formes xeométriques y naturalistes. Son característicos los botiyos y la páxara, un símbolu rellacionáu cola fertilidá. Anguaño los vecinos de Faro traten de que la tradición nun se pierda fabricando productos rellacionaos cola construcción.

23

CERÁMICA DE MIRANDA L’orixe de la cerámica mirandesa asitiase nos sieglos X y XI. Esti datu pudo conocese por aciu investigaciones arqueolóxiques onde s’atoparon restos de formes alfareres tradicionales con munchos años d’antigüedá. A principios del sieglu XX tuvo a poques d’escastase pol abandonu de los talleres y l’emigración de la dómina. Nel añu 1975 la producción artesanal recuperóse cola apertura de la Escuela de Cerámica de Miranda. Son característicos los instrumentos fabricaos pa guardar el “mecigayu del San Martín” o la matanza del gochu, amás de toneles, que s’usaben como recipiente pa llevar l’agua de casa a la fonte y adornos pa l’arquitectura rural, como florones o remates p’asitiar nos horros.

CERÁMICA DE L.LAMAS DE MOURU L.lamas de Mouru ye l’únicu llugar del occidente d’Asturies nel que se sigue ellaborando la cerámica negro, característica pol so color y rellumos metálicos. El so periodu de rellumanza foi alredor de los años 30 y caltúvose mientres los años por cuenta del esfuerciu de los sos habitantes.

Esta tradición foi tresmitiéndose y arriqueciéndose de xeneración en xeneración. Esta cerámica nun ye apreciada namás pola so guapura, yelo tamién pola so resistencia y capacidá de caltenimientu d’alimentos. El color negru característicu consíguese tapando dafechu los fornos por que’l fumu enfuse nel barru y vuélvase de color negru. Les formes más tradicionales son el cántaru o xaru d’agua, la olla, la escudiella, (el tradicional concu que s’usa pa comer), o’l porrón.

24

15 años de xeneración Formientu Formientu ñació n’ochobre de 2006 en Xixón y esti añu tán peculiar fai 15 años. Mientres esti tiempu salieron a la lluz 18 ediciones. De primeres, publicábense dos númberos añales más curtios y foi evolucionando hasta l’actualidá, onde s’espubliza un númberu al añu, complementáu pola versión dixital, Formientu.com.

Foi fundada por Inaciu Galán y Bexa Pérez.

El primeru foi director dende’l primer númberu hasta l’añu 2017, cuando na VII Xunta d’Escritores Asturianos presento’l númberu especial editáu pal eventu. Dende entós son codirectores Diego Solís y Claudia Elena Menéndez.

La trayectoria de Formientu va dende la presentación de la xeneración nueva de les lletres asturianes hasta la última edición dixital, #FormientuenCasaFest, el pasáu mes de marzu de 2020, coincidiendo col confinamientu por cuenta de la crisis sanitaria.

“La revista de lliteratura mui moza” como bien apaez nel sotítulu de la mesma, ñació coles mires d’afalar la continuidá de la lliteratura n’asturianu, xenerando en cada númberu una escoyeta de les estremaes tendencies lliteraries. Gracies a la publicación de la revista dio visibilidá mientres munchos años a los y les escritores mozos, qu’apurrieron novedá, calidá y puxu al panorama lliterariu.

Amás, en cada exemplar, apaecen imáxenes ya ilustraciones de distintos artistes asturianos cola finalidá da-yos visibilidá al traviés d’esti mediu. Na parte posterior inclúise una pequeña biografía d’estes persones pa que los llectores puedan conocer ya interesase pol so trabayu.

25

Defínese como “mui moza” gracies a que tolos participantes son futures promeses qu’afaen cada númberu a los enclinos lliterarios que se siguen na actualidá, esto fai que la so temática nun s’enllancara nos 15 años que lleven, tocando temes erótiques, tradicionales o de momentos de la hestoria d’Asturies, ente otros.

Amás de la so presencia física, Formientu ta presente na rede con una páxina web que, dende 2007, contién la última actualidá de la lliteratura asturiana. Nella pue atopase conteníu variáu sobre la revista, noticies rellacionaes o anuncies sobre los distintos puntos de venta nos que puede mercase en formatu físicu.

