Jurnal sastra bali moderen suara saking bali edisi xix

Suara Saking Bali

Édisi XIX | Méi 2018

1

Suara Saking Bali

Édisi XIX | Méi 2018

2

Suara Saking Bali

Édisi XIX | Méi 2018

Daging Jurnal Lawat-lawat Pondok Kurungan (IGA Darma Putra)

2

Satua Cutet Délem (IBW Widiasa Kenitén)

5

Nyuryakang Badé (Déwa Ayu Carma Citrawati)

13

Lintang Badé (Ni Kadék Sudiastari)

22

Ngelut Dui (I W. Wikana-Seraya)

30

Satua Bali Katuturan Gajah ané Nyapa Kadi Aku (I Madé Pasek)

36

Puisi Bali Puisi-puisi Mas Ruscitadéwi

38

Puisi-puisi Komang Juniarti Widyasanti

43

Puisi-puisi I Wayan Supadma Kerta Buana

46

Puisi-puisi I Nyoman Agus Sudipta

50

Ésai Ngon (IDG Trinandita)

55

Satua Masambung Kania (9)—IBW Widiasa Kenitén Gegonjakan Sunat (I Gusti Lanang Sutéja Naréndra)

59 65

Kartun I Komang Swakarma

67

1

Suara Saking Bali

Édisi XIX | Méi 2018

Lawat-lawat

Suara Saking Bali| Méi 2018

Pondok Kurungan IGA Darma Putra

P

ondok punika genah masayuban. Sabeh nénten belusan, kebus nénten kebusan. Ring pondok anaké nunas paneduh. Manawi wénten lelipi sané mengkeb ring selagan taru sukun, sinah nénten kaabi-abi jagi

kacepolin. Minab wénten macan ring batan taru nangkané, sinah nénten jerih jagi kasagrep sadaweg leplep. Mawinan, patut ngaturang parama suksma ring pondoké sané sadina-dina sareng ajak ngentasin lemah kalawan peteng.

Saking tengah pondoké maraab somi, semeng-semeng kantenang aine nyentér ngalintangin somi sané matumpuk-tumpuk. Sunarnyané galang kantos ka tengah pondoké sané peteng dedet. Yéning petengé rauh, sinah pisan kenyitan bintangé saking selagan tumpukan sominé. Bilih-bilih sadaweg galang bulan nuju purnama sasih kadasa. Saking balé pasirepané intip bintangé sané nyénter punika. Langité peteng sakéwanten galang. Pondoké galang sakéwanten peteng.

Becikan tunas sunar bintangé punika genahang ring langit-langit duéné.

Mategepan pisan sané kayun nyunarin pondok kurungané, wénten surya, candra miwah lintang teranggana. Sakéwanten patut taler tiaganin sunaran suryané. Santukan ring jagaté pecaknyané wénten sané mawasta surya kembar.

Suryané asiki kéwanten, sampun ngawinang jagaté galang, ri sapunapiné panes

2

Suara Saking Bali

Édisi XIX | Méi 2018

bara. Napi malih yéning suryané kembar, sinah panes barané sayan-sayan panes kadi kalebu ring cambra goh muka manut pitutur panglingsiré riin.

SSB/ Manik Sudra

3

Suara Saking Bali

Édisi XIX | Méi 2018

Patut taler tiaga sareng sunaran candra sané kocap alus. Sunaran candrané sané ngawinang toyané ngalencok. Sagarané sayan-sayan osah, keni sunaran candra sané alus punika. Iwasin becik-becik, ri sapunapine sunaran candrané sané ngawinang embas rasa resres. Napi malih yéning sunaran candrané ri tatkala purnama madaging munyin asu ngongkong ngaung-ngaung. Asuné ngongkong nyapatin anaké sané mamargi alon-alon ka pura Dalem jagi ngaturang bakti ring Ida Bhatari. Nénten uning titiang, napi minab sané jagi katunas ring Ida sané kocap bares tan kadi-kadi. Manawi wantah ngetut pamargin ida sang Sutasoma sakadi sané kacaritayang ring kakawiné. Sang Sutasoma kocap ngaruruh galang ring petengé santukan kapetengan pikayunané sané sapatutnyané galang.

Saking pondok kurungané mangkin tekepin maka sami jelanané sané sarahina mungkaban, mangda nénten wénten angin sané ngaranjing utawi medal saking jelanané punika. Sakéwanten mangda tiaga taler ngungkabang jelanan tiosan sané sué nénten naenin kaungkabang, mangda becik pondoké. Mangda melah antuk nabdabang lawang sané sué pisan sampun empet. Saking irika mangda becik anginé ngaranjing miwah medal. Yening sampun becik antuk nabdabang sabang kekawané bresihin, punika taler buk sané neket ring pondoké.

Pondok kocap genah masayuban, sané nuenang pondoké leplep sirep. Lali ngupapira karang santukan kategul antuk kemelahan ipian. Lali nandurnandurin karangé antuk bungan menuh sané miik ngalub. Utawi nandurin karangé antuk jepun miwah sedah. Sedahé sané sentér surya kuning pakrenyeb.

Becik-becikin nandur sedah, sira uning benjang pungkuran embas pikayunan jagi nugtug pamargin panglingsiré nginang. Yadiastu barak makéraban cangkemé, nénten sapunapi. Santukan ri sampuné lingsir, napi kari wénten rasa elek madue gigi barak? Manawi nénten sangkaning giginé barak, wantah sangkaning iduhé barak ngerab kadi api ngabar-abar. Jerih kadalih ileh-ileh makta api ngendih ngawinang galang.

4

Suara Saking Bali

Édisi XIX | Méi 2018

Saking tengah pondok kurungané mangkin kayun-kayunin. Napi sané negul ring tengah ukudané? Napi peteng, napi galang? Yéning petengé negul, ngiring mangkin kidemang panyingakané. Yéning galangé negul, ngiring mangkin kedatang panyingakané. Yéning tegulané wénten ring selagan galang miwah peteng, becikan ngicir. Nyaru-nyaru kedat, nyaru-nyaru ngidem, unteng paliaté nuluh muncuk gunung magoa. Yéning wénten anak sané nyapatin, sampunang wangdé ngicir. Sadawegé ngicir, élingang sampunang lali. Ukudané kantun rebut legu, wetengé kantun makréok. Manahé kantun ngumbara, kalapu-lapu nyujuh langit matumpuk pitu.

IGA Darma Putra

embas lan magenah ring Bangli. Kakawiannyané kawedar ring makudangkudang média, minakadi Bali Post, Pos Bali, Tatkala.co, Suara Saking Bali, baliwisdom.com, miwah sané lianan. Ngamolihang Hadiah Sastera Rancagé 2018 antuk cakepan sané mamurda Bulan Sisi Kauh.

5

Suara Saking Bali

Édisi XIX | Méi 2018

Satua Cutet

Suara Saking Bali| Méi 2018

Délem Gedé Délem adanina tekén kramané krana misi gondong abedik.

Suba kudang garam yodium telahanga tekén Gedé Délem masi tusing nyak ilang. Koné maan ia ngrencanaang lakar ngoprasi gondongné sakéwala tusing bani. Ulian gondong ento, ia dadi liu maan adan, maaan tongos. Jatiné adan sekenné dong I Gedé Santika. Anaké masi ngimbuhin adanné dadiné I Gedé Santika Délem Gondong. Adinné ané pepes kaukina Sangut sujatiné madan Madé Arsa Wijaya. Apang masaih ajak rajan Majapahité semalu, Radén Wijaya apang dadi koné Arsa Wijaya. Péh Cara topéng Arsa Wijaya dogén. Bapanné meled apang sentanané arsa santi wijaya di umahné. Lantas adanina buka kéto.

IBW Widiasa Kenitén

6

Suara Saking Bali

Édisi XIX | Méi 2018

D

i kénkéné nyak cara Délem Sangut satwan iané. Kéné biasané.

“Ngut!Ngut!Ngut! Tingalin icang Ngut!”

“Suba katingalin. Gondong Délemé suba ngenah, sayan gedé sayan

bek misi. Sinah liu maan mamaan?”

“Hahahaha. Tawanga dogén. Sing pelih munyin cainé Ngut. Gondong icangé mula maguna. Kéné agetné ngelah gondong gedé. Nyidayang misi sabilang ané tagih icang. Cai awak berag cara cacingan dogén. Ping kuda cai madaar? Kuang gisi cai ento.”

“Depang suba icang. Yadiastun cacingan, icang tusing taén ngrépotang cai.”

“Béh, misi nyindir. Ngut tawang jani icang suba dadi pejabat.”

“Suba tawang. Cai mula demen ngidih-ngidih. Koné ngilangang anak ngidih-ngidih dadi cai ngidih-ngidih? Eda pelihanga anaké ngidih-ngidih. Cai ané tamatan tegeh masi ngidih-ngidih. Apa lantas binané?”

“Ada binané. Yén icang tusing tangkepa tekén satpol PP-né. Yén ané ngidih-ngidih ento paslangkeb nyelametang awakné.”

“Nanging isinné patuh. Ngalih isin basang apang dadi ‘tajir’.”

“Hahahaha ngelah dogén cai. Tusing pelih. Mula dueg cai. Tusing pracuma manyama ajak bli.”

Gedé Délem mula bisa manyama ajak adinné. Kija ja blinné barengina tekén adinné. Sakéwala, adinné tusing nyak ngidih-ngidih tekén anaké gedé. Ngujang ngidih-ngidih lek atiné suba maan gegaén lantas ngidih-ngidih. Manian mara suud ané idihin ngisiang gumi sapin suba. Matolihan tusing taén. Méh kanti mati tusing ada ngrunguang.

Madé Arsa Wijaya tusing taén nyangetang apa ja orahanga tekén bliné. Suba tawanga di gondongné ento anak liu pesan sesepelan munyiné. Sakancan munyi ané tawah-tawah mentik ditu. Apa buin lakar ada pilkada ia suba dadi tukang munyi. Anak taén ipidan dugas pecikina tekén dokteré mamunyi gondongné.

Kéné munyin gondongné.

7

Suara Saking Bali

Édisi XIX | Méi 2018

SSB/ Manik Sudra

8

Suara Saking Bali

Édisi XIX | Méi 2018

“Yén meled ngalih tegakan pipisé masi apang gedé. Tegakan gedé, pipis gedé. Ené pecikin.”

“Krinting,” kéto munyiné. Cara mas ané édénganga di tipi-tipiné. Dokteré demen masi mréksain krana tumbén nepukin gondong soléh. Buin pecikina ané sampingané.

“Brang!Brang!Brang!” kéto neges pesan. Yén alihang masaih ajak barang ajak bang, bang. Sinah nomor rékening suba tagiha.

“Sajan gondong soléh.” Dokteré ngrimik. “Yén makejang gondongé misi munyi buka kéné sing sayan liu anaké demen gondong. Tabunganné abana indeng-indeng. Ah, ngujang ento runguang. Ané melah tugas iragané malu jalanang. Koné yén sing inget tekén tugas padidi lantas nyalanang tugas lén tusing melah, nilar sesana koné ento, kéto anaké dueg nyambatang di tipitipiné.”

Gedé Santika sayan melah dogén pajalan idupné. Kija-kija ada ané nyapa.

Nuju Redité ia jalan-jalan ajak bapak-bapaké. Tusing car free day dogén. Bisa ka taman indah, bisa ka Bedugul, bisa ka Kuta. Ditu suba ngindikang isin gumi.

