XIX „Дньовка” (2016

XIX „ДНЬОВКА” 26. НОВЕМБЕР 2016. РОКУ

ДОМ КУЛТУРИ РУСКИ КЕРЕСТУР

Водителє Пактовци –Яким Винаї Цумай и Дарко Папуґа

Марина Роман и Николина Шарич Мария Римар, Давид Салаґ, Тамара Салаґ и Михаїл Римар

Славко Колошняї и Мирко Пап Роберт Загорянски

ЖАРКО ОСТОЇЧ

ПОШОЛ БИМ

Пошол бим, дзешка далєко нє пошол бим лєгко, aлє пошол бим, даґдзе дзе ше вилїчим.

Кед чловек завязани на жеми и кед го муча сто проблеми теди вон цали час швету дава свой найсмутнєйши глас.

Одплївал бим по рики, як лебед били и у природи бим нашол себе лїки. Одплївал бим, як лебед мили.

Одлєцел бим як соловей по широким нєбе лєм най найдзем лєпше место за себе. Даґдзе дзе у цмоти гвизди швица, гей, одлєцел бим, як птица.

Витворели би ше ми сни и красши би ми були днї. Лєм кед бим могол пойсц, и до даяких лєпших часох войсц.

Михаил Рамач и Жарко Остоїч

САША САБАДОШ

Уж ше анї нє намагам поинформовац ше подробнєйше о „свирки” на яку мам пойсц тераз уж по якейшик длужносци цо сом ю без даякей векшей потреби сам себе давен-давно наруцел. Можем ше уж ставяц без обаваня хтори странски гити буду на репертоаре и хтори вилїзани и давно чути шаблони буду хасновац у своїх нїби цалком нових ми „авторских” шпиванкох, плоду якогошик компликованого и математично точного компютерского алґоритму. Вельо ми вецей часу одбера думка на тото нєзвичайне чувство хторе до лопова урезує перфектно дизайнована талпа блїщацей седемстоевровей патики, тей всемогутнєй и нєзастановлївей сили цо слабенькей штернацрочней ножочки дава нєпреривно жадану моц указац абсолутну одданосц чупору на благо припитим живим труплє звалєним на асфалту слабо ошвиценей, полупериферней Драпшиновей улїчки. Стампедо пубертетскей жажди за креву лїковито ми указує архипитанє: Чом сом, до чорта, рушел сам до того преклятого сокаку? Чом ше купам у чарней самоти и безнадїйней позициї баладичней „ме манґавла, дає” любови? Чом, до пшамаца, нє уходзим нїґда до тей маси правдивих любовох цо сцерпезлїво чека прейґ драги, у сушедней улїчки, у валалє походзеня, гоч дзе, лєм нє там дзе ше ю глєдало? Пребачиш ми, озда, же сом це цали тот час тримал на оку своїм, припатрал ше з дистанци на божествену твою метаморфозу зоз квазибунтовней панк принцези до цалком автентичней, милей, ґрациозней и конвенционалней нашлїднїци престолу декадентного князовства фалшивого моралу, видуманей традициї и штучного шмиху, а ту ши, знїмам калап, маестрално виучела ремесло. Од тей ме яви млосц баржей обнїма лєм од факту же и я ту дзешка, же и я махам, шмишкам ше у корчу и, поправдзе, уживам у тим шицким. Вояк сом, ма дарлин’, вояк сом своєй животней драги на яку бим, зоз своїм прешлим мозґом, патрел з подполним презреньом. Чудно звучи, алє гей, пристал бим на шицко тераз, лєм же бим остал ту дзешка, пристал бим буц аж и комични дружба на якейшик фолклорней свадзби, можебуц аж и твоєй.

МИХАИЛ РАМАЧ

Себастиян Надь

НЄ СТОЙ

Зохаб набок подли чувства Хвильково ци барз допиваю Шпиванка и танєц це умиря Вибавя це од смутку и жалю

Огляднї ше коло себе Влап погляд хтори идзе на тебе Кед твойо шерцо задурка моцнєйше Ослухнї же чи то гевто найлєпше.

Нє стой у месце Даґдзе чека це дахто Даґдзе чека це щесце Лєбо придзе нєволане

Нє стой у месце Щиро нашмей дакого Дахто нашмеє це Нєт красше од того.

КРИСТИНА И ЕКИПА

БЕЛАВООКИ

Вше кед це стретнєм, ти погляд скриваш. Патриш инкадзи, дзе нєт нїкого. А я би видзиц очи нємирни твойо красши од нєба, нєба белавого.

Видзиц бим ошмих у тих очох и чуц чи шерцо ци затрепеци.

реф:

Белавооки, мой мили, а далєки, так бим це видзиц, ту коло себе. А як це врациц кед з очми сцекаш и лєташ?

И нєшка чекам стретнуце з тобу и же ме дотхнє твой ошмих благи. Та облапени, з нову надїю вєдно рушиме на красшу драгу.

Видзиц бим ошмих у тих очох и чуц чи шерцо ци затрепеци.

реф.

(Текст: Мелания Римар) Мирко Пап

I награда, Ивана Медєши II награда, Емилия Чизмар III награда, Адриян Колошняї

У голу Дома култури под час „Дньовки” була нєзвичайна вистава – там дзе мали буц виложени фотоґрафиї, орґанизаторе положели празни рамики, бо на Пактов конкурс за авторски фотоґрафиї з тему „Бунт” того року сцигли лєм осем фотоґрафиї трох авторох. Пре таке слабе одволанє, орґанизаторе на тот способ виражели свой „бунт”. З осем фотоґрафийох хтори сцигли, Пакт наградзел три, та першу награду за фотоґрафию достала Ивана Медєши з Керестура, другу Емилия Чизмар з Коцура, а трецу Адриян Колошняї з Керестура. Нащивителє „Дньовки” у голу могли поопатрац виставу „Приватни живот Руснацох” автора Саши Сабадоша зоз Зомбора. Афтер бул у дискотеки „Амадеус”.