Va un añu, en plenu confinamientu, fueron quien a entamar un de los festivales más llargos y completos de tolos que se fixeron mientres el confinamientu n’Europa. #FormientuEnCasaFest, el nome que-y dio vida

al festival, consiguió atropar más de 100.000 visualizaciones ente les 62 actividaes entamaes, onde participaron 26 muyeres y 34 homes de toles xeneraciones, siempres con una gran presencia de la mocedá. Mientres los dos meses que duró, tuvieron llugar conciertos, charres y dellos recitales, ente otres actividaes que quixeron representar tolos territorios onde se fala la nuesa llingua, de les que resultaron ganes más de 1.500 siguidores nuevos nel perfil de la organización, dende onde se retresmitió’l festival íntegru.

Tres esta esperiencia onde s’amontó la presencia lliteraria nes redes, Formientu asoleya un númberu nuevu nel que se recueye parte de la esperiencia del #FormientuEnCasaFest, y yá ta nes llibreríes.

“Nació coles mires d’afalar la continuidá de la lliteratura n’asturianu”

26

27

Ana Francisco “Prestaríame pola vida ser testigu de la prehestoria d’Asturies” Ana Francisco ye presentadora del concursu El Picu (TPA) y reportera del programa Todo es mentira (Cuatro), que presenta Risto Mejide. Con ella siguimos descubriendo Asturies.

Un llugar pa perdese una fin de selmana…

Taramundi.

Un llugar pa vivir…

Llanera o Candamu.

Un muséu pa recomendar…

Ye un muséu natural, Tito Bustillo y tampoco ye un muséu, pero tol mundu habría visitar el Pozu Sotón.

Un postre…

Tarta de quesu.

Un momentu de la hestoria d’Asturies que te prestaría vivir…

Prestaríame pola vida ser testigu de la prehestoria d’Asturies, poder observar a los neandertales del Sidrón, o tar presente mientres se pintaben la cueva de la Peña o’l Pindal.

Una playa pa pasar el día…

La playa del silenciu o Gavieiru, en Cuideiru.

Un baille pa pasalo bien…

Cualesquier nuna fiesta de prau con amigos.

Un pueblín que nun podemos dexar de ver…

Tazones.

Una pallabra n’asturianu que te preste…

Caparina.

Un chigre pa tomar unos culinos…

La Llera, en Posada, Llanera.

Una tradición que nun pue perdese…

L’enramáu de la fonte, les alfombres florales, el filandón...

Un platu…

Cebolles rellenes.

Un parque natural pa visitar…

Parque Natural de Ponga Una fiesta a la que nun faltar…

Los Esconxuraos.

Una espresión n’asturianu que te preste... ¿Qué, qué, ho?.

28

Empanada d’atún Ingredientes: -2 planches d’hoxaldre redondes o rectangulares -½ quilu de cebolles -350 g d’atún (recudío) -4 cuyaraes de tomate frito -Pimentón duce -Güevu cocíu (opcional) -Pimienta -Sal

Ellaboración: Pa preparar el rellenu de la empanada picamos la cebolla en brunoise y sofrímoslo hasta que se dore. Añadimos una cuyarada de pimentón duce y removemos. Dempués incorporamos l’atún y el mueyu de tomate.

Ye opcional añadir un par de güevos picaos al rellenu para da-y un toque deliciosu. A lo último, retirámoslo del fueu y esmucimos l’aceite sobrante.

Pa montar la empanada, espurrimos una plancha d’hoxaldre col rodiellu y forramos la bandexa del fornu con papel pa que nun s’apegue a ella. De siguío, distribuyimos el rellenu percima dexando alredor de 1’5 centímetros d’hoxaldre ensin rellenu. Asitiamos la otra placa enriba y adornámosla. A lo último, píntase con yema de güevu batío y enfórnase a 200º mientres 30-35 minutos.

29

Y si nun tienes paciencia pa facela...