Koné yén sida matemu ajak pejabaté lakar maakang dogén nongos ané lakar apti. Di kénkéné Gedé Santika Gondong Délem orahina ngajak ané lakar ngalih tegakan buin. Gedé Santika Gondong Délem suba nawang. Artiné ento ngorahin apang tetep nyiapang pipis. Tusing ada jabatan gratis. “Anak ngentut dogén bisa kena danda. Kalingké jabatan,” kéto taén dingeh ia ngrieng.

Sagét Madé Arsa Wijaya Sangut matembang kéné: mai malu, dija ada gondong udu,bikasé melahang, buka anaké manuakin,iris danggul, sinah ngetél tuak jaka.

“Eda jail dogén Madé Arsa Wijaya,” Blinné tumben ngaukin seken adané.

“Mara icang belog buin gondong cai ngéndah mamunyi. Kedén suba liu anak masél ulian munyi. Ento menistakan gondong icangé adana. Eda ngaé-ngaé dogén. Masi tusing cai ngaba gondong. Anak icang ngaba ngujang cai inguh buin repot.”

9

Suara Saking Bali

Édisi XIX | Méi 2018

“Miiiiiiiiiiiiih. Memedih Blin icangé. Mara ibi maan darma wacana. Tusing dadi gedeg. Santi tetepang kenehé apang santika, santiné sai teka. Tusing nyeléka.”

“Buin cai ngéndah. Lakar lapurang kaka nah. Ené suba pencemaran nama baik adana. Ngéndah dogén cai. Baang di tundun nagih ka baong. Baang di baong nagih sirah bejel cai.”

“Sing kéto Bli Bagus Santika. Gendingan cang ento angon nglimurang keneh dogén. Kéné guminé mrasa kebus. Yadiastun ujan sasih kalimané nekain.

Enu masi panes rasané. Mirib ujan salah masa ené. Sangkananga kebus tusing karoan apa. Guminé kebus, maciri masi ané nongosin masi kebus. Ento tingalin Bli suba antianga koné lakar maguneman.”

“Aa, saja, pesan. Yén sing cai ngingetang sinah kaka suba engsap. Suksma Ngut, Arsa Wijaya.”

“Sajan jelema tusing nawang apa. Aget nyak ia ulehang kenehné, yén sing kéto dong suba ajak nyama matungkas. Paturu idup di guminé lantas matungkas.

Nungkasang tembang misi gondong. Idéwék masi pelih malah irukin isin basang iané antes gedeg. Apa buin mula énggal gedeg. Yén saja buka munyiné nglapurang, dong suba té nyama ngukum nyama. Miiiiiiiiiiih! Jengah pesan dadiné. Di matiné nyén orahin ngrunguang. Tuah ja bangké tusing milihin sema.

Suba bangké.” Made Arsa Wijaya ngamémél padidiana buka bebotoh kilangan dompét. “Sajan ulian bungut bisa pelih. Kéwéh masi ngaba cadik. Yén pejang, pican Sanghyang Widhi. Yén anggon bisa mabui. Ngujang ento sangetang, ané melah, sina Bli Santika maan tongos sing cara pancoran matatakan batu. Kritiskritisané ada bakat.”

Sabilang anak gedé paakina baan Gedé Santika Délem Gondong. Sabilang anak sugih ajaka matimpal. Matolihan ka betén kapah pesan. Lakar ngujang ngrunguang anak suba di betén. Ia ngindegamayang awakné buka katak. Menék nyekjek timpal ané di betén. Apa ja orahanga sing karungu. Kuping dadi

10

Suara Saking Bali

Édisi XIX | Méi 2018

sengsengin. Pinih makelo raméné tuah akambuhan suud kéto ilang ampehang angin.

Kija-kija makejang nganggutin. Macihna ia anak suba gedé. Yén sing gedé, dija ada anak nganggutin. Peteng lemah pragat iju dogén maakin pajabat. Anak bisa kanti ngepél di umah pajabaté misi ngébatang pada. Gigis luungné I Gedé Santika Délem Gondong. Somahné masi marengin. Koné, suami maju berkat istri yang jago. Apa saja apa tusing? Ané seken. Jani I Gedé Santika Délem Gondong suba dadi pejabat ané andel.

Goar-goar suba ia mapidarta. “Kerja yang semangat. Semangat kerja.

Sebelum dikerjain. Kerjain dulu. Dulu kerjakan. Kerjakan dengan kerja.”

Adinné ingkel-ingkel ningeh pidartané I Gede Santika Délem Gondong. “Apa orahanga tekén blin déwéké. Sajan pejabat makarbit. Jeg magradugan pesu munyiné. Sinah suba di poloné masi magradugan. Samben dieng. Pelajahang abedik. Lek atiné tusing karoan apa.”

“Sakéwala makejang ngoplokin pidartanné I Gede Santika Délem Gondong.

Koné melah pesan. Tatuwekné liu ganti. Ento suba guminé jani ané tusing anut bunuhan melah. Sajan ilehan gumi. “Adinné ngrengkeng padidiana buka jangkrik kririk mamunyi di song témboké.

Adané pejabat mara malajah, makejang nemenin. Dugasé ene, I Gedé Santika Délem Gondong sagét mapendak baan gong baléganjur di sampingné ada anak majengin. Lebihan tekén betara lakar melasti. Tiang makesiab mabalih.

Saja apa tusing ento I Gedé Santika Délem Gondong. Mirib ngelah ilmu mayamaya nyuti rupa I Gedé Santika Délem Gondong. Sayan paek sayan ngliunang dogén gobané buka I Gedé Santika Délem Gondong. Tiang malaib. Takut lahlahan gondong.

11

Suara Saking Bali

Édisi XIX | Méi 2018

IBW Widiasa Kenitén Embas ring Geria Gelumpang, Karangasem, 20 Januari 1967. Oneng ring sastra Bali klasik, sastra Bali modéren taler sastra Indonésia. Kakawian idané kawedar ring Bali Post, Buratwangi, Mémorandum, Warta Bali, Bali Aga, Majalah Sinar Agung, Majalah Éksprési, Bali Tribun, Pos Bali. Ngamolihang Hadiah Sastra Rancagé ring warsa 2006 antuk pupulan satua cutet Buduh Nglawang. Ring warsa 2015 ida ngamolihang Penghargaan Widya Pataka antuk cakepan Jero Lalung Ngutah.

12

Suara Saking Bali

Édisi XIX | Méi 2018

Satua Cutet

Suara Saking Bali| Méi 2018

Nyuryakang Badé Suba kenyel rasaang tiang déwék tiangé malinder nuryakang badé.

Badéné seken angkab-angkab girang kasuryakang di pempatanné.

Makipekan tiang kelod, tepuk tiang pos kamlingé suba suung, negak tiang ditu mabalih bulan, ané bareng nyaksiang badéné lakar majalan ka langité ngungsi sepi. Dedet petengé di bedelod saha wanén sinar bulané nyuksuk ngalih selah nyunarin pajalan badéné. Tiang tusing nyidaang bareng kemu. Kanggoang mabalih uli dini. Dipempatanné. Pos Kamlingé. Pan Caluk ané mati.

Déwa Ayu Carma Citrawati

“W

iih..gadagan semengan suba nganggon kamen, lakar kija?”

“Pan Caluk mati!”

“Yee..ipidan?adi sing pesan ningeh orta. “

“Jani..jani iyang lakar kemu” “Nah..nah ditu ba ngidih nasi, liu ada saté, liu ada lawar ditu!”

13

Suara Saking Bali

Édisi XIX | Méi 2018

SSB/ Manik Sudra

14

Suara Saking Bali

Édisi XIX | Méi 2018

Tiang nyrengseng ngalahin Pan Rugeg ané enu ngajak tiang ngorta.

Munyinné tusing demen tiang ningehang. Sajaan buduh. Yadiastun isin keneh tiangé buka kéto, kéwala ento terus anggona ngwalék padéwékan tiangé.

Ngénggalang tiang majalan ngajanang. Ainé kondén sanget nyentér. Kewala tiang runtag majalan, apang enggal neked. Nékéd di arep umahné Pan Caluk, makesyab tiang Pan Caluk seger oger. Majalan lakar magaé.

“Kija koné gadagan makamén semengan kéné” Tiang bengong. Tusing masaut. Mirib dibi tiang ngipi kewala mula cara seken. Pecik tiang palan tiangé, enu marasa sakit. Awak tiangé masi nyal ulian nyuryakang badé, kewala pelih. Tusing mati ia Pan Caluk.

“Sing…sing..Pan Caluk kija?”

“Masuk..lakar magaé. Kénkén?bareng?”

“Sing..Sing..” Ngénggalang tiang malaib, lek suba makamen lakar nulungin, Pan Caluk buung mati.

“Yéé..yé…kal kija to..wéé..Gadagan..Wéé..bongol!Mai nyanan nah, ajaka mabuk..mabuk saté.”

Uli joh dingeh tiang Pan Caluk enu kauk-kauk, ngaukin adan tiangé. Buduh mula Pan Caluk totonan. Ngudiang sing jani dogén matiné, bin misi matémpo.

Nyrucut tiang ngelodang, tusing matolihan kija-kija. Kaméné lus tiang pang tusing kedékina di margané, apang tusing anggona kakedékan uliang bogbog.

“Weeehh…gadagan

bagus…ngudiang

paid

kéto

kamenné.

Saluk..saluk..silapin cicing nyanan…to..jité..hahahaha” Makebris masi tiang kedék, I Redig mula banyol. Ija ada cicing nyilapin jit.

Tusing nawang anak lek ulian Pak Caluk awinan ngembus kamén. Sajaan I Redig buduh. Tengilin tiang dogén, depang suba ia kedék.

Wéé…gadagan..mai malu..Né mula saja bogbog, adi Pan Caluk anaké orahang mati. To Mara nyerét ngelodang ngaba montor, Bah..bogbog né..bogbog..” Pan Rugég jerit-jerit mara nepukin tiang uli kaja.

“Buung..buung ia mati. Kayang né pasti mati.”

15

Suara Saking Bali

Édisi XIX | Méi 2018

“Hahahaha..men bin pidan koné lakar mati? Ba takonang ajak Sang Suratma? Makejang anaké kayangné mati Gadagan…”

“Nyén..eh..nyén madan kéto?”

“To suba ané nyatet-nyatet akuda iraga ngelah pelih, ping kuda malaksana melah, bin pidan mati..Hahaha..tolih..tolih Yan..bengong yé..”

“Suud candéna Bli..bénjep gedeg nyanan ia dini..”

“Aja..Aja..Wayan mara polos. Demen ajak Wayan. Eéééh..Lastri ija?

“Nehh…kurenan cainé takonanga Yan. Beneh orahanga polos cai..hahaha” Buin Pan Rugég nyangetang kedék. Kanti telah poosné pacratcrit ngedékin tiang.

“Jumah..kénkén..” Wayan Adi iteh ngecel siap, pasautné mula sigug dogén.

“Sing..jegeg ia Lastri..demen iyang..jepét bokné luung..”

“Hahahahah..suud..suud ngrayu..sing ngelah roko ia I Wayan, mulih koné malu, alih-alihina ajak méméné. Ajaka ngalap bunga.”

“Buduh…Wayan buduh…Né bin sik..buduh” Enggalan gedeg basang tiangé ngraos ajak anak buduh ajaka dadua totonan.

