Majalah Suara Saking Bali edisi 75 (LXXV)

daging majalah

Komik Strip

Komik strip 4

Pamahbah

togtog sirah (Madé Taro) 5

Lawat-lawat

kisi-kisi di dori (IGA Darma Putra) 7

Satua Cutet

galah ngagah buah melah, maliah ring tangkah begah linggah, ngolah selah lidah dirah, ngragah sukserah sipah lekah uyah, nyregah alas samah, masolah mungkah luah tlaga wayah somah gelah (I Madé Suarsa) 16 sandal jepit (I Nyoman Sutarjana) 36

putu wédari (IBW Widiasa Kenitén) 48

mapag dedari (I Wayan Kerti) 85

Satua Bali

i gringsing tekén ni ranjani 27

Puisi Bali

puisi-puisi tatukung 23

puisi-puisi ketut sugiartha 42

puisi-puisi komang sujana 54

puisi-puisi désak gedé setyaningsih 73

Artikel

ngortang seni #5: 2023, Apa Seni Ané Baru? (Déwa Gedé Purwita – Sukahet)

33

Satua Masambung

mlancaran ka sasak (20) Gdé Srawana 58

babad ayu ginanti (7) I Putu Supartika 77

Geguritan

geguritan bangbang wétan (IBW Widiasa Kenitén) 13

Isin Gumi

tued (I Gusti Lanang Sutéja Naréndra) 10

Kamus kamus 85

Komik Strip

togtog sirah

Togtog sirah

ketogang sakadang sirah

ulah apang kesah

togtog uli pengkeban

I Kempul I Kembar

buin I Celomang

sing ja lén ané ngrekang kuku

sing ja lén ané ngrukang siku

tikeh pandan anggon belat

keneh beneh anggon nakeh

I Pengalih I Pengeléb

tebag katebag

Pamahbah Madé Taro

edeng kaedeng soang-soang

depang galang kalah-menang

Togtog sirah

ketogang sakadang sirah

krék i barak ngobar

krék i pandan buyar

sing ja lén ané ngrékang korék

sing ja lén ané mretang berek

di pengkeban mabudi ngeléb

di peléban ngoyong magandong

Dénpasar, 2002

Suara Saking Bali Édisi LXXV | Januari 2023

kisi-kisi di dori

IGA Darma

Putra

Ajah-ajahan agama ane suba dapet uli cenik, tusing cukup yen lakar anggon nujuin pajalan ane luung. Iraga ajak makejang suba nawang, ajahan agama ento tusing cukup anggon nyumpel bibih pisaga. Apa buin pisaga ane tusing bisa ningalin iraga bagia. Pastika suba bibihne lantangan teken jan.

Kupinge pragat panes yen ningehang munyi-munyiane ane tusing mamuncuk mabongkol. Ane anggona dasar tuah iri hati. Konden karoan masih iya lakar nawang apa-apa amun sekene. Makejang panawangne madasar tuah baan ningehang laut buin tuturang teken anak elen. Yen ento bakat kenehang munyi-munyiane, bisa-bisa iraga berig gidid sing karoan entek. Awinan, anak ane keto-keto mulan sing mangkuh runguang.

Enu luungan magae paselegin apang ada bekelang mani puan. Yen iraga dadi anak sugih, dong ditu ia lakar makeneh padidiana teken omongane padidi.

Mulan saja raos shastrane, jaman jani kabaos jaman kali. Ane ngidang nyumpel bibih pisagane, tuah pipis dogen. Shastrane suba puntul tusing ada

Lawat-lawat

anak ngarunguang. Tan bin acara arca kuno ane maurug di tanahe. Ipidan jaja, jani sumping!

Len buin yen iraga dadi pamimpin. Suba pasti liu ane lakar ngetarang parisolah iragane benjang pungkur. Lacurne, solah ane luung-luung tanema, solah ane jele-jele dadianga konten apang viral. Buka keto mulan suka dukan iragane yen dadi pamimpin. Yen tusing siap dadi tukang tegen bebek, eda nyemak gae buka keto.

Apa buin yen iraga dadi actor intelektual di pusat. Apang bisa masih iraga anggut-anggut, kenyem-kenyem, yadiastu tusing ngerti. Apang bisa iraga maanggutan yadian iraga tusing cumpu. Kadharman di tongos ane keto, tusing lakar maan tongos. Liunan iraga tusing juari yen lakar matungkas. Bilih-bilih suba tawang pusate ane iringang mulan tusing dadi orahin.

Yen iraga malajahin shastra, ada masih bacakan wiku ane dadi juru pawisik para ratune imaluan. Wiku-wiku buka keto madan Wiku Rajya. Mulan swadharmane dadi badan pertimbangan para ratune. Luungne, ane keto-keto maan masih kadudukan ane tusing langsung. Nu ngenah cara wiku, sakewala buin ngenah cara raja. Wireh Wikune ento masih ngelah hak suara tur ngelah kekuasaan. Yen unduk sasanane, patut Rsi Sasana takonang unduk Wiku Rajya ento. Apake enu Wiku buka keto dadi ngaloka pala sraya?

Saja yen raga malajahin sejarah perwikuan, ditu sing kuangan wiku-wiku sakti ane dadi badan pertimbangan raja. Sakewala iraga tusing nawang apa pikolih wikune ane ngamargiang pajalan buka keto. Apa buin wiku-wiku ane pragat nyatuang kasorohan. Iraga ane nguda-nguda kene bisa bingung baana, teken ane madah beneh. Ida Sang maraga Wiku tusing uning paragayan idane satuanga mailehan, teked di warung-warung kopi. Makejang anake ento kisikisi di dori. Jejeh yen saget dingeha, lakar kena sapatha. Lakar kena kutuk.

Ada buin anak ane malajahin spiritual. Sing kuangan gaya yen tolih uli

duur teked beten. Yadiastun tusing makejang, liunan ane granang greneng keto tusing misi apa. Cara pongpongan tuh ulun uli punyane. Grudugane gede,

sakewala tusing misi lengis. Tusing ada ada sandang anggon karana, nguda anak ane keto bakat ajumang.

Ngenyit dupa bisa aduang kranjang sabilang Purnama kalawan Tilem. Kenehne madukan ajak ngenehang mitrane ane patuh-patuh ngayah. Dikenkene nyelap mapanganggo sarwa soleh, apanga ngenah eksis. Sambilanga live di Instagram ngedengang kaspiritualane. Ngidem ia prajani ngorahang ngulengang pikayun. Nak mulan keto ane patujuanga teken shastra google. Sing bedik jani shastra ane suba ringkese di google. Shastrane ento ane picayanga teken para pangikutne.

Pengikutne anggut-anggut menehang makejang ane pesu uli bibih gurune. Uli dija Kaden ia nawang ento beneh apa pelih. Intine ingetang dogen ngorahang rahayu. Misi nyakupang lima, sarwi kenyem alus. Yen suba keto baan ngetangang paukudan, sing mungkin ada anak ane tusing percaya iraga suba madan putus. Sakewala kapah-kapah perlu masih dingehang pakrimik

pisagane ane ngetarang iraga nyalanang spiritual. Ane sai dingeh di patuakan, pisagane ngorahang:

“Eda uyut! Kanggoang di dori kisi-kisi, ia anak lakar dadi Pedanda Baka!”

IGA Darma Putra

embas lan magenah ring Bangli. Kakawiannyané kawedar ring makudangkudang média, minakadi Bali Post, Pos Bali, Tatkala.co, Suara Saking Bali, miwah sané lianan. Ngamolihang Hadiah Sastera Rancage 2018 antuk cakepan

“Bulan Sisi Kauh”

Isin Gumi

tued

I Gusti Lanang Sutéja Naréndra

Dugas enu raré....

Luh Stevy wélanga tekén bapané, ulian meplalianan di bet-beté, alas gelagah di durin umahné.

“Eda ditu meplalianan! Bahaya!”

“Bahaya kénkén Pa?”

“Tusuk tued nyen!”

“Kénkén yén tusuk tued?”

“Metatu. Yén inféksi, beseh bana!”

“Yén suba beseh kénkén?”

“Badah! Nyai nyényé megenyé! Yén beseh, kembung, bisa makeplag. Bani?” kéto bapané nakut nakutin.

Suba molas tiban....

Luh Stevy menék bajang. Masekolah ia di kota, kost di durin kantor lurahé dajan marga. Suba ada telu bulan ia tusing mulih. Nak nu tréning koné. Saget ia nélpun bapané, mirib kangen.

“Swastyastu, bapa né?”

“Swastyastu. Ae. Kénkén Luh? Dadi sing mulih?”

“Aduh, tiang sengkala, Pa.”

Bapané tengkejut. Awakné prajani ngetor.

“Sengkala kénkén?”

“Tusuk tued!”

“Ipidan?”

“Suba telu bulan. Kéwala bakat saru-saru. Jani mara sakit.”

“Pantes tusing maan mulih. Dadi sing ngorahang?”

“Aduh, pedalem bapa tuyuh nelokin.”

“Sanget?”

“Sanget.”

“Suba dokterang?”

“Suba.”

“Kénkén oranga?”

“Cek lab oranga inféksi. Suba beseh makotogan, Pa!”

“Mimih... meranen tuedé. Baah tatuné. Dong sing nyai nyidang masuk?”

“Nyidang, Pa. Lawan lawanin.”

“Kénkén bisa tusuk tued, nyai?”

“

Bakat meplalianan di beté durin kos. É”

Bapané bangras.

“Suba orain, eda meplalianan di beté. Nyai sing ningeh munyi!”

“Kujang laut. Kadung demen meplalianan. Kadung kelangen.”

“Uli cenik nyai kual. Suba kelih nyansan! Maplalianan apa? Jak nyén maplalianan?”

“Meplalianan mengkeb-engkeban ajak I Madé timpal kosé.”

“Baaah.... nyai buka raré dogén. Kija aba matané, dadi bisa sing tepuk tuedé?”

“Nak suba sandikala. Suba telebteb mua. Tepuk tuedé, kéwala kadung nanceb sing nyidang ngabut.”

“Amun kén tuede nusuk?”

“Lumayan. Mirib ada telung langkat nyauh. Gedéné ada amun pati sekopé!”

“Mimih.... ambat dalem tatuné. Rokrak suba tatun nyaine! Tong... nyai jeg sing ngorta.”

Bapané maserieg ngenehang tatu panakné. Laut buin ia sesed matakon,

“Nyén nulungin nyai ngabut tuedé?”

“I Madé ya. Nak ia dogén ajak ditu.”

“

Nyén I Madé ento. Pang maan masé bapa matur suksma?”

“Tunangané!”

Teg........

Makleteg keneh bapané. Mara ia ngeh tekén unduk. Awakné ngetor, peluhné pakritis. Télpuné tutupa. Kurenané metakon.

“Kenapa I Luh, Bli?”

“Tusuk tued.”

“Mimih.... kujang laut jani?”

“Anténang!”

Kurenané bengong.

Bengong....

Bengong....

Bah ia tiwang! ***********

Pitutur mémén tiangé: yén suba bajang, eda mengkeb-engkeban. Apa buin di beté padaduanan. Bisa tusuk tued.

Corokiiiiinnnnnnn........

Cuuuubbbb......

Cuuuuubbbb.....

I Gusti Lanang Sutéja Naréndra

magenah ring Macang, Bebandem, Karangasem. Satuanyané prasida kawacén ring facebooknyané.

geguritan bangbang wétan

IBW Widiasa Kenitén

/28/

Dundun malu, sirep lupa ring pitutur, atma patut jagra, uning maring sang sujati, kéto Bagus, tundén bangun Bangbang Wétan.

/29/ Bikas ngagu, masok gedénan di malu, ngéndah ngodag-ngodag, munyi bangras nyuleg ati, cening Bagus,

ṡila ayuné uripang.

/30/

Kliad-kliud,

buka ula ngintip bikul, kedatang déwéké, awak lengit ngerok ngengkis, mimbuh mauk, mabet nawang swaran keneh.

/31/ Ipit pesu, suginin baan yéh tutur, usapin bikasé, sina ngedat uli ngipi, jemak suluh, lantas sundihin kenehé.

/32/ Singgih Ratu, tityang tambet keni tegul, Hyang Danu ṡagara, Gangga Soma nyuwécchain, jaga ruruh, anggén tirtha jroning idhep.

/33/ Uli malu, Hyang Gangga mili di dulu, tetep astawayang, matingkah inget maresik, ening danu, tanu éling kalinggayang.

/34/ Cening Bagus, gama tirtha patut tuut, lekad urip lampus wekas, twah tirtha gangga muputin patut rungu, gama tirtha kauripan.

/35/ Yukti Ratu, gama tirtha luwih agung, tirthané manglukat, nyudhamala daging ati, nyurud ayu, mawali kajati mula.

/36/ Cening Pucung, ajakin mai makumpul, sinambi ngigetang, kertha bhaṣa ṡastra Bali, sina mupuh, Gadagada tundén ngrambang. (pacang kalanturang....)

galah ngagah buah

melah, maliah ring

tangkah begah linggah, ngolah selah lidah

dirah, ngragah

sukserah sipah lekah

uyah, nyregah alas

samah, masolah

mungkah luah tlaga

wayah somah gelah

Satua Cutet

Langit lumbang galang tan paselang. Siang. Angang kapas kapuk kambang rangrang. Riang ngumbang kuntul anglayang tapaking ilang ring gaganang. Paksa paksi dara parapata magarang nangtang embang. Kupu-kupu alit putih kuning asimbang-simbang, ngrisak srining-srining asing-asing sari-sarining kemuning kembang. Ring taru dagdag macarang canggah wang mabancangbancang, kété-kété tmarérétan ngacuér dengang mangkur ding dang. Kampid kakeberang, kobér kakebérang, wang sang lanang kakabarang.

