Wettkampf
Regionalmeisterschaften in Wald
5
Samstig, 22. November 2014, s isch kurz nochm Mittag gsi, wo sich die zwei Mannschaftä vo Rappi-Jona in Wald zu de diesjährigä Regionalwettkämpf troffä händ. Leider sind mir das Jahr nur gad mit einerä Herrämannschaft und einerä Plauschmannschaft verträtä gsi. Was biz schad gsi isch. Aber es isch super gsi mit allnä, wo debi gsi sind. Marco, dankä dir vill mal, dass du als Funktionär für üs mitcho bisch und eus somit de Start a de Regio ermöglicht häsch. Au es dankä ad Patricia, wo kurzfristig als Mannschaftleiterin igsprungä isch. Noch dä Funktionär- und Mannschaftleitersitzig ischs den am 13.30 Uhr losgangä mit de erstä Disziplin. Was eus sehr gfroit hät, das a de Fensterfront doch eher sehr warm gsi isch. ;-) Im zweitä Lauf sind den eusi Herrä, vertrettä dur de Patrick G, de Simon, d Yvonne, de Patrick C. und de Andreas, zum Isatz cho. De achti und letschi Lauf isch unteranderäm vo eusem Plauschteam bestrittä wordä. Im Team sind gsi, de Christian, d Wendy, d Larissa, d Fabienne, de Melanie E. und ich. Wer jetzt s Gfühl het, mir säget „Pläuschler“ gsi, de irrt sich. Mir händ alles gäh und händ de herrvorragendi ersti Platz beleit. Da das Jahr gad mal drü Mannschaftä i derä Kategorie aträttä sind isch nüt usglöslet worde, sondrn de wo nach de Uswärtig erstä gsi isch, het den au gwunnä. Eusi Herrämannschaft isch zwar mit sich nöd immer ganz so z friedä gsi,händ aber glich de 11. Rang beleit. :-) Noch denä asträngende Disziplinä und ohni irgendwelchne „Usfäll“ und „Unfäll“ vo eusnä Schwümmer, sind mer denn scho sehr froh gsi, dass es im Vereinsrum im Lido öpis zässä gäh hed für üs. Viele Dank für s organisierä und kochä de Ursi und am Michi, isch en glungänä und gmüetlichä Abschluss vom Tag gsi. Denä, wo mitgmacht händ, es grosses Dankä, dass das so guet klappet hät. :-) Für die, wo s erstmal mit gmacht händ, hoffi s isch nöd s letscht mal gsi, ihr händ das würki super gmacht. Und für di anderä gilt sowiso biszum nöchstä Wettkampf. Ramona Rüdisser