Pragat tiang dogén dadianga kakedékan. Tusing lenan. Mirib makejang tusing ingét tiang masi ngelah pangrasa, apa ané orahang tiang mula lamun benehné. Tiang tusing demen nguluk-nguluk. Acépok tiang tusing taén bogbog.

Kurenané Wayan Adi mula paling jegéga tepukin tiang. Lastri adané. Uli SD suba tawang lakar dadi anak luh jegég, kéwala ngantén ajak bebotoh cara Wayan Adi pastika tusing bagia. Pedalem.

Ainé suba nyentér di muan tiangé. Ngaé génit awak tiangé. Suba telahang ngasgas sumingkin makebun buin misi klaskas. Mirib ené ngranaang anaké tusing nyak paak ajak tiang. Kéwala tiang tusing kénkén, lakar gena ngelah kulit kedas, ané kené suba luung. Ada gasgas. Mlaib tiang di delod binginé, apang enggal neked jumah. Mémén tiangé pastika buin bénjep nguél, krana tiang pesu tusing ngorahang.

“Putu…teka uli dija?saluk clanané..jang kamené!”

16

Suara Saking Bali

Édisi XIX | Méi 2018

“Uli Pan Caluké..”

“Ngudiang?”

“Kadén nak suba mati Pak Caluk Mé, Yééé…. buung ia mati. Suba magaé mara ia ka Badung.”

“Wéééhh..sing dadi ngraos kéto, sing dadi ngaba orta ané tuara-tuara.

Nyanan orahanga buduh. “ “Sing…seken dibi tiang bareng nyuryakang badéné. Badé ngrényéb pesan, cara badé dugas Pan Lanangé mati. Mirib di Gianyar ento meli. “ “Kemuu..umbah malu batisné, suba beliang bubuh, madaar malu.”

“Mémé…sing ba ngugu..béhh..mémé buduh!”

“Sing..nyén sing ngugu..kéwala Putu sing dadi ngraos ngawag-ngawag unduk kéné. Nyanan gedegina, kadén suba sai mémé ngorahang, sing ada luungan tekén nengil.”

“Yén tiang nengil ada ané lakar demen ajak tiang Mé, ada ané lakar ngugu?

Pragat kedekina dogén.”

“Ngudiang ngraos kéto, makejang anaké demen ajak Putu. Anak macanda, makedékan suba biasa. Sing dadi gedeg.”

“Mén makejang tusing demen ajak tiang” “ Nyén ngorahang?”

“Uli paliat matané suba tawang, tiang pragat kedékina dogén. Tiang dot masuk apang dueg, kedékina. Mara ngorahang lakar meli montor masi kedékina.

Mula buduh makejang ané dini. Sing demen tiang matimpal ajak anak buduh.”

“Sing..sing ada anak ngedékin..Tengilin dogén. Anak suba truna kéné luungan jumah mlajah ajak mémé. Lamun suba dueg mara bliang mémé montor.

Madaar malu. Benjep ngelodang nah..Ajaka ngetis ditu. Mémé ngaé bubuh sumsum, lakar ngatag.”

Won sajan tiang masaut. Bin pidan kadén misi munyin Mémé tiangé ané paling jegéga ento. Uluk-uluka dogén tiang. Kewala agét tiang ngelah mémé ané sayang pesan ajak tiang. Mémé dogén suba ané ngerti apa ané ada di keneh tiang.

17

Suara Saking Bali

Édisi XIX | Méi 2018

Ento ngranaang tiang sayang pesan ajak mémé. Lamun ada ané nyandénin, nyampahang mémén tiangé, lakar kecuhin. Kecuhin di muané. Cara bapan tiangé pidan. Pang tawanga mranén poos tiangé.

Yén ngraosang sayangné I Mémé, inget tiang dugasé dibi tiang mabalih tipi ada film panak ajak méméné tundunga uli umahné ulian tusing demenina ajak reramané ané lénan. Sedih tiang. Nyrékcék yéh paningalané. Ingat dugas tiang nepukin i mémé tundunga masi ajak i bapa. Ulian tiang. Ulian tiang tusing ada nemenin. Makejang ngedékin, makejang nundén tiang ngejoh. Kewala bayol masi filmé ento. Buin kesepné suba dadi sugih anaké ané tundunga ento, akésép pesan magaé. Tusing cara tiang ajak I Mémé makelo pesan ngantiang sugih.

Kanti kedék ingkél-ingkél tiang padidi. Kadén anak tiang ané critaanga di filmé ento, mapan artisné ané muani bagus cara tiang..Yéé..dong..tidong crita indik idup tiangé.

Basang tiangé suba suud mamunyi. Bubuhné Ketut Alit mula paling jaena.

Mara ukana majalan tiang ngatag, dingeh tiang kedis di baduur punyan pohé magending sedih.

“Kuuukkk…magending misi mapi-mapi sedih. Nyén ada lakar ngalihin?

Anak buung..hahahaha..Tengal..Huusss..husss…” Kanti kedis bareng pelih cara tiang. Mirib ipiané patuh cara tiang dibi. Nyuryakang badé.

Tusing ada ané nyidaang ngalahang galang guminé ba delod. Carik-cariké makejang mawarna gadang. Padang-padangé suba sayan tegeh, buin kejep dogén lakar mawarna kuning misi mabuah. Tiang uli joh suba nepukin mémé mabanten. Tusing ja mémén tiangé dogén makejang anaké luh-luh mabanten ka carik. Apang kedék pula-pulaané, punyan kayu apang nged mabuah.

“Mé..yén Pan Caluk buung mati, mirib tiang ngipi adané ento?”

“Biin..nutur kéto..jemak bubuhé né mawadah tékor ento..ajeng..ajaka ngalap bunga di tebénan.”

“Sing..seken Mé..”

18

Suara Saking Bali

Édisi XIX | Méi 2018

“To suba orahin mémé. Da pesu peteng-peteng, makejang bakat tolih, nyanan ngipi suba ané tidong beneh. Ngipi apa Putu ibi?”

“Kadén suba orahin. Nyuryakang badé. Ané Mati Pan Caluk. Cara ngipi kewala tiang sing jumah ngipi, di balé banjaré. Tuni suba jagjagin mulihné, tusing mati ia. Enu idup, lakar magaé.”

“Ahh…ipian paling ento. Da sangétanga. Bénjep ingetang dogén mambuh.” “ngudiang misi mambuh, pang engken terus orahin mambuh?”

“Mén apang tis duuré, pang suud ngipi jelék-jelék.”

“Mén Murji ngorahang lamun ngipi nyuryakang badé koné lakar ada ané kena sengkala.Saja mé..”

“Saja..mémé mirib kena sengkala.”

“Sengkala apa mé? Da kalahina mati tiang, Mé..”

“Hahaha..Mén kénkénang sing sengkala, kondén suud mabanten suba telah bubuhé. Suud-suud malu daara, orahin ané di tekoré dogén daar, di beténan mémé kondén mabanten.” I mémé mula demen dogén ngaé bayun tiangé makesyor. Tusing dadi mémé mati. Tiang tusing nyak pedidian jumah.

“Mén Putu..orahin ja I Putu, apang suud ngaé kesyab-kesyab.” Mén Kerti ané mara suud mabanten nyagjag ka kubun tiangé.

“Kénkén mbok?”

“Semeng-semengan suba ngaé iyur. Pan Caluk anaké orahanga mati. Anak enu nyidaang magaé, enu siteng. Orahanga mati, misi seken makamen ngajanang lakar matetulung.”

“Nggihh mbok..suba ja tawang Putun tiangé kéto da sangetanga. Anak ia ngipi!”

“Sing..mawinan pidan seken. Dugas Pan Lanang mati, Mara molas menitné mati, ia suba ané simalu nawang, makamén ngauhang, ngorahang Pan Lanang Mati. Né Jani kadén anak seken, malah tiang magéso-gesoan mulih. Buin misi telah pisagané bakat orahin.Yééé..dong..nguluk-nguluk ia..”Kedék ngrikik Mén Kerti saha maekin tiang.

19

Suara Saking Bali

Édisi XIX | Méi 2018

“Gadagan…mai..pilusa nyén kupingé. Sing dadi nguluk-nguluk kéto buin nah.Sing kal baang bubuh nah.”

“Sing..sing ada uluk-uluk..anak seken. Ibi suba nyuryakang badé di pempatané, iyang bareng masi.” Tiang tusing trima orahang nguluk-nguluk.

Mula saja tiang nyuryakang badéné Pan Caluk.

“Néhh..enu masi ngraos kéto..Nah..Nah..mai-mai..baanga bubuh biin.Dong anak ngipi Gadagan bagus né. Mambuh anaké lamun ngipi jelék kéto, bisa ada lakar kena sengkala. Sing keto Tu? Putu masi mambuh, apang tusing kena sengkala masi.”

“Ngiih..mbok, bin jep lakar mambuh. Ampura mbok..da pesan anggona gedeg, suba ja tawang mbok Putun tiangé mula kéné.”

Nyeh tiang ningehang tuturné Mén Kérti. Ipian tiangé ané seken ento jelek koné. Bisa tiang utawi mémén tiangé kena sengkala. Kénkénang jani? Kewala tiang anak tusing ngipi, anak tusing ngidém paningalané. Anak seken ento.

Kewala nyeh, nyeh Mémén tiangé kena sengkala. Ngeling tiang sengi-sengi, tusing dadi mémén tiangé kena sengkala.

“Mé…da gelem, da mati nah. Benjep mambuh, lamun ento nyidaang ngaé mémé tusing kena sengkala. Pang tiang dogén ané sengkala.”

“Yé…ngudiang ngeling. Sing..sing ada kéto. Da kenehanga ento.” Mémén tiangé nyagjag nyemakang tiang bubuh biun atékor. Mén Kerti kedék nepukin.

“Mbokkkk…mbokkkkk….Mbokkk Ranti…” Uli baduuran dingeh tiang ada anak makaukan.

“Weee…kénkén…melahang majalan, ulung nyanan.”

“Ratu betara…haduuuhh..haduuuhh..” Lastri ané makamén gantut maserod di pundukané, angkihané ngangsur peluhné nyrekcek ngebekin awakné.

“Anak kenapa koné Lastri malaib-laiban buka kéné. Melahang malu bayuné.

Mara ngraos. Né nyéh malu jangin dik kolongané.”

“Siepp..siepp malu mbok..Né tebana Mbok Putu masi dini. Pastika tusing ningeh orta.”

20

Suara Saking Bali

Édisi XIX | Méi 2018

“Orta apa?”

“Pan Candra dadi anggota déwan?” Mén Kerti ulah aluh nebag.

“Siiiiiing, ento suba orta makelo. ” “Mara tiangé ngajanang. Lakar nyemak baju kebaya sikné Mbok Sarti.

Diwangané yan Mus tiang makesyab. “ “makesyab kenapa?”

“Pan Caluk Mati!”

“Ambulancé ngaba mayatné mulih.”

Makejang saling cureng. Mémén tiangé makesyab. Tiang tuah ngajengit.

Mén Kerti sanget pesan masi makesyab. Makelo ia nolih tiang. Cara tusing ngugu ajak ortané Lastri. Kamemegan ia buin matakon.

“Aaa..aanak..Anak mati kenapa koné? kadén seger ogér tuni semengan.”

“Tabrakan di bypass!”

