MUYERES DEL LLAGAR

LLAGAR FRUTOS - VILLAVICIOSA

Emilse Palacio Cayado nació en Bedriñana (Villaviciosa) en 1945 y, dende pequeña, crióse xunta un llagar nel qu’el so güelu y so pa faíen sidre casero y onde ayudaba a pañar mazana. Darréu, casó con Gustavo Costales, ñetu del fundaor de Sidra Frutos, que garró les riendes del negociu en 1989, lo que-y fixo vivir bien de cerca’l díi ente díi nel llagar, echando un gabitu no que pudiera.

¿Cuála ye la so primer alcordanza d’un llagar? Recuérdolo de tola vida porque na mio casa había un llagar onde mayaben el mio güelu y mio pa. Teníemos pumarada y nunca faltaba la sidre en casa. Dmepués casé y, anque de primeres vivimos en Xixón, cuando se fixo cargu’l mio home de Sidra Frutos, vinimos vivir xunta’l llagar y equí siguimos.

¿En qué ayudaba? Pos diba a pañar mazana, taba ellí cuando corchaben... ayudaba en tolo que se podía. Alcuérdome de dir a pañar mazanes incluso xarazando. Tengo l’alcordanza de mio pa y el mio güelu apiertando y cortando el llagar. Dempués, la magaya dábemosla a les vaques. El mio güelu faía montones de mazanes na pumarada, yá qu’al paecer calteníense meyor. D’aquella había mazanes fasta avientu.

Quiciabes se perdió esa tradición por faer sidra casero. Ye verdá qu’enantes cuasique tol mundiu tenía pumaraes y había munchos más llagares nes cases. Caún ellaboraba la so propia sidre. Yera una sidre con un saborgu más fuerte porque la dexaben reposar muncho primero de corchar. A min, gústame más la sidre d’agora, que ye más suavino. Eso sí, la sidre dulce nunca me dio más por ella. Esfruto tomando una botella sidre, porque nun me gusta nin el vinu nin los refrescos. Yá de pequeña paez ser que me gustaba, alcuérdome que la mio güela paterna, que yera de San Xusto, “reñíamos” porque nun quería que tan piqueños bebiéremos un vasín de sidre cola comida. Poníase mala cuando mos vía.

Dempués de tantos años, ¿cómo vió evolucionar el seutor? El trabayu nel llagar siempres foi bien duru, pero agora hai máquines que lo faen más llevaderu. Enantes yera tou manual, recuerdo coyer palaes pa echar la mazana a la cinta pa mayar. Camudó la forma trabayar y los materiales, inda recuerdo les caxes de madera, que pesaben enforma y había que cargales a pulsu. Esi trabayu nun yera pa muyeres por mor de la desixencia física que requería.

¿Qué balance fai de la so vida nel llagar? Cuando’l mio home pasó de trabayar col so pa a quedase col llagar y vinimos a vivir equí, llóxicamente al tenelo al llau, echaba muncho más tiempu. Cuando se mayaba había munchísimu trabayu, yo ayudaba no que podía. Tuvimos la suerte de qu’el nuesu fíu, que ye’l que s’encarga agora d’él, nació nel llagar, vívelo y gústa-y muncho esti mundiu; y si precisa ayuda equí tamos pa echar un gabitu no que se pueda.

Febreru 2020 ¿Cómo ve’l futuru de la sidre? El futuru depende de la mocedá, que-y guste beber sidre. Enantes, bebíase la sidra d’una manera distinto y la xente tenía otra manera de rellacionase, echaben hores nuna sidrería tomando inclusive caxes, mentes qu’agora la xente camudó la forma consumilo, too ye muncho más rápido, tomen una botella y colen. Testu: Víctor Escandón.