Aldeastur Av. Prudencio González, 7 - Posada - 985 770 361

La Casa de las Empanadas Cai Saavedra, 15 - Xixón - 984 490 643

Sabropan Cai Manso, 16 - Xixón

La Forna - 985 601 133 Plaza Armando Palacio Valdés, 2 - La Pola Llaviana

30

31

Procesión de Ramos nel Barriu de Sabugo. Fonte: Memoria Dixital de Asturies

32

Les escursiones de Vero Suari La Ribeseya prehestórica, marinera y rural Ribeseya ye un mecigayu perfectu de mar y montes, hestoria y gastronomía, y aunque tolo qu’ufre nun ye abarcable nun solu día, güei vamos esfrutar de la so villa principal y de les ayalgues que tien al so alredor como la Cuevona de Cueves, los molinos de la Riega de Tresmonte, la cueva Tito Bustillo (El Pozu’l Ramu, nel so nome tradicional) o’l Desfiladeru d’Entrepeñes.

Entamamos la xornada nel prestosu pueblu de Cueves, asitiáu a unos 7 quilómetros de la villa de Ribeseya, onde cruzaremos la so famosa Cuevona pa llegar al pueblu, puntu d’iniciu de la ruta.

Anque la Cuevona pue cruciase en coche lo más recomendable ye dexalu nel aparcamientu habilitáu enantes d’esta y cruciar caminando los 300 metros de llargor que tien esti guapu sistema kársticu, mientres intentamos atopar a la so habitante más famosa, una sacavera ciega, autóctona de la propia cueva, que pola mor del tránsitu humanu ye bastante dificil d’atopar.

Hasta Cueves, podemos tamién llegar caminando desde la villa de Ribeseya o garrando la FEVE, yá que tien apeaderu. Namás entrar al pueblu vemos el panel indicativu del PR AS 58.1 onde entama la ruta. Cruciamos tol pueblu y mientres un cachu de la sienda va acompañanos el ríu Seya qu’abandonaremos pa entrar nuna bucólica viesca enllena de castaños y carrascos per onde discurre la Riega de Tresmonte chiscada por 6 molinos a lo llargo la sienda, dalgunos mui bien conservaos que podremos visitar per dientro y otros en ruines.

Nesti puntu podemos volver a Cueves pel mesmu camín y finalizar la ruta o siguir unos 500 metros más hasta’l pueblu de Tresmonte, al que llegaremos depués de xubir una cuesta pindia pero curtia. Esti pueblu güei cuenta con namás una casa habitada, y ye famosu por ser la cuna de Manuel Fernandez Juncos, periodista y poeta, defensor del idioma castellanu en Puertu Ricu énte l’avance de la llingua inglesa, asina como de la llibertá de prensa.

La vuelta pue facese desfaciendo el camín percorríu per La Riega de Tresmonte o xubiendo la carretera hasta’l Monte Moru, anque pa dir más descansáu ye recomendable facer la primer opción.

Tres acabar la ruta, si quedamos con gana de más conocencia podemos dirixinos hacia la villa de Ribeseya pa visitar el Centru d’Arte Rupestre Tito Bustillo, onde pue visitase una recreación de la cueva Tito Bustillo o la propia Cueva orixinal. Ye mui importante tener les entraes compraes con antelación de díes o hasta selmanes, dependiendo de la epoca del añu, sobre too pa visitar la cueva, yá que ye una de les cueves d’arte paleoliticu más importante d’ Europa, polo que necesita planificación previa la so visita, siendo actual-

33

mente’l máximu en grupos de 6 persones pola situación pandémica.

Dende l’iniciu hasta la sala de pintures el percorríu ye d’unos 500 metros y la duración de la visita suele estimase nunos 70 minutos.

La cueva ye Patrimoniu de la Humanidá dende l’añu 2008.

Podemos perdenos tamién pela villa y xubir a la ermita de La Guía caminando, pa esfrutar les vistes del Cantabricu, el puertu, la guapa sablera de Santa Marina chiscada de vistoses cases d’indianos per tol paseu y al fondu los Picos d’Europa. Dende’l puertu son unos 20 minutos de camin pindiu que paga la pena namás pol paisaxe que se pue contemplar.

Yá enriba veremos la ermita de La Guía, d’estilu renacentista, cola virxe nel so interior y una barca na mano, pues cuenta la lleenda qu’esta foi atopada nuna llancha gobernad por una palomba, asina como precioses maquetes de barcos nes paredes, yá que nun hai qu’escaecer que ye la patrona de los marineros.