I Madé Suarsa

Wengiang, ikang tawang ébeking bintang-gumintang. Tan pakirang kunang-kunang kumarayang amurang-murang kumalanglang ikang padang ilalang. Arepniang anarung kunang

candrasasi hyang. Tan hanang kapihalang jua sabenang. Sami terang, sami galang, sami gampang, suami menang. Tan panantarang sapanginang canang...

Surya bebel, bulan ucel, bintang taranggana mapepel mapesel masepel. Angin nglinus macedem tan kahalem, tumpel tampel gulem tebel magibel, maubel-ubel sat tan pasibeh ngemu sabeh. Sayan katah toya mapupul ring tangkah Gdé Lila angeseh. Munggah-munggah ngébekin sirah, nyusup ring selagan paningalan gerah. Sabeh maliah labuh ring lebah tangkah.

Mepes yéh paningalan ngahngah ring kursi roda nandang jengah. Sakepah tan wénten manahnyané nunas asepah. Tan sah ngajiang somah, paksa ipun ngelekang bubuh bélék-bélék tambis ngutah ngluah.

“Suba tombaang tiang, Beli sing perlu sai-sai sebet buka kéné, apa buin misi ngeling!”

“Jengah Beli tekén awak padidi, nepukin Luh puntag-pantig lemah peteng ngalih gaé. Kéné san ja lacuré dadi jlema.”

“Kemiskinan bukan untuk ditangisi. Kadén Beli sai ngorin tiang kéto.”

“Beli tulén sampi lung, medem kin ngamah dogén.”

“Da ngraos kéto Beli. Tanggung jawab adané. Ipidan Beli lepah-lepuh magaé, jani tiang ngelah tugasé.”

“Sing pantes benya awak luh, kema-mai lemah peteng maburuh ngalih gaé.”

“Yan sing tiang magaé, dija ngalih pis anggon meli ubad? Da Beli sebet! Tiang bisa kok ngaba awak. Jani Beli suba madaar, tiang kal pesu malu kejep. Soré tiang teka.”

Semu semi pajalan idup Gdé Lila ring bumi. Semu, keni baya marga sengkala, matemahan tan pakala ring kursi roda maplangka. Semi, sangkan susatia somah nyinahang manah mucah rajah tamah mapatibrata ring laki lalu larah jroning umah. Rumasa bangga ngawé tusta, sayan suasta.

Déwa ratu utama sekala niskala ring jaba ring jero daging manah ring

tangkah Gdé Lila madrebé somah. Ring jaba sekala, tangkah somah mabuah begah, ngawé rena glayah-glayah ngemu sepah ngemu sepah antuk layah. Ring jero niskala taler banget melah, sayang tan telah-telah.

Yadiastun ngraga malangkah ngrereh rupiah, ngayah somah wantah ring kursi roda masadah, amatra tan wénten manah somah ngéndah. Tangkah melah ring sisi ring tengah, nyegerang malih salangkah-salangkah. Mangen-mangen

Gdé Lila pacang gelis ngagah buah melah ring tangkah begah somah gelah.

Sirep raré, Luh Laksmi sampun lelep masaré. Gdé Lila nyréré, ring betekan batis ipuné anaké istri makalé nylepetég mélé, saking kenyelnyané maburuh manting ngumbah ring saumah-umah tan pariwangdé. Kapeluk sipah somahnyané, kaseluk kantos gépé grapa-grépé. Nguyak, nanging tan kantos ngrusak bulun rasé, tan kantos ngrisak jénggot wré.

Alon-alon katingtingang mangda sida masaré ngandang. Gdé Lila manreng mandang sipah somah kembang mapadang lantang. Arep kagurayang nanging kawandéang, antuk ring somah lintang sayang, yadiastun déréng janten Luh Laksmi tan arsa kagurayang. Gineng gining karasayang, mapi-mapi tan ngendus ngedusang. Luh Laksmi jangkep tan makutang, nyelap amurang manah ning kang ayam panggang, mangda somah sida ngrasayang senang grayang-grayang.

“Luh Luh. Apa ya kadén lacur benyané ngelah somah Beli. Beli patutné ngalih gaé ngamertanin Luh, né malah Luh pontag-pantig ngalih gaé apang ada amah Beli. Manian yan suba beli seger, Luh sing dadi kéné bin.”

Gdé Lila lila asesambat asawang-sawang, sué tan pabantang. Sareng kalih nylempang, kantos jagaté mawali galang, napetang somah sampun ilang. Grayang-grayang ngrépé kursi roda samping ranjang, ring natahé nunas téja terang.

Saking kamar mandi ngawé kadaut, nyelap wantah mabalut cerik anduk gantut. Nepu nyrangcang nyaruang barang sané kakaput. Kedeng menék kedeng tuun pada ngalah, bongkol bokong sinah, gémbol nyonyah ngenah. Luh Laksmi nampekin somah sedek nginyah, ngrereh ai ring kursi roda ring natah. Ngelap somah saking suku kantos sirah, tunggang-tungging nguntul nungadah, busan-busan ragané mabungkah.

Kabusbusang kamben baju clana sané kantun neket. Somah anget, nyapuhang toya anget ring raga anget, sané nguni-nguni mawali inget. Ngelap ngurutin somah bincuh, busan-busan Luh Laksmi menahin anduk tambis runtuh. Tambis nungkruk mangda tan labuh, tan pajamuga Gdé Lila nyregem paa somah ébuh kukuh. Gdé Lila rikah-rikuh, Luh Laksmi tan singkuh paané peluh-peluh kasentuh, nyihnayang raras waras sayan tumbuh. Gdé Lila lila nyantos somah rauh saking maburuh.

“Beli, tiang kenyel sajan. Tiang ngebah malu akejep dogén nah. Binjep tiang ngurut Beli, suba beliang tiang lengis urut.”

Masaré ja Luh Laksmi sat nelasang leleh nyal rinasa awaknyané. Tan kapialang nylempang ngandang sakadi matangtang perang. Luh Laksmi tenang, Gdé Lila tegang. Luh Laksmi uyeng, Gdé Lila uyang. Bukit tangkah somah nangtang, bibih akidik enggang, katon lidah marangsang. Gdé Lila nyungsang mangurayang bukit tan mayang-mayang. Ngusap-usap sirah somah kasayangsayang, lédang ongkara ngadeg murang ongkara sungsang, matemahan ongkara temu muka kembang kambang.

Luh Laksmi bimbang rumasa iwang. Jagat sampun nrangdang, ipun kari nylempang, somah tan karambang yén dija malanglang. É é é malah di paon ngaé yéh anget ring dandang, dingin-dingin manjus toya anget mangda tan gesang. Ngracik kopi gula nyeduh kolongan paningalan cedang galang. Tan kamanah antuk Luh Laksmi, somahnyané grayang-grayang, sida sada gancang. Punapi antuka tedun saking plangkan kursi roda kasayangang. Nékat. Saragsorog ring kursi roda, makarya toya anget nyeduh wédang, sapisanan anggén manjus pasemengan nyandang.

“Aduh Beli nékat sajan. Ngoyong Beli ngoyong, tiang ja nyeduhang Bali kopi. Beli ngoyong dogén!”

“Mabalik won atié ngoyong.”

“Dija Beli maan taluh né?”

“Pangina mataluh telu, juang Beli sik.”

“Nyidang Beli nunggah-nunggah lenggatan.”

“Ba Luh. Beli ba nyidang nunggah.”

Karasa wénten tingkah nunggah-nunggah munggah tangkah, mlekur saking ungkur, ngudir saking gigir. Kesueng-kasieng bayun Luh Laksmi, jering-jering bulun kalongnyané. Alon-alon mungkah paningalan, mapi-mapi leplep, malih kakidemang. Kabanggéang galah somah ngagah buah melah maliah ring

tangkah begah linggah. Tangan-tangan pongah somah mapindah ngrundah

sipah lekah pakeh uyah. Manah Luh Laksmi ngawit goyah, nragtug ring

tangkah, rikala kaogah kabadinggulingang somah mapadu tangkah.

Durung polih masadah, bibih kejem kajamah, selah lidah ngolah lidah. Tan sah Luh Laksmi sayan gelisah. Lahru kangkang tinibanin udan sawengi basah pasah, sué tan polih upah, nadak keni sepuh sepah. Luh Laksmi sayan gerah, uh ah uh ah, ritatkala somah nyregah alas samah. Punyah masolah mungkah

luah samudra onyah, nyékah telaga wayah. Luh Laksmi nyerah kalah katimpah

katumpah katimpuh katampah somah gelah.

091122

Wates

saking wates gumi siki puniki

wantah jengah masisa

sabilang éling ring ratu

nyapnyap yukti

sakadi bikul ubuh

tedun mangkin wenginé puniki

ring jerih sané ngepung sabilang bucu

ring wates karang anyar lan sétra

Chekoslovakia, 1913

Gendingan Buung

niki lengkara ping ungkur gegendingan buung

‘kampid-kampid tukung sané ulung tan patulung

di arep kukun-kukun batis ngaplug témbok peteng’

pacang kagendingang setata

nganggé engkagan tatu

némblés uli tanggun pasih

sané urung kasilemin

kedis selem makeber

ka dalem petengé

niki lengkara pamuput gendingan

sané nénten naenin kagendingang

Leiden, 1916

Patapan I Belog

jalan majalan terus majalan nganti lung entudé

sing dadi nolih kuri ka samping apa buin

kidemang matané sabilang nepukin pateluan

majalan terus majalan nugtug keneh i batis

di muncuk apin sétrané ditu marérén kejep

utawi pules terus pules setata leplep

sing dadi geleh nguyang ngipi apa buin

kidemang matané sabilang makita kedat pules terus pules nganti tipis galengé

di dasar galengé ditu ngalih galang

Leiden, 1917

Kacerita ané malu ada anak ngubu ditu di tegalé linggah ajaka dadua. Ia, maadan Ni Ranjani tekén méméné. Ia tusing nu ngelah bapa, tur tusing ngelah nyama lénan. Geginané sesai-sai tuah matanduran di tegalé

Ri tatkala semeng dina purnama, kacerita koné méméné Ni Ranjani nyakitang basang. Ni Ranjani orahiné ngalih dadong balian ditu di duwur bukité kangin apang teka mai ngubadin. Umah dadong balian koné maraab ambengan.

Gelisang satua, apang tusing makelo méméné nyakit, ngénggalang Ni Ranjani luas ka umah dadong balian. Nganteg di umahné ento dapetanga suwung gamblang. Gelar-gelur ia majeritan, tusing ada anak masaut. Disubané kéto, majalan buin Ni Ranjani nuju umah ané buin besikan ané maraab duk. Ni Ranjani majeritan ditu. Lantas ada anak masaut uli tengah umahé. Jeg suba demen atiné Ni Ranjani sawiréh katemu ngajak dadong balian.

Tusing ada buin akijepan, jeg pesu suba anak tua maawak gedé, bok magambahan gémpél, paningalanné nelik, munyiné gedé gora, nyonyoné lambih, basing gedé, batis mabulu, tur kuku lantang. Makasiab ia Ni Ranjani.

Masaut anaké aéng totonan, “Yéh nyai Ni Ranjani, kénkén tumbén nyai teka ka pondok dadongé?”

Masaut Ni Ranjani, “Kéné dadong, dadong apang mulih ka umah icangé, wiréh mémén icangé sakit basang. Dadong jani tundéna ngubadin.”

Dadong basang gedé nyautin, “Nah lamun kéto, nyanan dadong kemu ngubadin mémén nyainé. Satondén nyai mulih, aliang malu iban nyainé tebu. Tebuné totonan daar, tur ampasné sepahang di jalan. Nyanan ampas tebuné totonan lakar tuwut dadong apang neked di umah nyainé.”

Kacerita suba Ni Ranjani nuwutin pamunyin dadong totonan. Satwa di gelis, neked lantas Ni Ranjani di kubuné sambilang makpak tebu. Matakon méméné, “Kénkén Ranjani, tepukin nyai dadong balian?”

Masaaut lantas Ranjani, “Tepuk, Mé, né cang ngidih tebu orahiné makpak, tur ampasné lakar tuwuta tekéning dadong balian apang nganteg mai.”

Mara madingehang kéto makesiab méméné, “Dadong balian anak tusing ngelah tebu. Umah ané cén ojog nyai?”

Masaut Ni Ranjani, “Paling malu icang ngojog umah maraab ambengan, kéwalé suwung mangmung. Lantas kema cang ka umah ané maraab duk. Tepukin ia I Dadong balian ané aeng ditu.”

Mara kéto, nyangetang ngetor bayuné mémén Ranjani, “Tusing ja dadong balian, ento tuwah Dadong Raksasa ané demen ngamah jelema. Kénkén baan iraga mengkeb jani, sinah suba nyanan iraga lakar tadaha ajak Dadong Raksasa.”

“Nah, kéné dogén Ranjani, nyai menék ka punyan nyuhé di samping séméré, ditu mengkeb apang tusing tepuka tekén Dadong Raksasa. Mémé mengkeb di betén palungané. Apang tusing tepukina tekén Dadong Raksasa.”

