Göngubók UMFÍ er afrakstur vinnu umhverfisnefndar UMFÍ sem vildi í samræmi við stefnu UMFÍ auka þekkingu fólks á landinu og kynna fólk fyrir umhverfinu svo það fari betur með náttúruna og læri að umgangast hana.
Fyrsta göngubókin kom út sumarið 2002 og innihélt hún 144 stuttar gönguleiðir víða um land. Nýjasta eintak Göngubókar UMFÍ inniheldur lýsingar á 282 stuttum gönguleiðum fyrir alla fjölskylduna ásamt 10 gönguleiðum á fjöll. Göngubókinni er ætlað að hvetja fólk til útiveru og hreyfingar og vekja athygli á gönguleiðum ásamt því að hvetja til samveru fjölskyldunnar.
Göngubók UMFÍ 2019 er unnin í samstarfi við göngu- og útivistargarpinn Einar Skúlason, höfund gönguappsins Wapp. Í bókinni eru heilmiklar upplýsingar um Wappið og ítarlegar lýsingar á gönguleiðum.