Los 3 cañones que protexen la ermita formen parte de la hestoria de la villa, usáronse pa defendela na invasión napoleónica y fue-

ron echamos a la mar polos franceses tres la retirada de les tropes. Fueron recuperaos del fondu y restituyíos nesti emplazamientu nel añu 1999.

Y si entovía nos queden fuercies, en malapenes 6 quilómetros dende la villa podemos acabar la xornada nel Desfiladeru d’Entrepeñes.

Vero encamienta Al tratase de una ruta a la vera’l ríu, lo meyor ye dir con botes de monte o playeros impermeables, yá qu’a ratos el senderu podemos atopalu enllenu folla. Per otru llau, nun cuenta con fontes pel camín.

Característiques de la ruta Cueves - Tresmonte - Cueves Percorríu: llinial (dir y tornar) Distancia total: 12 kms aproximadamente Dificultá: Baxa Tiempu: 4 hores (incluyida parada pa xintar)

34

35

Mio güela: Syra Mio güela Syra yera una güela ensin edá. La so partida nacimientu perdióse na Guerra Civil y esto aprovechólo ella pa quitase dalgún añu cuando volvió a arreglar los sos documentos.

Nun se m’olvida cuando-y pregunté cuántos años tenía y nos castigó a min y al mio primu.

Preguntar eso yera de mui mala educación.

Nacida en Bo (Ayer), yera fía d’un mineru que morrió por una esplosión de grisú, y de los trés hermanos tocó-y a ella dir pal Orfanatu Mineru d’Uviéu y ellí se crió. Cuando tenía 9 años, hubo un tirotéu nel orfanatu y ella, cola curiosidá y la inocencia d’una cría, foi a asomase a una ventana pa ver qué pasaba y travesó-y l’hombru una bala. Sangraba tantísimo que quedó inconsciente y les demás críes dieronla por muerta y ellí la dexaron envuelta nuna manta. Pero al pasar un ratu, un soldáu diose cuenta que siguía viva y lleváronla al hospital, onde la salvaron. Aquello pienso que yera una seña de les inmenses ganes de vivir que tenía, y que bien demostró dempués.

Enantes de casase y afincase en Les Arriondes vivía n’Uviéu, donde trabayaba como secretaria de la Xefatura Provincial de Mines.

Daquella diba col Real Uviéu a tolos parti-

dos, siempre-y gustó correr muncho. Dempués de criar a cinco fíos fueron frecuentes les escursiones pel monte col mio güelu Alberto, les escapaes cola coral, y colos demás conxuntos nos que taba metida. Fe d’esto danlo les semeyes, qu’hai como pa empapelar toa Asturies, porque ella desde bien xoven diba a tolos llaos cola máquina de fotos y dexaba costancia de toles sos andadures y de la xente que la arrodiaba. ¡Y lo bien que posaba! A presumida yera difícil ganala.

Nel añu 2010 diéron-y el Premiu Fayuela de Les Arriondes por “dedicar una vida a los demás”, reconociendo’l so llabor na vida social y cultural del conceyu: foi una de les fundadores de la Coral Cima de Parres, pionera nel asociacionismu d’ames de casa, presidenta de l’asociación de donantes de sangre y ayudaba tamién na ilesia. Una cabecina inquieta y con ganes siempres de deprender y de ver más.

Echo de menos les sos hestories (tuvo una memoria ablucante hasta l’últimu día), la so risa y bon humor y hasta’l colacao con zucre que me preparaba la mañana de Les Piragües, qu’anque me repunaba tan dulce, sentábame lo bien que sienta tolo que te da’l ciñu d’una güela.

Alejandra González

36

3 rutes pa perdese por Asturies Ruta del Camín Encantáu (Valle d’Ardisana, Llanes)

Trátase d’una ruta circular d’alredor de 9 quilómetros de llargor nel oriente d’Asturies, en concretu, nel conceyu de Llanes y percuerre distintos pueblos dientro del Valle de Ardisana. El puntu de partida ye’l pueblu de La Venta. A lo llargo del percorríu atópense distintes figures de personaxes de la mitoloxía asturiana realizaes pol escultor Pedro Bueno.

Toles figures tienen un cartelu onde puede lleese’l so nome y hestoria. Dalgunos de los personaxes que pueden vese son: el Nuberu, rei de les agües y de les nubes; el Cuélebre, curiador d’ayalgues y princeses; el Busgosu, guardián de los montes o’l Diañu Burllón.