Disubané nyaluk sanja, Dadong Raksasa teka kema ka umahné Ni Ranjani nuwut sepahan tebu tuni. Pejalané keteb-keteb, nyonyoné kaplik-kaplik, tur giginé kretek-kretek. Kacerita anteg suba Dadong Raksasa ditu. Dapetanga suwung.

Majeritan ia I Dadong Raksasa, kéwala tusing ada ané masaut, krana ia ajaka dadua suba mengkeb. Ni Ranjani nepukin Dadong Raksasa uli duwur punyan nyuhé. Bayuné ngetor. Kéto masih méméné ningeh gelurané Dadong Raksasa, kéwala ia tusing nepukin, sawiréh ia matekep palungan.

Disubané sing ada anak masaut, negak lantas ia Dadong Raksasa ditu duwur plangkané sambil mangantosang. Sambilanga nyiksik kutu. Suba makelo ngalih kutu, jeg saget ada kutuné maleketik tur macelep ka betén palungané. Dadong Raksasa ngalih tur badinganga palungané. Mara kéto dapatanga mémén Ni Ranjani ditu mengkeb.

“Nah, né ia, bakat jani ané alih kai, jeg lakar pakpak tulangné, ambis isiné, tur cérét getihné,” kéto ia I Dadong Raksasa.

Méméné ngénggalang lakar malaib, kéwala lacur, énggalan jangkuaka

tekén I Dadong Raksasa. Ditu mémén Ranjani katadah tekén I Dadong

Raksasa. Liang buka otonan kenehné Dadong Raksasa.

Jani ia lakar ngalihin pianakné buin besik ia Ni Ranjani. Yéning bakat, sinah suba jaen bana sawiréh jadma muda. Kéto kenehné Dadong Raksasa sambilanga ngantosang, ia ka sémér ngalih yéh, ngilangang bedak. Ditu ia negak di tuwed nyuh, tongosné Ni Ranjani mengkeb. Di samping séméré

tongosné I Dadong Raksasa negak, ada pané misi yéh tur kesinarin tekén bulan. Lantas tepukiné lawat Ni Ranjani ada di muncuk punyan nyuhé. Ditu lantas I Dadong Raksasa ngelunin Ni Ranjani apang tuwun. Kéwala ia tusing nyak tuwun.

Dadong Raksasa lantas mamunyi, “Nah lamun nyai tusing nyak tuwun, lakar jeritang ia I Klabangapit, céléng dadong ané gedé galak tur demen ngelumbih punyan nyuh.”

Bah lantas punyan nyuhé totonan. Kajagjagin baan I Dadong Raksasa. Kéwala sing bakatanga Ni Ranjani. Tusing tawanga wireh Ni Ranjani makecos, ka carang punyan sandat di sampingné.

Dugasé ento, mara lantas makleteg ia Ni Ranjani, ia ngelah cicing gedé, gémbrong maadan I Gringsing Wayang. Uling punyan sandaté Ni Ranjani ngelunin cicingné I Gringsing Wayang apang teka ngutgut céléngné Dadong

Raksasa. Mara majeritan acepok, suba saget nengok, tur jeg suba dapetanga nyarag céléng gedé totonan, lantas mati. Disubané kéto, Ni Ranjani ngorahin

tur ngandupang apang ia I Gringsing ngutgut I Dadong Raksasa. Lantas Dadong Raksasa dengel-dengela, gutguta kanti telah awakné matatu, tur getihné mabrarakan, laut Dadong Raksasa mati.

Disubané kéto, mara Ni Ranjani bani tuwun, tur maekang I Gringsing Wayang tekén méméné ané suba mati. Ditu Ni Ranjani sedih katinggalin méméné. Nunas ica ia dumadak méméné apang buin matunggalan awakné tur buin idup. Maré ia mamunyi kéto, dapatanga méméné jeg buin idup. Demen pesan atiné ia Ni Ranjani.

Suba jani gelisang satua, bangkén Raksasané kapaid ka bangbangé tur katanem.

Ngawit uling totonan sayan-sayan sayang I Ranjani tekén cicingné I Gringsing Wayang, kéto masih méméné.

Nah, kasuwén-suwén mapitutur méméné tekén I Ranjani kéné, “Nyai ngancan kelih, luwungang ningehang tur ngeresepang pabesen anak lén.

Apang tusing pelih nampi pabesen lakar nepukin baya buka jani.”

Artikel

ngortang seni #5: 2023, Apa Seni Ané Baru?

Déwa Gedé Purwita – Sukahet

Jedar-jeder, kebyah-kebyah langité dugasé peteng di tanggal 31

Désémber 2022 nuju pergantian tahun. Aké nyodog di jineng, metimpal wine a botol kéwala inum ping telung gelas. Tolih asbaké kudang roko kadén suba bakat enjitin, morbor bunguté, klepus-klepus. Dipetengé to, metimpal gerimis laut mekeneh, apa ye lakar ada di seni rupa ané lakar teka?

Yén keneh-kenehang buin, asané seni di Bali nak monto-monto gén. Ada komunitas seniman ané ngaé pameran, ada ané gradag-grudug ngalih koalisi, ada ané ngaé penelitian ngasilang buku, kampus-kampus seni tetep masih montoan, mahasiswa teka ke kampus, doséné ngajahin, ngemaang tugas, laut mulih. Dinas-dinas ané menaungi seni masih momtoan gén, rasayang sing ada

inisiatif baru, laut begbeg ngortang budaya adiluhung kéwala laksana sing ada melénan ajak ané suba-suba liwat.

Yén ngortang seni, sejarah seni rupa Bali masih tusing pegat-pegat satuané yén sing ngortang I Gusti Madé Deblog pasti ngortang Pitamaha, asané kapah je ngortang seni rupa Jembrana, Karangasem, Buléléng, Bangli. Lantas apa ané baru di seni rupa Bali? Né ané perlu kenehang, ngidupang atmosfir kesenian

Baliné tusing je nyidang uling di kebijakan doén kéwala sing ada action ané saja, kéto masih senimané ané tusing nyidang uling megaé dogén di studio atau

gradag-grudug pameran kelompok kéwala sing taén mikir ngerumusang

sesuatu uling prosés megaéné, penulis ajak kurator masih harus mesuang

karyané ané tusing je nulis dogén di paméran seni kéwala sing taén ngerumusang pikirané kanti nyidang nyujukang téori-téori. Apa karanané

kekéto? Tegarang metolihan ke Gumi Kauh, apang johan bedik, sepalanan ke Eropa ke Amerika, lekad karya-karya seniné ditu sibarengan ajak lekad

pemikiran, teori, wacana baru ané gaéne uling rumusan-rumusan pemikiran ané suba liwat uling di leluhurné. Ento nyandang san contoh, seniman tusing wanén di ngasilang karya, kéwala wanén masih mesuang satua, mesuang pernyataan.

Misalné di Jepang anggon wakil Asia, ipidan ada gerakan seni madan Gutai ané menganalisis proses megaéné Jackson Pollock sampai ngerumusang politik kebudayaané pasca 1945 ané dadi penanda kebangkitan seni rupa Jepang disubané kalah di perang Pasifik. Ada masih biin uling Rusia, madan Ilya ajak Emilia Kabakov karyané mejudul “The Man Who Flew Into Space

From His Apartement”, pemikirané futuristik kéto masih karyané ulian negarané di tahun 1960an demen ajak pengetahuan luar angkasa. Tuah je dini mula tantangané raga di Bali, Indonésia, ané sesai ngorahang ngelah ajak ngewarisin budaya adi luhung asané sing bergerak maju, mungkin ulian bes seleg megaé, atau pelih baan ngartiang “depang anaké ngadanin”.

Koné jani Era Bali Baru? Saja, uling telung tiban asané slogan to dingeh, sesai anak gedé-gedé ngorahang kekéto, kéwala majuné sebatas di infrastruktur masih pocol yan tusing sandingan ajak SDM jelemané, di seni rupa Bali asané SDM né kéweh maju apalagi infrastrukturné, cara tusing ada proyéksi jelas politik kebudayaan ané di bidang seni lakar kéngkén bin mani puan. Nak nu dogén pemikirané maan ngaba karya seni atau péntas ke luar negeri jeg lantas gedé angkabané, cara dugas tahun 1930 péntas di Perancis banggaine padahal ento proyék paméran kolonial. Yén cara dugasé Documenta

15 né di Jerman mare je lén kesyabé ané Ruang Rupa Jakarta terpilih dadi

Direktur Artistik né, diastu pro-kontra kéwala tusing buin wacana kolonial ané ngenén kéwala kéngkén wacana Indonésia ajak dunia to besikange di betén wacana “lumbung”.

Jani iraga ajak makejang, berharap ajak ané muda-muda pastiné, soalné ané suba tua pemikriané suba mentok, kéto-kéto doén uling di karya/kréasi. Asané tusing bani nyemak résiko. Apa buin jani ané muda-muda suba manjaange tekén ebekné conto-conto karya seni ané masliweran di smartphone, catatané paliunin memaca paliunin ada ngorta-ngorta ané membangun daya nalar. Pang sing pocol masih ada slogan “Bali Pusat Seni Kontemporer Dunia”, kéwala ajak megaé jeg pules.

Nah né suba balin galahé suba léwat jam 12 peteng di tanggal 31 Désémber 2022, pasti suba jani adané taun baru, telahang malu oyot wine né, suud dusdus bunguté, lan nyongsong matan ai 2023, dumogi je lekad pemikirpemikir ané baru gréss.

Pohmanis, 7 Januari 2023

Makejang suba ngelah paduman nasib. Kéto masi buka tiang. Dadi sandal jepit. Manyama ajaka dua. Uli pabrikan tiang pesu buka

kéné. Tusing patuh tekén timpal tiangé. Sirah tiangé bénjo.

Ukuran tiangé délapansetengah ukuran ané anggona tekén anak cerik. Tiang oranga kesalahanproduksi. Liu ané suba nyemak

tiang lakar belina mara nepukin sirah tiangé, ejanga tiang malih. Makelo-kelo tiang nongos paling sibetén. Katumpuk, katandés, kajepit buka adan tiangé. Sandal jepit.

I Nyoman Sutarjana

Timpal-timpal tiangé suba liu ané kabeli. Tiang dadi kakedékan wiréh ukudan tiang tusing normal. Yén istilah manusané tiang kena body shaming. Lénan tekén ukudan, warnan tiang masih soléh. Warna tangi, ané kasambat warna janda. Mirib anak luhé tusing enyak meli ulian takut oranga janda. Anak muani masih tusing ada meli sawiréh takut oranga cara anak luh. Plastik ané mungkus tiang suba lecek bolong-bolong. Warnané beru ulian pepes sentér matan ai.

Tiang setata kabully kasambat produk gagal, sandal lapuk, tusing laku. Rak kacané buka nyinahang undag-undagan tiangé. Ané tegehan undagané madan sandal selop. Ia nongos barengan ngajak barang-barang ané penting luiré sabun lan obat-obatan. Sandal selop pepes ngwalék tiang. Ia ané mawarna bungah tur awakné malakar aji bahan kelas satu. Kéto masi ané ngidang meli ia sinah anak sugih. Sandal selop pepes saluka nuju mabakti ka pura. Yén sandal buka tiang pepes anggona ka carik madaki-daki. Dikénkéné tiang sampara anggo ngulah kuluk. Jelékan buin, tiang anggona ganjel méja ané batisné génjong.

Rak kacané nongos marep badangin ané ngadakang tiang élah mabalih solah manusané. Di mukak tokoné ada sekolah, sabilang semeng tiang mabalih

murid-muridé majalan masuk. Manusané karasa patuh buka tiang. Ngelah undag-undagané, sugih kalawan tiwas. Ané sugih ngidang masekolah tur mapanganggo kedas. Ané tiwas buka anak cerik ané tepukin tiang. Panganggoné daki, muané ocem, awakné berag, pajalané téjlok-téjlok, masapatu uék. Ia ngandong tas ané misi botol plastik. Ia majalan masuk sambil munduhin luu plastik.

Klangen tiang nepukin anak cerik punika. Setata dadi korban body shaming lan bullying. Ia kasambat panak pemulung setata katundung ulian pajalané. Pageh anak ceriké punika nudukin luu plastik sekadi mayasa. Cara jani jumlah luu plastiké liunan tekén manusané. Makejang barang manusané malakar aji plastik. Yén sing urati mani puan guminé bisa ebekin luu plastik. Iraga mapiutang yasa sareng anak ceriké punika.

Mulih uli sekolah tiang nepukin anak cerik punika nulungin mémé bapané nyorog grobak. Grobaké liu misi rongsokan sekadi besi lan plastik. Ia nyorog grobagé kasarengain sandal jepit ané tipis tur ngeling-ngeling tamis-tamis pegat. Luu plastiké tepuka buka nepukin merta, di samping tiangé ada bak misi luu. Anak cerik ento saat nyliksikin luu. Idupné buka magantung sareng luu plastik.

Nasib tiang dadi sandal jepit tusing melénan sareng anak ceriké punika. Setata katanDés, milu ngasanin pamanes idupé. Tuuhné enu muda tusing antes rasané ngasanin pait idupé. Seleg ia nyalanang pakaryané, tusing sanget ia rungu tekén munyin timpalné. Widhiné setata ngicénin merta buat sané seleg mautsaha.