Getakan, 12 Juli 2016

Déwa Ayu Carma Citrawati Embas ring Getakan, Banjarangkan, Klungkung, 24 Fébruari 1990. Sané mangkin dados guru ring SMP Negeri 3 Dénpasar. Cakepan sané sampun kamedalang inggih punika pupulan satua cutet “Smara Réka” (2014) lan “Kutang Sayang Gemel Madui” (2016). Ngamolihang Hadiah Rancagé 2017 antuk cakepan “Kutang Sayang Gemel Madui.

21

Suara Saking Bali

Édisi XIX | Méi 2018

Satua Cutet

Suara Saking Bali| Méi 2018

Lintang Badé Anak Agung Istri Intan Mas Wistari, tengkejut rikala miragiang HP-né masuara. Ring layaré cingakina peséngan ajiné, nyihnayang wénten pikobet sané genting. Gelis Ida nyawis telpuné.

Ni Kadék Sudiastari

“S

apunapi Aji?” “Gung, Niang lepas” “Lepas?” makesyab Ida miragiang orti punika. Wawu sané ibi,

Gung Niang iringa ngorti ring video call, Ida kénak tur ica sekadi biasané.

“Gung?”

“O inggih Aji,” suaran ajiné nundunin lamunané. Nadak cokorne karasayang lemet.

“Gung mresidayang mantuk?”

“Inggih Aji, tityang jagi ngutsahayang ngurus cuti.”

22

Suara Saking Bali

Édisi XIX | Méi 2018

SSB/ I Gede Putra Ariawan

23

Suara Saking Bali

Édisi XIX | Méi 2018

Sané mangkin Gung Intan kantun ngelanturang studi S2 Ilmu Budaya ring panegara Belanda. Gagéson Ida ngurus cuti lan administrasi jagi mantuk ka Bali. *** Bali, 1 Méi 2012 Gung Intan sampun rauh ring puri. Irika ida masimpuh ring ajeng layon niangné. Tan kerasa toyan panyingakané ngembeng, éling ring sayang miwah tresna asih idané.

“Gung” Gung Intan matolihan. Cingakina anak lanang bagus alep ngadeg ring pungkurné, gelis Ida ngusap toyan panyingakané.

“Sira ngih?”

“Titiang Madé Ambara, nunas lugra jagi nyukat niang.”

“Ngih, ngraris Bli Dé.”

Irika Madé Ambara ngaturang ituk-ituk, canang témpélan, beras, jinah solas kéténg, benang, miwah banten pejati pinaka piuning indik sang undagi jagi ngawit makarya. Ngraris nyukat layon saking duur, angga, miwah cokor.

Usan ngalaksanayang swadarman ipuné, irika Made Ambara nunas mapamit.

“Ngiring Gung.”

“Durus Bli Dé.”

“Ikhlasang manten Gung, mangda becik pamarginé Niang”, punika Made matur saha makenyem.”

“Inggih, suksma Bli Dé.” *** Suryané endag kangin, kasarengin antuk suaran paksi lan karuyukan ayamé nyiriang jagaté sampun matangi. Gung Intan sampun sayaga jagi mapangayah.

Ida nyujur jaba tengah, napakin I padang bintak sané belus antuk ketélan damuh.

Pengayahé sampun ramé, wénten sané mebat, wénten ngarya warung, lan

24

Suara Saking Bali

Édisi XIX | Méi 2018

pengayah sané istri iteh makarya banten. Tradisi gotong royong ring Bali gumanti kantun rumaket pisan. Manahné kadaut nyingakin para undagi sané ngarya badé. Irika ida nampekin Madé Ambara.

“Bli Dé.” “Éh Gung,” tengkejut Madé sawiréh wénten tamiu jegég. Gegéson ipun ngedasin balé sané akéh medaging luu guntingan kertas miwah skét gambar badéné.

“Melinggih Gung.”

Gung Intan makenyem, “Santai gén Bli Dé.”

“Semeng pun bangun Bli Dé.”

“Tiang durung pules Gung.”

“Durung? Saking ibi?”

Madé makenyem, “Sampun swadarman titiang dados undagi, mangda puput ring galahé sané sampun kacumpuin. Wantah néntén puput nyanan wangdé sang sané jagi makarya Gung” “Ring dija Bli Dé malajah dados undagi?”

“Titiang nénten naén gumanti jagi malajah, jeg mengalir manten,” Madé masaut polos, limané iteh nyolék lim némpél ukiran patra punggel.

“Bli Dé masukné dija pidan?”

“Titiang tamat masekolah arsiték ring Jepang Gung. Sakéwanten minab sampun kadi puniki pamargin idup titiang”. *** Nénten karasa sampun kalih minggu Gung Niang lepas. Madé Ambara lan Gung Intan sampun leket pisan rumasat sampun kenal sué. Sekadi soréné puniki ipun sareng kalih mabaosan, ngorti kangin kauh makedékan. Madé nyaritayang indik dumun daweg ipun masekolah ring dura negara. Sujatine ipun tuah anak berandalan, punika awinan dewekné akeh madaging tattoo. Siosan ring masekolah, geginané tuah geradag-gerudug sareng timpalné. Nanging minab sampun pakayunan Ida Sasuhunan, sané mangkin Madé Ambara dados undagi

25

Suara Saking Bali

Édisi XIX | Méi 2018

badé. Gung Intan miragiang sahasa tan waneh-waneh nyingakin Madé Ambara minishing badéné sané sampun tamis puput.

“Napi sujatiné makna badé puniki Bli Dé?”

“Badé puniki pinaka cihna sukuning Gunung Maliawan Gung.”

“Tumpangné sios-sios ngih?”

“Ngih wénten sané tumpang solas, sia, pitu, miwah lima. Kapalih madasar antuk wangsa Gung. Bénjangan wantah wénten galah, ngiring simpang ke pondok tityang cingakin.”

Sagét galahé sampun jam dasa peteng, pangayahé sampun sami mantuk kasarengin lolongan asuné sawat.

“Sampun wengi Bli Dé,” Gung Intan mataki-taki jagi ka purian.

“Gung,” nadak Madé ngamel tangané Gung Intan. “Éh?” Gung Intan tengkejut, penyingakané sareng kalih matemu. Ketugan jantungné karasayang tinglis ring wenginé sepi puniki.

“Bli Dé…” suarané samar, kakaonang antuk suaran jangkriké ngerik.

“Suksma Gung, sampun nyarengin kantos usan,” Madé makenyem manis saha ngaturin Gung Intan bukét bunga. *** Ring pameremané, Gung Intan kenyem-kenyem peragaana, sambil tan surud-surud nyingakin bukét bunga punika. Becik pisan, malakar baan kertas maukir seni. Nadak sara, sagét wénten kertas ulung, surat punika raris kawacén.

Rikala I Gadagan nuléngék ngantosang ujan, katingalin lantas I Bulan makalangan. Kayun ké I Bulan tedun ngetisin I Panjak ring tukadé tuh? *** Semengé puniki, Madé Ambara sampun sayaga nyantos ring jabaan puriné.

Tangkahné ngetug, peningalané tan lepas lepas saking lawangané. Kenehné sengsaya, kayun ké Gung Intan sareng dewekné?

“Bli Dé!”

26

Suara Saking Bali

Édisi XIX | Méi 2018

“Gung,” masriak galang kenehné Madé, serasa tan percaya Gung Intan kayun rauh.

“Ampura tiang kasép.”

Madé makitukan “Suksma Gung” Ipun sareng kalih menék ka montor trailné Madé Ambara, raris ical ring tanggun margi. Lédang pisan kayuné Gung Intan sawiréh sampun sué nénten naén masesanjan ring Bali. Ipun sareng kalih nyingakin keasrian cariké ring Ubud, nyingakin désa lan wewangunan adat ring Penglipuran, tur malukat ring Tampak Siring. Nénten karasa, sagét sampun nyaluk sandikala. Ipun sareng kalih kantun ring Danu Batur. Nadak sara tedun sabeh bales tur kabut nyulikub.

Madé Ambara digelis nyetater motorné mantuk. Belus licitan, paningalané pedih katiba toyan sabehé mangan. Karasayang tangané Gung Intan ngetor, tekek ngisiang bangkiangné.

“Gung,” Madé ngamel tangané.

“Bli Dé,” cangkemné ngejer ngaretek.

Kabuté ngansan tebel, Madé marérén ngerereh genah madunungan.

“Swastyastu,” Madé Ambara ngeranjing ke umah cenik tur sederana, nanging ring ajengné madaging plang penginapan.

“Swastyastu,” masaut Bapak lingsir sané nuénang panginapané saha gagéson nyagjagin Madé Ambara.

“Sapuniki Pak, tiang jagi nyéwa kamar kekalih. Tiang nénten mresidayang mantuk,” Madé masaut jangih, suarané kakaonang antuk gerudugan suaran sabehé.

“Ampura Gus, iriki wantah wenten kamar asiki.”

Madé nolihin Gung Intan ngerereh tatimbang. Gung Intan manggutan, ngilgilang, lambén cangkemné sebuh.

“Nggih kanggé Pak.” Ring kamaré, Madé ngénggalang ngambil saput tur handuk. Ngelapin rambutné Gung Intan sané lukus. Risampuné angetan, Madé Ambara

27

Suara Saking Bali

Édisi XIX | Méi 2018

ngajabaang bir kalih botol saking tas ranselne. Irika sareng kalih minum nambanin gesité ngutgut, sahasa magendu wirasa. Made Ambara ngurut cokorné Gung Intan sané kembang lémlém. Yen sapunapi nawi pariundukané, tan uning sapasira sané ngawitin, sagét bibih sampun matemu bibih. Kasarengin suaran angkihané nelung dasa lima. Di sisi sabehé nyansan bales, dingin manulang, satmaka ngubkubang sang nyolong samara. *** Jaum jam nujuang angka 8. Sunaran sang surya mobos saking celah-celah jendéla kamare. Nundunin Gung Intan sané setengah sadar. Ida mautsaha ngélingang pariundukané dibi sanja, nanging duurné karasayang baat pisan.

Nadak jantungné serasa makebyeng, rikala nyingakin ragané tanpa busana.

Madé Ambara ngelut saking kuri.

“Bli Dé! Bli Dé!” Gung Intan ngoyag lengené Made Ambara sané kantun pules leplep.

“Mmmm…” Madé makeengan sahasa ngamelahang pules.

“Bli Dé…!!!”

Madé ngedatang paningalané bédbed, samar-samar cingakina Gung Intan.

“Gung!” Madé ngadébras bangun rikala tingalina anggané Gung Intan polos, pateh kadi déwékné.

“Gung, tiang tanggung jawab!”

Gung Intan makitukan.

“Tiang matur sareng Gung Aji!” “Ten sealuh nika Bli Dé!”

“Tityang iwang Gung! Biar ngaturang urip tityang nyadia!”

“Plakkk….!!!!” Nadak sara Gung Intan nampél pipiné Madé.

“Sadar Bli Dé! Iraga boya ring dura negara. Iraga ring Bali. Bli Dé sira, tiang sira,” Gung Intan nangis sesenggukan sahasa noktok tangkahné Madé.

Madé bengong mapangsegan, kenehné benyah latig. Matemu sareng Gung Intan sané luwes tur nue pamineh modern ngaryangang ipun engsap. Lalah

28

Suara Saking Bali

Édisi XIX | Méi 2018

ménah, nundunin gejolak jiwa mudané ritatkala masekolah ring dura negara.