Ruta del Canal del Texu (Poncebos, Cabrales)

La ruta empieza nel pueblu de Poncebos y tien unu llargor d’apenes 4 quilómetros. La Canal del Texu ye un impresionante escobiu formáu por un antiguu glaciar que partía de la base del Picu Urriellu hasta llegar Poncebos. Termina nel pueblu de Bulnes, en plenu corazón de Los Picos d’Europa, l’únicu pueblu d’Asturies al que puedes llegar al traviés d’un tren cremallera.

Per aciu esta ruta, puede llegase a Bulnes d’una forma más tradicional tal como lo facíen mientres numberosos años los sos habitantes. Dende’l mirador de Bulnes, puede esfrutase d’unes espectaculares vistes del Picu Urriellu.

37

Ruta de les Xanes (Villanueva, Santu Adrianu)

Atópase nel conceyu de Santu Adrianu, en concretu cerca del pueblu de Villanueva. Dende l’área recreativa El Molín de Les Xanes, empieza la ruta con alredor de 7 quilómetros de percorríu incluyendo día y vuelta. Trescurre per un escobiu que fai que delles persones se refieran a ella como “el pequeñu Cares” yá que ye una versión amenorgada d’esta otra famosa ruta. Una vegada termináu’l trayectu pel escobiu, trescurre per un senderu arrodiáu de gran vexetación y frondosos árboles siguiendo siempres el percorríu del regueru de les Xanes. Esta ruta termina al llegar a la ermita de San Antonio de Padua y a partir d’ende, puede faese la vuelta al puntu d’orixe siguiendo’l mesmu percorríu o tomando la sienda de Valdolayes.

Restaurante Contamos Contigo Ardisana, s/n - Llanes Teléfonu: 985 925 609

Mesón Las Cuevas Ardisana, s/n - Llanes Teléfonu: 985 404 723

Sidrería Moreno Carr. General, 3 - Benia (Onís) Teléfonu: 985 844 007

¿Qué sabes de la naturaleza asturiana?

En ViaxAst y VerAsturies.com enseñámoste muncho sobre la naturaleza asturiana.

Pero, ¿quedes cola información? Vamos ponete a prueba...

1.¿Qué ye una pumarada? a) Un conxuntu de perales b) Un conxuntu de texos c) Un conxuntu de mazanales d) Un conxuntu d’ablanos

2. ¿Cuála ye la pareya d’animales más famosa d’Asturies?

6. Na zona central d’Asturies los árboles autóctonos que más abunden son: a) Fayes b) Bidules c) Pumares d) Castaños

7. ¿Cómo se llama n’asturianu a la cría del xabaril?

a) Pin y Pon b) Paca y Tola c) Paca y Xuan d) Xurde y Tola

a) Xatu b) Rayón c) Xabatu d) Xabalín

3. ¿Qué frutu envolubra’l carrapiellu?

8. ¿De qué árbol se saca’l nataliegu que se quema n’Asturies na Nuechebona?

4. ¿Cuálu foi’l primer parque natural d’Asturies? a) Parque Natural de Redes b) Parque Natural de los Picos d’Europa c) Parque Natural de Somiedu d) Parque Natural de Ponga

5. Cuando sientes cantar per primera vegada nel añu al cuquiellu... a) ...hai que tener dineru en bolsu pa tener bona suerte b) ...hai que pegar un saltu pa tener bona suerte c) ...hai que tocar el prau pa tener bona suerte d) ...hai qu’asonsañar el so cantar pa tener bona suerte

a) Ablanu b) Nogal c) Cerezal d) Carbayu

9. ¿Qué nome recibe en castellán el raitán? a) Golondrina b) Pez de ría c) Petirrojo d) Ratón común

10. ¿Qué se conoz como “campanu”? a) Al primer bonitu que se pesca b) Al primer salmón que se pesca c) Al primer pixín que se pesca d) Al primer besugu que se pesca

Respuesta correctres: 1c / 2b/ 3c/ 4b/ 5a/ 6a/ 7b/ 8d/ 9c/ 10b

a) Castaña b) Nuez c) Ablana d) Pistachu

39

40