Sanjané anak ceriké ento ka warungé ené lakar mablanja. Peluhné enu nyrétcét, bin akesep ia marérén ngitungin pipisné buka takut kuangan. Munyiné banban, tumbén dingeh tiang. Anggek-anggek ia ngelunin dagangé.

“Mé, tiang meli baas limang kilo.”

“Mara suud megaé, Dé? Ada biin ané lakar beli?”

“Mara Mé, astungkara tiang maan pamelin baas. Lengis ajak uyah, Mé.”

“Tusing meli bé, Dé?”

“Méméne suba ngalih jukut paku di tukadé anggona darang nasi.”

“Ené aba taluhé, Dé. Pedalem mémé nepukin Madé. Bapané enu gelem?”

“Nu Mé. Yén dingin asmané pepes kumat.”

“Ba beliang obat, Dé?”

“Tondén, Me. Tiang tusing ngelah pipis.”

“Dé, jemak ditu lengis urut di rak kacané! To malu anggo bang bapané!”

“Suksma banget, Mé. Suba olas tekén tiang.”

Lega kenehé mireng munyin dagangé. Tiang ngacepin apang sida kacundukin sareng anak ceriké ento. Rikala rak kacané kabukak, mabriuk sandalé ulung. Tiang milu ngulungang raga. Mogi-mogi dagangé ngingetin tiang. Apabuin pacang baanga ka anak ceriké ento.

Saja buka ané acepang tiang. Dagangé tau tur nyemak tiang. Pedasanga nolih awak tiangé. Ia mapineh-pineh nanging lacuré tusing sida kelidin tiang buung matemu sareng anak ceriké ento. Ejanga tiang di keranjang ané matulisan diskon 70%. Anak ceriké ento ngejohin tiang. Sebet ané karasayang.

Di keranjangé tiang tusing padidi, ada baju, celana, sepatu, lan topi. Ento ané ngaénang tiang tusing sanget sebet wiréh ada ané nasibné patuh buka tiang. Barang-barange masih bisa nerima tiang, tusing ngabully lan body shaming Bareng-bareng tiang ngrestiti apang ada ané meli tiang. Sinah tiang dadi barang maguna. Swéca Widhi ada tangan ané ngambil tiang.

“Nguda meli sandal jepit ukuran anak-anak luh?” kéto dagangé matakon sareng murid ané suba bajang miriban suba masekolah SMA.

“Tiang meli duang pasang, Mé. Lakar anggo kerajinan tangan. Tiang lakar ngaé vas bunga.”

Anak luh ento raris ngaba tiang mulihné. Lega kenehé wiréh ada ané nerima tiang. Nanging jelék bayune wiréh tiang lakar anggona vas bunga. Sinah lakar getepa awak tiangé. Lacur mula nasib tiangé tusing taén nepukin aget.

Di kursi sofané tiang ejanga. Anak luh ento menékang ka lantai dua mirib

lakar maganti baju. Ia ngelunin pembantuné apang nyemakang gunting lan tiuk.

Kénkén kadén uli betén sofané teka kuluk gémbrong makecos tiang dangala

malaib mauber-uberan ajak timpalné. Awak tiang telah matatu.

Pembantuné milu nguberin lantas nyemak tiang. Kedasina awak tiangé laut

baanga anak luhé ento. Tiang sebengina wiréh awak tiangé telah matatu.

Sampara lantas awak tiangé ka kuluk gembrongé. Wiréh tusing maguna tiang entunganga ka tukadé. Dadi ati pembantuné ngentungang luu ka tukadé.

Sera panggang, sera tunu. Nasib tiang tusing malénan. Jani tiang kaluntalunta di tukadé sareng luu plastiké. Ada ané nyangkét di akah kayuné. Ada ané nyangklek di batuné. Buin akesep ujan sinah tiang ngempetin pajalan yéhé.

Tusing buungan tiang lakar ngaénang tukadé blabar.

Abing tukadé misi entik-entikan, ada masih ané suba kawangunin villa. Buin akesep sinah telah abingé misi villa. Torisé Démen maumah di abingabingé. Di tebénan ibu-ibuné seDék itehé manting baju lan prabot-prabotan. Cerik-ceriké manjus maumbang-umbangan. Sayan karasa liu kagunan tukadé.

Miribang ené madan pajalan nasib tusing ada sané narka. Ulian pageh tiang nyalanang kasengsaran. Tiang sida matemu sareng ibu sané iteh ngalih jukut paku. Ibuné ento nudukin tiang, awak tiang kasayang-sayang. Neked jumah tiang serahanga ka anak ceriké ané pepes acepin tiang. KenDél atin tiangé kanti ngetelang yéh mata.

Januari 2022

I Nyoman Sutarjana

embas ring Gianyar, Bali tanggal 21 September 1986 makarya dados guru ring SMA Negeri Bali Mandara. Meled nulis sastra Bali modern sangkanin piteket Ajik Weda Sanjaya lan Bapak Raka Kusuma

Ring Pura Rambut Siwi

ring utama mandala tiang masila

ngentegang manah

ngulati santi

iriki Danghyang Nirartha

nguni ngenahang rambut akatih

sadurung matulak

nglanturang pamargi

nyujur Swécapura

nyakupang tangan tiang

ring selaning lelata

masaa nempuh suara segara

nunas waranugraha

Ring Pura Jagatnatha Yogyakarta

kaiter sipeng madyaning wengi

ring arep padmasana tiang masila tiding

tan pasekar tan paasep

pawana masayuban ri kala

lintangé nyunarin akasa

wusan Mantra Gayatri kauncar tan pasuara

kadulurin tresna saking telenging manah

purnamaké sané nyiratang amerta

saking ambara?

Mantra Gayatri

Ida uning napi sané wénten

ring sajeroning ati

sering wilangin tiang

aran Ida sané luwih

ri kala osah maplisahan

nénten naen tiang maselselan

yadiastu tangkahé karasa sesek

ri kala wénten kabrebehan

dwaning mantra sané kauncar

prasida ngardi manah sumringah

mantra suci Gayatri

yukti utaming mantra utama

Makudang Purnama

makudang purnama sampun tiang

nguncar mantra nyabran rahina

ring linggih Ida ngunggah cawan

nadah waranugraha

sané ngetél satmaka getah

saking carang taru buwana

makudang purnama sampun tiang

ngrastiti bakti ring Hyang Embang

mapangapti mangda Ida ledang

mapaica galang apadang

nyupat kabrebehan sané ngandang

Nénten Éling

nénten éling tiang

yéning naen ngréka lampah

duk kari doh irika

masikian ring karana sarira

nénten éling tiang

napi naen ngragrag jagi malajahin napi

iriki ring mercapada

sampun biaparaké manah tiang

kapanggang antuk panes uripé

déréng amongkén nabdab pamargi

tan kawilang pariselsel sampun nangkeb

Ketut Sugiartha

meneng ring Belayu, Tabanan. Kakawiannyané kawedar ring makudangkudang média minakadi: Bali Post, Pos Bali, Media Bali, Nusa Bali, Suara

Saking Bali miwah sané lian.

Satua

“Nyampat-nyampat maceniga, mabanten sumping keladi, (2x)

yén ané nyampat dadi déwa, né mabanten dadi dedari” (2x)

IBW Widiasa Kenitén

Bapa Sunia demen pesan ningehang cecangkriman anaké ané mabanten dugasé ené. Ia ngrasaang ada ané luung macelep di bumbung getihné. Mirib baan tumbénné dingeha ngranayang. Ia nulis apa ané munyianga tekén anaké ento. Buka ada déwa tedun, buka ada dédari tedun nyaksiang aturané. Tepukina pada liang anaké mabanten. Ada ngélogang awakné buka anak ngigel. Ané nyampat, misi ngigel masi. Kramané ané ada ditu mrasa bagia nepukin anaké magending buka kéto. Ulian gendingan ané saderana ento ngranayang liang. Lelehé magenti baan rasa bagia.

Kanti peteng Bapa Sunia ngenehang gendinganné ento, “Dadi ané nyampat dadi déwa. Apa ya ento?” Bapa Sunia makeneh-keneh, “Mirib kenehé apang

bersih, kenehé ané tusing anut patut ilangang, apang tinglas ening apang sida makeneh déwa. Keneh ané nguripang rasa melah. Rasa ané matéja buka déwa. Téjan kenehé lakar ngenah uli paripolah ané nganutin sesana. Ané mabanten apang dadi dedari. Dedari ané jegég, apa ya ento? Sinah sing Dedari Nilotama ané dueg ngoda sakancan tapa. Sinah tusing dedari Supraba ané sambatanga lek-lekan di kakawin Arjuna Wiwahané ané karipta olih Mpu Kanwa. Idepé apang jegég ayu, ento aptiang murip sabilang dina di kenehé.” Bapa Sunia matakon padidina nyautin masi padidina.

Prajani Bapa Sunia ngaukin somahné. “Luh, manian yén di subané lekad panaké, jalan ja Putu Wédari adanin,” kéto Bapa Sunia mamunyi tekén somahné.

“Dadi kéto, Bli? Sing dadi adanin ané lénan. Baet rasaang tiang adanné ené. Adan anak bisa masi ngraranin.”

“Sing, bli meled nglah sentana makeneh melah buka dedari.”

“Sasukat inget widyadariné mula dueg ngoda, Bli. Tiang tusing nyak sentanan tiangé dadi anak ngoda keneh anak lén. Apabuin di subané ia bajang lantas geginané pragat ngoda dogén. Ento ané sing demenin tiang, Bli. Aptiang tiang, apang dadi sentana ané bisa maparipolah ané madan beneh.”

Kenyem Bapa Sunia mara ningeh munyin somahné buka kéto. Geluta somahné buka dugasé mademenan ipidan. “Madak apang misi apti-aptian iragané.”

Lekad belingan somahné, Bapa Sunia ngadanin sentanané Putu Wédari. Aptianga apang keneh sentanané buka widyadari ngleganin isin Indralokané. Kenehné dong gumanti melah pesan. Sayan-sayan nrisdis pajalan sentanané ngelihang. “Sentana mula ngleganin keneh,” kéto Bapa Sunia ngrimik sambilanga magending. Ia masi mrasa lega maan ngrasaang dadi anak tua apabuin makelo gati mara nyidaang nglah sentana. Ada limang tiban mara nyidaang beling somahné. Akudang balian, akudang dokter suba jagjgagina apang nglah sentana masi tusing nyidaang beling. Kanti taén ia nglah keneh

lakar meras sentana, kéwala jejeh. Mirib suba panemaya, swéca Suungé nyidaang somahné beling gigis kendelné. Béh dugasné tondén beling somahné liu pesan pakrimiké di sisi, ada ngorahang bekung, ada ngorahang jubeng.

Sakéwala pangrastitiné di kemulan tetep gati jalanina apang nyak numitis kawitanné di somahné. Misi ngrieng kéné Bapa Sunia, “Yén nénten kayun tedun, sira pacang ngaturang canang ring singgih Bhathara?” Apa krana pangrastiti, apa krana mula suba patemonné ngranayang? Ané jani, suba kaswécanan.

Lanus pajalan idupné Putu Wédari kanti kelih buka jani. Reramané

ngaénang semayut menék kelih apang anut pajalanné dadi anak bajang. Apang bisa ngaba kabajangan, apang bisa ngisi kasmaranné. Di bajangé mula

Sanghyang Smara-Ratih ané nglingganin. Yén suba kalingganan ento, patut tyaga tekén awak apang tetep melah kabajanganné. Di bajangé galah melah anggon malajahang awak. Uli mlajah nawang pangajah-ajah. Nawang rasan sastra.

“Bli kija I Putu?”

“Ituni ngorahang sig timpalné. Koné mlajah ditu.”

“Dadi pepes gati I Putu mlajah sig timpalné? Dadi jumah sing demen mlajah? Mirib melahan mlajah di umah timpalné?”

“Timpalné. Ituni ngalih mai.”

“Nyén timpalné ento?”

“Nyén kadén Bli. Sing bakat takonang. Anak muani.”

“Badah. Ené suba ané jejehin bli. Dadi timpalné sing tawang adané?”

Kanti sanja Putu Wédari mara teka. Reramané suba ngantiang di arep umahné.” Kija dogén mlali? Nyén kajak ento?”

“Timpal tiangé Pa. Timpal ajak mlajah.”

“Dadi anak muani ngandéng?”

“Timpal Putuné ento Pa.”

“Melah-melah Tu ngaba awak.”

Bapa Sunia makeneh-keneh, “Dadi mrasa lén sentana jani? Tusing misi apti-aptianné dugasé ipidan. Kéto baan ngamelahang apang nyak melah dadi sentana. Ngujang dadi tusing nyak ngresepang munyi? Apa idéwék ané pelih bes gedé pinunasé? Apa aab guminé suba magenti? Apa ulian timpalné ngranayang?”

“Méméné, mai malu. Dadi bli mrasa soléh nepukin I Putu jani?”

“Suba orahin, eda bes tegeh ngaénang adan apang cara widyadari. Jani, ngindeng dogén widyadariné. Bli bes kaliwat ajum dadi anak muani.

Kanggoang biasaang dogén maangin adan. Jani, sinah suba parikrama dedari dadin panaké. Ngoda anak lén. Ia masi godana tekén kenehné. Pada-pada saling goda.”

“Ngujang sing tungkasin ipidan dugasé ngaénang adan?”

“Kalingké bani nungkasin Bli. Yén sing misi munyin bliné, lakar miyegan dadiné. Melahan mendep dogén.”