Masawitra lan ngulurin semara tanpa wates. Tan mandang kulit, rupa, wangsa, sami pateh. Madé ngelut anggané Gung Intan, nyerahang déwék. Katoktok kabésbés, ipun pantes. Nénten karasa yéh paningalané ngembeng. Nadak guminé karasayang peteng, kasaputin kabut Kintamani. *** Suaran tatabuhan madongdang. Badéné nyeleg megah pisan, karemba olih krama désa kadi semuté. Ngaturang pangayah kaping untat majeng ring Gung Niang. Made Ambara sareng ngiringang, pajalané kambang. Ngatonang Gung Intan malinggih ring joliné, serasa ngentungang déwékné ke pangkungé dalem.

Ipun tuah I Bojog sané ngidamang bulan. Risampuné rauh ring setra, badéné raris kaancungin. Geniné ngilab, ngalalap seka kedik. Madé Ambara bengong ngaksiang, badéné sané kakaryanin sedina lemah peteng sané mangkin samun geseng. Punika naler pajalan tresnané kadi ia I Lintang Bad, ngéaryané méweh, sué, nanging risampuné becik sinah lakar puun.

Ni Kadék Sudiastari Embas ring Sibetan, 7 Séptémber 1993. Sané mangkin magenah ring Br. Dinas Tlugtug, Sibetan, Kec. Bebandem, Karangasem. Makarya dados pegawai administrasi ring SDN 6 Sibetan.

29

Suara Saking Bali

Édisi XIX | Méi 2018

Satua Cutet

Suara Saking Bali| Méi 2018

Ngelut Dui Semengan hapéné Putu Purwa suba mamunyi. Kadirasa tondén makejang isin guminé bangun, nanging hapéné suba iteh mamunyi kanti pindo ping telu.

I W. Wikana-Seraya

P

utu Purwa enu jaen nyambung ipian. Angkiané karasa aris tis. Tusing pesan ada makrisikan nang abedik. Miribang marasa leleh unduk pajalan dinané ibi, kanti kapeteng mara teka uli luas kema mai.

Mula uli abulané ané suba liwat, Putu Purwa kapah ada jumah. Sirepné

tusing masih cara ipidan, kanti nyidang nyambungang ipiané uli bongkol ka muncuk. Ipiané satata kapegatang atenga jalan. Tondén mamuncuk, suba kakaukin. Tondén maulu suba kadundun baan munyin hapé.

“Halo..... Om Swastiastu...!”, peninggalan ngidem, nanging limané grapagrépe nyemak HP.

30

Suara Saking Bali

Édisi XIX | Méi 2018

SSB/ Manik Sudra

31

Suara Saking Bali

Édisi XIX | Méi 2018

“Halo Tu Swastiastu. Tu halo...halooo!!”

“Hallo.... sira niki?”

“Bli Satra né,” pasaut uli hapéné Putu Purwa.

Tondén suud masaut, ngraris engsap Putu Purwa buin sirep nylekétek duur pasaréané. Nanging hapéné iteh mamunyi.

“Halo...halo...halooo tu!”

Siep akejep, buin mamunyi. Itéh amun to dogén pajalan hapéné totonan, uli jam lima semengan kanti jam pitu. Suba duang jam, masih tondén kajemak baan Putu Purwa.

Matan ainé di sisi suba ngancan ngendih tegeh. Mara abedik nyidang Putu Purwa ngedatang peninggalané. Mara masih Putu Purwa nyidang ngadapngadap nyemak hapé, ané sagétan suba ada di betén awakné.

“Méh....bli Satra né be kanti bek gatina maan nélpon tusing tawang nah.”

Ngadébras raris Putu Purwa bangun uli genahné masaré. Inget janjiné lakar ngatah Wayan Satra, masimakrama di delod désa ané tongosina. Ulah labuh Putu Purwa ngojog paoné, lakar matatagihan kopi ajak somahné apanga tusing kiap. Nanging, di paoné suung, tusing ada nyén.

“Ah dija koné Luh Koncréng né,” kéto Putu Purwa nyambatang adan somahné padidi.

Ngadébras lantas Putu Purwa ngojog kamar mandi lakar masiram. Nanging, di bak kamar mandiné, tusing ja misi yéh nang aketélan.

“Ah...dija sih somah icangé né? Alih di paoné tusing ada. Jani ngojog kamar mandi, jeg yéh nang aketélan tusing ja misi. Sing ngelah keneh nang ngidupin kran!”

Matan ainé suba ngancan tegeh, ngancan kebus. Ngadébras lantas Putu Purwa pesu ngojog tongos parkir motorné. Mara ngampakang jelanan, sagétan Wayan Satra suba negak di ampik umahné.

“Yéé...bli Wayan. Ampun tuni bli driki?”

32

Suara Saking Bali

Édisi XIX | Méi 2018

“Ampun Tu. Uli tuni tiang nélpon Putu, jeg tusing ada pasaut,” Wayan Satra nyautin patakoné Putu Purwa.

“Lédangang bli. Jeg kiap sajan tusing nyidang nanggehang.”

“Né somah Putuné ajak bli dini nutur-nutur ngantiang Putu.”

“Nggih bli. Padalem bli Satra padidina dini negak,” Luh Tini nyambungin Wayan Satra. “Bli tusing ngopi?”

“Oh...sing Luh. Ainé suba ngancan tegeh. Padalem bli Satra nyanan antianga ajak krama delod désané.”

“Nggih Luh...bli ajak kurenan Luhé lakar majalan malu,” kéto Wayan Satra mapamit ajak Luh Tini.

“Nggih bli sareng kalih. Alon-alon ring margi.”

Uli abulané ané suba liwat, Putu Purwa ajak Wayan Satra mula satata maatepan. Kaja kelod, kain kauh satata mabarengan. Peteng lemah, semeng sanja masih satata mabarengan. Yén orahang manyama tusing. Yén orahang mapisaga, nanging umahné majohan maselat tukad.

Dinané jani, Wayan Satra ajak Putu Purwa suba teked di désané badelod.

Mara Putu Purwa markirang mobilné Wayan Satra, sagétan krama ané ada di balé désané masuryak pakraik. Sahasa nyuryakin Wayan Satra ajak Putu Purwa ané mara teked.

“Idup Wayan Satra!!” krama banjaré dimalu masautan.

“Idup!!” briuk sapanggul, luh muani, truna bajang kramané pada bareng nyautin.

Sayan paek ajak balé désané, munyin kramané aéng sayan ramé sayan keras.

“Idup Wayan Satra! Idup Wayan Satra!!”

Tumbén Putu Purwa nepuk unduk buka kéto. Tumbén masi kanti negak di arep anaké ramé buka jani. Aéngan tekén dadi bos ané rasaanga baan Putu Purwa. Ené tagiha, jemakanga. Ento tagiha, ambilanga. ***

33

Suara Saking Bali

Édisi XIX | Méi 2018

Ainé suba ngancan sanja, patemon ngajak krama désané delod suba suud.

Rasa leleh bayuné Putu Purwa jani suba sanget rasaanga. Awakné uli betén kanti kaduur karasa telah sakit. Nanging, Putu Purwa tetep tegteg pageh nimpalin sakancan pajalané Wayan Satra. Uli désa delod, nuju ka désané kaja. Uli désané kauh, nuju ka désané dangin, kéto masi uli kangin ngojog ka désané badauh, nanging tetep iteh Putu Purwa nyihnayang rasa satia nimpalin Wayan Satra.

Yén dadi sambatang, Putu Purwa nyak dadi ajudan ané satia. Satia tekén laksana, satia tekén wacana, turmaning satia tekén semaya.

“Tu, kéto masih Luh. Dinané mani suba gantiné bli lakar ngetohang awak bliné. Dumadak ja, suéca Widiné ngicén pamargi. Yén kanti bli maan, bli lakar ngajak Luh lan Putu Purwa malali ka luar kota,” kéto rarembugan tur semayané Wayan Satra negak ajaka telu.

“Mih dumadak ja bli. Tiang sabilang wai sampun ngastiti, dumadak ja pamargin bliné rahayu,” kéto Luh Tini nyautin Wayan Satra saha makenyem lantang. Putu Purwa tuah manggutan dogén.

Guminé suba nyaluk sandikala. Gumatat-gumitité pada saling sautin, makaciri guminé ngancan peteng. Luh Tini suba cara biasané masiram laut ngaturang bakti. Nanging, tumben jani Luh Tini kanti makelo di merajané.

Miribang mapinunasan apanga Wayan Satra maan acepané.

Dina ané antianga baan Wayan Satra, Putu Purwa, Luh Tini suba tepukina.

Pajalané sabilang wai nuju ka delod désané, dain désané, dajan désané miwah dauh désané ané jani suba mabukti mapunya tur mabuah. Apa ané dadi arepan jani suba bakat gisina baan Wayan Satra.

Idupné Wayan Satra sayan nincap. Sabilang wai masi Wayan Satra teka ka umahné Putu Purwa. Sabilang wai ada dogén buah lima ané abana baan ragané.

Kanti lek rasaanga baan Putu Purwa satata ngrépotin Wayan Satra. Yén tusing sarwa ajengan, bisa panganggo masih abanga Putu Purwa ajak Luh Tini.

Miribang ento tuah walesan sangkaning satiané Putu Purwa ipidan kema mai ngatahin tatkala matemu ngajak krama. Sakancan ané demenina baan Luh Tini

34

Suara Saking Bali

Édisi XIX | Méi 2018

satata isinina. Miribang ulian suécan pinunas somahné masi makada satata gapgapina baan Wayan Satra.

Rasa precayané Putu Purwa sayan nincap. Rumasat magelut kenehné ngajak Wayan Satra ulian ngugu sakancan solahné ané luung.

“Tu...Putu kan precaya ngajak bli. Putu pastika tusing taén ngelah keneh boya ajak bli,” kéto Wayan Satra semengan suba ada di ampik umahné Putu Purwa.

“Nggih bli. Pun uli makelo tiang ngajak bli. Tiang satata precaya ngajak bli.

Apabuin bli suba liu san ngwantu tiang.” Pasautné Putu Purwa “Nggih suksma pisan Tu. Kéné sabenehné Tu. Dinané mani lakar ada rapat, ba kéto, mbok somah bliné jani enu sakit. Rapaté mani patut katimpalin anak luh anggon nulung sakancan kakuangan di genahé ento. Nginepné niki di hotél kok Tu. Yén Putu precaya ajak bli, precaya ajak somah Putuné, lakar ajak Luh Tini luas marengin bli?”

Tusing ada keneh jejeh Putu Purwa masaut. “Nggih bli. Tiang precaya ajak bli. Tiang masih precaya ajak somah tiangé Luh Tini.”

Suba apetengan Wayan Satra ngajak Luh Tini luas joh. Tumbén glibag glibeg nyelék keneh Putu Purwa di pasaréan. Bayuné karasa runtag, kenehné uyang paling. Kanti atenga lemeng, Putu Purwa tusing nyidang sirep. Pesu lantas Putu Purwa ngojog kamar tengah, tur ngontak tipiné. Karasa makesyab, ulung jantungné Putu Purwa nolih acara tipiné. Ada penggrebekan nak luh ajak nak muani ané ba pada-pada ngelah kurenan matangkep di hotél.

“Koncrréééng!!”