“Jani, masi tusing jumah. Pragat sig timpalné dogén.”

Makréngkang kulukné mamunyi. Bapa Sunia makesiab, liu anaké makamben nekain. Timpalné ane pepes ngandéng panakné masi bareng.

“Ngujang-ngujangin adana ené?”

Panakne nguntul. Ngetel yéh paninghalané.

Suksma Guru

Sangkaning tuhu manah guru

Ngicénin sesuluh ri kala kapetengan

Ngajahin titiang sakancan pangweruh

Panuntun nyujuh kasujatian urip

Sangkaning tuhu manah guru

Mawastu titiang uning ring indik

Anggén ngruruh pangupa jiwa

Sida maguna ring jagat pada

Sangkaning tuhu manah titiang

Éling ring sakancan pituduh guru

Ten sida ngwales antuk arta brana

Sangkaning tuhu manah titiang

Ngaturang suksma pangacep pangastiti

Dumogi rahayu, Guru

(Ki Jugul, Hardiknas 2021)

Gelis Ical Ten Mawali

Malané sakti ten sida kaaksi

Sakancan jagat nglimbak ten kadi-kadi

Kantos ngawinang kabrebehan gumi

Ten sida nambakin pinungkan gumi

Wénten sané ten papakéring

Campah ten ngétang grubug gering

Ri sampuné metu manah paling

Ten pariwangdé katibénin ling

Pinungkan gumi kalintang sakti

Tan ambat-ambat gumanti ngawé pati

Jadmané akéh mati ten patepi

Pinungkan gumi cihna jagat kali

Gering pakéling Sang Hyang Uning

Trikayané mangda nirmala ning

Sangkaning éling ning ngastiti

Subakti ring Ida Hyang Widi

Uripé lantang landuh sané kaapti

Dumogi gelis ical ten mawali

(Ki Jugul)

Malajah di Jumah

Guminé jani suba wayah

Koronané ngaé makejang benyah

Pamerintahé ngaptiang apang ngoyong jumah

Tusing dadi makumpulan malali ganjah

Murid-muridé masi tusing dadi ka sekolah

Makejang malajah uli jumah

Malajah jumah tusing dadi kapah-kapah

Apa buin misi matabuh piwal ngéndah

Tetujoné apang maan nilai melah

Ngoyong jumah selegang malajah

(Ki Jugul)

Raris I Madé ngrereh supiré, janma Sasak; ipun nyuksukin, turah

mangkiné 'maltuin' I Wayan Pasek, sané ngriksain motor Mekel

Ketuté Gdé Srawana

ira adan supiré niki, Embok?”

“I Wayan, makelo sampun ka Beléléng?”

“Makelo suba, Dé. Bapa Ketut reramanné masangih gegedén koné, ada suba dasa dina jumah kauh! Ento teka Lu' Gani!”

“Uli dija Gani?” asapunika Mekel Istri matakén.

“Tiang wau usan nunas ring pasar, Mekel Istri!”

Raris I Madé midartaang ring Lu’ Gani, indik Mekel Istri ngiring I Dayu pacang ka Cakra. Sampun para istriné munggah ring motoré di pungkur, raris I Madé ring samping supiré macegleh; motoré magerung, malih ajepné sampun ngudiding manganginang. I Dayu angeb ring linggah margané, imbangang ring Bali; Ida nyingak purané alit ring delod marga. I Madé ngaturang indiké né sampun, daweg yuda kumpeniné marep ring anaké Agung Bali ring Sasak; ipun midartaang indik suradaduné kéh makelid ring pura punika. Nanging taler irika akéh kanin, keni mimis.

Ring Cakra dangin pasaré, jag nyelag kacingak antuk I Dayu pura méruné; kasuter antuk tembok bata barak, mapinti-pinti turah riin, kéngin atep pisan mapinti, tan kaseletan antuk luluh wiadin semén; aken tur asri pakatonannya, méruné nyeleg, kadi manyaksiang agung kabakten karatuan Baliné riin ring Ida Batara. Dajan marga, inang kanten saking margané, wénten balé kambang, kangin-kauh pagenahannya. I Dayu éling ring satuané ring kamandakané, duk dané Sang Patih osek ring pakayunan ‘aguling’ ring balé kambang dané,

doaning tambis telas arumjagaté ring panagara Patali sampun katur ring Sang

Prabu. Nangken raina mangda katur sarin dahané asiki-asiki.

Motoré mrarian, raris gelis I Madé tedun ngampakin para istriné jalanan motor punika.

Kenyem sawitrannya istri-istri makekalih; I Dayu miwah Mekel Putu

Sawitri rupa kadi ‘mapinta kasih’ antuk rungun I Madéné ngulanin sawitra istri.

“Anti dini, Gani!” asapunika Mekel Putu ring supiré. I Madé sareng ngranjing; wit manggisé majajar daunnya babar angin, sakadi mangulapin sang wau rauh.

Toyané ring telaga, maombakan tempuh angin; nanging doh alit ombaknya imbangang ring sagara.

Sampun I Madé kalugrain antuk sang Yogia, pacang napak ka balé kambang punika.

“Tis dini, oo, Dé? Sangkal ada kursi, dini Dé?”

“Iriki genah kerta, Tu!; genah kertané mutus wicara.”

“Ngiring, Tu; iriki mlinggih!”

“Aruh, Embok, sampunang ja, Embok! Ring motor sampun titiang med negak... Sering Mekel Putu meriki?”

“Aruh, sampunang ja ‘Mekel Putu’ Tu! ‘Embok’ cik sampun. Titiang tan wénten mambuatang asapunika... Dé, Dé, Madé ngaturin Ida ngentosin ‘Emboké’ aji ‘Mekel Putu’; nakal I Madé, sing kajak ban ngiring Ida nyanan....”

I Madé kenyem, nanging tan purun masaur.

“Enggih Embok,” asapunika I Dayu mawacana. “Usanang sampun. I Madé ten ngurukang tiang...; oo sing oo?”

“Kadong ngrawesang Kerta, Dé! Ipidan Madé nuturin I Luh Sari unduk I Ketut Rijasané di Sekartaji kénkén pamuputné, Dé?”

Mekel Putu matakén, “Napi, Tu? Sira punika Ketut Rijasa?”

I Madé raris midartaang indik punika, sakadi sampun kasatuaang antuk Nia

Luh Sari ring Suranadi dibi wenginé. Wau usan ipun masatua, raris istri-istri makekalih sinarengan matakén ring I Madé.

“Men kénkén pamuptné, Dé?”

“Tan katur antuk titiang, durung titiang polih matakén ring I Arka; yakti, Embok, yan tatasang nyandang ngrumun Ida dané anaké istri, anaké luh Bali. Rasa tan nyeneng tengah kramané marep ring anaké istri iriki ring Bali.

Punuki sampun sakadi parindikan Ni Ketut Rijasané, yan asapunika pamutus rawesé, durung titiang polih nakénang ring timpal titiangé. Sukil sayewakti punika.”

“Saja, oo Dé, agamané, nah, yan turah janiné weté totona, yan talektek bantas nambakin i janma, apang sing malaksana corah, jelé! Sing kéto, Dén?”

Raris Mekel Putu masaur, “Sayewakti Tu! Yan kamanah antuk titiang tambet, i janma kekalih patut nggamel agama. Pamucuk: agama (krama) sané tuwi medal saking kayun, manah, sané ngupadi ngawéntenang, wiadin nggihang laksanané becik. Kéngin saking pakardin i janma padéwékan saking

‘tengahing angen’ i janma ngupadi becik. Inggih upaminnya: I Tampul ubuh ipun ludin ten madué nyama. Engkak-engkak ipun gelem, makudang-kudang rahina. Pisagannya, I Sendi madalem ipun, kandugi iju ipun mreténin I Tampul, nyimbuh ipun, wiadin ngrerehang balian jantos ipun I Tampul seger sakadi waluya jati.

Manahang titiang durung wénten munggah ring agama, parindikan punika.

“Yan I Tampul sakit, wenang I Sendi mreténin pisagannya; yan tan asapunika danda pati ipun. Manahang titiang, durung wénten munggah kayogiané asapunika ring tulis. Nanging kayogiané punika janten sampun wénten, nanging manut ‘agama kamanusan’. Inggih Tu, wet punika artiang titiang agama dumun. Agama kamanusan punika sakadi kalaksanang antuk I

Sendi marep ring I Tampul i wau, punika kamanah antuk titiang kéngin kawastanin, agama makadi becik.

Nanging agamané sané ketah sampun matulis ring lontar wiadin ring buku, boya ké wantah anggén mialangin, mangda i janma tan malaksana corah.

Upamipun Ratu! Yéning ring pempatané wénten I Tampul, katambakin mangda tan tulus ipun memargi nganginang, boya ké durung janten ipun pacang mawali ngauhang? Manawi ipun mlaib kelod, manawi kalér, yan asapunapi, ngempi ipun, mambelogang ring tengah!

Kéngin yan i janma tan malaksana corah, punika durung janten mateges malaksana becik.

Beneh kéto, Dé? Nang ja Dé, i janma soang-soang ngraksa Raksasa tekén

Déwa. Yan upama I Sendi ngulurin I Raksasa, manuukin tetagihan I Raksasané dogén, pedas ia kasambat jelé di gumin manuukin tetagihan, pedas ia murug

agama. Nah agamané né matulis di lontaré wiadin di bukuné, sing té jani ento anggon nambakin I Raksasa apang sing ia ndén nguragada.

Nanging yan jani iraga nambakin I Raksasa, kondén dadi mateges nglébin déwané di raga, kondén ento mateges bisa ngadakang melah.

Saja, Dé, oo Dé! Mapucuk melah pesan ada agama. Yan sing ada agama, mimi, pasliwer Raksasané, apa ia dadin jagaté? Nanging api sing pesu Raksasané upama, yan déwané di raga masih sing medal, apa ia isin jagaté? Sing Sunia?

“Yan dadi baan, I Raksasa apang sida baan nambakin, Déwané apang medal masih, mara ja melah, oo Dé?”

“Bik, Embok Putu; yan sida baan nambakin Raksasané dogén suba melah adanné. Ten kaliwat sukil Embok, yén nambakin Raksasa, lén ngaturin Déwané medal.”

“To, ba, ané sukil nyandang plajahin, yan sida baan napak ambat ia luungne?”

“Yakti Tu,” I Madé matur ring I Dayu. Aling aling Raksasané dados lengkungan dados cangkit, dados Pan Balangtambakin, yéning Déwané tan wénten ngraksa aling-aling punika, taler rug jagaté.’

I Dayu kenyem, “Sangkal buat dados rawesé, Embok? Ngiring sané tenggelan!”

“Yakti Tu,” asapunika masaur I Madé.

“Di pidan wénten murid titiangé dapet titiang ngeling ring kamaré padidiinipun. Titiang nakénin ipun.”

Raris I Madé nyatua, “Kenapa Gedé; kenapa adi ngeling?” raris i murid midartaang, “ Guru, mémén titiangé sané ipuan mrangkat nika! Aturanga tekén bapan titiangé nika!”

Titiang megat tutur ipun, “Yén beneh, sing aturanga méméné, kalihina né kurenané mrangkat!”

“Guru! Mémén titiangé sampung duang dasa bulan ten runguanga kén bapan titiangé; kalihina mamondok ring Benyah, mondokin...”

“Nah, nah, Gedé! Guru ngerti suba; mondokin dagang kul? Nah, lautang Gedé!”

“Nggih, ten taén titipina jinah; I Mémé ping kuda-kuda sampun mabesen, mangda nitipang jinah, anggén naur sakolahan taler ten wénten patitip!”

“Men nyén mayahin Gedé?”

“Yan ten polih i mémé madolan, kamen sandaanga nika. Ipuan mrangkat mémén titiangé, raris aturang nika!”

“Mimi, Déé! Kéto kéweh anaké makurenan, oo Dé? Ah, Dé yang buung! Kéto nyen yang. yang buung nah, Dé! Nah, Dé?”

I Made kabilbil ipun ring ati, “Pedas Embok Putu nyegguhang iraga matunangan suba!”

Ipun raris kenyem matur, “Buung ja Ida, Lamun joari!”

Sapuniki kaayonida joari matungkalikan tanggal, ngelong janji...?”

I Dayu sareng Mekel Putu sinarengan ica, “Éééé, liu bladbadan I Madéné, nemin I Madé...!”

Raris Mekel Putu nutungang, “Sangkal matungkalikan tanggal Dé?

Makresnapaksa cara Bali, keto naké!” (puput)

Dinané ento, sawatara jam 7 peteng, Pan Basur nongosin pianakné malajah di kamarné. Roko pilitanné ngalebus, sambila nusdus nyinyik. Nyinyik ento awakné cenik, sakéwala ngenitin pesan yén sengeta. Apa buin, Pan Basur tuara demen mabaju. Kulitné selem malengis, sujatiné suba tama tusuk dui, kosod medang, wiadin ancuk tuwed. Sangkana liu marawat tampak berung wiadin kelét.

I Wayan Kerti

Ia mula sayang pesan, tur jemet nongosin pianak malajah. Yadiastun, déwékné padidi tuara tamat sekolahan. Mén Basur nu marépotan di paoné

ngumbah perabot, ngimpesang sisan dadaran. Biasané, Mén Basur masi seleg nongosin pianakné malajah, sambilanga nyait canang. Gaginané Mén

Basur tuah dagang canang di peken Désa Kuncara Giri.

”Ning, idup di duur guminé sujatiné nak makejang palsu. Guminé suba wayah, ebekin sotaning i duratmaka. Bisaang ngaba raga, duaning tatujon hidupé ngalih suargan,” Pan Basur stata mapiteket tekén pianakné, Luh Manggali ané mara masekolah kelas dua SD di désané.

”Nggih, Bapa,” Luh Manggali masaut adéng, sambila iteh malajah. Ia mula anak cerik jemet tur nuut munyi. Tusing taén piwal tekén rerama, tur stata nuut panikan guruné di sekolah.

Kulawargané ené tuah ngelah pianak adiri, Luh Manggali doén. Kulawarga ené idup sadarana di désa, di wates kelod kangin Désa Kuncara Giri. Bapané tuara seken gegaéné. Sabilang wai ia pragat ngalas. Apa kadén aliha di tengah alasé. Asalan mapagang rahinan, ia mabekel canang ka tengah alasé. Dikénkénné, ia ngaba banten. Bisa telung wai ia mara malipetan mulihné. Apa kadén

gaéna, apa kadén pelajahina. Nyén kadén guruné? Krama désané tuara ada tatas nawang. Ané nawang gigis-gigis, tauh kurenanné, Mén Basur. Tuah ajak kurenanné ia nyak nuturang paundukanné. Paling aget ia mulih ngaba saang, sagét nyuh tuh, buah juet, di kén-kénné ngaba lakar jajukutan.

Pan Basur tuara pati magola di lingkunganné. Liu kramané ngarimikang. Di banjar malah ia suba kasepékang ulian taura nganutin dresta, tuara taén sangkep, tuara taen nedunin banjar, tuara taén masi ngopin di banjarané. Cutetné, ia mamongol dadi krama. Ento mawinan pangelingsir banjar kasungkemin baan kramané, ngulihang pipilné Pan Basur uli banjar adat.

”Ning, idup iragané lakar nepukin damé yening iraga sida menyahang i duratmaka. Matiang ia pang kanti tuara enu ada di duur guminé,” keto Pan Basur buin mapiteket tekén pianakné sedek dina lénan. Sebengné cara betara, miteketin pianakné apang nyak percaya.

”Sira sujatiné ané madan i duratmaka nika, Bapa?” Luh Manggali matakon polos tekén bapané, ulian saja-saja tuara nawang.

Pan Basur lantas nyekenang nyautin petakon pianakné, “I duratmaka ento sing ada lén tekén anaké ané sing nganutin cara papelajahan i raga, Ning. Anaké ané demen mamaling, ané demen nyuang pagelahan anak lacur cara i raga, ané demen medagang narkoba. Pokokné, anak ané tuara nganutin piputur anak lingsir. Anaké ané kakéto liu ada di kantor polisi. Ditu i duratmaka biasa urusa.”

Sebengné Pan Basur mamanes pesan, nyambatang raos polisi. Apa kadén ngeranaang ia gedeg mati tekén polisi? Koné, ipidan Pan Basur makabar taén maukum telung bulan ulian nuduk ulungan nyuh pisagané. Ia katara tur laporanga ka kantor polisi orahanga ngamaling. Ulian masalahé ento, ia kaukum. Ritatkala metaan di kantor polisi, ia koné pepes siksana apang nyak ngaku ngamaling. Minab, ento ngeranaang ia dukita pesan tekén polisi, tur stata nuturang polisi ento jelé ajak pianakné.

Minab ulian takut, apa ulian bakti tekén i rerama, Luh Manggali matakon cara anak setuju. ”Kén-kén carané, Pa? Polisiné nika nak makejang koné ngelah bedil.” Anaké cerik ané nu polos ento inguh ngenehang pitutur mémé bapané sabilang wai. Sing lemah, sing peteng, tuah ento ané tugesanga tekén mémé bapané. Tuah suarga lan neraka ané sai tuturanga.

Nanging, ia bingung. Sawiréh, di sekolah ia masi sabilang wai maan pitutur ané masingsalan ajak ané pirenga jumahné. Pitutur guruné di sekolah melah pesan, “Ning, i raga ten dadi ngelah keneh gedeg, iri ati, wiadin nyeléknyelékang anak lén. Napi ja papelajahané, uli dija ya asalné, kakén-kén ja warna kulitné, ia patuh ajak i raga. Patuh dadi jatma pakardin Widhi. Mawinan, ten dadi nyakitin sotaning maurip di duur guminé, napi buin amati-mati. Piteket guruné ento nu tingglis kainget baan Luh Manggali. Ento ngranaang ia nyansan bingung tur ragu.”

”Ning, nguda bengong?” Munyiné ento ngesyabang Luh Manggali. Ia lantas ngingetang déwék, tur nalektekang muan mémé bapané, ané negak di sampingné nguratiang dewekné. Nyambi menangin tegak, ia ngusap-usapang lima ka muanné padidi.

Buin bapané mamunyi, cara titah raja, ”Ning, i raga musti bani ngelawan i duratmaka! I raga ngelah senjata ané lebihan tekén ia.”

”Napi senjatané ané cagerang, Bapa?” polos pesan patakon anaké cerik ento, sakéwala masemu pang tatas nawang.

Bapané lantas masaut cemped, ”Bom. Bapa ngelah bom, Ning.”

Méméné ané uli tuni negak glayah-glayah, milu matutang munyin kurenanné, sambila ngusap-usap sirah pianakné.

”De sumandangsaya, Ning!” Méméné mapangidih tekén Luh Manggali. ”Nu inget pabesen anaké lingsir? Koné, yéning sida ngamatiang i duratmaka, ento ngeranaang i raga lakar nepukin suargan. Ditu lantas iraga lakar papagina ajak dedariné. Cening uli cenik ngedot pesan nagih nepukin

dedari,” kéto buin pitutur méméné. Ia nu masi iteh nyambil ngusap-usap sirah pianakné. Minab ento makecihna pitresnan i rerama ngajak i pianak.

”Mé, dija I Bapa maan bom? Gegaéné tuah ka tengah alasé, sagét ngaku ngelah bom.” Luh Manggali ngarengkeng ajak méméné.

Mén Basur lantas nyautin patakon pianakné, ”Ento I Bapa ngelah urusané. Minabang, anaké lingsir di padepokan tongosné malajah ané ngicénin.”

Mirengang raos méméné buka kéto, ia lantas inget tekén panikan anaké lingsir, ané stata magapgapan manisan ritatkala rauh ka umahné. Ida stata mapaica piteket, ”Yéning sida ben nelahang I duratmaka uli duur guminé, ento parilaksana ané luih. Nyén ja sida ngalaksananag, lakar nepukin suargan. Ditu ia lakar matemu ngajak dedari-dedari.” Piteket ida nak lingsir ento nyusup pesan, sangkan ia stata ngedotang matepuk ajak dedari.

Luh Manggali lantas teges masaut, ”Mémé, Bapa, tiang tatas mangkin. Tiang cumpu tekén piteket Mémé lan Bapa.” Uli cerik ia dot pesan matemu ngajak dedari, kanti maumur kutus tiban kondén mabukti. Minab, jani né galah ané melah lakar jalanina. Ia tuara buin percaya tekén piteket guruné di sekolah. Ia suba sayaga lakar mapagin dedari uli suargan.

Kedisé suba ngawit manyunyi, nguci matinggah di carang kayuné. Munyin siap kurungan masih makruyuk saling timbalin, makecihna dinané suba semeng. Sakéwala, angsengan guminé di Desa Kuncara Giri enu dingin pesan.

Damuhé paketéltél uli raab umahé. Keto masi don-don kayuné enu belusang damuh semeng. Luh Manggali suba tuara nyidaang ngidemang paningalan.

Sawatara jam 4 semeng, ia suba bangun. Ulian demen pesan kenehné lakar matemu ajak dedari, uli neruput gadang ia suba sayaga. Magenepan pesan bekel ané abana, duaning ia lakar luas joh.

Ritatkala suba pada sregep lan sayaga, ditu lantas ia luas ajak telu menek motor bébék lawas. Ia suba sayaga lakar ngepungin i duratmaka, apang sida nemu suarga, genah dedariné. Luh Manggali negak di tengah, kaapit mémé lan bapané. Pan Basur anteg sebeng ngilut gas motor apang énggal neked.

Sawatara jam 9.50, ia ajaka tatelu macelep ka kantor polisiné. Ia percaya kantor polisi ento tongosné i duratmaka makumpul. Ditu biasané i duratmaka kapertama kaurus.

Swagina di tongosé ento majalan kadi patuté. Liu kramané ané maurusan lan kaurus. Makejang pada iju baan urusan soang-soang. Ada ané ngenah ngurus SIM, ada ané ngaé surat tusing cacad ukum (SKCK), muah urusan ané lénan.

Sagét, nadak mamunyi, ”Dooooarrrr!” keras pesan jedaranné. Makejang sambeh, cara siap alih lubak. Pada malaib, nyelametang déwékné soang-soang. Ada ané nyerit. Ada mamunyi anak ngeling ulian takut. Ada masi ané nu wanén.

Anak cerik ané mabaju kuning, sirahné makrudung putih kateteh baan mémé bapané. Awakné telah maura getih, sakéwala ia selamat ulian katumpuk baan awak mémé bapané, ané suba benyah. Minab, ia selametang Widhi.

”Bangun, Dik. Bangun …!!!” Bapak Polisi ané wanén ento nyerit nyagjagin. Anaké cerik ento mautsaha bangun, tur majalan magaang nyambi ngeling sig-sigan. Ia lantas nylempoh ngalimuh. Pak Polisi gagéson pesan nyagjagin. Ia tuara ngitungin keselamatan dewekné, tuara ngenehang buin uger-uger ngurusin bom. Di SOP koné kasurat, polisi tuara kadadiang maakin tongos bom bunuh diri, duaning bisa nu ada sisan bom ané lakar makeplag ulian teteh bangkén terorisé. Maekin anak ané enu idup masi tuara kadadiang, duaning bisa masisa ada bom di awakné. Sakéwala, ia suba tuara rengu. Ia tuara ngitungang. Anaké cerik ento lantas kaplaibang ngejohin tongos bomé majedar.

”Nyén ya anaké cerik né? Ngudiang ia dadi nyak milu nyemak gaé kakéné?”

Pak Polisi érang pesan tekén unduké. Pak Polisi buin nyagjag, maekin bangkén terorisé. Selukina kantong celana ané muani, tas ané abana tekén anak luh ané suba mati. Tuara ada tepukina KTP-né. Pak Polisi bingung. Ia mautsaha apang bakatanga, nyén sujatiné kulawarga ané las kenehné bunuh ngulah pati. Ditu

lantas ia mabalik nyéksék aba-abaan anak cerik luh ento. Anaké cerik ento mara tawanga tekén Pak Polisi madan, Luh Manggali. Adané ento bakatanga, ulian nepuk tulisan di cawetné. Pak Polisi nebagin, ia sawatara mayusa kutus tiban.

Awakné tusing buin urab getih. Ia ajaka maubad tur ka opnama di rumah sakit. Aminggu suba ia kaopnama, Luh Manggali nyansan seger. Pak Polisi ento jemet, tur uratian pesan nongosin Luh Manggali di tongosné maubad. Sirahné Luh Manggali sai usu-usuina baan Pak Polisi. Makecihna, ia sayang tur uratian. Mara kéto, inget ia tekén parilaksana mémé bapané ritatkala mapitutur.

Sambila makeneh, Pak Polisi ngacep mapanglungsur ngamik-mik, ”Yéning buin pidan Luh Manggali kelih, dumadak sida dadi dokter, pilot, polisi, utawi guru. Ratu Betara, nawegang icén Luh Manggali pamargi becik mangda ipun nénten sekadi reraman ipunné. Reraman ipun, mameteng pikenohné, antuk iwang papelajahan. Ipun nénten ja manusa mautama, sakéwanten manusa mapikenoh sakadi baburon.”

Pak Polisi iteh ngamikmik, ”Akéh pisan kramané sané iwang maajah-ajah ring anak alitnyané, sané kapelajahin sampun masiosan ring kasujatian manutin agama. Dumogi Luh Manggali sida dados jatma istri sané suputri, tur mawiguna ring jagate,” Pak Polisi ngacep mapangelungsur.