I.W. Wikana-Seraya Embas ring Br. Tinjalas, 30 Juni 1989, mangkin meneng ring Br Bukit Catu Désa Seraya Timur Karangasem. Tamat saking IKIP PGRI Bali Fakuktas Pendidikan Bahasa lan Seni warsa 2011. Kakawiannyané naanin kawedar ring Bali Orti (Bali Post) lan Médiaswari (Pos Bali). Cakepan puisinyané mamurda “Gebug Éndé”

35

Suara Saking Bali

Édisi XIX | Méi 2018

Satua Bali

Suara Saking Bali| Méi 2018

SSB/ Manik Sudra

Katuturan Gajah ané Nyapa Kadi Aku Kaceritayang Antuk I Madé Pasek

W

énten reké Gajah ageng ring alasé. Ipun nyapa kadi aku antuk kakerenganipun, mawanan ipun tan pakakering. Telas taruné ageng-alit karubuh antuknya, kéngkot antuk danta, akéh taluh

paksi kalih pianak-pianakné ulung, minakadinipun taluhnyané I Paksi Siung.

36

Suara Saking Bali

Édisi XIX | Méi 2018

Ceritanen pedih reké I Paksi Siung luh ngantenin taluhipun ulung. Sané muani age reké ipun mituturin, “duh mas beliné, adi. Sampunang idéwa bas kaliwat nyebetang saulung taluhidéwané. Yan tuara mati baan beli, musuh idéwané, ia I Gajah, adayan beli ngemasin mati, ketimang idup dadi kakedékan. Yan beli teka ngawag-awag, réh ngelawan anak gedé, tan wangdé mapuara kéweh. Masih ulih aris baan beli ngalih kasingseyannyané i musuh. Yan sing reké bani nangkepin musuh kéto patutnyané baan matingkah. Ento sesanan anaké manumadi. Ané jani mangda sida baan ngalahang isatru patut pasangin pangupaya singid.”

Sapunika luir tuturnyané I Siung muani. Taler tan kidepan antuk luhnyané, taler ipun kari sedih masesambat luir padulaménnyané sapuniki, “duh cening pianak mémé, cai nyai pada makejang. Bas kaliwat ichan Widhiné tekén mémé.

Réh cening ngemasin mati buka jani. Yan tuara mati ia I Gajah, sing da buungan mémé lakar nutug pajalan cai nyainé mati.” Sapunika sasambatan Siungé luh kabatek antuk kalangkung sebetipun.

Mawastu karenga antuk sami kakampungannyané, luiré, Belibis, Buyang kalih paksi Gowak, Gadagan, lan paksi Belatuk. Kocap punika sami ngerawuhin I Siung. Pangidih I Siung sedek sedih, masesambat pati jelamut. I Gowak raris mapajar banban, “duh nyai Siung, eda bes sanget nyai sebet, wiréh tingkah anaké numadi, tuah sing ada kasimpangan baan suka duka lan pati urip. Kerana beli mamunyi kéto, apang edanan nyai bas kelajuk sebet. Mangda ké anaké buka nyai mawak kedis, Ida Bhagawan Wasista masih katanan duhkita mahabara.

Beli jani nuturang tekén nyai buat pamargan Ida Bhagawan Wasista.”

37

Suara Saking Bali

Édisi XIX | Méi 2018

Suara Saking Bali| Méi 2018

Puisi Bali

SSB/ Manik Sudra

Puisi-puisi Mas Ruscitadéwi 38

Suara Saking Bali

Édisi XIX | Méi 2018

Nengkul Kepikan galahé mapiteh tan rérénan. Titiang i riki nengkul. Meték surya masawang ring jendélané. Malaib-laibang.

Wénten sané ngilit, nyuksuk ring kolongan, ngedeng suara, ngered kagenahgenahé sipeng. Mamaksa ngetut peteng.

Rikala Pedahu-pedahu Kawatek Ring dija i bendéga masayuban? Rikala pedahu-pedahuné kawatek marérod nyanggra sayong nyemayang sabeh, micayang ulam. Titiang mamula engon, munuh kangen tan lascarya matilar

Kelem Ring dija jagi batekang pedahuné? Toyané ngancab, melusin sakancan tuh, ngéréd, musering. Tan wénten genah masanekan. Galahé nguber, paksi-paksiné nyander. Manahé mabyangbyungan. Kadi gulem selem kelem ring danuné dalem.

39

Suara Saking Bali

Édisi XIX | Méi 2018

Pedahu Bulan Dayung, sampunang mararian Malomba ngasorang hujan Munuh sayong ngetut lelampan Pedahuné jegjeg nyujuh bulan Pamargin uripé maguét ring ambara Ngigel nganutin ngronceng i kedis dara Mapiteh magabyar ring warna bianglala Dayung, ida nyantosang ring purnama

Mampakan Kuri tiingé buwuk mampakang, yantos pangangonné ngetis. Napiké sabehé kayun nristisin pamulan-mulan sané ngetuhin gulem? Sayongé ngritayang pamargin toyané macandetan ring ambara, ngelut téja, ngembasang tatit. Gurit.

40

Suara Saking Bali

Édisi XIX | Méi 2018

Sekar-sekar Ngalentér Sekar-sekar nglentér maroncé Embas saking pelung langité Langsé ngililidang panes baeng Madu bludru putih ngrengkeng Napiké ipun metu saking bhakti Sané nyampuh raket dados siki Ring sakancan rasa ning hati saking toya panon jati sujati Ambu miikné ngater titiang ka ipian Nglangkungin payudan tan rérénan Mangaturang rupania tatandingan Ring buk padan sang madué sinamian Sekar-sekar ngalentér Kawinih galahé ngentér

41

Suara Saking Bali

Édisi XIX | Méi 2018

Meled Meled mataled leplep Macelep nyuled emed Matungked gagad geged Ngombéd cengked jogéd Nyesed tan bina uled Ngeked tangisé sesed Katamped saking uwed Mebed sakancan meled

Mas Ruscitadéwi Kuliah Arkelogi, Filsafat, lan Keagamaan ring Institut Hindu Dharma Negeri Dénpasar. Sajabaning nyurat puisi, lagu, miwah satua cutet, dané taler dados guru filsafat majeng ring narapidana sané pacang kaukum mati. Dané taler ngajain alit-alite sané keni virus HIV/AIDS ring Yayasan Kerti Praja, miwah dados Kurator ring Gelar Seni Bali Mandara Nawanatya.

42

Suara Saking Bali

Édisi XIX | Méi 2018

Suara Saking Bali| Méi 2018

Puisi Bali

SSB/ Manik Sudra

Puisi-puisi Komang Juniarti Widyasanti

43

Suara Saking Bali

Édisi XIX | Méi 2018

Suksés Siki, Loro, Telu.....

Ulian liu maan gaé Kasaub makejang Sing takut sing jerih Ento madan suksés??

Suksés nak liu ngelah pipis?

Sugih nadak, Uma linggah kagelahang Kéto madan suksés??

Sekadi gedé kayu gedé papanné...

Ento suba madan suksés!

Seken....suksés nak liu ngelah pipis...

Sané ening dadi butek Ulian nagih suksés Keneh gedé, nyaub gaé Sulur idep, sulur idup Embasé puniki, dadi manusa mayadnya SUKSÉS.... solah laksanané apang melah, sampunang bes kedropon, yening pipis manten anggén tetujon, sami pacang kaon....

44

Suara Saking Bali

Édisi XIX | Méi 2018

Wikan Sugra gusti guru....

“Wajebhir wajiniwati” nika sampun gusti guru i raga idup ring guminé malajah..... ngrereh kawikanan Wikan ngaturang astiti bakti wIkan mayadnya wiKan mabaos wikAn maparilaksana i raga

wikaN

santukan malajah pandidikan punika sané ngranayang kaanggén ngukur unggul sekadi kropak majalan...

Komang Juniarti Widyasanti Mahasiswi Sastra Bali Unud

SSB/ Manik Sudra

45

Suara Saking Bali

Édisi XIX | Méi 2018

Suara Saking Bali| Méi 2018

Puisi Bali

Puisi-puisi I Wayan Supadma Kerta Buana 46

Suara Saking Bali

Édisi XIX | Méi 2018

Pendidikan Nelebing sastra né mautama gumanti kewajiban wargané sami maka tetujoné negarané ngawinang panelahné liunan subé ké patuh sekadi arepang? ento ané jani tegarang resepang apa buin ulian gratis ngaenang kenehé tis wajar sembilan tahun patut laksanayang pendidikané ngewangun gumi.

47

Suara Saking Bali

Édisi XIX | Méi 2018

Kadi Toya Ngerincik ngalir pemarginé tan kawates ening makenir ngetisin gumi tanpa rupa, luwih guna maka tirta ngehayu-hayu nepasin kapiambeng manusané.

Rumasatang toya pengetahuané di guminé pekardi Sang Hyang Widhi maprabawa Ida Bhatara Sang Hyang Aji Saraswati kadi pemarginé toyané ngelimbak tan telas selantang tuwuh musnah hilang awidyané.

48

Suara Saking Bali

Édisi XIX | Méi 2018

Smartphone Disubané smartphone dadi raja smartphone sube dadi kebutuhan ngeliwatin kebutuhan pokok kanti engsap tekén déwék ulian megantung tekén i smartphone.

Dija-dija pesu ngisiang smartphone limané sibuk ngetik ninggalane kanti tusing makijepan sube kanti bongol ningeh tekén anak ulian sayangé tekén smartphone kaliwat.

Mula liu kawigunan smartphone anggon masawitra lan mabraya kéwala tegarang da kanti engsap apang tusing manemu ala ulian pelih nganggo smartphone.

Smartphone anggon melajah sekatah paplajahan mapunduh ditu melahang-melahang nganggo pilah-pilih né dadi duduk apang ada anggon melajah.

I Wayan Supadma Kerta Buana Magenah ring Karangasem

49

Suara Saking Bali

Édisi XIX | Méi 2018

Suara Saking Bali| Méi 2018

Puisi Bali

SSB/ Manik Sudra

Puisi-puisi I Nyoman Agus Sudipta 50

Suara Saking Bali

Édisi XIX | Méi 2018

Guna lan Widya Duka lan sengsara lantaran awidya Sing demen melajahang awak indik sastra Kénkénang nyidaang dadi manusa mautama Yéning tusing kadasarin Tatwa Jnana

Idup sing dadi emed melajah Amun dot pesan nemu madan melah Melajah cara ngeduk yéh pasih tusing lakar telah Patut pagehin yasa kerti apang tusing obah

Melajah makrana nawang unduk dadi manusa Ngelah widya apang nyidayang nepukin bagia Ditu mara marasa dadi manusa maguna Nawang beneh lan pelih lantaran wiweka

51

Suara Saking Bali

Édisi XIX | Méi 2018

Proyék Pendidikan lan Pendidikan Proyék

Kurikulum setata magenti Satmaka sesai yéning ngenti Menteri Kebijakan jani bisa malénan buin mani Pendidikan dadi proyék lan politisasi

Pendidikan jani mael sajan Ané lacur sing maan kesempatan Pendidikan gratis tuah di omongan Janji-janji manis tatkala pemilihan

Pendidikan dadi proyék ulian liu ada anggaran Anggaran pendidikan jani dadi rebutan Sawiréh ento dadi kesempatan yén ngelah jabatan Dadiné pendidikan proyek tusing ada masa depan

52

Suara Saking Bali

Édisi XIX | Méi 2018

Sekolah Ipian Yén tiang dadi menteri pendidikan Sekolah makejang kagratisang Gajih guru terus kapenékang Nanging ento tuah di ipian

Ngorahang pendidikan bermutu Ento munyi gebuh sing nyandang gugu Melajah pang dueg nanging sing ada buku Kanggoang pragat mireng tutur guru

Sekolah sujatiné tongos melajah Tongos melajah malaksana ané melah Boya tongos ngaé manusa ané ngendah Bani alpaka guru kena raja pinulah

Sekolah jani dadi tongos ngemedin Para sisya begeh pengkung sing dadi orahin Males melajah lan guru tusing buin kahormatin Sekolah satmaka taman tuah diipian tusing lakar tepukin

53

Suara Saking Bali

Édisi XIX | Méi 2018

Ki Hadjar Déwantara Sampun katami saking nguni Tut Wuri Handayani Ing Madyo mangun karso Ing Ngarso sung tulodo

Ring ungkur ngicén tuntunan Ring madya ngwangun idep kawekasan Ring ajeng dados tetuladan Ngapti manusa mautama nganutin jaman

Bapak pendidikan Indonesia Nénten tios punika Ki Hadjar Déwantara Mapangapti manusa pradnyan mahardika Sutindih bhakti ring bangsa lan negara

I Nyoman Agus Sudipta Embas ring Karangasem, 29 Séptémber 1984. Kakawianipuné kawedar ring Bali Post (Bali Orti) miwah Pos Bali (Médiaswari). Sampun ngamedalang cakepan ésai mabasa Indonésia tetiga lan dados jayanti ring lomba buku anak sané kalaksanayang Balai Bahasa Bali.