I Wayan Kerti,

embas ring Sibetan, 29 Juni 1967. Swaginané dados guru bahasa Indonésia, ngawit warsa 1995 tugas ring SMP Negeri 1 Kubu, kantos mangkin kasudi dados guru ring SMP Negeri 1 Bebandem. Midep marariptan puisi, miwah satua cutet riantukan katuntut swaginan ipun dados guru. Rariptané akéhan mabasa Indonésia, sané kawedar ring média cetak lan média online.

puisi-puisi désak gedé setyaningsih

I Ubuh

Marginé ring banjar bayuh

Matilar suara aduh-aduh

Embas anaké alit ubuh

Kapiara antuk asah asih asuh

I Ubuh anak ubuh

Teka mara uling kauh

Makena bubu pipisné mapunduh

Nekaang pikolih I Ubuh tuyuh

Manis kenyemné I Ubuh

Demenané jukut pusuh

Sabilang semeng ngajeng kutuh

Makinyukan bibihné lemuh

I Ubuh nénten rusuh

I Ubuh nénten runyuh

I Ubuh nénten pangkuh

I Ubuh nénten kéwuh

I Ubuh setata kukuh

I Ubuh tusing taén ngiah -ngiuh

I Ubuh tusing ngelah musuh

I Ubuh ngalih sawitra aluh

Tutur di Sakepat

Dina Saniscara rahina purnama kapat

Sang Hyang Ratih mekenyem manis

Guminé galang ngelimurang manah

Jangkrik megending krik krik krik krik

Bapa negak di balé sakepat

Kedampingin kopi selem metimpal jaja

Mémé maekin bareng negak metimpuh

Pedaduanan ngortaang isin guminé jani

Ada bocok ada masi ané jegég

Ané kedas akéh kéto masi ané daki liu

Nyamané liang ada masi demen ental magulung

Madamar di langit parisolah maputer

Petengé ramé baan tutur reramané

Ring pasar akéh sampun anak mablanja

Ring sekolahan wénten ngawit anak malajah

Ring pasihé majéjér sampun turis majemuh

Mémé lan bapa bagia ngaraosang

Unduké ané jani di marcepada

Damuh panjak Ida sami polih paica

Kicén keselamatan miwah kerahayuan

Sebet

Bias pasih ngedékin semuné jani

Ombaké ngigelin uling tuni

Negak pedidi sepi dini

Ngetél yéh peningalané sebet hati

Dugas jukungé katengahing segara Bali

Semeton kuluwarga nyingakin sami

Biang merika sampun mamargi

Makejang majejer ngelapin ring pesisi

Mangkin kerasayang tan pabiang ring sisi

Nénten wénten ngalem tiang driki

Tiang sedih tan pabiang ring gumi

Ampura biang antuk kaiwangan tiang sami

Désak Gedé Setyaningsih, embas ring Batununggul, 3 Fébruari 1983. Mangkin dados kepala sekolah ring

SD Negeri 2 Pesinggahan. Magenah ring Jalan Kresna, Dusun Kanginan, Désa Pesinggahan.

Suba telu wai kurenané I Ripeg kehkeh di balén kubuné. Suba mabo kepeh-kepeh pengit. Awakné sayan gedé, basangné gedé, cara anak beteg. Dikénkéné ada buyung nemplok di awakné. Sakéwala I

Ripeg ondén masih ngelah keneh lakar nanem mayat kurenané totonan. Ibi poané, awak kurenané enu masih bawangina di ulun

atiné. Dikénkéné oyaga orahina bangun.

I Putu Supartika

Sisan getihé suba tuh di duur kebaté. Yén peteng, I Ripeg enu pules di betén magaleng janyuh. Panakné pulesanga di samping mayat méméné.

Kanti petang dina, buyungé nyansan liu ngeriung di kubuné I Ripeg.

Némpok di awakné Luh Ruti ané suba sayan kembung tur mebo pengit. Taluh buyung némplok di samping bibihné, di samping matané.

Disubané petang dina, I Ripeg mara makeneh yéning kurenané patuh cara dadongné ipidan: suba mati! Ri kala ainé ngawit séndéh kauh, ia nyemak tambah tur abana ka tegalé. Panakné pulesanga di samping mayat kurenané magulung aji kamben soklat.

Di samping taneman méméné ipidan I Ripeg ngaé bangbang. Ané jani tusing ada punyan ubi prau ngrembun ditu sawiréh umbin ubiné suba mabét. Ia nyikutang awakné ri kala ngaé bangbangé totonan.

Suud ngaé bangbang, ia malipetan ka kubuné. Kurenané gulunga aji kamben. Kenehné lakar nikul mayat kurenané ka tegalé, nanging ia tusing mampuh. Bayuné suba tuna. Mayat kurenané orosa uli baléné, makeblék di natah kubuné. Tanggun kambené ané di sirah mayat kurenané bungselanga. Tanggun kamben ané dibatisné lantas kedenga. Mayat kurenané orosa abana ka tegalé cara ngoros bangkén cicing. Di salantang marga nuju ka bangbangé, ngenah tampak mapaid lantang.

Neked di bangbangé, kamben ané anggona mungkus kurenané kelésanga satondéné clempunganga ka bangbangé. Dugasé mayaté totonan clempunganga, bangbangé cenikan. Awak kurenané suba ngembetin ané makada nyansan gedé.

I Ripeg tusing makeneh ngedénang bangbangé, sakéwala mayat kurenané totonan teltelanga apang nyidaang makejang macelep ka tengah bangbangé. Di subané awak kurenané makejang macelempung di tengah bangbangé, rurubina kamben, lantas mayaté totonan urugina aji tanah. Di duur tanemané totonan isinina batu pinaka panginget. Satondéné magedi uli tegalé, I Ripeg nlektekang taneman kurenané. Tusing asanina yéh matané ngembeng tur ngetél. Ia malipetan ka kubuné sambilanga ngusapin yéh paningalané.

Di balén kubuné, I Ripeg nepukin panakné enu pules leplep. Uli petang dina, kanti jani panakné ané adanina Luh Ayu Ginanti totonan tuah naar yéh titisan dogén. Sabilang semengan ia ngaé titisan anggona kanti maka sanja. Kéto masih buin mani semengané ia ngaé titisan lan yéhné baanga panakné.

Sing ada yéh nyonyo. Sing ada ané nyidaang ngenyonyoin. Dikénkéné, dugasné panakné sangkila, liman panakné totonan ngabag nyonyoné I Ripeg.

Tuah nyonyo cenik matuktuk selem denges kadirasa tusing malenting tur tusing lakar taén pesu yéh.

Yadiastun mawak muani, padidiana, I Ripeg seleg meting-meting panakné. Ia tusing bani ngalahin makelo yén ka tegalé. Dikénkéné yén ngalih maman sampi, panakné ajaka ka tegalé. Tatakina aji don biu, panakné ané mabungkus kamben pulesanga di pagedogan sampiné.

Dikénkéné panakné ngeling, dikénkéné degeng pules. Yén dinujuné ngarit, panaké masi ajaka ngarit, patuh masih cara biasané kebatina don biu lan I Ripeg ngarit di samping panakné.

Ulian sing nyidaang kija, sing nyidaang ka peken, sisan baasné nyansan medikang, gerangé masih suba nagih telah. Panakné masih kapah kayehanga. Di nujuné kayeh, panakné lakar ajaka, bedbeda aji kamben lan singala, tur ia mabekel beruk duang besik. Yéning lakar kayeh, ia majalan ngauhang, nuunin bukit tur nepukin paluh cenik. Yéhné masih cenik, dikénkéné yén masan terak, tuah magumblengan dogén duang gumblengan, ento buin tuah yéh ané miis uli parangané.

Yén masan janiné yéhné nu membah yadiastun cenik, ning, lan rikala ngencebang batis marasa makesyeng. Muan panakné sapsapina aji yéh, kéto masih lima lan batisné. I Ripeg tuah nyuginin muané, ngumbahin batis.

Dimulihné, beruké suba misi yéh, lan sisan-sisan yéhé lakar néltél di salantang marga ané liwatina. Di kubuné yéhé totonan biokanga di gentong paoné.

Nyansan wai, baasné I Ripeg nyansan medikang. Rikala baasné telah, tusing kakeneh baana lakar kénkénang ngayahin panakné jani. Tusing nyidaang ngaé titisan lan tusing nyidaang masih maang nyonyo.

Di kubuné tuah ada ubi prau, lan ubiné totonan ané jani ngawaregang basangné. Apang panakné tusing seduk, ubiné totonan pakpakanga tekén I Ripeg lantas sopina. Dikénkéné ubiné totonan lepéhanga tekén panakné ulian asané ngood.

Makelo-kelo panakné suba biasa naar ubi. Tuuhné nyansan ngedénang, lan panakné jani demen maplisahan di natahé. Taén masih panakné kalahina

ngalih maman sampi. Apang tusing kija-kija, panakné tekepina kranjang di tengah natahé tur di duurné tetehina aji batu. Ia lantas ngalih maman sampi kanti ka dauh bukité

Teka uli ngarit, dapetanga panakné suba bengul ulian ngeling tusing dingeha. Awakné masi telah urab buk. Sasukat ento ia tusing bani ngalain panakné magedi joh.

Kanti jani panakné suba bisa magaang, suba bisa naar ubi matambus padidiana, lan kanti suba bisa majalan. Disubané bisa majalan, panakné pepes ajaka ka tegalé. Di tegalé, bapané ngarit, panakné maplisahan di padangé.

Ulian demen maplisahan di gatelé, telah awak panakné berung. Awakné masih selem denges, bokné masawang barak lan gémpél. Bek misi kutu wiadin taluh kutu.

Pajalan idupné Luh Ayu Ginanti majalan cara biasané. Kadirasa sabilang wai tuah kéto-kéto dogén. Uli dedaran tuah naar ubi, yén sing kéto biu matambus ulian I Ripeg tusing taén ka peken, maplisahan di tegalé, milu najuk turus ubi prau, kayeh ka paluhé masangkil tur bapané ngandong beruk.

Nanging ada pajalan idupné ané paling pait ané asanina tekén Luh Ayu Ginanti lan I Ripeg. Dugasé mara muruk majalan, Luh Ayu Ginanti taén gelem sanget. Ibi sanjané ia enu biasa maképu di natahé, tur milu ngarit padang ka tegalé. Petengné, awakné Ayu Ginanti ngergerang, dingin. Tengah lemeng ia ané pules di baléné di samping bapané ipit. Unduké ento ngaénang I Ripeg bangun kapupungan. Baliina awak panakné kebus ngarepet.

Awak panakné kocokanga, tur disubané bangun ngeling jengker-jengker. Tengah lemengé ané sepi tan mua dadi ramé ulian lingné Ayu Ginanti. I Ripeg nyemakang panakné bawang tur uapanga di basang lan tangkahné. Gidatné masih uapina bawang.

Ling panakné masih tusing ilang. Panakné singala, ajaka ka natahné tengah lemengé totonan. Guminé peteng diet, di langité tusing ada bulan, tuah bintang pakenyinyit. Panakné anduh-anduha apang nyak mendep. Uli bibihné

kadingehan cara anak magending. Sakéwala gendingané totonan tusing nyidaang nyaingin munyin ling panakné.

Semengan, ri kala siapé samar-samar kadingehan pakaruyuk, mara lingné Ayu Ginanti ilang. Panesné enu keras, saka bedik Luh Ayu Ginanti ngidemang paningalan lan pules. Bangun rikala ainé mara endag, awakné enu masih panes.

I Ripeg buin nyemak bawang tur nguapin awak panakné. Tengainé panakné pakpakanga ubi, nanging lepéhanga. Baanga yéh, masih lepéhanga. Kanti guminé ngaremeng, kebus panakné masih tusing tuun-tuun. Uli semengan, ia ondén maan ka tegalé ngalih mamahan sampi. Sampiné masih suba ngembo ulian layah.

Guminé nyansan peteng sakadi karurubin kain selem, Luh Ayu Ginanti bangun babang ngeling jengker-jengker. Panakné depina di duur baléné ngeling. I Ripeg ngalih plosor biu di tegalé magabag-gabagan. Plosor biune totonan pejanga di basang panakné.

Mani semengané, I Ripeg ngetogang sisan baas. Ento krodokanga pejangina yéh. Yéhné totonan baanga panakné. Nanging tusing nyak gelekanga tekén panakné. Kanti telu wai, panes panakné masih tusing tuun-tuun.

Yadiapin panakné sakit, I Ripeg ngalawanin ka tegalé ngalih mamahan sampi. Panakné singala tur bedbeda aji kamben. I Ripeg nganggét don kayu, tastasanga tur baanga sampi.

Yéhé di gentongé masih suba telah. Panakné masih ajaka ka paluhé yadiastun kebusné tusing ilang-ilang. Sanjané, paksana panakné apang nyak naar yéh titisané. Nanging lepehanga.

Kanti limang dina panakné enu gelem, muané kembang tur suba layu. Dikénkéné nelép ané makada I Ripeg paling. Ia tusing nawang apa, tusing nawang kénkén carané ngubadin panakné totonan, sajabaning tuah ngurut aji bawang tur nganggon plosor biu.

Aminggu panakné enu gelem, I Ripeg suba pasrah. Yén di slameté seger, panakné lakar ajaka idup di duur guminé. Sakéwala yén jelék nasibé, panakné

lakar mati, ia masih tusing lakar maselselan. Ia masih makpakang panakné ubi

sabilang wai lan sopina yadiastun pamuputné lakar lepéhanga.

Dasa dina gelem, tepukina langit-langit bibih panaké suba putih. Cara ada didih di kolongané. Kolongan panakné seluka, ané makada ngutah. Isin utah panakné gadang. Bin maniné gelem panakné nyansan ilang, panesné nyansan nuunang. Tusing matuwuh telu wai, panakné jani suba seger.

Sekat ento, panakné tusing buin taén gelem. Sakéwala, uli cerik kanti jani suba bisa malaib, Luh Ayu Ginanti ondén nawang madan gumi lén sajabaning

I Ripeg, tegal, kubu, ubi, biu, paluh tur sampi. Ia sing taén makeneh yén ada

jelema lén di guminé, lénan tekén I Ripeg.

Uli bisa makukan Pa, kanti bisa memisuh ngorahang dakin teli nuutang munyiné I Ripeg rikala nepukin sampiné malincer di pagedogané, Luh Ayu Ginanti tuah nawang amontoan dogén. Tusing lebih! (masambung...)

Kamus kamus bali – indonesia

bo.yong.an n curian: malingé liu ngadep barang pencuri itu banyak menjual

barang curian

bra- n awalan yg menyatakan makna ‘suka’

bra.a.mah.an a suka makan;

bra.ge.deg.an a suka marah;

bra.ka.pa.kan a suka bicara besar;

bra.o.mong.an a suka berbicara

bra.cuk a banyak bicara dan tidak berujung pangkal;

ma.bra.cuk.an v berkata-kata tidak berujung pangkal

Brah.ma n Dewa Brahma

brah.ma.ca.ri n tidak melakukan hubungan kelamin selama menuntut ilmu pengetahuan/ ketuhanan; masa menuntut ilmu pengetahuan

Brah.man n Tuhan

brah.ma.na n salah satu golongan dl masyarakat Bali

brah.man.da n alam semesta ciptaan Tuhan

brah.man.ti.an a marah; bertabiat pemarah

bra.jag Jbr n ranjau panjang;

bra.jag.in v pasangi ranjau panjang;

bra.jag.ina v dipasanginya ranjau panjang;

ka.bra.jag.in v dipasangi ranjau panjang (oleh);

ma.bra.jag v terpasangi ranjau panjang;

mra.jag.in v memasangi ranjau panjang

brak.bak-bruk.buk a suara gelembunggelembung air ketika botol dicelupkan

ke dl air; ki suara yg tidak jelas

bra.kus v ringkus;

bra.kusa v diringkusnya;

ka.bra.kus v diringkus (oleh);

ma.bra.kus v teringkus;

mra.kus v meringkus

bra.ma.ra n kumbang

bra.ma.ra.wi.la.si.ta n seloka atau kakawin dg metrum - - - - U U U U U= 9

suku kata

bra.na n harta: arta harta kekayaan;

ma.bra.na v berharta

bra.nang v dg cara mendadak;

bra.nanga v dipaksa dg cara mendadak;

bra.nang.an n aduan ayam; sabung ayam (burung dara dsb) yg diadakan secara mendadak;

bra.nang.anga v diadu secara mendadak;

ma.bra.nang.an v mengadu ayam secara mendadak

bran.dal n 1 berandal; orang yg tidak menuruti peraturan yg berlaku; 2 pengacau; 3 a nakal;

bran.dal.an a bersifat berandalan

bra.ngas, bra.ngas.an n pemberang; pemarah; kasar (tt sikap);

ma.bra.ngas.an v melakukan sst dg sikap kasar atau marah

bra.nge.ngeng.an v berwibawa

brang.song n batu asah yg kasar

brang.song.an a bersifat kasar dan pemarah

brang.ti a marah;

brang.ti.ang v buat menjadi marah;

brang.ti.anga v dibuatnya marah;

brang.ti.nin v marahi;

brang.ti.nina v dimarahinya;

ka.brang.ti.ang v dibuat marah (oleh);

ka.brang.ti.nin v dimarahi (oleh);

mrang.ti.ang v membuat jadi marah; menyebabkan marah;

mrang.ti.nin v memarahi

bra.rak, ma.brak.rak.an v berhamburan; berserakan;

a.bra.rak num jumlahnya banyak;

bra.rak.ang v hamburkan; serakkan;

bra.rak.anga v dihamburkannya;

bra.rak.in v hamburi; seraki;

bra.rak.ina v dihamburinya; diserakinya;

ka.bra.rak.ang v dihamburkan (oleh); diserakkan (oleh);

ka.bra.rak.in v dihamburi (oleh); diseraki (oleh);

mra.rak.ang v menghamburkan; menyerakkan;

mra.rak.in v menghamburi; menyeraki;

pa.bra.rak v terhambur; terserak

bra.rut v angkut semua;

bra.ruta v diangkutnya semua;

ka.bra.rut v diangkut semua (oleh);

ma.bra.rut v terangkut semua;

mra.rut v mengangkut semua

bras.ta Ami v habis; ludes: sami – semua habis

bra.ta n 1 pantang; 2 puasa;

ma.bra.ta v berpantang; berpuasa: ia ~ naar béulian tusing ngelah pipis ia

berpantang makan daging krn tidak mempunyai uang;

be.bra.tan n pantangan; hal berpantang: jani suba tutug é sekarang sudah

selesai masa berpantangannya

Bra.ta.yud.ha n 1 kakawin yg dikarang oleh Mpu Sedah dan Mpu Panuluh; 2

peperangan antarkeluarga Barata

bra.wah n rawa-rawa

bra.ya n kerabat;

ma.bra.ya v berkerabat;

pa.bra.ya.an n hal kekerabatan; hubungan kerabat;

pa.bra.ya.ang v gunakan; berikan; dermakan untuk kepentingan hubungan kekerabatan

Bra.yut n tokoh dl cerita rakyat yg mempunyai banyak anak

bre.bed, ma.bre.bed.an a situasi yg sumpek, kacau, dan sibuk

bre.beh, ka.bre.beh.an 1 n kesusahan; 2v ditimpa wabah

bré.cé n suara-suara yg tidak menentu;

ma.bré.cé.an n suara (banyak) yg tidak menentu

1bre.cek a 1 rusak; buruk; jelek; tidak jelas (tt tulisan); 2 lecek; lusuh; kumal; berkerut-kerut (tt kertas);

bra.cek.ang v rusakkan; lecekkan;

bra.cek.anga v dirusakkannya; dilecekkannya;

ka.bra.cek v dirusak (oleh); dilecekkan (oleh);

ka.bra.cek.ang v dirusakkan (oleh); dilecekkan (oleh);

mra.cek.ang v merusakkan; melecekkan;

2bre.cek n bopeng: muané kena cacar mukanya bopeng kena penyakit cacar;

pa.bre.cek a banyak bopeng

bré.cét, ma.bré.cét.an v berceceran: baasé ~ beras itu berceceran;

bré.cét.ang v cecerkan;

bré.cét.anga v dicecerkannya;

bré.cét.in v ceceri; taburi (dg tidak teratur);

bré.cét.ina v dicecerinya; ditaburinya (dg tidak teratur);

ka.bré.cét.ang v dicecerkan (oleh);

ka.bré.cét.in v diceceri (oleh);

ma.bré.cét.an v tercecer;

mré.cét.ang v mencecerkan;

mré.cét.in v menceceri; manaburi (dg tidak teratur);

pa.bré.cét v berceceran: apa né ~ apa ini berceceran

bre.cet, pa.bre.cet a kecil-kecil

bre.cit → brenyit

bré.co a kacau;

ma.bré.co.an a kacau; buruk (tt suara, bunyi);

bré.ga n hantu

bre.gah a durhaka

bre.ga.la n buta kala; roh-roh halus sbg pengiring dewa

bré.gan → bréga

1bre.gas n salah satu alat pemotong rambut

2bre.gas n jukung bermesin

bre.ge.dél n bergedel

bre.ge.ja v direbut secara paksa;

bre.ge.ja.na v direbutnya secara paksa;

ka.bre.ge.ja v direbut secara paksa (oleh);

ma.bre.ge.ja v terebut secara paksa;

mre.ge.ja v merebut secara paksa

bre.gi.ding n tumbuhan yg buahnya merah bersayap;

mre.gi.ding v bersifat menyerupai bregiding (jauh dr sanak keluarga)

bre.gu n tumbuhan sj rotan

bre.gud n sikap yg kaku

bre.ja → bréco

bre.jog n kucing liar

bré.kat a sikap yg janggal; tidak serasi;

ma.bré.kat.an a sikap yg tidak serasi

brek.bek → bekbek

bre.kék n sj burung rawa

bre.kek → brekekek

bre.ke.kek v peluk dg kuat;

bre.ke.keka v dipeluknya dg kuat;

ka.bre.ke.kek v dipeluk dg kuat (oleh);

ma.bre.ke.kek v terpeluk dg kuat;

mre.ke.kek v memeluk dg kuat;

bre.kes v ikat dg kuat;

bre.kesa v diikatnya dg kuat;

bre.kes.ang v ikatkan dg kuat;

bre.kes.anga v diikatkannya dg kuat;

ka.bre.kes v diikat dg kuat (oleh);

ka.bre.kes.ang v diikatkan dg kuat (oleh);

ma.bre.kes v terikat dg kuat;

mre.kes v mengikat dg kuat;

mre.kes.ang v mengikatkan dg kuat

bre.kis n sj semut kecil-kecil di pohon kayu

bre.kut → bekut

bréng.béng a compang-camping: panganggoné pakaiannya compangcamping;

bréng.béng.ang v buat jadi compangcamping; compang-campingkan;

bréng.béng.anga v dibuatnya jadi compang-camping; dicompangcampingkannya;

ka.bréng.béng.ang v dibuat jadi compang-camping (oleh);

mréng.béng.ang v membuat jadi compang-camping

breng.beng a panas;

mreng.beng a panas: awaknébeng ~ badannya panas sekali

bre.ngés → brengos

breng.ga a sulit dibawa krn keadaannya kurang rapi

bre.ngik → brenyit

bréng.kat n selalu ada rintangan/hambatan

bre.ngos n cambang, janggut, dan kumis yg lebat;

bre.ngos.an a bercambang, berjanggut, dan berkumis lebat

bre.nya → bréco

bre.nyet, ma.bre.nyet.an a rusak; tidak rapi; kecil-kecil; kacau; jelek (tt

jahitan): jaitanné ~ jahitannya rusak, tidak rapi

bre.nyit, pa.bre.nyit a kelihatan kecil-kecil

bré.og → bréok

bré.ok, ma.bré.ok v tertumpah;

bré.ok.ang v tumpahkan; tuangkan;

bré.ok.anga v dituangkannya; ditumpahkannya;

bré.ok.in v tuangi; tumpahi;

bré.ok.ina v dituanginya; ditumpahinya;

ka.bré.ok.ang v dituangkan (oleh); ditumpahkan (oleh);

ka.bré.ok.in v dituangi (oleh); ditumpahi (oleh);

mré.ok.ang v menumpahkan; menuangkan;

mré.ok.in v menuangi; menumpahi;

pa.bré.ok v banyak tertumpah

bré.rét, ma.bré.rét.an v berceceran (tt air kencing, kotoran manusia, atau binatang);

bré.rét.ang v cecerkan;

bré.rét.anga v dicecerkannya;

bré.rét.in v ceceri;

bré.rét.ina v dicecerinya;

ka.bré.rét.ang v dicecerkan (oleh);

ka.bré.rét.in v diceceri (oleh);

mré.rét.ang v mencecerkan;

mré.rét.in v menceceri;

pa.bré.rét v tercecer

bré.rong n hantu menyerupai kucing, tikus, dsb yg suka mencuri uang

1brés.bés, pa.brés.bés a banyak robek di sana-sini: capilé ~ topi itu banyak robek di sana-sini

2brés.bés, ma.brés.bés.an v berceceran; berhamburan; bertaburan; brés.bés.ang v cecerkan; hamburkan; taburkan; brés.bés.anga v dicecerkannya; dihamburkannya; ditaburkannya; brés.bés.in v ceceri; hamburi;

brés.bés.ina v dicecerinya; dihamburinya; ditaburinya;

ka.brés.bés.ang v dicecerkan (oleh); dihamburkan (oleh);

ka.brés.bés.in v dicecerinya (oleh); dihamburi (oleh); ditaburi (oleh);

ma.brés.bés.an v tercecer; terhambur; tertabur; mrés.bés v mencecer (benda yg berbutirbutir, spt beras, nasi, kacang);

terhambur;

mrés.bés.ang v mencecerkan; menghamburkan; menaburkan;

mrés.bés.in v menceceri; menghamburi; menaburi;

pa.brés.bés v tercecer di sana-sini; terhambur di sana-sini

bré.sé,a bré.sé num banyak sekali: panakné ~ anaknya banyak sekali

bre.sek v desak; paksa;

bre.seka v didesaknya; dipaksanya: I Madé ~ apang nyak ngantén I Made dipaksanya/ didesaknya agar mau menikah;

bre.sek.ang v paksakan; desakkan;

bre.sek.anga v dipaksakannya; didesakkannya;

bre.sek.in v desak;

bre.sek.ina v didesaknya;

ka.bre.sek v didesak (oleh);

ka.bre.sek.ang v dipaksakan (oleh); didesakkan (oleh);

ka.bre.sek.in v didesak (oleh);

ma.bre.sek v didesak; dipaksa;

mre.sek v mendesak; memaksa;

mre.sek.ang v mendesakkan; memaksakan;

mre.sek.in v mendesak

bre.set n sj burung sawah

bre.sih a bersih; suci;

bre.sih.ang v bersihkan;

bre.sih.anga v dibersihkannya;

bre.sih.in v bersihkan: ~ malu pasirepanné mara sirep bersihkan dulu

tempat tidur itu baru tidur;

bre.sih.ina v dibersihkannya;

ka.bre.sih.ang v dibersihkan (oleh);

ka.bre.sih.in v dibersihkan (oleh);

ma.bre.sih v 1 menyucikan diri; 2 menyapu dsb agar bersih;

ma.bre.sih-bre.sih v berbenah; memberes-bereskan; merapikan;

membersihkan (tt rumah, pekarangan, perabotan);

mre.sih.ang v membersihkan;

mre.sih.in v membersihkan;

pa.bre.sih.an n penyucian

bré.wok n cambang; cambang bauk

(masambung...)

Catetan: Kaambil saking Kamus Bali-Indonésia Édisi Ke-3 sané kamedalang

antuk Balai Bahasa Bali