54

Suara Saking Bali

Édisi XIX | Méi 2018

Ésai

Suara Saking Bali| Méi 2018

Ngon IDG Trinandita

N

gon tuah kruna sané saderana, kruna sané maartos angob utawi héran, tusing percaya sekadi angob pisan.

Yéning dumunan sinah kruna ngon niki sering utawi dados orta

sawai-wai. Napi ja sané wénten jeg samian anaké ngon. Yén indayang minab sekadi kebo mabalih gong. Bengong nlektekang sakéwala nénten uning napi sayuwaktianné punika. Niki boya ja ngawalek utawi nyelék-nyelékang jaman utawi kawéntenan aab jagaté duk punika. Niki wantah anggé gagambaran mangda alit-alité mangkin uning ring kawéntenané duk punika Sekancan ané tumbén tepuk utawi tumbén ngenah sinah lakar dadi ngonngonan gumi. Wénten sampi léb sampun ngon, wénten nak buduh malaib dados ngon, wénten céléng mati jeg ngon, ngantos wénten motor ngaliwat sinah lakar ngon. Napi malih yéning wénten kapal terbang léwat sinah sampun makesami warginé nyihnayang rasa angob utawi ngon.

Duk punika informasiné kari akidik pisan. Yéning baosang ring tepengan tahun 70 ngantos 80an sinah doh pisan yéning saihang ring aab jagaté sekadi mangkin. Télevisi dados barang méwah pisan. Yéning dumun ring kantor camat wau wénten TV. Utawi ring balé désa. Yéning TV-né daweg nika siarannyané nénten sekadi mangkin 24 jam nonstop. Daweg nika siarannyané nénten sekadi

55

Suara Saking Bali

Édisi XIX | Méi 2018

mangkin. Yéning dina redité wau wénten acara uli semengan ngantos sawetara jam 12 siang. Soma ngantos saniscara siarannyané wantah uling jam 5 soré ngantos jam 12 peteng. Nika wantah 1 stasiun sané wénten TVRI wastané tyosan ring nika durung wénten.

Télpun duk punika taler dados barang langka. Kantor, rumah sakit, sekolah wau maduwé télpun, punika taler sané rumasuk nak sugih minab maduwé telepun. Daweg punika télpun umum sané keloktah anggé sarana komunikasi sareng kulawarga, misan, mindon, ponakan utawi gagelan.

Radio duk punika wantah dados sarana hiburan sané utama tur ngulangunin pisan, maduwé radio sampun sakadi maduwé tavé récorder sané merluang kasét.

Jeg sampun sugih rasaang. Arang pisan daweg nika sané maduwé TV. Yéning alat transportasi baosang. Sepéda motor napi malih mobil sinah nénten méweh jagi metékin akuda sané mresidayang numbas. Yéning di banjaran paling sané maduwé siki kalih kémanten. Nika sampun rumasuk anak sugih pisan.

Koran utawi surat kabar rumasuk barang langka, arang pisan anaké ring pedésaan jagi maduwé koran napi malih malangganan koran. Yéning polih uwékan koran sinah sampun jagi merebut ngwacén yadiastun uwékan koran sampun liwat.

Punika taler listrik, toya PAM sinah duk punika durung sekadi mangkin.

Ring padésaan kari nganggé strongking, wénten nganggé damar sentir utawi lampu témplék sané mabahan bakar lengis gas.

Hiburan sané duk punika sané dahat kasenengin wantah mabalih film ring gedung bioskop sané wénten ring kota. Nika hiburan sané sanget marakyat.

Yéning dina Galungan lan Kuningan sinah gedung bioskopé ramé uli semeng ngantos peteng. Jeg maembah kramané bajang truna cerik kelih teka lakar mebalih film. Daweg nika sané ngetop film India, film perang, utawi film percintaan.

56

Suara Saking Bali

Édisi XIX | Méi 2018

Ring tepengan nika wénten sané mawasta bioskop masuk désa. Balé banjaré kaserung dadosané gedung bioskop. Kramané mayah karcis mabalih sambil negak léséhan di bataran utawi semén balé banjaré punika. Sakéwala daweg punika manah utawi kayun warginé girang. Dagangé sané maadolan keni imbas antuk keraméan penontoné sinah polih bati akéhan.

Nika, dados conto indik kawéntenané duk punika. Sakéwanten nika wau sebagian kecil utawi akidik sané kasurat. Akéh kari kawéntenan sané lianan.

Yéning saihang antuk kawéntenan sané mangkin sampun matiosan pisan.

Hiburan ring paumahan 24 jam nonston. TV akéh canel-né wénten ANTV, Indosiar, SCTV, TvOne, Kompas TV, RCTI, TVRI Bali, Ntv, Global TV lan akéh malih sané tiosan. Jeg ten ngidaang ben metékin saking liuné. Napi malih sané sampun maduwé anténa parabola sinah akéhan malih chanel TV sané wénten kacingak tur tragia.

Indiké punika sané ngranayang sané mangkin informasi audio visual artosné informasi gambar lan suara sampun ngebekin kauripan i manusa sakadi mangkin. Durung malih kabaosan indik kemajuan téknologi komunikasi sané mawasta HP. HP sané simaluné tuah anggé nélpun, mangkin sampun akéh kawigunannyané. Boya ja anggé nélpun manten sakémaon sampun dados anggé internét, ngrereh berita, youtubé, goglé, whatshap, liné, bbm, facebook, vidéo call, mabalih vidéo, ningeh musik, inbox, mésénger, mabalih TV, ningehang radio, anggo mayah listrik, telpun, ngantos anggo ngalih alamat utawi googlé map. Pokokné jeg lengkap.

Ditu suba ané ngeranayang maweweh-weweh manusané mangkin polih informasi utawi pengetahuan. Apa ané ada di luar negeri suba tawang uling dini.

Apa buin ané ada di Bali. Jeg becat sajaan sekancan informasi masuk ka soangsoang jatma. Ada informasi ané sujati utawi seken. Ada informasi ané ngulukuluk utawi hoaks ada masi informasi ané guyu tur macanda. Ento ngaranayang manusané jani patut bisa milah tur miih sekancan informasi ané ada. Tusing ja makejang bakat gugu.

57

Suara Saking Bali

Édisi XIX | Méi 2018

Nah yén saihang ajak ipidan sinah ada ané patut dadi renungan utawi kenehang. Yén suba kéto aab jagaté jani sing ja pelih yéning jani lakar kéweh ngalih utawi nyingakin anak lakar ngon cara ipidan. Kénkénang lakar pesu kéneh ngon utawi angob yéning apa-apa ané ada di guminé ané kondén ngenah di arepé suba tawang malunan. Ada orta di Jakarta, dini suba nawang, ada kejadian di luar negeri masi suba tawang malunan, sinah ento ané mekada.

Sakéwala makejang ané suba ada jani sinah patut iraga syukuri utawi suksemaang. Nak makejang kemajuané misi jelé melah. Buka raos anaké wikan makejang madaging rwa bhinéda ento tuah ten dados pasahang. Yéning pidan liu anaké ngon yéning dados mangkin sampun dados akéh anaké maboya utawi tan rungu utawi cuék riantukan kahuripané tetep mamargi nganutin pamargin jaman. Sané becik ruruh anggé pangweruh lan penuntun urip, sané nénten manut patut joh entungan.

Yéning sané mangkin. Kantun wénten semeton sané ngon nika boya ja iwang yéning ngoné punika anggé dasar utawi tantangan sané anggén dasar nagingin sikian antuk ilmu pangweruh marupa ilmu lan téknologi sané anggé ngawantu ngalanturang kahuripan mangda idupé nénten ketinggalan kemajuan jaman sané sayan-sayan nincap nénten dados tambakin.

Saniscara, 10 Novémber 2017

IDG Trinandita Wantah guru ring SMPN 2 Banjarangkan. Dané ngajahin mata pelajaran matematika. Seneng nyurat saking SMA sané kaanggén ring mading miwah koléksi pribadi. Kakawiannyané naanin kawedar ring Bali Orti (Bali Post) miwah Médiaswari (Pos Bali).

58

Suara Saking Bali

Édisi XIX | Méi 2018

Suara Saking Bali| Méi 2018

Satua Masambung

Kania (9) IBW Widiasa Kenitén

S

uaran paksi crukcuké nyambrama. Kejag – kejog ring wit carang nyambuné. Élogan i jepun Bali ngaturang kalemuhan déwék ipuné. I padang ambengan ring abing griané slayar – sloyor. Wit saboné

bengong ngantenang pangarauh Dayu Latriné. Kabanda antuk kalegan ipuné.

Sampun sué aesan wit taruné nénten wénten sané munduhang.

Dayu Latri seneng pisan nandur wit sekar. Pateh kadi pamargin kakiang ida, Pranda Kerta. Urati ring tetanduran.Ring ajeng griané, katandurin taru tulak.

Taru sakti. Ring kangin griané maurip paku taji. Ring kaler griané murip taru puring, taru pikpik. Ring belog griané murip andong bang, taru sihsih. Ring kangin griané andong wilis, nagasari. Kelod kangin maurip taru sugih. Ring tengah wénten sekar tunjung,paku pidpid.

Antuk suéné tan kawirenga, kawéntenan gria Tamané nénten kadi dumun.

Wit – wit sekar sané becik murip sampun katah sané tan kantun. Wénten ical santukan arang prasida kacingakin. Wénten taler sané padem tan karungu.

Telaga alit sané maka cihna gria Tamané nénten matoya malih. Mis utawi padang teki sané ngentosin. Tan bina sakadi pikayunan sané tan karungu.

Palinggih – palinggihé wénten sané unggahin tetani. Wau guékanga olih Dayu Latri, pakléjat ring betén. Ayam – ayamné ngesik saling pagelisin nyotot tetaniné. Binbinan ipuné magémolan kadi anak gondong. Pianak ayamé ngitehang ipun neda tetani. Sané angengan déwékné, panyamaan ipuné dumun

59

Suara Saking Bali

Édisi XIX | Méi 2018

gitika wau ngrebutin tetani. Gelisan sané lianan ngeniang. Bengong ipun kaonanga madaya. Yukti wantah miyegan dumun, sépanan ngambil amerthané.

Gelisan sané lianan ngeniang.

Dayu Latri ka pawaregan ngambilang minyak tanah, katuruhin palinggihé mangda usan umahin tetani.

“Péh kéné umahé makelo tusing karungu,” Dayu Latri ngrimik. Méh yén makeloan bisa benyah amah tetani. “Sarwi ida nyapuh ring natar mrajané. Krek krek suaran sapun ida. Sayan kedas sayan bersih kanten.” Luung ngenahné mara kedas. Yén kenehé kedas dong luung masi,” Ida mabaos – baos ring kayun.

“Sakéwala ngalih keneh kedas kéwéh pesan. Kadénang kedas pamuputné puek. Kedas di keneh kedas di sisi nyak anut, gigis ya melahné?”

Ida tangkejut ring pungkurné Dayu Ratna ngadeg. “Yéééééé, Mbok Ratna.

Sampun nuni?”

“Mara pesan. Mbok demen mabalih Dayu mawali ka gria. Kénak cara ipidan. Griané suud sepi. Makelo mbok tusing ningehang suaran Dayuné.Meled pesan mapupul cara ipidan. Sina nyak idup buin pasathianné ri sampuné Dayu rauh.”

Dayu Latri kenyem. “Titiang taler meled pisan kadi rihin.“ Mbok Sriasih gegesonan ngrauhin. Angkihan ipuné kadi noos. Mbok Sriasih sawitra leket sareng Dayu Latri.

“Dados nénten nganikaang jagi ka gria?“ “Ampurayang, padelem tiang Mbok. Ampun tawang tiang Mbok repot di sanggah. Koné lakar ngodalin di Purnama Kadasané?”

“Yukti pisan. Sira ngaturang?”

“Kéto ya dingeh – dingeh.“ “Ratu nué manten.” Mbok Sriasih kedék. “Bénjang jagi ngarya sanganan suci. Ampura, titiang nénten purun ngaturin Ratu. Ratu wau dadosan.“ “Tusing kenapa. Tiang ampun seger. Ené tingalin. Liman tiangé suba magetihan.”

60

Suara Saking Bali

Édisi XIX | Méi 2018

Gagambaran Drs. I Nyoman Ngadeg

61

Suara Saking Bali

Édisi XIX | Méi 2018

“Ratu!”

“Bapa Gejer saget teka. Negak malu.”

Bapa Gejer tangkil sarwi makta jangan – janganan. Paku sané wau pisan kaémpok ring pinggir telabahé kaaturang. Liking – liking pakantenané.

“Puniki Ratu becik santenin. Anggén jangan mangkin.”

“Bapa Gejer sagét semengang teka. Negak malu. Gaénanga kopi.”

“Titiang angayu bagia Ratu prasida kénak. Domugi nénten wénten malih kapiambeng.

“Tiang masi kendel, Bapa. Ulian pitulung Bapané, tiang selamet. Yén sing kéto, dija kadén.“ “Ané jejehin tusing inget tekén awak. Bapa lek ningalin tiang. Ané gedeg tekén tiang, sinah kendel gati.”

“Gumanti sapunika Ratu. Paileh ring jagaté, wénten sané demen ngantenang anak lian bagia, wénten sané nénten. Paripolahé punika gumanti ketah, katah pisan.Domugi paripolahé sané nyemerin kauripané sayan ical ring jagaté.”

“Beneh pesan Bapa. Tiang masi ngaturang angayu bagia ring Sanghyang Widhi, ring Lelangit tiangé prasida kaswécanin urip. Maan tiang ngayahang karma wasanané ané déréng telah jalanin ipidan.“ Bapa Gejer kenyem. “ Ratu élingang pinunas titiangé?”

“Indik napi Bapa?”

“Ratu mangda madiksa.”

“Seken pesan keneh Bapané tekén tiang. Lamun kéto tiang lakar matur tekén ajin – ajin tiang. Madak apang tusing ada kapiambeng.”

“Titiang sané jagi ngiringang Ratu matur.”

“Sedeng melaha, lamun kéto.”

Dayu Latri matur. Karauhin Ida Bagus Cidra. Kadi menggah pangandikan ida.

“Dayu panak PKI. Tusing dadi madiksa. PKI ento tusing pracaya tekén Widhi. Tusing nyandang dadi Padandha.”

62

Suara Saking Bali

Édisi XIX | Méi 2018

Bapa Gejer kedék wau Ida Bagus Cidra ngandika sapunika.

“Punika panampén Ratu. Yan titiang, ngaturang suksma ring okan Ratu sampun kayun madiksa. Sapasira malih antosang. I Ratu sampun nénten muputang punapa – punapi.”

Bendu pisan Ida Bagus Cidra wau sapunikayanga olih Bapa Gejer. “Péh Bapa wanén tekén tiang?”

“Titiang purun ring paripolah Ratuné. Ring linggih Ratuné titiang nénten purun. Paripolah Ratu nénten naen nglédangin kawitan. Setata nyemerin griané sareng pasemetonané. Titiang uning sapasira I Ratu.”

“Ngiring Ratu mawali! Ajin Ratu sampunang malih wilangina. Nénten jagi muputang karya Aji Ratu puniki.”

Dayu Latri sareng Bapa Gejer ka gria Sidemen. Dayu Latri matur ngaturang daging pikayunané.

Lédang pisan Pranda Sidemen. “Ada ané inget tekén angga. Ada nglanturang tatujoné Pranda Gdé Kerta.”

Pranda Gdé ngwilangin déwasa. Raris kapicayang déwasa tanggal ping 13 sasih Kalima. Rahina padiksaan Dayu Latri. Kanikain ngrereh surat katerangan ring polisi. Ngereh guru saksi sareng guru waktra. Sami gelis kamarginin.

Sasih Kalimané tanggal ping teluwelasé rauh. Padiksaané mamargi antar.

Puput padiksané cendet pisan pangandikan Pranda Sidemen, “Domugi Nanak Kasaraswatén!”

Dayu Latri polih tengeran Pranda Istri Kania.

Malih tigang rahinané Pranda Istri Kania ngaturang jauman ring Bhatharan ida kasarengin olih Bapa Gejer.

“Bapa kemo matur ring Bhatharan tiangé. Aturang tiang lakar tangkil.”

“Inggih.”

“Pranda Gdé. Nanak Pranda jagi tangkil.”

“Lautang iringang.“

63

Suara Saking Bali

Édisi XIX | Méi 2018

Wau rauh ring ajeng Bhathara nabén ida. Ida nguntul. Nénten dados mapas liat sareng Bhatharan ida. Mangda nénten keni cakra pinulah. Pranda Istri Kania ngaturang sembah nikel ping tiga. Bhur, Bwah Swah.

Galahé punika anggén Pranda Gdé Sidemen nganikain Pranda Istri, “Nanak melahang ngiringang Sanghyang Aji Saraswati. Gamel pesan sasanané.

Undukang indiké utamayang apang maunduk.”

“Lungsur titiang pangandikan singgih Bhathara.”

Tigang sasih Pranda Istri madiksa sampun mresidayang mapulang lingga karuntutin raris matirta yatra. Ngaturang Wédha ring pura – pura sané kanikain olih Pranda Gdé Sidemen. Usan matirta yatra wau kanikain muput karya.

Kaloktah Pranda Istri Kania. Wantah asiki sané ulengan ida ngayah ring Sanghyang Aji Wédha.

Ida Bagus Cidra sayan – sayan menggah. “ Béh nglaut tusing misi isin keneh déwéké. Jani, buin cepok. Jani tusing misi. Mula bénjul pajalané.

Wenginé punika, Ida Bagus Cidra numbas bénsin. Wénten ajérégan sané madaging limang liter. “Ené lakar mragatang Pranda Kania. Apang taén ada Pranda séda puun di sirepné.”

Ida Bagus Cidra mamargi alon –alon. Tangané sané kenawan ngamel jérégan sané kiwa ngamel korék.

“Byos! Byos! Byooooooooooos!” Kurin pamereman Pranda Istri Kaniané kakebyosin bénsin. Wau jagi ngrékang korék, raris Pranda Istri Kania ngungkabang kori pameremané. (Puput…)

Amlapura, Ngembak Gni, Saka 1932 Wrehaspati Kliwon, 18 Maret 2010

64

Suara Saking Bali

Édisi XIX | Méi 2018

Gegonjakan

Suara Saking Bali|Méi 2018

Sunat I Gusti Lanang Sutéja Naréndra

"A

pa madan sunat, Bli?" Mimih...semengan jeg ber tawah petakon kurenan tiangé.

Apa ya kenehanga? Apa ya tepukina? Mula ia sing tamat

sekolahan, mawanan jeg blakasan dogenan raosné sing nang kulitina bantas aklabar salak. Masak keto takonang semengan? Untung pedaduanan, yen ada anak lénan...mbéé ambat lek atiné. Diastun soleh, sautin tiang mase, apang nyak énggal teka kopiné.

"Sunat ento...matugel muncukné!" Keto saut tiangé sambil tujuhé ngecenggir undit undit anggo pinda. Masak ané asli anggo? Beh...

Kurenan tiangé nyansan jeek. Negak ia nyampingin tiang.

"Liu tugela, Bli?" "Sing. Jatu dogénan. Yén liu sing kado ya!"

"Oooo..." keto ia munju bibihné.

"Apang kénkén masunat, Bli?" Buin ia metakon.

"Apang bersih. Ada masi ulian agamané ngorahin apang kéto!"

"Apané bersih?"

Beh, buka bajang genten celekotokané! Mapi sing nawang kekéto.

"Tendasné apang bersih Luh! Pang sing mebo!" Saut tiangé sekel, gerimutan basangé!

65

Suara Saking Bali

Édisi XIX | Méi 2018

"Ah... mebalik ento Bli. Ané mesunat suba mebo! Kotor ento!" Saut I Luh sada buka ngeréng. Badah...apané usak né? Mebalik isin poloné.

"Dija ada unduk! Ané masunat ento suba bersih! Sing ja mebo!" Mingkin nengkik tiang.

"Ae... bersih, amaha telahanga! Kewala kotor ento. Patuh tekén gaé maling, gaé mamirat. Madak apang énggal banges! Apang juka tendasné!"

"Yéé...apané ngeranayang ia majuk? Nak nugel gelaha" "Yen gelaha matugel, kadung kanti onya baang. Né gelah timpal pantet tugela!" Mimiih jeg brangti I Luh. "Gelahné nyén tugela?" Sesed tiang nakonang, wireh rasa soleh raosné.

"Gelah icangé!"

Duaaarr... makeplag tangkahe mireng. Laut tiang kedek bungker.

"Wééé... awak lua sing ngelah kekéto, apané sunata?"

"Yéé... dadi orang sing ngelah? Gedé gelah icangé!"

Nyumingkin bungker tiang kedék. I Luh mingkin brangti. Ngedébas bangun nyemak koran akebésan di sok dagangané. Édéngina tiang...

TABUNGAN PEDAGANG PASAR DISUNAT OKNUM PEGAWAI KOPERASI Mbééé...celekotokané ...

"Kal ngenceh malu dik...." keto tiang bangun magedi.

(Macang Rumah Cinta Seribu Jendela)

66

Suara Saking Bali

Édisi XIX | Méi 2018

Kartun

Suara Saking Bali|Méi 2018

I Komang Swakarma/ Makunyit di Alas

67

Suara Saking Bali

Édisi XIX | Méi 2018

I Komang Swakarma/ Panabuh Maplalian HP

68

Suara Saking Bali

Édisi XIX | Méi 2018

69